JINGHPAW KASA

SHARE SHAGAN DR. N LAM AWNG A LABAU

2012-02-14T10:19:00.003+08:00

1743 NING LADU HKRUM AI VALENTINE NINGHTOI

2012-02-14T10:05:00.002+08:00

Tsaw ra kamhpa ai myutsaw hpu nau ni;

Dai ni gaw 1743 ning ladu hkrum ai Valentine Ninghtoi rai nga ai majaw makam masham lam hte seng nna asak apnawng wa ai shabrang kasha Valentinus hpe shakawn kungdawn ai nhtoi kaw shanglawm myit dum lawm ga, ngu nna saw shaga dat ai.

Roma mare kaw Christian hte seng nna mungga htawn tsun ai ni hpe si ari dam jaw nga ai ten hta Valentinus gaw n hkrit n tsang Karai Kasang a mungga htawn tsun hkawm ai shaloi, Emperor Claudius II gaw shi hpe rim nna htawng jahkrat dat ai. Dai ni kaw nna Karai Kasang a lam mungga n htawn na sai lam ga sadi jaw ai rai yang, si ari dam jaw tawn ai kaw na shalawt dat na, nga nna tsun ai shaloi, Valentinus gaw, shi asak naw ahkrung nga dingsa gaw matut hkaw tsun na lam mahtai jaw wu ai majaw shi hpe si ari dam jaw dat sai.

Valentinus gaw shi hpe sat na matu la nga ai ten hta, myi kyaw ai bawngdung a kasha numsha hte hku hkau tsaw ra hkat ai majaw shi hpe sumtsaw laika ka ya ai kaw "From Your Valentine" nga nna hpungdim dat ai ta masat hte ka jaw kau da wu ai.

AD 269 February 14 ya shani Valentinus hpe si ari jaw dat sai. Shi a moi mang hpe Roma mare na Praxedes church wang kata kaw lup tawn ma ai. Lup wa a makau kaw, "PINK ALMOND TREE" langai hkai tawn ma ai. Yaw shada ai gaw prat chyanat pu tsawm nga ai sumtsaw nampan masat dingsat rat u ga, nga ai.

Dai hpang 50 ning daram na wa ai shaloi Christian hte seng nna mungga nmai htawn ai lam tawn da ai tara gaw angwi ngwi prai mat wa sai rai nna, Valentinus shingdu lam mung bai dan dawng wa sai. Valentinus asak ap nawng ai nhtoi hpe makam masham lam hku nna masat dingsat galaw wa ai rai yang, aten na wa ai shaloi SUMTSAW NHTOI hku nna mungkan ting hta chyam bra wa sai. Ginra hta hkan nna grup yin a ra sharawng ai hkrang shapraw la nna SUMTSAW NHTOI hpe hkrang amyu myu hku galaw wa nga ma ai hpe mu lu ai.

Anhte Christian ni a matu gaw makam masham yu jut hku nna grau htap htuk ai hkrang hpe jawm jahtuk akyu jashawn sa wa ai gaw madung rai na re. Myutsaw hpu nau ni yawng dai ni na Valentine Poi hta ngang kang ai tsaw ra shawang myit hte kabu gara shang lawm lu mu ga, ngu nna shakram dat ai law.

JJ Lum Dau

SAWN MU AI

2012-02-13T21:21:00.002+08:00

Sum tsan myi myit hte tau hkrau mu yu ai shaloi myen a pahkam kaba hpe ngai hku nna ndai hku myit mu yu nga nngai. teng myen hte mung masa bawngban shangut ga nga yang myen gaw annau ni hpe Tara shang ra lata poi shang nna Rapdaw kaw Tara masing kata kaw yawng hte bawngban shangut yang she mung masa bawngban ai lam jaw ai hku mai bawng shangut na re nga tsun wa chye ai hta annau ni hpe mung ra lata poi shang ra ai,ra lata poi shang na matu, simsa lam la ra ai.dai laknak simsa lam shawng la ngut ai hpang she gangwi ra ai hpe hparan la nna 2015 ra lata poi hpang e she rapdaw kaw hkut hkut nai nai chyawm bawngban hparan shangut la ga nga chying hkraw galu hkra ten hpe garawt na re dai ni na bawngban ai mung masa lam hpe mahtai jaw wa chye ai. 2015 du hkra naw la shangun na masa pru nga ai.

Rai sa dai ni na bawngban ai hpawng hta kadai dawdan hparan ya na ta? Kadai lapran Slg tai ya nna sang lang dawdan mahtai jaw na ta? Kadai tara Slg tai nna bawngban hpyi shaw ai hpe dawdan hparan shangut ya na ta? Dai ni na bawngban ai hta lapran Slg gaw dung nan dung ra ai ngu mu ai hpa majaw nga yang myen dawdan ai hku sha galaw hparan sa na kun?dai hku rai yang moi mung bawngban hpyi wa saga ai. Nang tsun ai n'dai hku, ngai ra ai n'dai hku nga nang tsun ngai tsun rai ten shama nna mahtai pru wa na lam nnga ai. Hpa majaw annau ni ra ai hpe jaw mayu yang gaw shaning (60) ning hkawt hpyi gasat wa saga ai n'rai ni? Hpa rai duhka hkam nna sutgan ginlut let sutgan kata masha hpyen yen tsin yam masha hku madu lu lawm ai lam yawng sum machyi hkam nna dubru dubra garen gari maling mala kaw naw jamjau hkam ra na rai ta? Dudaw saihkaw asak arang kaba naw bang ra na ta? Lapran Slg dawdan hparan ya ai masha n'nga yang gaw dai ni na bawngban ai lam ngut na n're hte, myen woi ka ai hta annau ni mung poi lum hkra sa shang n'gun jaw lawm ai, shawa ga sa ai hte bung nga ai.padung n'mu ai myidi shim masawp amya hkawm ai hte she bung nga sam ai.

Panglung ga sadi hpe kalang bai gram ra sai nga, prat madang n'nga mat sai nga myen a simsa Slg langai tsun wa sai. Rai yang panglung ga sadi gram mai na kun? Ji woi jiwa ni myit hkrum let bawngban shagrin tawn ai ga sadi sharun kau nna kalang bai mai gram na kun? Panglung ga sadi laika lamang hti hkum kara madaw shut nna kara madaw naw gram ra nga ta? Panglung ga sadi ningnan bai la ra sai nga mai na kun? Panglung ga sadi a jaw she myen hte annau ni pawng wa ai re. Kadai mung kade urawng udat kaw pyaw nga yang kade mai na ta? Panglung ga sadi a jaw myen hte shanglawt rau la ai hta shut kaba langai mi naw nga ai dai gaw myen mungdan ngu shamying la kau ai. Dai ten kaw na munghpawm bawsang mungdan ngu shamying la yang dai ni n'dai daran mung arang n'bang ra na sai. Ya gaw mungkan na chye ai gaw myen mungdan ngu ai hku sha chye ai, anhte mungdan kata kaw kara hku byin ai bawsang law law nga ai, bawsang ni hte rau shanglawt chyum la majaw myen mungdan byin wa ai lam kadai nchye ai. Kachin ngu ai mung ya she chye wa ai re, dai majaw dai ni kalang bai n'sum machyi na hku ladat tam ra ai.myen a ga hkrai la madat nmai sai. Lapran Slg tawn nna lapran Slg ni ga she madat nna bawngban sa wa yang kaja na re. Dai ni kade bawngban tim udi gaw langai sha rai na re. Hpang jahtum gaw myen dawdan ai hta hkan sa ra na sha re.

Ya ten gaw matut gasat sha mai sai, lapran Slg nga wa ai shani she annau ni ra ai mahtai pru wa na re. Madu sari sadang hte dung lahkum hta ngang ngang dung nga yang she kaja na re. Myen a le waw tsun nga ai hpe myit shang sha nga na malai kara hku gasat nna padang dip la lu na hpe she myit nga yang kaja na re. Panglung lam hpe mung ntsun ai sha tinang mungdan hpe tinang nan kade kata mung ntaw ra ai awmdawm shanglawt ai hku nga saga.bawngban sara mung nra sai. Madu ra hku nga saga law.
Uhku a masa si la gawm she rai nga ai.
Haloi mung gasat ga.

Baren Numraw

MANGSHI JINGHPAW MUNGKAN MANAU HTE LABAU

2012-02-13T16:16:00.003+08:00

1. Mungkan Manau ngu ai lachyum:- Manau ngu ai gaw, moi prat hta, Marip Duwa dum ai manau, Nhkum Duwa dum ai manau, Maran Duwa dum ai manau nga nna, Jinghpaw du magam ni a manau hku she byin hpang wa sai. Dai gaw Manau Poi a madu ni rai nga ai. Manau poi hta, Jaiwa wa gaw ahkyak dik ai hpaji ninghkrin wa rai nga ai. Shi gaw manau madu n rai, magam gun hku rai nga ai. Moi prat hta manau langai dum yang, mayu dama kahpu kanau, makyin jinghku, rau dung rau nga yawng sa du zup nang ai majaw, poi zawn byin wa ai lam re. Moi prat hta manau dum ai lam a yaw shada ai lam gaw, sutgan lu su nna dum yang, Sut Manau; du salang si nna dum yang, Ju Manau; kashu kasha n lu nna dum yang, Shakawng Manau; majan rawt na rai yang, Larawt Dinghtan Manau; majan dang nna wa jang, Padang Manau; dum nta kahtawng buga htingbren pru na rai yang, Kumran Manau; ga li ga law hkat ai hpe bai htingram yang, Htingram Manau; mare nnan, dum nta nnan dingshawn shang yang, Hpundu Dit Manau nga nna shamying let dum lai wa sai re.

Ya prat hta, marai langai hkrai sha lit la manau galaw na n loi sai sha n-ga, prat masa galai shai wa ai hta hkan nna ninggawn shawa galaw ai manau hkrang byin tai wa sai. Shawng nnan shawa manau dum woi ai gaw, 1918 ning daram kaw nna English Asuya ni woi galaw sai re. Dai hpe Durbar Manau ngu shamying lai wa sai. Durbar ngu ai gaw, Kala ga she re. English gaw, India hpe shawng shaning tsa lam up sha ai hpang she Myen hte Jinghpaw ni hpe matut up sha ai re. India masha ni hpe uphkang loi na matu galaw ai zuphpawng hpe Durbar ngu shamying ai. Dai ga si anhte hpang de htawt du wa ai re. Jinghpaw mung na Durbar Manau hpe shara shagu galaw lai wa sai. Dai gaw Jinghpaw ni kaw na mayam ni hpe dat kau lu na matu hte, English Asuya a ntsa Jinghpaw ni sadi dung nga lu na hpe yaw shada ai lam re.

1945 ning kaw nna gaw, Japan dang ai manau; 1948 ning kaw nna gaw, shanglawt lu ai manau; Jinghpaw Mungdaw Manau; 1962 ning kaw nna, Shanglawt Mawhke Hka Manau, Rawt Malan Manau; 1976-77 ni hta gaw Catholic hte Hkalup ni a Jubellee Manau ni nga wa sai. Hkristan manau rai nga ai. 2001-2002 ning hta gaw, Mali Nmai Zup Myitkyina Majoi Ninggawn Hkumra Manau ngu ai hpe bai shalat jat sai. Moi prat Mali Hku Majoi, Chyai Hku Majoi, Hkrang Hku Majoi ngu tsun hkai hkrat wa ai labau hpe mahta nna Myitkyina Majoi ngu ai lam rai nga ai.

Miwa hkran na Jinghpaw ni galaw ai manau chyawm gaw, jasat loi mi shai mat wa sai. 1948 ning kaw nna Mao Zedong wa communist mungdan woi shagreng wa yang, makam masham hte htunghking yawng pat hkum kau ai majaw, Miwa hkran ni manau hkringhtawng loi matsan mat sai. Dai hta n-ga, Jinghpaw mung na ni hte matut mahkai pru pru shang shang mung n mai galaw, Jinghpaw mung na ni mung Hkristan she bai law mat wa ai majaw, grau yak mat sai. 1985 ning daram kaw nna she Miwa ni a mungmasa bai galai shai wa nna, amyu kaji ni a htunghking hpe n-gun bai jaw wa sai. Hka jaw poi, Gawnyen poi ni hkik hkam wa yang, Jinghpaw ni gaw manau dum na ahkang hpyi sai. Raitim manau ngu ai gaw, grai hkik ai poi re majaw, Sam ni, Balawng ni manawn nna Miwa Asuya hpe n jaw ai hku sakse hkam ma ai. Sam hte Balawng ni gaw, moi Jinghpaw ni e majoi joi mi azat gasat hkrum ai ni rai nga ma ai.
Shing rai tsam mari ahkang lu nna manau dum wa sai raitim, nat jaw manau hku sha dum nga ma ai. Manau shadung maka pyi n chye mat sai raitim, Shadan Krung buga na salang langai mi moi na manau shadung dingsa hpe Miwa Asuya n mu tam hkra nta npu ngaudang kaw shawn makoi da ai kaw na bai yu jahtuk ka la ai shadung maka she rai malu ai. Ya daini Myitkyina na manau shadung hpe grai yu sharawng ma ai raitim, Miwa Asuya kaw kalang mi register galaw kau sai majaw, yak taw nga malu ai.

Shanglawt hte Myen 17 ning gasat gala jahkring ai laman, Sutdu Yup Zau Hkawng a shakut shaja ai marang e, Miwa hkran na Jinghpaw ni hte Jinghpaw mung na Jinghpaw ni rau kahtawng langai zawn kanawn mazum lu wa ai lam rai nga sai. Raitim Miwa hkran na manau gaw, Gawnyen manau hku ang taw nga ai. “Gawnyen” ngu ai gaw, Miwa ni a newyear festival rai nga ai. Dai ten hta mungdan ting poi ladaw, poi shata masat da nga malu ai. Gawnyen manau ngu nna chyawm gaw, mying n jaw tawn ai.

Myitkyina ga na manau gaw, ja sutgan hte ahkaw ahkang madang grit yawm tim, myit masa, lachyum masa madang tsaw nga ai hpe Miwa hkran ni sawk hkaja la masai. Shanhte a kata e gaw, Miwa Asuya budget hte galaw ai re majaw, n-gun grai rawng ai. Ya gaw Miwa mung, Yunnan Province, Saphkung madu uphkang mungdaw hta shaning shagu, mare shagu, kahtawng shagu manau dum ma ai. Jinghpaw mung de gaw manau kalang dum lu na grai yak tim, Miwa hkran de gaw shaning shagu, yawm dik manau poi manga kru daram nga ai. Kahtawng ningchyawng hkan gaw, kahtawng masha ni a atsam hte ji nat jaw jau manau hku dum ai. Ginwang ni hta gaw Asuya atsam hte Htunghking Manau ngu ai hku dum ai. Mangshi gaw Saphkung madu Uphkang Mungdaw a mare daju “City of Dehong Prefecture” rai nga ai majaw, lahkawng ning hta kalang dum ai. Dai hpe “Mungkan Manau” ngu shamying ai. Mungkan Manau gaw, 2010 ning kaw nna she hpaw hpang ai re majaw, 2012 ning na manau gaw, lahkawng lang ngu na Mungkan Manau rai nga ai.

Saphkung mungdaw ngu ai gaw, Yunnan mungdaw kaba (Province) kata na amyu sha (Ethnic) hpe madung tawn ai madu uphkang mungdaw (Prefecture) langai rai nga ai. Saphkung mungdaw hpe Jinghpaw hte Sam ni a mungdaw hku masat da ma ai. Miwa mung na Jinghposu ngu ai hta, Jinghpaw, Maru, Lashi, Zi ni lawm ai. Lisu hpe Jinghposu hta n shalawm ai sha kaga laksan amyu langai hku masat ma ai. Nung-Rawang ni mung Saphkung mungdaw kata e n nga ai majaw Jingosu hta n shalawm ai. Saphkung hka hku maga she nga ai majaw, dai de kaga madu uphkang mungdaw hku masat da ya ma ai.

Saphkung mungdaw kata hta (1) Mangshi (Lusi) Ginwang, (2) Ruili (Shweli) Ginwang, (3) Lungshawn (Janghkawng) Ginwang, (4) Yinjiang Ginwang hte (5) Lengho Ginwang nga nna ginwang kaba manga garan da ai. Manau grau law ai ginwang gaw, Yinjiang Ginwang hte Lungshawn Ginwang rai nga ai. Yinjiang Ginwang kata e, Yinjiang pa (Hpinyang pa) hta lai nna, Nhkum Krung, Shadan Krung hte Janshi Krung ngu ai buga kaba masum nga ai. Lai sai shi ning laman hta, Nhkum Krung e manau kaba galaw ai garai n mu ai. Shadan Krung hte Janshi Krung gaw manau poi kaba lahkawng lang hpra galaw masai. Nhkum Krung hte Shadan Krung gaw Jinghpaw ga shaga ai buga rai nna, Janshi Krung gaw, Zaiwa hkrai hpring ai buga re.

Saphkung Mungdaw kata na ginwang kaba manga hta, Mangshi gaw madu uphkang mungdaw mare daju rai nna, Janghkawng (Lungshawn) gaw Jinghpaw htunghking mare daju rai nga ai.Lengho Ginwang gaw, dingdung maga jahtum ai ginwang rai nhtawm, Janshi Krung a sinpraw maga ang ai majaw, Jinghpaw mung hte ga jarit n kahtep ai. Lengho Ginwang hta Maru (Lhaovo) ni nga ma ai. Shi ning laman Lengho mare e manau dum ai garai n mu ai.

2. Mungkan Manau sa lawm ai masha ni:-Myitkyina e htunghking lam galaw shagu, bawsang manghkang pru ai. Komiti langai hpaw shagu bawsang mi kade hpra ngu ai manghkang pru ai. Maru, Lashi, Lisu, Rawang ni Jinghpaw hpe jawm adawt ai manghkang grai law ai. Miwa mung e dai baw manghkang hpa n nga ai. Jinghpaw manau she nga tim, Miwa sha n-ga, shamying pyi n chye ai amyu hkum sumhpa yawng shang lawm ma ai. Grai grai tsan ai buga na Jinghpaw n re ai ni ja gumhpraw jarik htum hkam nna sa lawm ma ai. Jinghpaw n re majaw shanhte hpe shagrit da ai lam hpa n nga ai. Yawng maren mara jawm pyaw ai lam rai nga ai. Tourist ni mung n dut n dang sa du lu nga ai.

Daining na Mungkan Manau gaw, USA kaw na Jinghpaw marai 5 tup du ai. Woi awn ai gaw Rev. Dr. Yoba rai nga ai. England kaw na gaw, Lauban Bawmwang La Raw a nta masha ni rai ang ma ai. Lauban La Raw hpe gaw n mu ai. Singapore na mung du ai. Marai kade re hkrak n chye ai; nau n law na re. Thailand de na mung manga kru daram du ang na re. India kaw na gaw n du ai raitim, tsawm shayi shingjawng ai hta India Jinghpaw gawng malai hku shang shingjawng ai lam lawm ai. Yangon hte Mandalay na mung pawng yang marai kru sanit daram rai na re. Sammung na gaw, yawng pawng yang 40 jan na re. Manmaw, Manje, Shwegu ni kaw na 30 jan re. Maija Yang, Laiza ni pawng yang 30 daram re. Myitkyina kaw na 183, Wunpawng Ningja (WNJ) hte rai yang 200 loi jan ai. Ndai jahpan gaw, tara shang manam jahpan hte hotel shara jahkrat ai ni hpe sha tsun ai re. tinang nang personer hku sa ai chyawm gaw, Myen mung hkran na hkrai pyi tsa kaba naw nga na re. Kau mi htunghking hpun palawng dut sa ai. Kau mi lungseng dut sa ai ni nga ai.
Saphkung Mungdaw hta n lawm ai Yunnan kata na tsan gang ai buga hkan nga ai Jinghpaw ni mung du ma ai. Htinggaw n law mat ai majaw, Jinghpaw ginra hku masat n hkrum ai. Ya na ma ni gaw Miwa she gale mat wa sai lam chye lu ai. Shing rai tim, shada bai matut mahkai hkat let, Jinghpaw n mat hkra shakut nga ma ai. Ndai lang na Mangshi Jinghpaw Manau gaw, poi wang kata e hkrai masha sen mi grupyin gaw aten tup gamawng taw nga ai masa re. Mare de mung masha hkrai hpring mat ai majaw, yawng hpawn masha sen 3 daram zup ai poi rai na sai ngu maram lu ai.

3. Bawngban Hpawng:- Saphkung mungdaw kata na Jinghpaw myitsu salang ni gaw, “Jinghpaw Wunpawng Htunghking Hpaji Sumru Ginrat Hpawng” ngu ai hpe aten htuk manu shagu galaw ma ai. Dai zuphpawng hta Myitkyina, Manmaw, Sammung, Lawu ga na Jinghpaw ni hpe mai byin ai hta hkan nna saw shaga chye ma ai. Mungkan Manau Poi a ahkyak madung gaw, dai zuphpawng mahtang she rai nga ai. Grak re ai myit hkrum dawdan lam n lu galaw tim, mungkan ting na Jinghpaw Wunpawng sha ni a nga pra masa, htunghking hte laili laika, ginru ginsa labau ni hpe shada tsun jahta ginlen garan kachyan hkat ai lam rai nga ai. Ndai lang na Mungkan Manau hta hkrum zup bawngban lai wa sai ka matsing hpe, atsawm bai ka lajang jahtuk nga dingyang re majaw, ngut jang she shagun jaw lu na re.

4. Kaga lam ni:- Mangshi na Saphkung Mungdaw a Pati Du Usa Duwa Manam Tawng woi awn ai “Jinghpaw Wunpawng Ginru Ginsa Labau Dup Ginrat Ka Shalat Hpung Komiti” ngu ai mung langai mi nga ai. 2006 ning, April 24-26 lapran Ruili e hpaw hpang ai re. Jinghpaw mung de na gaw, Rev. Dr. Maran Ja Gun, Sara Kaba Maran Brang Di hte ngai, anhte masum sa lawm ga ai.Dai zuphpawng hta yawng hpawn marai (25) sha re. Lahkawng lang ngu na “Jinghpaw Wunpawng Ginru Ginsa Labau Dup Ginrat Hkrum Zup Bawngban Hpawng” hpe 2008 ning, December 6-7 lapran e Ruili mare kaw galaw yang, marai 103 shang lawm sai. Sammung de na grai du sa ma ai. Masum lang ngu na zuphpawng gaw, 2009, Feb. (1-2) ya shani Laiza Nabang (Miwa hkran) e galaw ai. Marai (9) sha hkrum zup ai. Lhaovo labau, Nung labau hte Hkrang Hku Majoi, Chyai Hku Majoi, Mali Hku Majoi ni a lam Uma buga na ni hkai ai labau sawk manaw na matu gan hpawng ai lam re. Hpa majaw nga yang, Miwa hkran na ni gaw Uma ga na ni hkai ai labau nau n chye, dantawng Mogolia, Miwa mung, Tibet mung ni de sawk hkawm ai lam she rai nga ai. Uma buga na ni mung, English wa e lamu ga jarit masat da ai kata e sha “nga hkang na shu hpa” sumtsan n mu mada ai lam nga ai. Dai hpe jahpra hkat ai lam re.
Dai hpang gaw Mungkan Manau kaw na zuphpawng ni bai matut wa ai hku rai nga ai. Ta tut hta htunghking ginru ginsa lam ni hpe aten jaw apnawng gunhpai lu na n loi nga ai. Ja gumhpraw mung yak ai. Mungmasa sat lawat mung garai n hku ai. Shakut ai ni gaw shakut nga dingyang rai ga ai lam shana dat lu nngai.

Matsing:- Mungkan manau na photo kaja nau n lu ai. Zuphpawng hpe she madung tawn ai re majaw, manau pa de kalang sha sa du nngai. Lu tawn ai photo ni mung date out mat sai.

CHYEJU DUM LAIKA

2012-02-13T13:07:00.003+08:00

Dear Friends and Families,

Thank you very much for effort for our Kachin Refugee.

Because of your effort in fund raising T-shirts printing, X’mas Choir singing, and cash donations, we were able to donate a total of {($10,000) = kyats 80,40,000}, kyats 40,20,000 to Kachin refugees in Bhamo district via Fr. Paul Awng Dang and kyats 40,2000 to Kachin refugees in MaiJaYang, China boarder via Wunpawng N-Htoi (Sin Praw Ginwang Ginjaw, Mai Ja Yang Muklum) on Jan 05,2012.

We would like to sincerely thank you and appreciate for your kindness and support.
Dedicated to the supported families in:
1. Canada
2. New York, USA
3. Indiana, USA
4. Pennsylvania, USA
5. Maryland, USA
6. Alabama, USA
7. California, USA
8. Illinois, USA
9. West. Virginia, USA
10. Tennessee, USA
11. Arizona, USA
12. Iowa, USA
13. Omaha, USA
14. Louisiana, USA
15. Amarillo, Texas, USA
16. Laredo, Texas, USA
17. Houston, Texas, USA
18. Dallas/Fort Worth, Arlington, Texas, USA

Thank you very much. May God Bless You All.

Volunteer
(Kachin Catholic Families in Texas, USA)

HKA BRA N MAI

2012-02-13T10:43:00.000+08:00

Marai masum myit hkrum yang,
Panglai nawng pyi htawk dang;
Lu su ai nga hkum kadap,
Matsan nna kadai n hkrap;
Hkrit tsang na lam hpa n nga,
Maumwi sakse hkai dan na......
Jingling u hte magwi,
Byin lai wa sai maumwi;
Shaba sun hta magwi lai wa,
Jingling u gaw hkungga lara;
Hpyi nem let shi tsun,
U hkalung tsip hpe madun;
Ndai hpe n hkra ai sha,
Lai wa ya rit nga.........
Tim,
Magwi gaw n gawn n sawn rai,
U tsip hpe jahten ya sai;
U hkalung ni matsan mayan rai,
Magwi e kabye hkrum sai.
Kanu ni a hkam sha tsinyam,
Jingling u hkrum ai tsindam;
Maroi n ni masin n si hpa dai,
Hkum kaji nna roi sha ai lam rai.
Hkum kaji tim myit n kaji,
Karai jaw ai machyang hpaji;
Chyeju shakawn let shi sumru;
Jinghpaw manang kaw hpaji hpyi na sawn lu,
Uhka, jinu hte shu hpe karum saw,
Kabu gara shanhte hpaji daw;
Uhka gaw magwi myi hpe achye da,
Dai ningma kaw jinu di di ya;
Kade n na ai ten,
Magwi a myi yawng hten;
Tam lu tam sha n lu,
Hpang gara ai gaw n chyi n mu;
Shu gaw magwi myidi hpe gyam,
Magwi gaw shu nsen madat let hka tam;
Lunghpra nten e dung let shu shaga,
Magwi gaw hka nawng shadu nna sa;
Jingling u hpe yu kaji kau ai magwi dai,
Lungbra krung de dihkrat si sai....
Oh! ndai mabyin hpe kasi la,
Chyurum sha ni myit tsang lam n nga;
Jasam latsa yawn, jinghku latsa prawn ai da,
Chyurum sha ni myit hkrum ga .....

Bum Shanghkawng
12-2-2012

MUNGHPAWM NHTOI DAWM AI POI

2012-02-13T10:31:00.003+08:00

February (13) bat Langai,

2012 ning, Februry (12) ya shani gaw, (65) lang na Munghpawm Nhtoi rai nga ai. Jinghpaw Mungdaw Asuya gaw, Munghpawm Nhtoi Shana Lusha Poi ngu ai ga baw hte myitsu du salang ni hpe saw shaga daw jaw ai lam galaw sai. Masha (1,000) mi daram du zup ai lam na chye lu ai. Rai ti mung, Mungdaw Hkringmang Daju kaw nna ga hkaw ga ding tsun shaga ai lam n nga ai sha, mayam nchyang ni hpe daw jaw ai masa hku jaw sha lai wa sai lam shiga na chye lu ai. Grau sawng ai gaw, lusha poi sa ai myitsu du salang ni a palawng sinda ntsa hta shagan langai sha re ai masat maisau pa shakap nna sa ra na hku lajang da ai lam chye lu ai. Dai lam hpe hkam sha ai myitsu salang ni gaw, munghpawm n rai mat sai lam asan sha chye na htai la lu ma ai, nga nna kam ram ai myitsu ni kaw na shiga na lu ai rai.

JAN BAWK JA (NDF) HTE SAN HTAI

2012-02-12T23:50:00.002+08:00

SATAN GAW HPA MAJAW WUNPAWNG MYUSHA NI HPE SHAMYIT NGA

2012-02-12T20:45:00.000+08:00

Machyi nga ai wa hpe tsi shamai la lu na matu shawng nnan shi hta kaning re ai ana ahkya rawng nga ai hpe chye hkra jep sagawn ra ai zawn satan wa gaw anhte Wunpawng Myusha ni hpe hpa majaw shamyit wa nga ai a npawt nhpang chye lu na matu azin ayang sagawn yu ga.

Myen ni a shingdu lam maumwi mausa hpe hkaja yu ai shaloi, prat 4 ginhka tawn ai hpe mu lu ai. (1) Anoratha prat, (2) Bayinnawng prat, (3) Alongphaya prat, (4) Shanglawt lu ai shani kaw na dai ni du hkra na prat ni rai nga ai. Prat 1-3 gaw-gap ai kaw lawu ga na bum nga masha ni a ginra ni hpe zing la nna masha ni hpe gaw Myen ni ra sharawng ai hku asung jashawn wa masai. Raitim dai bum nga masha ni a lam gaw shanhte a maumwi mausa kaw ntsun shalawm ai sha, Myen ni ram nna gaw-gap wa lu ai hpe sha shadan shadawng wa masai.

LARAM AI WUNPAWNG MYUSHA NI A LAM:- 1885 ning kaw British ni Myenmung ting hpe zing la ai hpang, bum nga masha ni a ginra ni hpe matut zing bang wa ai shaloi, kaga amyu in British hpe hkap gasat ai lam n-galaw ma ai raitim, anhte Wunpawng Myusha ni gaw 30 ning grup yin laja lana hkap gasat ai lam, mungkan majan (I) kaw magrau grang let sinna mungdan hkan e gara hku gasat du hkawm ai lam, Myen ni woi shang wa ai Japan ni gaw British ni hpe Myenmung kaw na gasat shapraw kau sai raitim, Wunpawng Myusha ni gaw Japan ni hpe htunghpau sinat hte hkap gasat nga ai hpe mu ma ai shaloi, British hte American ni gaw India kaw nna Myenmung de bai shang wa nna Wunpawng myusha ni hpe hpyen hpaji loi li sharin ya nhtawm jak sinat ni jaw dat ai hte Japan ni hpe Myenmung kaw nna gara hku gawt shapraw kau lu ai lam, shing re ai laram a majaw Myen hte bum nga masha ni yawng kalang ta shanglawt lu na matu Gen. Aung San gaw Wunpawng Myusha ni hpe garum hpyi ai lam, Myenmung shanglawt lu ai hte lawu ga hkan e gasu wa ai Myen Communist hpung ni hpe mung, Jinghpaw dap ni e shagrawt kau ai lam, Myenmung ting hpe bum nga masha rawt malan hpung ni e zing la nna Yangon sha ngam sai ten hta U Nu hpe Yangon asuya nga nna jahpyak shamying hkrum ai shaloi, 3 ya laman Jinghpaw dap ni e hkye la ya sai. Shing re ai Wunpawng Myusha ni a laram ai hpe Myen ni a matu gaw chyeju dum na malai na chying hkrit hpa rai wa sai.
Wunpawng Myusha ni gaw Myen hpe gade lang hkye la wa sai raitim bum nga masha ni lu ging ai ahkaw ahkang n jaw ai majaw 1961 ning kaw rawt malan hpang wa sai. Dai shaloi Myenmung a Commander-In-Chief rai nga ai Gen. Ne Win gaw grai hkrit kajawng mat sai rai nna, bum nga masha ni hpe shamyit kau lu na matu shawng nnan e, 1962 ning hta U Nu asuya hpe daru magam zing la nu ai. Myen asuya ni asak matut hkrung lu na matu ra ahkyak dik ai ten ni hta Wunpawng Myusha ni hpe hpyen masa, mungmasa kaw asung jashawn ngut sai rai nna, ya gaw shamyit kau na mahtang ladat shaw masai. Ahkyak ai gaw, KIO hpe sha n rai, npawt nhpang rai nga ai Wunpawng Myusha ni hte hpawn lu shamyit kau jang gaw kaga ngam nga ai ni hpe matut shamyit na matu lit nli na sai, nga nna myit la manu ai. Shing rai prat (4) hta mung prat (1-3) na zawn bum nga masha ni a amying shingteng ni Myenmung a maumwi mausa kaw na shamyit kau lu na matu hkyen wa sai. Dai majaw 1963 ning hta Wunpawng Myusha ni hte KIO hpe shawng shamyit kau na matu masing shalat masai.
(1) Makam masham lam hpe dumbru dumbra galaw dat ai hte kahkyin gumdin lam lu jahten sai.
(2) Hpakant hpe gat lawk shatai nna nanghpam malu masha shabra dat ai hte aten kadun laman Wunpawng Myusha ni kani ya byin wa sai.
(3) Mokong, Monyin, Hpakant hkan e AIDS ana kanu ni shabra dat ai hte amyu hpe jahten sharun lu ai ana ahkya ni chyam bra wa sai. Kaga ladat ni law law nga ai raitim ndai myu masum gaw na chying ahkyak ai masing a npawt nhpang rai nga ai.
Hpang na aten ni hta Ne Win hpe nra sharawng ai General ni nga wa ma ai raitim, bum nga masha ni hpe shamyit kau nna Burmanization masing awngdang wa lu hkra shalat tawn ai Ne Win a ladat hpe gaw dai ni du hkra tup hkrak hkan shadik shatup wa masai.

KIO HTE CPB MILITARY ALLIANCE GALAW:- Aten ladaw hte grup yin a masa hta hkan nna KIO gaw CPB hte Military Alliance galaw nna hpyen man bung ai Myen hpyen asuya hpe pawng gasat na matu myit hkrum nhtawm hpyen hpaji ni mung jahtuk shabung wa nga magang sai. Dai shaloi Myen hpyen asuya a matu na chying hkrit hpa byin wa ai. Madung gaw KIO hte CPB hpyen man pawng dat ai hte Miwa gaw KIO hpe laknak ntaw ntsang jaw na rai nna, shawng de British hte American ni Kachin hpe laknak jaw dat ai hte Japan ni hpe Myenmung kaw nna lu gasat shapraw dat ai hpe mu wa sai zawn, ndai lang gaw Myen ni asum hkam ra ai baw rai wa na sai nga nna asan sha mu wa masai. Dai majaw hpyen asuya gaw shi a hpyen rai nga ai Miwa hte lawan ladan jahkau la nna hpu nau Wa hpung hpe asung jashawn ai ladat hte 1989 ning hta CPB ni hpe daru magam zing la manu ai. Tau nau nna hkyen tawn sai hte maren Wa hpyen hpung gaw Myen hpyen dap hte gap hkat jahkring nna Wa ni hpe sut masa ahkaw ahkang amyu myu jaw let shabyawng kau masai.

GAP HKAT JAHKRING:- KIO maram yu dat ai shaloi, aten galu gasat poi shang wa ai rai yang, KIO gaw Myen hpyen dap hpe ndang ai zawn, Myen hpyen dap mung KIO hpe nlu shamyit kau ai majaw, lahkawng maga de sum kaba byin wa na hpe mu wa sai. Grau sum na gaw mungmasha ni rai wa na re. Dai majaw hpyen masa hpe shazim tawn nna mungmasa hku majan matut gasat na matu daw dan nhtawm 1994 ning kaw gasat jahkring tawn masai. Mungmasa majan gasat na matu constitution rai nnga ai majaw asuya hte pawng nna National Convention kaw constitution jawm ka wa ai rai yang 2008 ning kaw ka ngut nna mungmasa hku matut gasat hkat na matu Kachin State Progressive Party (KSPP) ngu ai mungmasa party hpe hpaw dat sai. Myen gaw Wunpawng Myusha ni a hpyen masa hte mungmasa hpe hkrit tsang nga ma ai majaw myu lahkawng yan hpe shamyit kau lu na matu KIO hpe Border Guard Force (BGF) galaw shangun nna KSPP hpe gaw ra lata poi shang na ahkang n jaw ai.

THEIN SEIN ASUYA:- 2011 March 30 ya shani Thein Sein asuya lung wa sai. Dai asuya gaw mungdan kata kaw mung, shinggan kaw mung Myen asuya hpe ninghkap nga ai ni hpe simsa lam galaw na matu ndau nga masai. Rawt malan hpung ni hte gap hkat jahkring tawn na lam tam wa masai. Raitimung mungdan ting hta hpyen masa hte mungmasa kaw hkam dahka nga ai simsa lam lu wa na matu gaw, 1963 ning kaw ladat shaw hpang wa sai hte maren Wunpawng Myusha ni hte simsa lam la tawn sai KIO hpe shawng shamyit kau ra ai, nga nna jahtuk magang sai hte maren shadik shatup galaw hpang wa masai. KIO hpe hpyen masa hku lu shamyit kau ai hte kaga rawt malan hpung ni gaw hpung langai a hpang langai asum hkam wa sana rai nna, dai rawt malan hpung ni hpe kam hpa nga ai Ma Kaw mung rawt malan hpung ni a ntsa e myit mada shara n nga sai majaw mungmasa shaga ai hta n-gun kya wa na sai nga nna tak la ai.

UNFC HPAW SHABAWN:- KIO woi ningbaw ai UNFC hpe woi hpaw shabawn dat ai shaloi Myen hpyen asuya hpe bai kajawng shangun sai. Dai majaw hpu nau Wa ni UNFC kaw nsa shang lawm hkra shawng de dawm la kau sai ahkaw ahkang amyu myu bai jaw nna kalang mi bai shalen la lu masai. Matut nna UNFC hpe jahten sharun kau lu hkra ladat amyu myu hte shakut nga masai.
MAJAN HPANG:- Ku Kang hpung hpe nhtoi 3 ya hte shamyit kau wa sai. Wunpawng ramma ni hpe yu yang 70% daram gaw kani ya, tsa ya, AIDS ana kanu ni byin ma sai zawn, KIA hpyen la ni hta mung kani ya law mat sai majaw naw lang mai ai laknak pala ni gaw nanghpam malu masha hte galai lu kau sai rai nna, lang n mai sai laknak ni sha lu na masai. Shing rai KIA hpyen la nnan sa galaw na matu ramma ni mung ndum shamyi si htum ma masai. Raitimung KIO ginra gaw dam ai majaw tsep kawp zing la na matu 10 ya na na re, nga nna maram nhtawm 2011 June 9 ya shani e gasat hpang wa masai. KIA hpyen hpung ni hpe Chemical laknak ni hte hkan gasat ai zawn, mare, yi sun hkauna hkan tam lu tam sha nga ai mungmasha ni hpe mung hkan gap sat hkawm ai hta n-ga, Yello Rain ngu ai chemical laknak hte mung matut manoi gasat wa masai raitim nlu dang la ai hta n-ga, Myen maga de hpyen hpung hkying kaba hkrat sum wa ai majaw ladat nnan bai shaw manu ai.

Ma Kaw hpe lu abawk la ai hte sinna masha ni jawm madi shadaw wa na mara ai. Dai shaloi rawt malan hpung ni yawng mung gasat jahkring kau wa na mara ai, nga nna kam let ta tut galaw wa ma ai rai yang, kaja nan kaga hpu nau rawt malan hpung ni gaw satan wa gunglau ai mahkrun kaw hkan gashawt nang mat wa masai. Shing rai satan wa gaw KIO hpe simsa lam mahtan masu nna ta tut kaw gaw lawu ga na shi a hpyen hpung ni hpe KIO ginra de sa bang dingyang rai laknak n hpai ai mungmasha in hpe hkan zingri roirip sat hkawm wa sai.

MAJAN A MAHTAI:- Ndai majan a mahtai gaw, WP myusha ni hta na chying sum machyi wa sai. Raitim si htum wa nga ai kani ya, tsa ya, AIDS ana kanu ni hpe shabran dat shangun nna tinang a asak hte amyu hpe aten dep makawp maga la lu na matu masawp dep ai laknak ni magra jum nhtawm gasat bang wa nga ga yang, mungdan kata hkan, maigan mungdan hkan shawng de dumbru dumbra rai ninghkap hkat nga ai myutsaw sha ni gaw kahkyin ai shawang myit hte tinang a hkum hpe tinang nan lit jaw la nhtawm byin mai ai shara kaw lit shang jum nga masai.

WP MYUSHA NI RA SHARAWNG AI HKRANG:- Bum nga masha ni yawng ra sharawng ai gaw Panglong myit hkrum ga sadi kaw rawng ai hte maren Munghpawm Myenmung hpe gaw-gap nna rapra ai tara npu e uphkang sa wa na hpe jawm ra sharawng nga ma ai. Raitimung ta tut galaw sa wa ai Myen asuya a lai gaw myu langai (unitary) hkrang hpe tawk hprut lang wa ai gaw Myenmung shanglawt lu ai shani kaw na rai wa sai. Magyi magaw re ai hpri tawng hpe malan la na matu gaw n-yak ai. Raitim magaw ai hpun tawng hpe malan la na matu gaw n byin ai.

Lahta kaw tang madun wa sai masa hta hkan nna byin mai na lam yan hpe lata ra saga ai. Mungkan grup yin na myutsaw hpu nau ni a ningmu hpe maram yu yang, ganoi tsa htam hpring ngu na daram gaw awmdawm ahkaw ahkang lu ai munghpawm mungdan hpe ra sharawng nga ma ai. Raitimung munghpawm myenmung hpe ra sharawng ai gaw loi li she arai nhten! Rai yang, yawng e jawm ra sharawng ai hpe lu wa na matu gaw dinglun hkat nga ai hte sha gaw lu wa na n re majaw hkum dek shagu atsam htum hte jawm shakut sa wa ra saga ai. Raitimung bum nga myusha in yawng lawm ai mungdan rai ra na re. Yaw shada tawn ai masing awngdang wa na matu bawng jahkrup ai shaloi, “Shing ngu yang Myen asuya n hkraw ya na ma ai majaw…..” ngu ai rai yang gaw, satan hpe asum jaw kau ai lachyum sha rai wa na re. Myen ni ding yang tsun chye ai ga hkaw, “Bum nga masha ni gaw myit hpraw san ai amyu ni rai ma ai” nga ai re. Lachyum gaw, “Bum nga masha ni grai anya ma ai” ngu ai lachyum rai nga ai hpe yawng chye nga chyalu re. Bum nga masha ni shanhte ra ai hte maren hkan madat ya hkra, jahkrit ai ladat, shamyawk ai ladat amyu myu lang dat ai hte bum nga masha ni gaw ntsen nga ninglen tinang maga de asum hkam nhtawm da sang kataw bang ya wa saga ai. Hpang de Myen in hte hkrum shaga ai shaloi Myen ni a akyang hte ladat ni hpe jai lang chye ra na masa nga ai.
Munghpawm Mungdan (Union of Ethnic Nationalities) kaw Unitary hkrang sha ra sharawng ai Myenmung nlawm ai. Ga shadawn, sumwum si langai hpe yu dat yang, ntsa lam na htat ai shan gaw kata na atum kaji hpe gayawp tawn nga ai. Lachyum gaw ntsa na shan gaw Munghpawm Mungdan rai nna, kachyi sha re ai atum gaw unitary hkrang hpe ra marit nga ai Myenmung rai nga ai. Myenmung a htingbu mungdan gaw Munghpawm Mungdan langai sha nga ai raitimung panglai ngu ai n nga ai. Panglai grup yin gaw moi chyaloi nhkoi kaw nna Munghpawm Mungdan e tsep kawp madu tawn da sai (Mon, Kayin, Yahkaing). Matse ai satan ni zing la kau ya ai hpe Mon, Kayin, Yahkaing ni a shingdu maumwi kaw mu lu nga ai. Shing rai kaga hpu nau ni yawng mung munghpawm mungdan hkrang hpe ra marit nga ma ai rai yang, satan gunglau ai hpe jan lu ai atsam n nga shajang ai majaw satan a npu e mayam naw tai shajang nga ga ai. Munghpawm Mungdan gaw lam shagu hta ra n rawng hkra hkumtsup nga ai majaw mungdan gaw-gap lu ai hpang aten gadun laman mungkan kaw na chying lu su simsa ai mungdan byin tai wa na re.

SATAN HPE MARA SHAGUN NA KUN? Sung sung myit yu yang satan wa gaw kaga masha ni hpe gunglau jahten sharun na matu lit nga ai hte maren shadik shatup sa wa nga ai majaw shi hpe mara shagun na lam n nga ai. Anhte mahtang Yehowa jaw da ya ai machye machyang hpe lang nna kahkyin gumdin ai n-gun hte tinang a amyu ni hpe makawp maga sa wa lu na matu lit nga ai hpe galaw na malai, satan wa a gunglau ai kaw hkan kataw hkawm nga ai aten naw rai nga ga ai. Tinang kaw ning ra nga ai hpe yin la nna gram sharai la na matu atsam rawng ai shani gaw satan hpe dang kau nna rawt jat wa na aten du sai, ngu nna hkam la ra saga ai.

Myutsaw hpu nau nlang hte satan a mayam prat kaw na lawt wa lu nna Munghpawm Mungdan hpe jawm gaw-gap na matu myit sharawng shajang nga sai hpe jut shagu de na shiga ni na lu nga air majaw n-gun lu ai. Mungkan ting kaw chyam bra nga ai hpu nau bum nga masha bawsang shagu chye na lawm hkra hkan htawn tsun ra saga ai. Shanhte dum hprang wa ai hpang gaw, shada matut kahte hkat ai ladat hte aten langai a laman e chyam bra wa nna maigan mungdan ni hte UN kaw na matut madi shadaw wa hkra tsang langai a hpang langai lahkam sa wa lu na re.

MUNGMASA NINGMU:- Mungmasa ngu ai gaw na chying dam lada ai majaw dam lada ai myit jasat hte shadik shatup nna tsun shaga ai jasat hpe na la ai ni hku nna myit hkrum ya mai na ma ai. Lai wa sai ten ni kaw bum nga masha ni hta, kaga masha ni a lam gaw tinang hte n seng ai zawn, kadai mung kade amyu a ginra, laili laika hte htunghking hpe sha ahkyak tawn wa saga ai. Raitimung satan wa gaw, shi a ginra hte htunghking gaw shi hte sha seng ai zawn, bum nga masha ni a ginra yawng mung shi hte sha seng ai, nga nna hkam la nhtawm ahkyak la sa ai nga yang, bum nga masha ni yawng hpe mayam lu yam sha nga ai gaw mau hpa n rai nga ai. Mungdan langai hpe madu lu na matu hkam la ra ai atsam gaw dai mungdan a madang hte bung pre ai hkam la lam lu ra ai hpe jawm chye nga chyalu rai na sai.

Masing kaba langai hpe myit shapraw la na matu gaw kade mi n yak nhten! Raitimung dai myit shapraw dat ai hpe galaw hpang na matu tawk hprut dawdan nna ta tut galaw hpang lu ai atsam gaw na chying yak ai. Law malawng gaw satan wa a gunglau ai hpe n jan lu ai majaw kataw mat nna shada dinglun mara shagun hkat ai de lam numshe shang mat chye ga ai. Kade rai nna ai laman shanglawt lu wa ai East Timor hte South Sudan a ntsa e maram yu yang, shanglawt lu ging ai shingdu maumwi ngang kang ai hta n-ga, maigan mungdan ni hte UN hpe matut mahkai ai hta htap htuk ai mahkrun hku sa wa lu ai hta hkan nna awngdang wa ma ai hpe maram lu ai. Anhte gaw-gap na Munghpawm Mungdan a lam ni gaw mungdaw shagu hta ngangkang ai shingdu labau ni nga nga shajang chyalu re.

Munghpawm Mungdan gaw-gap na hte seng nna ndai zawn rai ningmu garan kachyan galaw ai a npawt nhpang gaw, awmdawm ahkaw ahkang lu ai mungdan gaw-gap na matu shani shagu pru wa ai nsen ni na lu ai zawn, laili laika hkan e mung mu hti lu nga ai majaw tinang mung myit lawm wa let shang jahta lawm ai rai sai. Ndai ningmu a ntsa e grau hkumtsup dam lada ai madang hku mu lu ai hpaji ninghkring ni gaw ta tut jawm galaw lu na matu pri nen ai hkrang hpe shalat shapraw dat ai kaw atsang langai a hpang langai galaw awngdang wa na re, ngu nna shingran mu ai hpe myutsaw hpu nau ni myit yu na matu kamhpa let lajin dat ai.

GINCHYUM:- “Lagawn ai wa e, hkagyin hpang de sa su” nga nna Ja Chyum mungga kaw matsun da nga ai. Yehowa kaw kamhpa let kyu hpyi ai hte maren, tinang a hkum hkrang n-gun atsam yawng hpe asung jashawn let shadik shatup sa wa yang sha awngdang wa mai ai hpe shadum da nga ai.

Dai ni na ten hta WP Myusha ji nban yawng hte tsaw htum ai Yehowa kaw aja awa kyu jawm hpyi nhtawm gasat sa wa nga ai majan awngdang lam gaw bum nga masha myu bawsang yawng a matu rap ra ai munghpawm mungdan gaw-gap wa lu nna, Karai Kasang a mungdan hpe maden zinghka wa shangun lu ai mungdan hpe gaw-gap lu u ga matu, hkagyin zawn laram rawng ai n-gun hte atsam htum shakut sa wa ga law.

Pyilan
12 February 2012

SALWI SI HTAWNG PYAW CHYAI NGA MU YAW

2012-02-12T15:35:00.000+08:00

Moi prat bum ga e nga ai ten, wa sat sha shagu, ma ni wa shabawng hpyi ai, wa shabawng kashun hkat ai; wa shabawng lu la ai wa gaw, kawa htausen hte kawut shabawng la nhtawm, gawdin shatai nna htawng chyai lai wa sai. Wa shabawng n lu htawng ai ni gaw, salwi si htawng ma ai. Ya prat na zawn kanoi bawlung mu htawng na gaw n loi la nga ai. Daini na ten Jinghpaw Wunpawng sha ni a rawt malan hkrun lam hta mung, htawng mayu ai gaw, nylon nbung bawlung rai nga tim, salwi si pyi n lu htawng nna, lungdin she naw htawng chyai nga ga ai hpe anya shadu ai ni mung nga nga ma ai.
Daini myi hpaw sai mungkan mungdan ni yawng e ra sharawng ai gaw, demokresi masa nan rai nga ai. Demokresi masa hte grin taw nga sai mungdan ni hta mung, demokresi masa hpe n sim n sa sawk shaleng, jen dinglik, shingdaw maram, gram sharai, shangang shakang dingyang rai ra nga ma ai. Hpa majaw nga yang, demokresi ngu ai wa mung, gat seng na dut rai namnak shen ai joi shinglet zawn, waw de nhkyeng wa, nang de kadang wa, nbung bung jang myu mi, jan kahtet jang myu mi, shinggyim masha ni a majaw, baw pyi sin na daram rai nga ai.
Shing rai nga ai sat lawat a npu e, gumshem lailen hpe she manat tawn mayu ai ni mung, “demokresi” shamying lang nna, mungshawa hpe myi gale kau ya nhtawm, sai chyup zingri sha tik tik rai taw nga ai. Dai gaw kaga kadai n rai, Myen Hpyen Gumshem Asuya nan rai nga ai. Daini Myen mungdan hta demokresi asuya byin taw nga sai n rai; byin wa hkra woi shabyin na ni mung n rai nga ma ai. Shanhte a Hpyen Gumshem Lailen hpe mungkan ting jawm dinglun wa nna, demokresi shamying masu tawn ai sha rai nga ai.
Htauli htaula n rawng ai manaw manang nkau mi, Myen wa a demokresi hpe kam nna, manya jawng taw masai. Ga shadawn langai kahtap tsun na:- Gwi gaw, masha wa e hpyet bu shamawng dat ai hpe hkyi tawng mu hkrup sha sana shadu nna, maitsan she kangat hkra kabu let, hkan tam kyin taw ai hte bung nga ma ai. Jinghpaw Wunpawng sha ni Myen hte shaning 1000 mi matut pawng tim, demokresi ngu ai gaw dwi ai kun, hkri ai kun, kaning nga ai namchyim re pyi chye lu na hkum shadu myit. Gwi rai yang chyawm gaw, hkyi tawng wa n mu hta sha tim, hpyet nsa sha gaw ayan lu manam la na re.
Daini myu tsaw share shagan brang ni, du daw sai hkaw hkam let, n sim n sa gasat gala shakut nga ai gaw, laknak lang ai hpyen gumshem wa hpe, laknak hte nan gasat ra ai majaw apnawng shakut shaja nga ai lam re. Manang ni sai tum sai pa hkaw nna, shakut nga yang, “Si Mani Ladat Rawt Malan Jasat” ngu ai “None Violent Revolution” masa hkan nga yang gaw, la n du ai lai shadawng ai lam sha re, ngu mu lu ai.
Ga shadawn langai bai tsun na — Amerikan mung lashing kata na Amerikan num langai hpe, Jinghpaw buhpun hking soi palawng hte zeng di sumraw dat yang, Jinghpaw num byin wa lu na kun? Marip Hkawn, Maran Hkawn, ngu tsun shaga yang shi chye na lu na kun? Kanam daw ndai, kahkri daw ndai, ngu yang shi chye hkam sha na kun? — Daini Myen Hpyen Gumshem wa mung dai hte maren, hpyi ntsa na mying sha demokresi shamying tawn nhtawm, kraw kata e gaw, hkanghkyi matse nan raw wa rai nga ai hpe n mu mada lu hkra, tinang a myi hpe kadai wa pat kau ya sata?
Tsawra ai Jinghpaw Wunpawng sha ni e, myu a kanu kawa ni, mungdan a ningbaw ningla ni, shayi shadang ramma ni, nu num wa la ni, sutdu lauban ni, makam masham ningbaw ningla ni yawng hte e, Jinghpaw Wunpawng sha ni a shawng lam gam maka hpe hkanghkyi n-gup kaw na shalawt la lu na matu gaw, “None Violent Revolution” ladat hte mai nan n mai ai lu yaw. “Ga gun gaw n ja, nga kaba gaw ra” nga ai hpa, demokresi lu wa dam yang, myi man pa lu na gaw ra; manang ni sai tum sai pa hkaw nna gasat gala nga ai de gaw n gwi sa, re ai ni mung lanyan hkawm bu nga ma ai lu!
Hkau ni e, gwi zawn hpyet manam hkawm na n kam yang mung, salwi si htawng pyaw chyai nna nga mu yaw........!

Loimyebum
2012, Feb.12.

MYANMAR MUNG CATHOLIC SARADAW NI A NINGMU

2012-02-12T13:23:00.000+08:00

DUM BANG BUM KAW LAJA LANA GASAT

2012-02-11T21:44:00.002+08:00

February (11) bat Kru,
Jinghpaw Wunpawng Mungdan kata Myikyina Manmaw lam lapran Namsan Yang makau Dumbang Bum hta tai myen hpyen asuya ni gaw daini February (11) ya hta shamu shamawt pru hkawm ai majaw Wunpawng Mungdan Shanglawt Asuya KIA ginjaw laksan dap dung na myu tsaw share shagan ni hte MHH ni pawng nna myen asuya dap ni hte laja lana gasat hkat ai lam na chye lu ai. Myen tai hpyen maga na hkrat sum machyi ai lam law ai hpe mung na chye lu ai. Kata lam tup hkrak gaw nchye shi ai. Ndai laman Jinghpaw mung kata e mung myen tai hpyen ni shamu shamawt ai lam bai law wa ai lam hpe na chye lu ai.

There was firce fighting in Dumbang mountain located near Namsan Yang village on 11 Feb 2012. This was due to Burmese army intrusion into KIA control areas that led to the whole day arm clash between KIA forces and Bumese soldiers

CHYEJU DUM HKRUNGGA SHAGRAU AI LAM

2012-02-11T14:44:00.000+08:00

Dr. NHKUM ZAU HTUNG (Asak - 90) CA, USA, HPE CHYEJU DUM HKUNGGA SHAGRAU MASAT LAIKA

Chyoi pra ai ni a si mat wa ai gaw, Yehowa a man e hpu la nga ai. (Shk 116 : 15)
De:

Jan Nhkum Nang Mai Htun
hte Dum Nta Masha Makyin Jinghku Hpung masha ni yawng
CA, U S A.

Ninghtoi: 2012 ning February (7) ya

Ginlam : Chyeju Dum Hkungga Shagrau Dat Ai Lam

Hkawp tsawra hkungga let Kanu Kana Jan hte dum nta masha, Mayu, Dama, Kahpu Kanau makyin jinghku hpung masha ji nban ni yawng hpe lahta de na ginlam hte maren, 29 January, 2012 (6:47 am) hta Madu Yesu a lahpyen shingnyip kata hta yup pyaw hkring sa wun doi mat wa sai, anhte yawng a tsawra hkungga ai Wunpawng labau shang chyeju madu Kaji Kawa (Dr. Nhkum Zau Htung - Asak 90 ning) hpe hpang jahtum chyeju dum masat masa hkungga la ra arawng la let shagrau sha-a masat laika shana dat ga ai.

N myit mada ai a kajawng sha kraw hkrat sai daw sai chyen ru sai baw pa makyin jinghku ni yawng hpe sha n-ga, anhte Mungkan Jinghpaw Wunpawng Amyu sha ni yawng hpe amyu sha lam yan ni hte kaga lam amyu myu hku nhtung nhka dawhpum shanan n-gun kaba langchyi tai let woi awn zinlum pawn ba lakawn hpaji jaw lam matsun madun lai mat wa sai, chyeju Madu Kaji Kawa n nga mat ai yawnhkyen lahpu shiga hpe na chye lu ga ai majaw, dum nta masha makyin jinghku ni yawng hte maren, maroi nni myit ru yawnhkyen hkrum shajang nga ga ai. Rai timung, Karai Kasang kaw na shadaw shangang shalan shabran ai mungga chyeju ni hpe hkam la shajang lu ga ai hta sha n-ga, manu byat n dang lu ai Kaji Kawa hpe jaw ya ai Karai Kasang a mauhpa chyeju ni hpe n-gup hte tsun n ma, ta layung daw hti n hpra, n dang tsun hkra awlaw kabu shagrau nga ga ai law.

Grau nna Anhte a Kaji Kawa gaw, lai mat wa sai 1996 ning June shata hta shawng ningnan lang hte 1997 ning July shata hta lahkawng lang ngu na, Japan de du sa wa nhtawm, Japan Mungdan kaw du shajang nga ai Amyu sha ni hpe Jinghpaw Wunpawng Amyu Sharawt Hpung (Pan Kachin) hte seng nna masing masa mahkrun ni nga ai lam sa sanglang myit woi sharawt ai chyeju a marang e, Japan du amyu sha ni mung myu sha lam yan ni hta grau nna myit maku rawt, n-gun lu dating let Mai Ja Yang (Pan Kachin College) jawng de ra ang ai hta hkan nna garum madi shadaw ai lam ni, kaga lam amyu myu ni hpe dang di lu ai maga hku nna myit hkrum mang-rum lahkrip ra ra hte shang lawm shakut lai wa lu saga ai.

Daini anhte a Hpu Shawng Hpu Ba Kaji Kawa lam woi matsun mahkrun shaw hpaji jaw da ai Pan Kachin dawhpum dawnu a chyeju a marang e, Japan du amyu sha ni lani hte lani myu sha lam yan ni hta (n htum hkayan) rawt jat galu kaba wa lu ai chyeju ni hpe hkam la shajang lu nga saga ai. Dai hta n-ga mungkan ting kaw shanu shajang nga ai pu gang sin machyi amyu sha ni yawng hte shada matut mahkai ai lam ni hta mung, (Ngang hta Hparat, Jum hta Majap jat) grau nna dam lada masan sa ai hku nna rawt jat galu kaba wa lu ai chyeju ni hpe malap n lu chyeju dum shagrau nga na saga ai.

Daini anhte yawng a chyeju madu Kaji Kawa Madu Yesu hta yup pyaw mat wa ai majaw, lahpawt salai yawn madai nyep myiprwi pru nga na malai, yawn shaprai myit sharai, n-gun ningnan bai awai la shajang let, shi madun kau da ai, kasi kamang kaja kandang kaba hkringhtawng ni hpe hpun da hkap mangan nga lu hkra lahpa galai hkaja let, kasi yu la kanan ka hkan nang shadik shatup lu ga yang gaw, shi a chyeju ni hpe daw chyen mi hku nna sha pyi htang lu ai hte amyu sha ni lam shagu hta grau nna rawt jat galu kaba awngdang wa na re ngu, myit dum lu nga ga ai.

Anhte a Kaji Kawa (Dr. Nhkum Zau Htung) hpe (11th February, 2012) ya shani, makoi mayang chyeju shakawn kyuhpyi hpawng lamang hpe Madu baw tai ai hte atsawm apyaw sha galaw ngut kre la lu mu ga, yawng kyuhpyi myit dum shajang nga na ga ai. Ngam nga ai dinghku masha makyin jinghku ni yawng Madu kaw na grau htum ai hte shadaw shangang shalan shabran lu ai shaman chyeju ni matut nna kahtap hkam la shajang lu mu ga ngu, kyuhpyi myit dum shakram dat ga ai law.

Hpang jahtum chyeju dum hkungga shagrau arawng la let,
Japan Mungdan du Jinghpaw Wunpawng Amyu sha ni yawng a gawng malai,

Labang David Tu Lum
Jinghpaw Wunpawng Amyu Sharawt Hpung
(Pan Kachin)
Magam Gun Dingsa
Tokyo, Japan

YUDA ISKARUT MUNG MANAU SA LAWM AI DA AW!

2012-02-11T10:53:00.004+08:00

Yesu Hkristu a lam Chyum Laika hta, jinghku sape 12 nga ai kaw na Yuda Iskarut mying ai wa gaw, Yesu hpe dut sha kau ai lam yawng chye chyalu re. Dai hte maren anhte ni kade reng ai amu magam mi galaw tim, anhte a kata hta Yuda Iskarut hpan gaw lawm chyalu sha re. Yesu a sape 12 hta langai mi sadi n dung ai zawn, Mangshi Jinghpaw Mungkan Manau sa ai poi manam masha hkying mun hta sadi run ai hpyen wa a kinyu masha gaw, n law dik tsa lam gaw lawm na sai. Grau sawng ai chyawm gaw, shing re ai sadi run masha ni gaw, tsasam maigan ni mai byin ai zawn, jahtawng htu ai hpan kaw na mung mai byin na sha rai nga ai.

Nga langai mi yat manam ai ninghkan, htingga ting hpe manam hkying ai shadu kau hkrum ai mung byin chye ai shingra masa nan rai nga ai. Maka n kap ai masha langai lahkawng a majaw, poi sa shawa law law wa shatan dinglun ai hkrum ra mat sai. Grau nna myitsu salang, hpa-awn tai ai ni, ja gumhpraw arang shaw nna n-gun kaba dat ai ni a matu gaw, yawn hpa wa rai nga ai.

Tsun mayu ai gaw kaga n rai; Mangshi Mungkan Manau Poi sa ai myitsu salang ni gaw grai kabu myit dik let nhtang du wa sai. Myitkyina, Manmaw, Maija Yang, Laiza, Shwegu, Manje, Kutkai, Lashio, Muse, Mandale, Yangon, Chiangmai, Bangkok, Kuala Lumpur, Singapore, Kunming, Sipsong Banna, Hpu-e, Nukyang, Guijio, Taiwan, India, London, USA, mungkan ting chyam bra nga ai Jinghpaw Wunpawng sha ni hkrum zup let, htunghking lam, laili laika lam hte ginru ginsa labau lam ni tsun hkai jahta, bawngban sama la lu ai gaw, ja gumhpraw hte mari la n lu ai ahkaw ahkang, prat mi hta kalang byin hkrum yak ai awng padang lam nan rai sai law! nga ma ai.

Rai tim, Yuda Iskarut a amyu ni gaw, hkanghkyi yi wunawng hku nna shang lawm lai wa sai lam chye lu nga ai. Dai hkanghkyi yi ni gaw, jahtawng htu ai hpan ni nan mung rai nna, lai sai Asean Zuphpawng hta mung, Indonedia de sa du ahkyak lawm nang ai ni re nga ma ai. Shanhte du hkawm ai shara ni hta, hkrum zup ai masha ni hpe, Jinghpaw mung kata grai simsa ai lam, gasat gala majan hpa n nga ai lam, mungshawa ni angwi apyaw myit amu nga shajang ma ai lam, n teng n man ai ga ni sakse hkam hkawm ai lam chye lu ai. Mungdan dinghku majan a lam masha ni hkap san jang mung, tsun n ram ai kashun kashe lagut damya masha ni sha re nga nna, ahpa atang tsun shagrit kau ai lam na chye lu ai.
Daini Myanmar mungdan gaw, ning re ai sawt ai masha ni a akyang numdun sha n tsai yang, prat dingsa jamjau hkrum nga na sha re. Mung up ai du magam ni kawan katsan du hkawm jang, jahkring mi myi gan gale kau ya na hku gan gawat shatsawm da chye ma ai. Newin gaw, shi shalat da ai MSL masha ni a majaw, shi nan bai hkrat sum ra mat sai re. 2012 ning, January (10) ya shani, Myitkyina e, Jinghpaw Mungdaw Manau Poi hpe grai galaw sharawng ai ni nga sai re. Hpa majaw nga yang, Jinghpaw mung kata dinghku majan n nga ai, grai simsa ga ai, ngu ai hku mungkan hpe masu hkalem nna, ahkaw ahkang gyam na maw mawn lai wa sai re. Maisau hte galaw ai hkanghkyi tsip hpe, wut wahpang lungpu shatai la mayu nga ma ai re.

Chyoipra ai Chyum Laika, Shk.Kd. 137:4 hta, — Masha tsasam a mung hta e, Yehowa a mahkawn mangoi ga hpe, Anhte kaning rai mahkawn mangoi lu na law e? — nga nna rawng nga ai. Israela masha ni Babylon mung e bawng dung nga yang, shanhte a tingse ni dum let, mahkawn mangoi dan na matu, Babylon masha ni hpyi ma ai. Pyaw ai nsen madat mayu nna n rai; Israela ni nawku ai Yehowa Karai Kasang hpe jahpoi asawng ya mayu nna she rai ma ai. Israela masha ni chyawm gaw, sat yang sat, nat yang nat, hkraw ya mu ai n rai. Daniela gaw dai ten hta Yehowa hpe hkrit hkungga let, magrau grang dik ai wa rai nga ai. Hkanghkyi lawng hta jahkrat bang ai du hkra shi hkrum nu ai.
Mangshi Mungkan Manau Poi gaw, Miwa mung na Jinghpaw Wunpawng Manau Poi she rai nga ai. Pyaw daw kadaw na matu galaw ai n rai; ja gumhpraw tawn shara n nga nna jai ayai kau ai n rai; Jinghpaw Wunpawng sha ni shada zinlum hkat lu na matu she yaw shada ai. Gaja wa mung manu jahpu n dawdan lu ai akyu ara ni hkam la shajang sai. Rai tim sawt ai masha, hkanghkyi kinyu ni hkan shayuk nang ai lam nga sai hpe mung na chye lu ga ai. Adam hpe gunglau ai Ewa zawn, shanhte rai na sai. Shanhte a shingdu e satan lapu kaba gaw shinglet kabra shadap lang let, gumkan taw nga ai. Shanhte hkam la na shabrai gaw, “Myit malai hpang hkrat ai baw hkrat sum lam” sha rai na malu ai.

Hkra Kawyeng nsen zawn, mungshawa hte myu a ningbaw ningla ni hpe aten man man sadi jaw shadum ya nga ai ningka munu “Naw Hkam, Baren Numraw, La Ring, Gu Namti, Watsat Hku Chyingtek hte Ja Tawng Naw” ni hpe chyeju dum hkungga let,

Loimyebum

MANGSHI JINGHPAW WUNPAWNG MANAU POI SUMLA NI

2012-02-11T09:07:00.002+08:00

SINAT MAHKU KATA NA HKRAP MADAI N SEN NI

2012-02-11T06:17:00.003+08:00

MUNGKAN HTA NO-1

2012-02-10T16:52:00.003+08:00

Mungkan de kade daram mi htawng shatsawm masu tim lawu de na shadawn shadang hti hkum hpe yu maram dat yang annau ni a shawng lam hpe yu maram dawdan sa wa lu na re.
1-Mungkan hta grit nyem dik ai mungdan hta No,1
2-Rawtjat galu kaba bawngring lam n'nga dik ai hta No-1
3-Mungkan hta hpaji hparat madang nyem dik ai hta No-1
4-Mungkan hta matsan grit nyem dik ai hta No-1
5-Sut hpaga masa hkrat sum dik ai hte hpaga ginlen na hkrit tsang ra dik ai hta No-1
6-Shing gyim ahkaw ahkang n'lu, n'nga ginlut hkrum dik ai hta No-1
7-Mungkan hta hpyen gumshem up hkang masa hku shaning grai na up hkang ai hta lawm ai.
8-Mungkan hta dinghku majan shaning galu, na dik ai mungdan hta No-1
9-Mungkan hta laknak hpai ai hpyen law dik ai mungdan hta No-1
10-Ana ahkya law dik hte hkam kaja lam n'nga dik ai mungdan hta No-1
11-Tara n'lang ai roirip adip arip zingri ai hta No-1
12-Mungkan hta mayun kumhpa sha ai, myi man tam ai, maidang masawp ai, walang gale ai, bungli n'kangka ai mungdan hta No-1
13-Sadi n dung hkrit tsang ra dik ai mungdan hta lawm ai myen mung asuya gaw anhte myu sha ni hte bawsang ni a matu kade ram n'mai kam ai asuya re hpe lahta de na tang madun ai hpe hti yu sawn yu nna, dinglit mu mai nga ai zawn sakse re. Dai zawn re sakse sakgan nga taw ai mu tawn nga sai myen asuya a mung masa bawngban lam gaw, kam mai na kun?kam ai ni madaw manya shachyoi hkrum na kun? Myen hte matut bawngban ai gaw Jum shama sau shama she rai na re. Annau ni a manu dan dik ai myit hkrum mangrum dik ai ten hta, mungdan gasat di la na de she, mahkrun tam matut ganawng sa wa yang kaja na re. Dai zimsa lam ta masat htu sai, dingda sam ni karen hpu nau ni hte ya hkyak hkyak bai gap hkat nga ai dai mung sakse kaba langai rai nga ai, matut dating gasat ai she madung rai na re.
Hpyen yen tsin yam ni a matu grat dagra re masa sha n'mu dingsa, myen a htu tawn jung tawn ai, hpyen masa sha n'galai shai dingsa galoi n'mai kam ai ngu sawn lu ai majaw matut n'gun dating ga.

Baren Numraw

GASAT GALA JAHKRING NA / N JAHKRING NA JAWM DINGLUN YU GA

2012-02-10T11:22:00.001+08:00

Jinghpaw Wunpawng mungshawa tsa shadang 97% gaw, gasat gala jahkring na hpe n ra sharawng ai lam asan sha danleng nga sai. Myitsu salang langai mi tsun ai gaw, "Panglung Ga Sadi" ngu ai ga hkaw tsun dat ai hte pyi, Myen wa a mayam tai na ga sadi she re, nga nna lachyum shaleng dan ai mung na lu saga ai. Kawa hpe sat nna kanu hpe ret di ai amyu; kahpu hpe sat nna karat hpe ret di ai amyu; myit kade wa dingman ai nga tim, nhkyau daram naw magaw ai amyu, ru sai lakung lama n nga ai hpaw dam amyu, Karai Kasang hpe n chye ai amyu; jahtawng n htu ai amyu ni hte hpa rai naw pawng nga sana ta?
Jinghpaw Wunpawng sha ni a lam hpe, Dr. Ola Hanson ka da ai hta, "The Kachins have never been slaves, and were never tributary to anyone — Jinghpaw ni gaw kade a mayam mung n tai yu ai amyu; kadai hpe mung hkanse n bang yu ai amyu re," nga nna ka da ai lam gaw, daini dai labau malap kau sana kun? Mungshawa ni chyawm gaw, Myen hte tsep kawp n kam pawng sai lam kahtap san shara n nga na sai. Myit yu na lam langai gaw, myit kraw kata e sha rawng nna n ngut ai; ta tut mung naw shakut ra ai. Mungsang sat lawat mung naw htuk manu ra ai. "U a htuk tim ndan a nhtuk" nga ai ga malai hpe mung naw sawn shalawm ra nga mali ai.
Mungshawa a kraw lawang hpe sawk manaw yu ngut ai hpang, KIO ningbaw ningla ni a kraw lawang hpe mung sawk manaw yu ging nga ga ai. Mungshawa gaw KIO hpe masin n du dum, myit n krem dum taw nga sai. Myen hte bawngban hpawng galaw na shiga pru wa ai hte rau, gasat gala woi jahkring nna, moi na hte hpawk sha mayam bai woi yam taw nga na hpe shagri pyi madawn na daram tsang makran taw nga sai. 17 ning gasat gala jahkring ai laman, mungshawa ni a sutmasa, hpaji masa, nga sat nga sa rawt tsaw jat wa ai lam hpa n nga ai sha, Jinghpaw mung na sut rai nhprang ni sha akrin atsai di kau ya hkrum ai; lamu ga yi sun hkauna yawng kashun madu la kau ya hkrum ai; lawu mung de na jahtawng n htu ai ni kaput lung wa nna, masha jahpan hte kaput shamyit magap kau ai hkrum sai. Miwa lauban ni htim kaput nna, Jinghpaw a ginru ginsa hte nga lu nga sha masa yawng shanut mat ai. Ya byin nga ai majan mung, Miwa hte bogyoke ni a kan wang manghkang a ninghkan nan rai nga ai. Tsimyam tsindam hte roi rip nat sat hkrum ai gaw Jinghpaw Wunpawng sha ni sha rai nga ai. Mungshawa ni gaw, 17 ning laman e, KIO magam gun masha lachyawk mi a tinggyeng sut masa kaji kajaw htuk manu wa nna, mungshawa hte dapshawa ni matsan chyaren hkrum sha nga ai hta n-ga, mungdan sut nhprang krin tsai mat wa ai hpe nachying myit machyi ai lam rai nga malu ai.
KIO ningbaw ningla ni a kraw kata e, Myen wa a masu hkalem ga hkap la nna, mungshawa hpe mayam naw woi tai na myit masa n rawng nga ai lam chyawm gaw, hpa kam shut shara n nga ai, ngu mayu ai. Rai tim, KIO gaw mungkan a man e dan dawng ai mungmasa hpung langai rai nga sai. KIO a npu e, mungkan hta dan dawng kajai gumhkawng ai share shagan hpyendap KIA mung adan aleng rai nga ai. KIO hte mungshawa gaw, hka hte nga zawn hkum shan langai rai nga ai. KIO gaw Jinghpaw Wunpawng mungshawa zaw nawng a ntsa, asak hta grau sadi dung lit la ra nga ai zawn, mungshawa ni mung KIO a ntsa ngang kang ai kamhpa tsawra myit hte sadi dung madi shadaw ra nga ai. Mungshawa hta shamyet nna KIO n-gun kaba wa ai zawn, KIO a woi awn ai hku hkan sa yang chyu sha awng padang lu la na ga ai.
KIO a zai ladat pandung gaw, ninggam langai hpang langai (step by step systematical stradegy) masa rai ra nga ai hpe mungshawa ni hku nna myit tau chye na ya ai rai yang, hpa manghkang n nga na re, ngu kam ai. Ning mi nga tim, ya ten mungshawa ni KIO hpe gasat gala n jahkring na matu jawm marawn nga ai nsen ni chyawm gaw, shut ai ngu n tsun lu ai; shadum dingyang, sadi jaw dingyang, hkrap madai dan dingyang re ai lachyum hku ang nga ai. Kraw lawang hpaw malang dan ai hku mung rai nga ai. N nga mat sai KIO Ningbaw Kaba Maran Brang Seng a mungga hta, gawdin htawng ai wa gaw, goal de hkre lup htawng bang mayu ai raitim, dingbai dingna law law hpe naw koi yen ra ai ninghkan, pai de, hkra de, makau de, shingdu de, amyu myu hku hpyen wa hpe shachyai shawam kau nna, hpang jahtum e, lai n li re ai shaloi she, goal ang ang de sun! di htawng bang kau ai zai ladat ni shaleng dan lai wa sai re. Ndai daram nga jang "Soi" ngu ai gaw palin re hpe chye htai la na saga ai.
Myen hte n mai pawng sai lam gaw, KIO ningbaw ni grau hprang chyalu rai sai hpe kam shut shara n nga ai ngu mu ai. Ta tut hta mung hkyen shajin ai lam nga chyalu re ngu kam ai. Jinghpaw Wunpawng sha ni gaw hkwi lu hkwi sha zai ladat, jaugawng gawng ai zai ladat hta kung kyang ai amyu re. Hka kata na nga hkwi na rai yang, machyi shim sha-up ai zai ladat lang chye ga ai. Mahkam hkam yang, sha-it hkap yang, maiwang jawm yang, zai ladat amyu myu shaw ra ai. Amyu sha ni a awng padang shadip jahpang lu la na matu gaw, lahta na zai ladat ni hta grau kaba ai zai ladat lang na chyalu rai nga ai. Dai zai ladat hpe jum tek hpareng nga ai gaw, KIO re hpe chye na ra ai. KIO a sat lawat ntsa masin n du dum ai akyang hpe mara hku n mu ai zawn, KIO a mungmasa shamu shamawt ai ninggam, hpyen masa shamu shamawt ai ninggam ni gaw, hpyang ai ngu n tsun lu ai madang hta du nga sai.
Lahta na lam ni mahkra a ntsa, ahkyak hta ahkyak dik ai lam chyawm gaw kaga n rai, anhte kade mi zet dum, kung dum, ram dum tim, Karai Kasang n lawm yang kaman sha rai nga ai. Myen Asuya hta grau grau hkik hkam n-gun rawng ai mungdan asuya ni, anhte a myi npu e sha agrawp kadawng mat ai sakse law law nga nga sai. Mungkan labau hta hkik hkam dik ai Roman Empire sum agrawp mat ai gaw, hpa majaw rai ta? Karai Kasang hte tsan gang mat wa ai majaw rai nga ai hpe labau hta mu lu nga ai.
Dai re majaw, KIO ni, KIA ni, mungshawa ji nban ni, hpung woi ni, sut hpaga la ni, hpaji munu ni, yi sun hkauna masha ni, tara kasa ni, tsi hpaji munu ni, ramma ni, shayi hkawnjet ni, dinghku num dinghku la ni, nu num ni, wa la ni, buga mungdan e shanu nga ai ni, maigan sumtsan du nga ai ni, hpyen majan ginra e lit la nga ai ni, yawng hte gaw, chyahtum chyalai n-gun rawng ai Yehowa Karai Kasang hpe myit masin, kraw lawang, myit mang mahkra hte kamhpa shamyet shanat hkrit hkungga let, hkawm sa asak hkrung lu ai rai yang, awng padang gaw anhte a man e du nga sai, ngu ai hpe myit dik myit hkut ra nga ga ai.
Ndai lang na majan gaw, mauhpa laklai nga ai lam yawng mung mu chye lu saga ai re. Sinlum Pangmu mare, Hanson Masat Nawku Htingnu kata na dung lahkum ni agrawp ju nna shat shadu sha ai, wan kra ai, nawku htingnu kata awu asin di da ai Myen hpyen ni hpe KIA hpyenla ni n du dep lu ai laman, nam na lagat wunawng e jawm nna, agying agang tsimyam hkrum sha ai sha n-ga, tsawmra mi si ai du hkra byin lai wa sai lam mung mauhpa langai rai nga ai. "Ntap bum" hpe "N tat bum" ngu amying shingteng pyi galai kau ra ai lam mung, law la ai Myen hpyen ni htim lung wa yang, Shanglawt hpyenla ni masum mali hte sha gap sharu kau kau di lu nga ai. Shanglawt Brang ni byin nna n rai; Karai Kasang nan gasat karum ya nga ai. Gasat poi byin wa shagu, Shanglawt Hpyenla ni hpang maga, n chye ai masha n-gun ni gasat karum ya ya sha arai nga ai hpe sakse hkam dan ai mung yawng na lu saga ai.
1948 ning May shata (14) ya shani, Israel mungdan shanglawt lu ai hte rau, shanhte hta n-gun htam hkying mun grau kaba ai Arab ni jawm shinggrup htim gasat bang wa sai. Dai ten Israel ni hta gasat nbung li masum hte hpyen n-gun 300 sha naw lu ai. Raitim ta tut gasat gala byin wa ai shaloi, Israel ni hpang maga, n chye ai hpyen luksuk kaba ni gasat karum ya nga ai gaw, myit le le ai n rai; lamu ganghkau kaw nna jak shagan hte nan sakse pra pra mu mada nga ai majaw, Karai Kasang a mau hpa magam bungli hpe chye lu nga ai.
Yehowa Karai Kasang chyu sha chyahtum chyalai n-gun rawng ai wa rai nga ai. Mungmasa ga ngau hku tsun yang, Mungshawa a madi shadaw n lu ai mungmasa wuhpung gaw sum na chyalu rai nga ai zawn, makam masham masa hku tsun ga nga yang mung, Karai n lawm ai magam amu mahkra gaw kaman lila sha rai nga ai. Jinghpaw Wunpawng sha ni hpe Karai Kasang karum ya nga ai gaw, adan aleng rai nga ai. Karai Kasang hte nhtan n shai hkra sadi sahka ra nga ai. Karai Kasang hte rau sha rai nga yang, myit kaji na lam n nga ai. "ANHTE A AWNG PADANG, YEHOWA KARAI KASANG" rai nga ai law....

Watsat Hku Chyingtek

KAMPAITI BGF HPYEN LA NI MAW HPYI HPYI SHA RA NGA

2012-02-10T11:09:00.000+08:00

February (10) bat Manga,
Jinghpaw Mungdaw Kampaiti daju NDA hpyi galai BGF hpyen hpung na Jinghpaw ma ni nga yak nna lam ntsa hkan lai wa lai sa ni gaw gumhpraw hpyi sha nga ma ai lam shiga na chye lu ai. Miwa ga Mangshi Manau Poi kawn Jinghpaw Mung Myitkyina Mare de bai n htang wa ai poi sa masha ni kaw Kampaiti hte Sadung lapran kaw gumhpraw hta sha wa ai re lam, n dai hku gumhpraw hta sha ai lam hta grai wa a dan a leng hku n re sha, kasing kasun ladat hte hkap hpyi ai re lam na chye lu ai. Manau poi de na wa ai Myitsu langai tsun wa ai hta shagyeng shama rai hta sha ai gaw nre, n hpyi yang gaw sha na, jai na hpa n nga rai lagu lagyim rai hpyi sha taw nga ma ai, poi na wa ai myit su n kau mi gaw matsan dum nna hkying langai lahkawng, dang lu ai ni gaw dang lu ai hku jaw kau da ma ai, nga tsun dan wa ai. Ya na zawn gumhpraw hta sha ai hpe ntsa na ni chye kau na gaw hkrit, mung shawa masha ni tsun jahpoi hkum na mung tsang, n hpyi sha yang gaw tinang sha kyet re ai masa rai malu ai nga matut tsun dan wa ai.

MANG SHI MUNGKAN MANAU POI NA NGWI PYAW AI HTE BAI DU WA

2012-02-10T10:51:00.000+08:00

February (10) bat Manga,
Miwa Gumsan Mungdan Mangshi Mungkan Manau Poi Kaba de Jinghpaw Mungdaw Myitkyina kaw kaw na sa du shang lawm ai Myu Sha ni yawng marai (183) rai nna, Wunpawng Ning Ja (WNJ) hte Mangshi de tau hkrau sa du taw ai ni hte rai yang (200) jan sa du shanglawm lai wa sai lam shiga na chye lu ai. N dai hta Manmaw, Sammung, Mandalay, Yangon hkan na sa ai ni hpe n sawn shalawm ai lam mung chye lu ai. Myitkyina na sa du shanglawm ai ni gaw February (8) ya shani Myitkyina mare kaba de bai n htang du wa sai lam shiga na chye lu ai.

GALOI DU KAM NA?

2012-02-10T00:14:00.002+08:00

Hka kata sumla zawn hkrang shapru nga ai, mung masa bawngban mahtai chyawm tam chyawm shapraw nga ai hpe dum gin saga ai. Laika man law law hta ka sang lang lai wa saga ai. Mu yu na yu hkrum sha yu sai moi mwi mabyin hpe lang hte lang naw kai dan ra nga ai gaw kai dan ai wa madaw kaya nsu ai she byin tai sam sai.

Shaning galu anhte ra awng sharawng ai Madu Mungdan Mungdaw madu up hkang lu na hpe hpyi ai gasat ai gade ning na wa saga ta? Anhte ra awng sharawng ai hpe asan chye saga ai mi, hpa rai myen hte naw bawngban chyai nga na rai ta? Alang lang masu sha ai, alang lang sadi hpyen ai hpe shari mu hkrum sha wa saga ai. Tsaw ra ai myu tsaw mung tsaw ai ningbaw ningla ni e jaw ai zawn zawn rai nna, tai hpyen wa hpe n'gun jaw ai, ma ginsup chyai ai zawn byin nga ai. Ningbaw ningla langai mi a dawdan ai ga gaw mung chying sha law law a lu lawm ai manu dan dik ai asak hkrung lam hte seng ai re. Dai hta n'ga madu lamu ga hta nga pra ai hkrung mahkrung tu matu yawng hte seng ai. Tinang prat hta tinang dawdan ginlut ai a majaw yawng mai hten run chye ai hte galai shai chye wa ai re. Mung shawa law law a nsen gaw hpa pru nga ai kun? Gara de yawng nga ai kun?

Myit yu yang nshut na re.
1-Dai ni myen gaw hpyen masa nshai ai.
a-Anhte lamu ga hta htu tawn jung tawn ai hpyen dap grai n'dawm ai.
b-Hpyen yen tsin yam ni a matu masing masa jahkrat nna galaw sa wa ai lam n nga ai.

2-Panglung ga sadi.
a-Panglung ga sadi hpe ahkyak n.tawn sai.
b-Munghpawm masa n'nga sai. Shagan 14 nkap sai. Dai ni na dawnghkawn gaw shagan 1 sha kap sai. Munghpawm n'nga sai lachyum re.

3-2008 gaw da ai tara.
a-Dai ni myen ni ra lata galaw nna chyawm hpawng de nga ai rapdaw gaw 2008 tara kata kaw daw dan shagrin da ai rapdaw re.
b-2008 gawda ai tara galai lu na lam n'nga ai. Ra lata hta anhte shang lawm lam n'nga ai.

4-Mung masa bawngban ai.
a-Mung masa bawngban ai hta mung shaning galu anhte hpa baw ra ai hpe alang lang hpyi ai hte dai ni du ninghkap gasat nga ai gaw sakse re.
b-Simsa ga baw dat nna bawsang ni hpe shazim tawn ai masa sha re.
c-Ten garawt ai masa hte n'gun ban la nna myit makru shadaw ya ai masa re.
d-kalang tsun tawn hpyi tawn sai majaw alang lang bawngban nra sai, mahtai jaw na lam sha ang sai.

5-Hpyen masa.
a-2008 a gawda ai tara hta hpyen dap (1) sha nga na.
b-Rapdaw hte Gum San Magam madung nre. Hpyen dap hpe n'lai lu ai..
c-Myen mung hta daru magam arawng aya (2) jum tek ai masa re.
d-Simsa lam bawngban nga ai myen a dat kasa ni gaw sumla hkrang sha re. Hpyen masa shai ai lam n'nga yang gaw hpa bawngban nra sai ngu mu ai.

Anhte hpa hpyi nga ai, hpa ra ai hpe mung myen chye chyalu re majaw sari sadang nga nga hte mahtai hpe la madat yu nna matut sa wa na anau ni a mung masa hpyen masa hpe dawdan galaw sa wa yang kaja na re. Myen tsun shagu hkan galaw nga ai mung myen a npu taw ai hte bung ai zawn, myen gaw shanhte ra ai madang de ndu dingsa ten garawt nna maw lanyet shachyai nga na sha re. Munghpawm masa n'shapraw sai hta annau ni hpa rai myi man kaji hkam nna naw sa pawng na rai ta? Langai sha ngam tim matut gasat sha mai sai ngu mu ai.
San seng tsawm htap ai mara kata ai n'sam hte ma kaji ni nang hpe mau let yu nga ai, hpu shawng hpuba ni e.
Naw dating gasat ga.

Baren Numraw

DUNG (12) GINRA DE GAP

2012-02-09T13:48:00.002+08:00

February (9) bat Mali
Wunpawng Mungdan Shanglawt Asuya, Dap Dung (12) Ginra rai nga ai Manmaw Mung Hkawng maga February (8) ya shani myen asuya hpyen hpung ni shawng sa htim gasat wa ai majaw Dung (12) na myu tsaw share shagan ni hte shani ting majan byin gasat lai wa sai lam na chye lu ai. Majan shiga kata lam hpe gaw atsawm rai nchye lu ai.

The wicked attacked launched by Burmese army against KIA 12th Brigade Mung Hkawng village on 08th February 2012. In spite of ongoing Peace talk between KIA and Burmese regime government, Burmese army instigated attack against KIA by surprise according to KIA frontline report. However KIA was trying to calm down the situation during discussion between them. But KIA troops have no choice must defend against Burmese soldier’s intrusion and have defeated Burmese soldiers successfully the end of the day. The exact casualties from both side still unknown and Burmese army and government has no genuine intention for change and progress for the country. This is the fact of Burmese government and army for the past over 50 year since military rule the country. We Kachin people and KIA/KIO have witness it for the past many decades and Burmese army launched civil war against Kachin people. We KIA/KIO will continue to defend our Kachinland and our people until we have own freedom and right to rule and determination for our future.

MYEN HPYEN SADI RUN, SHARE SHAGAN (3) HKRAT

2012-02-09T13:38:00.004+08:00

February (9) bat Mali,

Wunpawng Mungdan Myikyina Kampaiti lam Sadung mare hta mani February (8) ya shani myen asuya dap ni gaw tinang KIA Dung (23) dap ni nga ai shara langai hpe ndum shami sa wang htim gasat ai majaw tinang KIA Myu tsaw share shagan marai (3) hkrat sum mat ai lam na chye lu ai. Ya na zawn myen gaw sadi ndung ai simsa lam bawng bang nga ai aten majan hkring nga ai ten hpe ahkaw ahkang la nna sadi run let shang htim gasat ai majaw tinang KIA maga sum machyi ai re lam chye lu ai. Tinang KIA maga na gaw ndai laman gap gasat ai lam ni hpe mai byin ai daram jahkring da ai aten re, dai hpe Myen gaw tara nlang ai sha ahkaw ahkang la nna tinang KIA hpyen dap de shang wang htim gasat ai re lam na chye lu ai. Dai hpang tinang KIA maga na Myu tsaw share shagan ni mung shani tup masin nsi matai htang let myen hpyen dap ni hpe shachyut wang gasat ai hta myen maga na tsawmra bai si hkala mat ai lam mung na chye lu ai, mana maga jan du nsin sin du hkra gasat hkat nga ai lam na chye lu ai.

There was another wicked surprise attacked by Burmese army against KIA 23 Bridge in Sadung village on 08 February 2012. It was 2nd ruthless attacked by Burmese army during peace discussion between KIA and Burmese government regime in spite KIA is trying to minimizes arms clash during peace talk with regme government. The fierce attacked have lost 3 KIA soldiers life while Burmese army take this time as opportunities to launch brutal and wicked attack against KIA. However KIA have defended successfully against intrusion attack by Burmese soldiers. This brutal attacked cited that Burmese army and regime government has no intention for national reconsolation and peace for the country. According to frontlne report that KIA is calm the fighting during discussion with regime government, therefore it caused unexpected casualty from KIA troop. However KIA troop have retaliate the Burmese army and many of Burmese soldier died and wounded. The fighting lasted till evening according to frontlline report. We condemn the wicked attacked by Burmese army and they have always broke the priciple, disregard mutual understanding. It shown that regime government has not change yet in their oppressive stand toward Kachin people and always act provocatively by undermining the important of peace and stabality for the nation as well as for the country.

ANHTE HPA MAJAW MAJAN GASAT NGA AI NGU AI HPE HKRAK CHYE RA SAI

2012-02-08T17:56:00.002+08:00

Salang Naw Hkam ka n na internet kaw mara ai, “Yup Tik Tik” ngu ai ga baw hte ka da ai laika hpe ngai mung madi shadaw ai, bai, shi a laika hti yu n-na ka jaw ai ni a ningmu ni mung grai kaja ai, grai n gun lu hpa re. Ngai shi hte hkrum ai shaloi tsun ai the maren ngai gaw W.P (Wun Pawng) amyu sha ni the ningbaw ningla ni hpe tsun mayu ai gaw “Pang Long” ga sadi hpe anhte W.P myu sha ni kajai nga na malai, dai hpe Myen ni shadik na matu hpyi nga, kasat nga na malai, dai Pang Long ga sadi a majaw, anhte W.P myu sha ni Myen a mayam tai mat sai, ngu ai hpe myit dum ra sai.

Kaja wa tsun ga nga yang gaw dai Pang Long ga sadi a shawng e W.P myu sha ni gaw kadai amyu sha ni a n pu e n re, mayam mung n re. Bai, Myen a mayam tai na matu anhte a shawng na ningbaw ni dai Pang Long ga sadi hpe galaw ai mung n re, Myen the maren mara nga na matu she galaw sai lam teng ai re. Raitim, Myen wa gaw dai ga sadi hpe jai lang n na anhte W.P myu sha ni hpe shanhte a mayam shatai na matu galaw mat wa sai. Ya mung shanhte dai kaw na shayawm na lam anhte n mu ai.

Myen wa a masa gaw, ya Myen mung kata kaw nga ai amyu bawsang ni hpe Myen shatai na masa, yamsha na masa sha nga ai. Dai hku masa shanhte kaw n nga yang gaw moi kaw na Myen mungdan gaw Federal mungdan rai nga sana re. Myen ni Federal masa ngu ai hpe n chye ai majaw galaw nga ai n re. Anhte hta grau n na pyi chye ma ai. Raitim dai masa hpe tingsa kau da n na Myen shanhte gaw madu mungdan atsuya tai let, kaga amyu bawsang ni hpe up hkang sha mayu ai majaw, yam sha mayu ai majaw, dai ni du hkra Madu mungdan (Pyi ma) astuya hku n na uphkang sha ai tara hpe n galai mayu ma ai re. Ya mung galai na masa n nga ai.

Shanhte a simsa ai masa ngu ai mung, hkalem sha na matu galaw ai masa sha re. Manghkang hpe, kaja wa nan simsa ai hku n na hparan la na matu nga n na galaw ai masa n re. Kaja wa shanhte, myusha bawsang ni hte simsa ai hku n na manghkang hpe hparan na masa nga yang gaw, lai wa sai 60 ning laman hta amyu sha bawsang ni a ga hpe madat n na hpa majaw manghkang hpe n hparan la ma ai i? Dai hpe yu yang gaw, Myen ni gaw, manghkang hpe teng man ai hku hparan na malai, laiwa sai 60 ning laman hta, myusha bawsang ni hpe Myen shatai na masa, shing n rai shamat kau na masa kade daram awng dang sai ngu ai hpe sha maram nga na re. Ya mung, du na 20 ning 30 ning, shing n rai 60 ning ram hta raiyang kade daram shanhte a masa awng dang wa na ngu ai hpe sha sawn yu maram nga na re.

Dai re ai majaw, Myen ni a simsa ai masa ngu ai gaw salang Naw Hkam tsun ai zawn aten hpe garawt ai masa sha re. Anhte ni yawng chye sai the maren, 1994 ning hta KIO/KIA ni the simsa lam galaw sai, raitim 17 ning laman hta, mung masa lam hpe n bawngban ai. Dai zawn kaga amyu sha ni hte mung simsa ai lam hpe galaw sai, raitim kadai hte mung, mung masa hte seng n na n bawngban ai. Ahkyak ai shara ni hta Myen hpyen dap ni grau ang hkra sha galaw la sai. Bai myu sha bawsang ni hpe gaw BGF tai ra ai nga wa ai. Dai re majaw ya bai simsa lam mi la tim anhte hpyi ai lam ni hpe Myen ni jaw na ngu n mai kam mat sai, anhte bai n rawt lu hkra gara hku galaw shakrip sawa na ngu ai hpe sha galaw shakut tik tik rai wa na ma ai.

Kaja wa Federal masa ngu ai hpe anhte hpyi ai zawn Myen ni lama jaw yang mung simsa ai lam kaja wa lu na kun? Ngu ai hpe mung anhte bai myit yu ra sai. Hpa majaw nga yang, anhte a Rawt Malan ai labau hpe yu dat yang, mung masa kaja ai hpe lu na matu (democracy luna matu) n re, Myen ni anhte a amyu sha ni hpe yam sha na, dangsha na, amyu shamat kau ai du hkra galaw na masa nga ai a majaw, byin pru wa ai majan she re. Ya na (2011-2012) majan hta Myen ni anhte myu sha ni hpe, masha ngu n sawn ai sha zingri ai, sat kau ai, yam sha ai, anhte a dum n ta ni, sut ni yawng hpe jahten kau ai lam ni yawng hpe yu dat yang anhte amyu sha ni hpe shamat kau na galaw ai masa re ai hpe asan apra chye lu na sakse rai sai. Mungkan hta, majan hpan masum sha nga ai, langai gaw kaga amyu sha ni tinang a amyu sha ni hpe roi rip yam sha, dang sha, zingri sha ai a majaw byin pru wa ai majan, mung masa majan the makam masham a majaw byin pru wa ai majan, ngu ai masum sha nga ai re. Dai majan hpan masum hta na, ya anhte W.P myu sha ni Myen hte byin nga ai majan gaw numbat langai na majan hpan re. Mung masa galai na matu, Democracy lu na matu kasat ai majan n re.

Dai re ai majaw, Myen mungdan kaw e, democracy mi galai wa tim, anhte ni simsa ai lam lu na n re. Simsa ai lam n lu yang gaw majan ngu ai hpe naw kasat ra na sha re. Hpa majaw nga yang, democracy mi galai wa tim Myen ni anhte hpe dang sha ai lam jahkring na n re. W.P. mungdan kaw-e, jinghpaw amyu sha ni hta Myen ni grau law htam wa hkra shalun na sha re. Ya mung, Myitkyina ginwang hte Man Maw ginwang kaw, Myen ni kade daram rai sai ngu ai hpe sha hti maram nga na re. Ya shanhte Hugawng Danai Ginwang kaw e, Myen ni sen lahkawng (200,000) shalun na ngu ai lam hpe 2010 shaning kaw na n dau tsun sai re.

Dai zawn re ai masa nga ai majaw Myen ni Federal masa lama mi hkan galaw wa tim, Jinghpaw mungdan kaw e simsa ai lam luna hpe myit mada hpa n nga ai. Moi (1949-1950) P.N.D.F (Pawngyawng National Defence Force) ningbaw kaba Duwa Naw Seng tsun ai ga gaw, “Anhte Myen hte sha rau nga yang gaw, galoi mung anhte amyu sha ni ngwi pyaw simsa lu na n re, dai majaw Jinghpaw Wunpawng mungdan shanglawt lu hkra kasat ra ai” ngu tsun ai ga gaw daini duhkra teng nga ai re. Mayam gaw, mayam kaw na lawt lu yang she simsa ai lam lu mai ai. Dai zawn, anhte W.P. myu sha ni simsa ai lam hpe lu na matu gaw, Myen ni a yam sha ai kaw na lawt lu yang she simsa ai lam hpe lu na re. Dai gaw awngdawm shanglawt she re, Federal n re. Karai Kasang anhte hpe jaw da ai lamu ga hpe anhte nan madu lu yang she, anhte ni simsa ai lam teng sha lu na re. Dai Karai Kasang jaw da ai lamu ga hpe, anhte hpe dang sha nga ai amyu sha ni a lata kaw jaw da n na anhte ni simsa ai lam lu na ngu ai gaw n byin mai ai re. Dai majaw, anhte hpa majaw majan kasat nga ai ngu ai hpe hkrak sha chye ra sai.

Ka ai,
La Ring

RAWT MALAN NINGHTOI, SALT LAKE CITY, USA

2012-02-08T10:39:00.002+08:00

February (9) bat Masum,

USa mungdan du Jinghpaw Wunpawng Sha ni kawn (51) lang na Rawt Malan Ninghtoi Masat Lamang hpe lai wa sai February (4) ya shani (buga hte aten bung hkra) Salt Lake City, Utah, awng dang ai hte galaw la lu sai lam shiga na chye lu ai. N dai lamang hta Salt Lake City kaw shanu nga ai Jinghpaw Wunpawng Sha ni hte rau, Hkang, Karen, Kaya, Mon, Yakhaing hte Myen amyu sha bawsang ni mung wu wu di di shanglawm sai wa sai hpe chye lu ai.

GARA MAHTANG TA?

2012-02-07T21:08:00.001+08:00

Simsa hte gap hkat jahkring
Shan a lachyum gaw kaning?
Matsing hkaja yu na mai,
Ndai hku she mu mada nngai......

Simsa lam ngu ai gaw,
Mabyin npawt hpa majaw;
Byin wa ai labau hpe sagawn,
Mungshawa nsen hpe shabawn;
Mungmasa a majaw byin ai hpe,
Mungmasa ta tut sat lawat hte;
Bawngban let jawm jahkrup,
Sum mat ai ahkaw ahkang bai hpring tsup;
Myu sha ni a ra sharawng yaw shada,
Madu mungdan madu up na,
Rau dung rau nga gasat n ra,
Dai gaw simsa lam nan rai nga.......

'Gap hkat jahkring' ngu ai hpe,
Na pyen lashing hta na ai hte;
Masin salum nan kahpra,
(17) ning hpe bai dum wa;
Mungdan kata na nhprang sut rai,
Yawng mayawng atsai awai;
Amyu sha ni gaw yawn madai,
Tsasam ni gaw mani sai;
Mali-Nmai zup mung ganoi mat,
Sengmaw ginra mung ganoi tat;
Galaw lu galaw sha shara yawng mye,
Buga sha ni chyaren re;
Tsasam ni hkrai lashoi jum,
Madu mungmasa gaw shoichyum..........

Bogyoke ni gaw kabu gara;
Lauban ni gaw hpaga ga,
Mungmasa lam hpe gaw rap;
Myu shamyit lailen de bai kap,
Sat nat roi rip lam ni hkrai,
Myu sha ni nan hkrum sha sai......

Ya mung dai zawn n byin u ga,
Zai ladat masing naw shaja;
Maigan wa a sumbu masha n tai,
Myu sha labau lit n mai hprai;
Tengman sanseng lam hta tsap,
Sawt ai lam hpe yawng tawn rap;
Grin ngang ai simsa lam lu hkra,
Mungmasa hpe madung tawn ra;
Myit hkrum lam hpe n-gun shatai,
Padang ninglaw teng sha lu na rai..

Ja Zin Htoi

JINGHPAW WUNPAWNG MUNGKAN MANAU (MANGSHI)

2012-02-07T19:14:00.002+08:00

February (7) bat Lahkawng,

Mangshi mare na, Jinghpaw Wunpawng Mungkan Manau a lahkawng ya ngu na shani jahpawt daw hta, mungkan ting na du sa ai Jinghpaw Wunpawng Dat Kasa ni marai 100 jan hkrum zup let, htunghking hte laili laika a lam hpe madung tawn tsun jahta bawngban n-gun jaw ai lam jawm galaw la lu sai lam na chye lu ai. Myitkyina, Manmaw, Sammung, Yangon, America, Singapore, Thailand, Yunnan kaw na Kasa Salang ni tsun bawngban ai hta, kaga myitsu kanu kawa ni shang lawm hpaji jaw, n-gun jaw shangang shakang la sai lam na chye lu ai. Dai hpang, Mangshi Htunghking Htingnu Rung ndaw e labau shang masat masa sumla hpe jawm dem ma ai.

RAWT MALAN NINGHTOI LAMANG, MALAYSIA

2012-02-07T14:50:00.002+08:00

Februay (7) bat Lahkawng,

Malaysia du Jinghpaw Wunpawng Myu Sha ni kawng (51)Ning hpring (52) Lang na RAWT MALAN NINGHTOI lamang hpe Februay (5) ya shani awng dang ai hte galaw la lu sai lam na chye lua i. N dai Lamang hpe Malaysia Mungdan Kuala Lumpu Mare kaba Bukit Bintang lawk na Mungdan Ngang Kang Komiti (Malaysia) a Zup Chyai Hpawng Shara hta jahpawt daw (10:00am kawn 12:00noon) ten d hkra ngwi pyaw ai hte galaw la lu sai hta, n dai lamang hta saw saga da ai Hpung woi Sara ni hte Malaysia du Jinghpaw Wunpawng Myu Sha ni marai (100) jan sa du shang lawm lai wa sai lam hpe mung na chye lu ai. Du sa ai shawa wa masha ni yawng hpe Mungdan Ngang Kang Komiti (Malaysia) kawn Jinghpaw shat shatmai ni hte daw jaw ya lai wa sai lam mung na chye lu ai. Grau nna n dai lamang hta lak lai ai lam gaw "MALAYSIA HTE SINGAPORE MUNGDAN DU JINGHPAW WUNPAWNG AMYU SHA NI A SHAWNGLAM MUNG MASA MYIT HKRUM NDAU LAM" hpe mung ka n dau lai wa sai lam shiga na chye lu ai.

MALAYSIA HTE SINGAPORE MYIT HKRUM N DAU LAIKA

2012-02-07T14:29:00.000+08:00

AUSTRILIA DU MYU SHA NI RAWT MALAN NINGHTOI LAMANG GALAW

2012-02-07T14:22:00.002+08:00

February (7) bat Lahkawng,

(52) Lang na RAWT MALAN NINGHTOI MASAT LAMANG hpe Australia kaw du nga ai Jinghpaw Wunpawng Myu Sha ni kawn February (5) ya shani hkying (12:00 noon) ten hta Melbourne kaw galaw lai wa sai lam shiga na chye lu ai. N dai lamang Austrilia du nga ai Jinghpaw Wunpawng Myu Sha ni marai (90) ram sa du shang lawm lai wa sai lam hpe mung na chye lu ai.

RAWT MALANG NINGHTOI LAMANG (TEXAS,USA)

2012-02-07T14:14:00.003+08:00

February (7) bat Lahkawng,

(52) Lang na RAWT MALAN NINGHTOI MASAT LAMANG HPE USA, Texas kaw du nga ai Jinghpaw Wunpawng Myu Sha ni kawn February (5) ya shana maga de USA aten hkying (5:00pm kawn (10:00pm) du hkra galaw lai wa sai lam shiga na chye lu ai. N dai lamang hpe Texas na Fort Worth (Trinity Hotel) hta galaw ai re lam hte lamang hpe numdaw 2 hku galaw lai wa sai lam, n dai lamang hta Fort Worth hte Dallas nga Jinghpaw Wunpawng Myu Sha ni marai (150) ram sa du shang lawm lai wa sai lam hpe mung na chye lu ai.

JINGHPAW MUNGKAN TSAWM SHAYI

2012-02-07T00:46:00.000+08:00

2012 ning, february (6) ya shana galaw ai Mangshi Mare na Mungkan Manau Poi a Jinghpaw Mungkan Tsawm Shayi Shingjawng Poi Kaba hta, Jinghpaw Mung, Myitkyina Mare, Wunpawng Ningja Hpung (WNJ) kaw na Shayi Mai Lung gaw nambat (1), Shayi Mai Ra gaw nambat (3) lu shajang ai lam akahtet hpoi hpoi shiga na lu ai. Ndai tsawm shayi shingjawng poi gaw, American, England, Singapore, Myanmar, Yunnan hte Kachinland ni kaw na Jinghpaw Wunpawng myu shayi ni sa du shingjawng ai poi re lam chye lu ai.

SHWELI ZUPHPAWNG HTA KIO HTE MYEN HKRUM SHAGA AI LAM (MYANMAR TIME)

2012-02-06T23:31:00.002+08:00

MUNG SHAWA NINGGANG SHAGRAU

2012-02-06T23:19:00.001+08:00

JAPAN DU MYU SHA NI RAWT MALAN NINGHTOI LAMANG GALAW

2012-02-06T22:59:00.002+08:00

Japan Mungdan du Jinghpaw Wunpawng Amyu sha ni kaw 5 February, 2012 (Laban) shana de, 6:00 pm – 9:00 pm) lapran, Tokyo mare kaw ( 51 ) ning hpring. ( 52 ) lang na Rawt Malan Masat Ninghtoi hpe awng dang ai hte galaw la lu sai lam na chye lu ai. Ndai lamang hta, Kanu mungdan kata Majan a majaw tsin-yam hkrum nga ai sai rum amyu sha ni a matu, tsawra kumhpa alu ni mung hta shinggyin la lu sai hta sha n-ga, (CNC, Japan) hte (Zomi Association, Japan) hpunau Hkang amyu sha ni kaw nna mung, hpyen yen tsin-yam ni a matu laksan alu sak jaw lai sai shiga na chye lu ai.

Lamang hpe (Daw -2) garan nhtawm, daini Kanu mungdan de ta tut hkam sha nga ai mabyin, shiga, sumla ni hpe (Power Point) hte htawng madun sanglang dan ai lam ni, myu sha lam yan mahkawn, hkrang shala, maumwi (Dramma) ni mung shang lawm lai mat wa masai lam shiga na lu ai. Ndai masat poi lamang de, laksan shaga da ai Hpunau Japan myitsu ni, Wunpawng Mungdan Shanglawt Ginjaw de (Judo) hpaji hpe sa sharin ya lai mat wa sai Japan Judo Sara (Mr. Miura), kaga amyu bawsang de na Mungchying Hpunau ni hte Japan du myu sha ni yawng marai ( 100 ) jan sa du shang lawm lai wa sai lam hpe na chye lu ai.

JINGHPAW MUNG HTUNGHKRING HPUNG NI MANGSHI DU SAI

2012-02-06T09:59:00.003+08:00

MANGSHI:- 5-2-2012

Miwa Gumsan Mungdan, Mangshi mare e galaw na Mungkan Manau Poi Kaba de, Sutdu Kaba Majoi Gintawng Yup Zau Hkawng woi awn sa wa ai Jinghpaw mung, Myitkyina mare daju kaw na poi sa masha marai (183) gaw, 5-2-2012 ya shani Miwa hkying 1:45 p.m aten hta Mangshi mare de du shang wa ma ai lam shiga na chye lu ai. Du sa wa ai manam ni hpe Saphkung Mungdaw na mung up du salang ni rai nga ai Duwa Lasang Yaw, Duwa Zahkung Gam hte Duwa Hkalam Seng Awng ni gaw, madum sumpyi hpung ni hte rung di hkap hkalum la ai lam na chye lu ai.
Du shang wa ai manam ni hpe, Duwa Lasang Yaw gaw, kabu gara hkalum mungga tsun ya ai sha n-ga, shada tsawra pu gang sin machyi hkat ai kumla hku nna htunghking shat lit lahkawng mung ap ya sai. Myitkyina bu nu num ni hte shayi shadang ramma ni yawng mung, htunghking mahkawn yungwi hte lahpawk she htem rai mahkawn shapyaw la sai. Matut nna mung, law la ai manam ni yawng hpe, shatmai hpan 15 hta n yawm ai hku shani shat hkru hkru kang kang hkap daw jaw la sai. Myitkyina bu ni hpe hkap bawp hkalum la ngut ai hpang, Kutkai, Manmaw, Lawu Ga Ginwang de na Chyurum Jinghpaw Wunpawng sha ni mung, hpung hte hpung matut manoi du shang wa ai lam na chye lu ai.
Ndai Mungkan Manau Poi ngu ai hpe 2010 ning kaw nna galaw hpang ai rai nhtawm, lahkawng ning hta kalang matut manoi galaw na masing nga ai lam hpe mung na chye lu ai. Ndai lang na Mungkan Manau Poi gaw, America (USA), Canada, Britain, Singapore, Malaysia, Thailand re ai mungdan ni hkan na Jinghpaw Wunpawng sha ni ram ram wa du nga shajang sai lam hpe mung na chye lu ai rai.
Ndai zawn ra n rawng hkra kabu gara hkap tau la ai lam gaw, kadai gara kaw mi nga nga, myit mang langai sha rai nga ga ai lam hpe sakse madun ai lam rai nga ai law.

(52) LANG NA RAWT MALAN NINGHTOI LAIZA KAW GALAW

2012-02-05T18:28:00.000+08:00

Feruary (5) Rawt Malang Ninghtoi
Wunpawng Mungdan Shanglawt Asuya a (52) Lang na Rawt Malan Ninghtoi Masat Lamang hpe Wunpawng Mungdan Shanglawt Asuya a Ginjaw Ginra rai nga ai Laiza Mare Kaba kaw galaw lai wa sai lam na chye lu ai. Lamang hpe Laiza Lahta Tsang Jawng Rawt Ninghkawng Gawknu kaba kaw galaw lai wa sai lam shiga na chye lu ai. Dai hte maren sha Laiza Mung Shawa Tsirung na Wun Jat Gawknu hta mung Rawt Malang Ninghtoi Lamang hpe galaw lai wa sai lam shiga na chye lu ai. N dai Rawt Malan Ninghtoi Lamang ni hta KIO/KIA Ningbaw ningla ni, magam gun KIA myu tsaw share shagan ni hte mung shawa daw tsa sa du shang lawm lai wa sai lam shiga na chye lu ai.

(52) LANG NA RAWT MALAN MUNGGA

2012-02-05T09:28:00.001+08:00

KNO NINGBAW KABA, (51) NING HPRING RAWT MALAN MUNGGA

2012-02-05T09:21:00.001+08:00

MAN YAWNG KAJA

2012-02-05T02:39:00.000+08:00

Labau ginrat, mungga jasat
Gasat gala, majan ginra
Mahkra jasim, mungdan sim hkra
N sim n sa, shakut shaja
Tsawra myit kaba, mungmasa jauya ni hpe,
Manga yunglat hte rau, hkungga shagrau dat let,

Mungdan ngwipyaw na matu,
Shawng lam hpe sung sung myit yu,
Lai sai labau hpe hpaji shatai,
Mungshawa nsen hpe madat mara rai;
Shanan lang wa nhkun n hkrat hkra,
Shanglawt bandung hpe madung dat nna,

"Lagat si mung di sha, ndan nsen mung maja" nga ai hpa
Myu sha ni a tsinyam hpe myit yu,
Chye ninglen sadi n run na matu,
"Ngang lu hta hpa ra tai"
Myit n dawt let htet dat ai rai.

Zin Htoi

JA PU MARE KAW GAP

2012-02-04T22:44:00.003+08:00

February (4) bat Kru,
Jinghpaw Mungdaw Shanglawt Asuya Dap Ba (5) Ginra rai nga ai Ja Pu Mare hta February (3) jahpawt daw KIA dap na Dingla hpung ni hte myen asuya hpyen hpung ni gap gasat ai lam byin lai wa sai lam shiga na chye lu ai. Kata lam shiga hpe a tsawm rai n chye lu ai.

2011/8/14 HTA JAWNG SARA LANGAI HPE MYEN NI GAP SAT LAI WA

2012-02-04T18:36:00.003+08:00

February (4) bat Kru,

Lai wa sai shaning 2011 ning August shata (14) ya shani hta Hkrang Hku Ginra, Hkrang Hti Dam Mare na Potao de lung wa ai Jawng Sara Ameng Gam Di Ram hpe myen hpyen asuya hka-la-ya (137) na hpyen la ni Hta Ei hka marai kaw gap sat kau lai wa sam lam shiga na chye lu ai. Sara Ameng Gam Di Ram hte rau hkawm ai lai wa sam lam hpe mung na chye lu ai. Hkala hkrum ai yan gaw Shd. Sing Gyi Di hte Shd. Dang Hku Min re lam matut na chye lu ai. Gap sat hkrum ai Sara Ameng Gam Di Ram

HPYEN YEN NI HPE SINGAPORE DU PAOH MYU SHA NI GARUM LA

2012-02-04T18:19:00.003+08:00

February (4) bat Kru,

Singapore mungdan kaw shanu nga ai Myen Mung na hpu nau baw sang (Paoh) Amyu sha ni a Pung gyi Jawng kaw nna anhte Jinghpaw Mung na Hpyen yen tsim yam ni a matu alu Gumhpraw Singapore dollar S$2000 (hkying lahkawng tup) hpe Singapore JLH ni a lata kaw daini 4th Feb 2012 shani hta ap ya lai wa sai lam shiga na chye lu ai.

SINGAPORE DU PA OH MYU SHA NI HPYEN YEN NI HPE GARUM LA

2012-02-04T18:13:00.000+08:00

SAPHKUNG BUGA, MANGSHI MUNGKAN MANAU DE (MYITKYINA)

2012-02-04T12:59:00.002+08:00

FEBRUARY-3-2012.

Miwa Gumsan Mungdan, Saphkung Madu Uphkang Mungdaw a mare daju Mangshi Mare hta (2) Lang ngu na Mungkan Manau hpe February 5-7 laman galaw na lam, mungkan ting na Jinghpaw Wunpawng sha ni sha n-ga, mungkan amyu danghta hpe saw shaga ai Manau Poi re lam na chye lu ai. Shing rai Jinghpaw Wunpawng Uma Buga a mare daju rai nga ai Myitkyina Mare kaw na mung, mungdan dinghku kata kade yak hkak nga tim, htingbu mungdan na sai daw sai chyen ni a mahku mara lam hpe n gaw n ja let, daini 3-2-2012 ya shani marai 180 jan Mungkan Manau Poi de, bus mawdaw kaba mali hte hpawn, kaga mawdaw kaji jahku tup hte rawt sa wa sai lam na chye lu ai.

Myitkyina kaw nna Sadung-Kampaiti lam hku rawt sa wa nhtawm, Kampaiti e passbook galaw la shajang ma ai. Miwa mung ga jarit hpe bum kata dinghkren htu waw tawn ai lam hku lai di rap shang wa sai. Dai hpang marit maroi nga ai shara bum nhkrem lam numda hku lai sa wa sai. Hkring mi rai jang, Ta hkaw hka a hka hku rai nga ai Hu-chao ngu ai dabang kaw du pru sai. Ta-hkaw hka gaw, lai sai 9-6-2011 ya shani KIO hte Myen Asuya ni Sanggang majan hpaw hpang ai hka rai nga ai.
Hu-chao mahkrai pawt e, Miwa pyada ni passbook hkap jep ma ai. Dai hpang Ga Jarit Maigan Masha Pru Shang Rung kaw langai hte langai a passbook hpe dazik dawk la shajang ma ai.
Ndai zawn Mungkan Manau Poi de shakut shakat nna rawt sa ai lam gaw, tinang mungdan dinghku kade yak hkak nga ai raitim, tangpyaw sa hkawm ai n rai; amyu a htunghking hta mungkan ting na Jinghpaw Wunpawng sha ni hte hkrum tsup let, pu gang sin machyi hkat ai myit kraw lawang hpaw madun hkat lu na matu rai nga ai.

Amyu sha ni yawng a shawng lam gam maka tsawm htap ngwi pyaw wa lu na hpe mung myit mada ai. Hkrunlam mahkra hta hpa dingbai dingna n hkrum ai sha Karai Kasang bausin makawp maga ya nga u ga, buga dum nta mungshawa yawng mung kyuhpyi myit dum karum nga na hpe myit dik kamhpa let hkawm sa nga ma ai re lam shiga na chye lu ai rai.

Watsat Hku Chyingtek

RAWT MALAN NINGHTOI

2012-02-04T12:55:00.000+08:00

Moi ….. moi …..
Lai sai duhkra shaning dingla
Munghpawm Mungdan mawru kaba,
Amyu kaji Mungchying sha
Shinggyim ahkaw ahkang rap n ra,
Sat nat roi rip tara kata
Dinghku majan ningsam hkum hkra.

Bai ya…
Myu sha maka tsawm htap hkra
Htunghpau Gawnghak shagreng ra,
1961 February 5 Laban ya
Nga shaning kaja Gintawng hta,
Myu tsaw share Shanglawt Hpyenla
Rawt malan gasat hpang lai wa.

Goi e…
Ginhtawng Lanam Nshung ta
Kawsi hpang gara myit hkiba,
Sai hka panglai nammukdara
Machyi hkrum sha hkum sumhpa,
Myu tsaw mung tsaw salum kaba
Padang hkrunlam ya du hkra.

Oh ya …
Lahtaw Zau Seng Ningbaw kaba
Hpu Shawng Hpu Ba Ningbaw Ningla,
Share shagan ali ama
Du daw sai hkaw yawng hpe wa,
Maroi nni myiprwi mya
Baw gum shagrau hkungga nga.

Oh…
Sai run Wunpawng yawng zeng hkra
Chyaihku sakse shadaw lungpa,
Rawt malan Ninghtoi daini ya
Hkringhtawng labau kandang ra,
Lahpa galai shawng lam hkra
Wunpawng Mungdan gaw de ga.

Bumwa Hkri Ma

YUP TIK TIK

2012-02-03T14:53:00.000+08:00

Shadum jahprang ai laika ni masa policy jaw jaw de bai gayin wa na matu ka ai laika ni law ka sai raitim n hti ai majaw n dum ai kun shingnrai hti nga ninglen hti shalai kau ai kun? n dum dingsa gaw shadum nga na ga ai, nawku hpung masha ni hpe pi n dum n hprang dingsa hpung up hpung sara ni gaw chyum laika hte shadum jahprang ai zawn anhte laika ka ai ni mung policy reng ai ni hpe n dum n hprang dingsa laika hte shadum jahprang nga na ga ai law.

J.W shi a pangdung hpe awngdawm shanglawt de bai gayin wa ga ngu lang hte lang ka shadum nga tim KIO ningbaw ni KIA du kaba ni gaw hkaw tsun hpawng shagu hta federal de sa na sha a tsun nga ai, masa gat hkai ai laika pa hkan mung pamphlet laika pa hkan mung KIO/KIA a pandung gaw federal re sha ja ja ka da nga ai, dingre laika mu hti shagu bawnu grai hkanu mat mat re ai lang hte lang rai wa sai.

N ta kaja galai n lu gaprawng ai ten laman kawa n ta gan gap rawng ga ngu ai polic mi re da. Myen hte bawng yu nna nlu jang she awmdawm de sa na re da, shingnrai jinghpaw mung hpe shawng madu uphkang shara lu jang she awmdawm de sa na re da. N dai masa ni gaw myeni a “aten garawt masa” (delaying tactics) kaw kabye hkrup mat sai policy rai taw nga ai. Moi Aung San wa mung bawsang ni hpe 10 ning khahtap aten garawt maw kau yang yawng myen tai mat na re ngu ai “aten garawt masa” hpe jailang na lam mada-ga na yu ga ai.

U Nu a parliament prat hta mung bawsang ni hpe mungmasa ahkaw ahkang jaw ai zawn zawn galaw masu nna shaning 60 ning (1948-2012)jan aten garawt kau nu ai, kaji kajaw mahti jaw masu nna tinang ra sharawng ai de n du mat hkra aten garawt kau nu ai, n dai policy hpe myen ningbaw langai hpang langai lahpa galai matut lit la mat wa ma sai.

U Nu woi awn ai Myen la ni n tsa kaw dung nna mayam yam dip sha taw nga ai hpe hkam mana jin mat sai majaw bawsang ningbaw ni gaw mahtai tam na shakut wa ma ai. Dai majaw 1962 February 24 ya hta Yangon e zuphpawng kaba galaw nna dai zuphpawng hta Myen ni hpe Myen Mungdaw langai galaw na tsun shadut sai, Rapdaw 2 hpe maren mara ahkaw ahkang jaw na tang madun sai, raitim myen ningbaw U Ba Swe hte Takhin Chyit Maung ni gaw kaji pi nhkapla ma ai, mi na zawn sha matut lang na hpe tsun ma ai.

KIO/KIA hpe mung mungmasa jahta na matu ngu a sawng nna 1994 ning hta gap-jahkring-simsa la woi sai, mailung dut sha na, bawngring lam galaw na kaji kajaw ahkang jaw dat ma ai, KIO gaw mung masa jahta ga ngu yang, myendu ni gaw anhte gaw mungmasa la ni n re, asuya nnan pru wa yang dai asuya hte jahta la mu ngu tsun dat sai. Dai majaw KIO gaw mahkoi mi lu ngu ai hte NC lung sai, 2008 Tarakanu madi shadaw lawm sai, maga mi de Dapba-4 na KIA hpyen la ni hpe sat kau ya ai lam ni hkrum nga sai. Ralatapoi shang na hkyen ai n awngdang ai, jahtum gaw jarit sindap gale mu ngu ai kaw kre mat sai, 94 simsa gasadi gaw jarit sindap galaw na matu hpyi shawn la ai hte bung mat sa. Sa ang ai de n sa lu mu ga htaw ra zawn2 le ra zawn2 di nna KIO/KIA hpe aten garawt shana kau sai. Ban langai htum mat nna ban nnan bai du wa yang myit masa ni gaw shai wa ai, mi na zawn n rai mat ai, hpyen wa ra ai maga de gyi lawm mat wa chye ai. Ga shadawn 1961 ning na pandung hpe tawn kau nna 1975 ning kaw na federal ngu de gale mat sai, e n dai zawn re masa de du wa hkra hpyen wa gaw aten garawt nna shadang la kau chye ai.

Ya mung UNFC kaw lawm ai bawsang laknak hpung mada n lawm ai uhpung hpe mada hpe sawng nna langai hpang langai simsa lam la lata mahkret hpang sai, hpaga galaw na ahkang jaw sai, bawngring lam galaw na ahkang jaw sai, Du kaba ni chyawm gaw lu su na re, hpyen ma ni gaw ta ta yaw, dai kata kaw garan sha n jaw yang shada bai galaw hkat. N dai lam ni mahkra gaw “aten garawt masa” hte divide-and-conquer masa n pu kaw galaw dat ai rai nga ai, sa ra ai lam de n lu sa mat na rai nga ai, le ra zawn2 n dai zawn2 di nna shaning 60 ning bai kahtap aten garawt mat na ra ai. Lai sai 60 ning, ya bai 60 ning bai jat pawng 120 ning de bai du mat na rawtmalan rai wa sai.

Rai yang bawsang ni a mungmasa pandung gaw;
1) gumhparw i?
2) arawng aya i?
3) lawt lu lam i?
bawsang ningbaw ni tsun gaw tsun nga ai anhte shakut ai gaw self-determination hte political rights da.

Myen ni gaw shanhte galaw ra ai hpe ngam ngam galaw nga ai, moi na mungdan tarakanu mung unitary state galaw da ai, ya na 2008 tarakanu mung unitary state galaw da ai, shinggan de gaw federal mungdan federal constitution re ngu n dau da ai, hpyi kaw gaw dai hku, shan kata de gaw Amyu Langai Up Tarakanu galaw da, hpamjaw dai hku galaw shanhte ra ai dai sha rai nga ai gaw. Moi na myen ningbaw ni mung dai hku sha hkawm ai, ya na myen ningbaw ni mung hkang dingsa sha hkawm ai.

Rai yang anhte bawsang ni wa hpa majaw dai ram bawja nna myen hte naw shakut pawng na sha jahta nga ai kun? federal ngu ai gabaw shatut nna Myen hte pawng na rai yang myen hpe sinat lang nna kasat n ra ai, masha n si hkam ra ai, lachyum n pru ai, moi na hpushawng hpuba ni sinat lang nna kasat ai gaw awmdawm shanglawt la na matu sinat hpai ai she re.

Manang wa a ka-pau de Nga hta bang na ladat gaw..shana de du jang kawsi kyu ai jahkrai ma maumwi zawn byin na jalu sha re.

Naw Kham

RAWT MALAN NINGHTOI SAW SHAGA LAIKA

2012-02-03T11:13:00.007+08:00

(51) Lang na RAWT MALAN NINGHTOI LAMANG hpe Malaysia du Jinghpaw Wunpang Myu Sha ni kawn galaw sa wa na ga ai. Wunli hte hpring tsup ai, Jinghpaw Wunpawng Myu Sha ni yawng a matu ahkyak di n htoi rai nga ai n dai RAWT MALAN NINGHTOI LAMANG hta Malaysia du Jinghpaw Wunpawng Myu Sha ni yawng hkra hkum hkum ra ra sadu shanglawm na hpe hkungga la ra let saw lajin dat ga ai.

Saw Shaga ai,
Shabyin Shatai Komiti

Ninghtoi: February (5) 2012 (Laban)
Aten: 9:30AM - 11:30AM
Shara: Zup Chyai Ginra, No. 10.1.6, City Garden, Bukit Bintang, Kuala Lumpur

MYIT TAWN GA

2012-02-03T11:07:00.002+08:00

Hpyen majan gasat nna hkrit tsang ra ai hta, katsi majan hku mungdan hpe masha hpe ga ngwi si manyi dik ai ladat hte yet yet ndum shami myit kraw daw agrawp hkra myit makru, myit masa, kyang lailen yawng hpe ga ngwi hten za hkra galaw ai masing ladat gaw grau hkrit tsang hpa rai nga ai zawn, grau hkrit tsang ra ai, grau jamjau du hka hkrum na ten a matu mung annau ni hkyen lajang shajin tawn ra sai. Hpa majaw annau ni gaw shanglawt lu ra ai. Myit masin lawt ra ai, Tara lawt ra ai. Tinang lamu ga myu sha lawt lam a matu grai n'ngut shi ai yingam a matu hkam jan lu na shajin tawn ra sai.

Myen a mahkam hta n'hkun hta hkrat gadawng bang wa yu saga ai, dai ni kalang bai myen a masu ndum hta bai byawng nang sa yang gaw chye nga ninglen hka yawng, yawng ai wa hpe mung ningren galu hte galaw achyaw bang, u nyem roi nga ai lachyum sha rai wa na re hprut hprut ja ja mazut zut dawdan ra sai. Myen a mung masa hpyen masa hpe yu nna chye gin saga ai zawn ung ang nga n'mai sai. N'hkring n'sa matut gasat ra ai ngu mu ai. Hpa majaw nga yang myen a mahkyen masing yawng gaw mai kam na lam n'nga ai. Kaga bawsang ni simsa masat kade htu tim annau ni hte mung masa pandung hkam la ai lam n'bung ai. Shanhte kata de kade mi kalai shai shai, democracy masa hku mi sa sa anhte hte nbung ai, mung masa teng jaw ai hku bawngban ngut jang gaw simsa lam n'kam la tim shi hkrai lu chyalu re. Dai majaw myen a masa lam grau chye hkra n'gam kaba langai dat nna laja lana htim gasat yu ra ai, myen kara hku ka manawt wa na kun? Shanhte tsun ai ndau ai simsa lam gaw teng rai nga ai kun? Gum san magam Thein Sein tsun ai lani mi hte gasat shamyit kau na nga ai ga gaw dai daram galai shai lawan nga ai kun? Chyam yu ra nga ai. Myen ni lu sha len shalai la na nga kachyi mi mung nmai shalai shangun na re. Annau ni hpe myu mat hkra gasat ai ni hpe n'gun jaw ai she tai na re.

1-2008 a gyin da ai Tara kata kaw de da ai hpawng tawn nga ai rapdaw she re majaw Tara ningnan bai gyin shalat lu na kun?
2-Panglung ga sadi hpe ahkyak n'tawn sai. Munghpawm masa n'nga sai, lachyum n'shapraw sai hpawng hta annau ni myiman kaji hkam nna, manang wa nsaw ai kaw kaya n su shang dung na kun?
3-Myen mungdan ngu sha shamying sai, munghpawm mungdan ngu shamying ra ai, myen hkrai myu kaba hku madu sha mayu ai, bawsang yawng hte de da ai ngu lachyum n'shapraw sai kaw baw gum nna madu e... ngu dingyawm sha tsap na kun?
4-Daru magam aya shanhte hkrai jumtek sha mayu ai kaw tinang lu malu yawng gunbang ap ya nna, mayam sa tai hkam na kun?
5-Dai ni dawhkawn gaw shagan langai sha kap sai, myen myu 1 sha nga ai myen hkrai sha madu sha na nga ai lachyum, myen mungdan. moi na dawhkawn gaw shagan 14 kap ai dai gaw munghpawm mungdan ngu ai lachyum re,
ya dai ni ladat amyu myu hku zingri lachyum shapraw taw nga sai, dai myen mungdan kaw naw sa pawng na kun?
6-Hpyen dap hku nna sha gyin shalat tawn ai 2008 Tara masing kata hta mai shang na kun? Bawsang yawng mung chying shawa yawng ra awng sharawng nna chyawm gyin shalat shapraw tawn ai Tara masing hkrang sha n'pru dingsa shanhte kata de singgu krin shang wa na kun?
7-Madu lamu ga madu myu sha ni n'jin lu na daram hkam sha nna arang kaba bang wa sai dudaw saihkaw lai wa sai hka dingsa hpe hpa hte madi shatai shaprai ya na ta? Sum machyi dik sai hpe n'tsa lam bawngban nna sha yu shalai kau na kun?
8-Shinggyin nauna myit n'rawng ai, shinggyin ahkaw ahkang n'yu mu ai tinang lagaw yungnu sha yu mu ai chyasam, chyazai hte naw ganawn yang kaja na kun?
9-Hpyen yen tsin yam ni hpe matsan nchye dum ai ni a ga naw kam na kun? Madu lahpan madu tsang nna madaw sa na kun?
10-Mung masa bawngban shagrin ai lam n'mu ai masa hta myi di shim jum tek manang wa ta masawp nna ganan nang na kun? Myit tawn ga naw myit tawn yu ga. Dai ni Thein Sein asuya a simsa lam bawngban ai gaw simsa lam masa n'pru nga ai. Shazim tawn masu ai, jum jaw shanyi ai masa u shoi dun lu hkra galaw ai masa sha pru nga ai re majaw grau hkrit tsang ra ai masa de yawng nga ai. Shagri kaji ai myit nkung ai ni a matu gung kaba rai nga ai.

a. Asean ningbaw lu galaw na.
b.Pat tawn ai bawngring hpaga masa hpaw lu na.
c-Mungkan de Democracy hkrang htawng shatsawm dan na.
d-Hpyen hpyi hte shinggyin ahkaw ahkang hpung hpaw na.

Lahta de na masing masa kata kaw myen a shamu shamawt sa wa nga ai masa gaw n'gam n'hkun kaba de gadawng bang na pahkam masa she re.
1-Hpyen dap ndawm ai, hpyen masa n'jahkring ai.
2-Bawsang shada kata n'ru n'ra byin hkra.
3-Shada manghkang byin hkra, shada myit daw hkra.
4-Simsa lam la mayu ai. Matut gasat mayu ai, hpung 2 garan hkra.
5-Sut masa mdun masu nna, madu lamu ga na sut masa shamyit shama hkra.
6-Shada da n'tse hkat hkra,
Galaw shangun nga ai ladat sha re ngu mu mada ai majaw annau ni kalang bai nkataw hkra myit malai kalang bai n'lu nu ga ngu sung sung li li n'den ja ja hprut hprut madu myu a maka hpe asan dawdan sa wa ga.

Du na bawngban sa wa ai hta Kanu Num hpung ni mung shang lawm bawngban sa lawm yang kaja na re, myiman ntau ai madu myu sha a matu gwi gwi tsun dawdan ra sai.
Myit tawn ga.
Baren Numraw

HPU NAU HKANG MYU SHA NI HPE HTUNGHKRING SHALIT HTE CHYEJU DUM

2012-02-02T13:27:00.002+08:00

February (2) bat Mali,

American mungdan Salt Lake City, Utah kaw shanu nga ai Jinghpaw Wunpawng Myu sha ni kawn Hkang (Chin) Myu sha ni hpang de Jinghpaw Wunpawng hpyen yen tsin-yam ni hpe ja gumhpraw karum madi shadaw shanglawm ai majaw chyeju dum chyeju htang ai masat masa hku nna Wunpawng Htunghkring shat lit shat ka hpe January 28, 2012 (bat 6 ya) shana de galaw la lu sai lam na chye lu ai.

LAWT AWNG MARE KAW GASAT

2012-02-02T13:09:00.001+08:00

February (2) bat Mali,
Wunpawng Mungdan Shanglawt Asuya Dap Ba (2) npu Dap Dung (5) ginra rai nag ai Lawt Awng Mare makau kaw February (1) ya shani KIA myu tsaw share shagan ni hte myen hpyen asuya hka-la-ya (141) dap ni galoi shani ting ngu na ram gap gasat lai wa sai lam shiga na chye lu ai. N dai gasat poi hta myen hpyen la marai (3) hkrat si wa sai lam hpe mung matut na chye lu ai.

51st LANG NA RAWT MALAN NING HTOI SAW SHAGA LAIKA

2012-02-02T12:45:00.000+08:00

Hkawp,
Hkungga Kamhpa let,Japan Mung du Chyu Rum ai Wunpawng Myu sha ni yawng hpang de n gun gang, ga saw dat ga ai law. (2012, feb,5)ya shani hta du na An hte Wunpawng Myusha ni a 51st, Ning hpring Rawt malan Ning htoi hpe Jinghpaw Wunpawng Myusha Hpung (K.N.O) Japan hku n na woi awn galaw sa wa na lam hta,Japan Mung du Pu gang Sin machyi Chyu Rum ai Wunpawng Myusha ni yawng sadu shang lawm let, Wunpawng Myu sha dawng hkawn hte,Myu hte Mungdan a matu A sak ap nawng lai mat wa sai share shagan ni hpe sa du hkungga jaw lawm na matu Kam kaba let saw shaga dat ga ai law.

Ning htoi________ 2012,Feb,(5) (laban shani)
A ten _________ 6;00 p.m to 9;00 pm
Shara _________ Shinjuku_ku, Shimo Ochiai 4-6-7
Ochiai Dai I chi Chiki Center (3F) (1-A+1-B)
Matsing ________Kanu Mungdan Hpyen yen Garum Alu hta na ga ai.
Matut Mahkai na__090-5416-5313 I 090-9299-3078 I 080-3240-6025

MYU SHA LAWT LAM HTA,
LIT HKAM
MUNG SHAWA PADANG HKRUNLAM MASING WOI AWN KOMMITTEE

DR. NHKUM ZAU HTUNG MADU HTA YUP PYAW

2012-01-31T19:12:00.000+08:00

January (31) bat Lahkawng,

Jinghpaw Wunpawng Amyu Sharawt Hpung (PKDS) hte Jinghpaw Wunpawng Amyu Sha Hpung (KNO) a Ninghtan Hpung (Founder) rai nga ai, anhte a tsawra hkungga ai (Dr.Nhkum Zau Htung) gaw, America mungdan kaw nga nga ai aten hta 2012 ning January shata (29) ya jahpawt manap hta e Madu Yesu hta yup pyaw mat wa sai lam hpe yawng na chye lu na matu yawn hkyen shiga hpe lasu su dat ga ai.

Ginjaw Rung
Jinghpaw Wunpawng Amyu Sha Hpung (KNO)
Chiangmai, Thailand

PRESS RELEASE OF WORLD ZOMI CONGRESS

2012-01-31T14:59:00.002+08:00

LAWT LU AI WUNPAWNG MUNGDAN, MYUSHA BYIN TAI LU HKRA

2012-01-31T11:38:00.004+08:00

Dai ni na ndai majan gaw wunpawng Jinghpaw annau ni a lamu ga mungdan kaw na she hkap gasat ai, anhte a mungdan lamu ga she re ai hpe asan sha shawng dum chye kau ra nga ai. Ya na zawn annau ni a n-gup hta wa mung sharai kau ra ai lam ni grai law ai, gashadawn pihtawngsu naingan(munghpawm mungdan) she nga ra ai hpe Myanmar mung (sh) Burmar nga nna yawng a n-gup hta noi mat ai, ndai gaw anhte hta hkratsum mat na npawt tai nga ai. Bai nna anhte a Wunpawng lamu ga hpe shanhte pyi Kachin pinay nga ai hpe wa anhte hkum anhte wa shi hpe hkrai shanawng jaw ai masa hku shi hpe she shat makai jaw shajan ai masa hku nna byin taw hku nna anhte Jinghpaw mung hpe mung Jinghpaw mung daw ngu ai hku nna she shayawm kau ai lam byin nga ai. Kaja wa annau ni gaw moi kaw nna ndai Myen (burmar) amyu ni hte gaw tsep kawp nbung ai amyu re. Lamu ga mung nbung ai, lailen mung nbung ai, makam masham mung nbung ai, nga hkrat wa ai npawt mung nbung ai. Shanhte a npawt gaw (Dagawng) prat ngu ai kala hkawhkam a ndawlitnga (ngyi) kasha sha re. Ya ten du hkra rai yang myen a shaning gaw hkying mi daram sha naw re.

Anhte Wunpawng ni gaw moi BC prat hkying 8 ram ten kaw na hkrat wa sai lam hpe mu mada ai, anhte myu sha ni gaw anhte a labau ni hpe laili laika hte labau hku nlu ka tawn ai lam sha re, rai tim anhte a kaji kawa ni gaw daini mungkan hta laklai tsawm htap ai maka kumla ndai hte jaiwa ga hku anhte labau hpe taw kau da ya sai re. BC 4000 daram hta anhte myu ni gaw hturen (sumpyi hpan) hpe lungseng hte galaw dum lu nga sai amyu rai taw sai re. Anhte a maka ndai ni hpe magri, ja ni hte galaw lang masat nga lai wa sai. Bai nna MANAU ka, MANAU maka ndai gaw Amyu Magam ahkaw ahkang lu ai ni sha mai galaw ai baw re. Daini mungkan hta ganan hkra rai nna mying gum hkawng ai kahkrang maka re. Bai nna anhte a wunpawng shun (wunpawng nsen) mung masha a myit hpe sharawt ya ai, ka hkrang ni rai tim htawngka mi rai manau mi rai tim anhte myu ni gaw lahkam mi htingnawt la nna lahkam lahkawng sa ai ayu hkrang baw re. Annau ni a Wunpawng nsen gaw galoi mung prat ban gade she galai mat tim nhpang hkrat ai shun re, ningre ai amyu htung hking maka lu ai amyu ni re hpe dum ra nga ai. Amyu langai gaw tinang a labau htung hking npawt nhpang chye ra nga ai, rai yang she myutsaw mung tsaw ngu ai masa nga wa ai .

Anhte Wunpawng Ramma ni she matsan shayan rai wa ai myen a maw ai kaw hkrup nna jawng lung ten hta mung jawng kaji kaw nna shi a myen laika, shi a labau, shi a htung hking maka hpe hkrai sharin mat chye mat re majaw dai lam sha chye mat ai majaw shi hpe hkrai yu kaba, htang kaba mat hkra ladat maw da ai re. Dai majaw anhte mung tinang a labau nchye mat ai majaw shi a ga, shi a lailen ni hpe hkrai shachyut mayu mat wa, lam shagu hta shi hpe hkrai shara jaw mat wa re ai masa de du mat wa ai. Aanhte a tsan tsan lu yu na myi hpe magap kau ya ai masa rai mat sai, annau ni gaw shi hpe sha kam, shi a hpaji sha hkan shachyut ya rai taw ai, raitim shi gaw daw hpe ahkaw ahkang bai la rai annau ni sha nrai munghpawng baw sang ni madang nga ai baw hpaji (sh) bungli magam zawn re ai kaw mung njaw, ningre lam law law wa annau ni hpe dip gamyet da nga ai le, shi a masing gaw prat tup shi a myu shi a ga htung hking hte ga up mat wa na hpe ladat maw nga ai. Anhte myu gaw tara hte nga ai, tara lang ai amyu re, masha law yang sha majan gasat gwi ai baw amyu nre, nlaw tim ntara ai hpe gaw gasat ai ni re. Ga malai nga ai "tara lang ai wa gaw tara nlang ai wa hpe hkrit ai da, tara nlang ai wa gaw shi hta tara grau nlang ai wa hpe bai hkrit ai da, tara nlang dik ai wa gaw si nhkrit ai wa hpe hkrit ai da".

Dai ni anhte a majan ndai gaw myen hkrai law si ai ngu ai mau shara nnga ai shan hte gaw tara nlang dik ai ni annau ni a shara de tawt lai ai majan, anhte gaw tinang a dum nta mare buga mungdan hpe makawp maga ai majan she re gaw si nhkrit anut na rai nga ai le. Dai majaw shanhte gaw she si ra u ga le, shi ntara ai hpe shi hkum mung chye chyalu sha re, raitim annau ni hpe roi ai, yu kaji ai lam a majaw byin ai she re gaw, ya pyi anhte maga gaw majan grai nbaw shi ai re, ya byin ai gaw ninghkp ai, manga ai majan she re, tinang a shara de sawa ai hpe hkap manga da ai sha naw re. Ya yang shi ndai hku naw ding yang rai yang gaw anhte kaw nna mung majan baw na masing rai ai, dai majaw dai ni na majan gaw anhte myu a matu grai nan ahkyak nga ai ten, mungkan ting mung gara nga ai ten rai sai, dai majaw Wunpawng sai rawng nga sai ni yawng gaw amyu sha a gam maka hpe nhpang hkrat ai sha lawan myit hkawn let tinang nga ai shara kaw nna dang di ai maga hta tsap let ngang ngang dawjau ra saga ai. Lamu ga lu, Shanglawt ai amyu byin lai lu hkra jawm shakut sa wa ga.

MAWHAN NAM SI AWNG LAPRAN WANLENG LAM BAWM KAPAW

2012-01-30T23:32:00.001+08:00

January (30) bat Langai,
Jinghpaw Mungdaw Mohnyin Ginwang Mohnyin ginwang Mawhan mare hte Nam Si Awng lapran Myitkyina Mandalay Wanleng lam kaw January (29) ya shana hkying (7:45pm) ten hta bawm langai kapaw lai wa sai lam shiga na chye lu ai. N dai Wanleng lam kapaw ai hta masha langai si hkrum lai wa sai lam hpe mung na chye lu ai.

HPU NAU MUN MYU SHA NI A LAM

2012-01-30T14:42:00.003+08:00

Jinghpaw Wunpawng Myu Sha Yawng Hpang De,

Ngai gaw Wunpawng Shadang Sha jet jet rai nna, ya ten Mawlamyaing kaw magam bungli hte seng nna du taw nga nngai. Rai yang, Hpu nau Mon Amyu Sha ni a nga sat/nga sa lam ni hpe gawn yu let Anhte Myu Wunpawng Sha ni sharin la mai ai ngu myit lu ai lam ni hpe loi mi garan kachyan mayu nngai. Ra rawng ai lam hta mung shading sharai hpaji jaw la myit ngu ga saw dat nngai.
Sharin la mai ai hta ; -
1. Hkai lu hkai sha lam hta Rubbers hte kaga hkai hpan ni hpe Hpungtang Sharin Sara (Technician) byin hkra shakut nna atsawm sha ladat jaw jaw hkai lu hkai sha nga ma ai. Dai majaw Myeng Mungdan kata kaga Mungdaw ni hta grau lu sut lu su, nga mu nga mai nga ma ai.
2. Amyu Sha lam yan hta grai shakut shaja ma ai (Nationalism Strong). Buga Kahtawng Ningchyawng hkan shanhte a A Ga, Laika, Htunghkying ni hpe grai manu shadan ai. (Ga shadawn : Mare Kahtawng ni hta Myen ga pyi n-ga shangun ma ai. N kau shara hkan Myen ga ga ai ni hpe rim jep ai, adup zingri ai, Myen jet yang pyi sat kau ai daram re. Myen Amyu hpe Mare hkan n-jashawn ma ai.)
3. Htunghkying lam hta mung grai manu shadan ai. Shanhte Mungdaw hta Laban hpang bat (1) ya hte bat (5) ya shani hpe Htunghkying bu hpun sumraw Nhtoi masat nhtawm, dai shani hta Num/La/Ram n-nga Mon Htunghkying Labu Palawng ni hpe bu hpun nga ma ai.
4. Amyu Sha ni yawng mung grai myit hkrum gahkyin gumdin ma ai. (Ga shadawn : Mung Masa Party hpe langai sha hpaw ninghtan nna, Ra Lata Poi ni hpe shanhte a Party hpe sha “Me” jaw nga ma ai. Dai majaw Mungdaw Rapdaw hta Mon Amyu Sha ni “Wun Gyi” law law shara lu ma ai.
5. Ya ten Mon Laknak lang Wuhpung rai nga ai “Mon Pyi Thit Party” Uphkang Ginra ni hta shanhte a “Myu Sha Dawnghkawn Sharawt ai Lamang” hpe jahpawt shagu sinat gap kapaw let Mung Shawa, Dap Shawa yawng “Bau jaw” nga ma ai. Ya du na February (8) ya shani ang ai “Mon National’s Day” hpe mung Buga Ginra Kahtawng shagu hta Dumbu, Shap sheng dum let myit hkrum mang rum “Myit Sharawt ai magam bungli ni hpe” wu wu di di galaw let hkyen lajang nga ma ai.
6. Shanhte a moi na Labau Lasang ni hpe mung ya prat na Ma ni, Ramma ni chye la hkan nang hkan sa lu na matu yaw shada let Myitsu Salang ni, Wun Gyi ni, Dakkasu Sara/ma ni nan woi awn nna sawk shagawn nga ma ai. Lu shagawn la sai Labau ni hpe Laika Buk byin hkra ka lajang nhtawm, Mung Shawa daw tsa chye lu na matu “Research Hkaw Tsun Hpawng” ni hpe galaw nga ma ai. Laika ka ai wa du ai shaloi “Masat yan (4) Hkaw Tsun Hpawng” galaw ai hta sa du shang lawm lu nngai. Dai hkaw tsun hpawng hta (a) Num wawn num la hte seng ai Labau; (b) Laili laika hte seng ai Labau; (c) Htunghkying madum sumpyi hte seng ai Labau; (d) Buga Ginra ni a nga sat/sa hte seng ai Labau; (e) Lai wa sai ten Jiwoi Jiwa ni jai lang mat wa sai “Tara Masa” Labau ni hpe hkaw tsun ai, shada htai lai ai, jahkum shatsup ai lam ni galaw nga ma ai.
Lahta na lam ni gaw Lawng lam law law hta na Anhte Myu Sha ni mung sharin la mai ai ni hpe sha lata tang madun da ai re. Mai la ai hpe shaw la nna, anhte hte n-htap htuk ai lam ni hpe gaw kabai kau ga ngu mayu nngai. Laika ka ai wa sharin la lu ai zawn, Myu Wunpawng Sha ni yawng hpe mung garan kachyan ai lam re. Yawng hpe Hkungga Tsawra let,

Myu Sha lam yan hta,
(Kadaw Awng)

USA WZC NI HPYEN YEN NI HPE GARUM

2012-01-30T12:38:00.004+08:00

January (30) bat Langai,
US Mungdan du World Zomi Congress (WZC) kawn Jinghpaw Mungkata Majan a majaw jam jau hkrum nga ai hpyen yen tsin yam ni a matu alu sak jaw ai lamang hpe January (28) ya shani USA mungdan Dallas na Vickery Baptist Church kaw galaw lai wa sai lam shiga na chye lu ai. (WZC) a Amu Madu Slg. Pu Thang Lian kawn (WZC) a yaw shada ai lam hte tsin yam ni hpe garum shingtau la ai lam a yaw shada lam ni hpe tsun dan lai wa nna, Slg. Cinpu Zomi kawn tsin yam ni hpe garum alu US$ 13,013.90 tup hpe ap ya lai wa sai lam na chye lu ai. JLH Amu madu Slg. Lahtaw Zau Yin kaw (WZC) hpe chyeju dum ga tsun lai wa sai lam na chye lu ai.

အေမရိကန္ႏုိင္ငံေရာက္ ခ်င္းလူမ်ိဳးမ်ား World Zomi Congress (WZC) မွ ကခ်င္ျပည္နယ္အတြင္းရွိ စစ္ေဘးဒုကၡသည္မ်ားအတြက္ အလွဴေငြေပးအပ္ပြဲ အခမ္းအနားကုိ ဇန္န၀ါရီ (၂၈) ရက္ေန႕တြင္ အေမရိကန္ႏုိင္ငံ Texas Dallas ျမိဳ႕ရွီ Vickery Baptist Church တြင္ျပဳလုပ္ခဲ့ေၾကာင္း သတင္းရရွိပါသည္။ အခမ္းအနားတြင္ (WZC) အတြင္းေရးမွဴး Mr. Pu Thang Lian မွ (WZC) အဖြဲ႕၏ရည္ရြယ္ခ်က္ႏွင့္ ကခ်င္အမ်ိဳးသားမ်ားႏွင့္ ခ်င္းအမ်ိဳးသားမ်ားမွာ ေရွးယခင္တည္းက ညီအစ္ကုိမ်ားျဖစ္ေၾကာင္း တစ္ဦးဒုကၡေရာက္ ေနလ်င္တစ္ဦးက ကူညီေပးရမည့္တာ၀န္၀တၱရာရွိေၾကာင္း၊ ေကအုိင္အုိမွ ကုိယ့္ျပည္နယ္အတြက္ စစ္အစုိးရႏွင့္တုိက္ခုိက္ေနျခင္းကုိ (WZC) မွအျပည့္အ၀ ေထာက္ခံေၾကာင္းႏွင့္ ေနာက္ေႏွာင္မ်ားတြင္လည္း ဆက္လက္ကူညီေပးသြားမည္ဟု ေျပာၾကားသြားေၾကာင္း သိရွိရပါသည္။ ထုိ႕ေနာက္ Mr. Cinpu Zomi မွ ကခ်င္စစ္ေဘးဒုကၡသည္မ်ားအတြက္အလွဴေငြ အေမရိကန္ေဒၚလာ (၁၃,၀၁၃.၉၀) တိတိကုိ ကခ်င္စာေပႏွင့္ယဥ္ေက်းမွဳေကာ္မတီသုိ႕ေပးအပ္ခဲ့ေၾကာင္းသိရွိရပါသည္။ အလွဴေငြမ်ားကုိ ကခ်င္စာေပႏွင့္ ယဥ္ေက်းမွဳေကာက္မတီ အတြင္းေရးမွဴ ဦးလေထာ္ေဇာ္ရင္မွ လက္ခံျပီး ေက်းဇူးတင္စကားျပန္လည္ ေျပာၾကားသြားေၾကာင္း သိရွိရပါသည္။

USA HKYING HKUM 24 LU SHA GAM N GUN MADUN NA

2012-01-30T10:46:00.000+08:00

PADANG LU HKRA

2012-01-28T16:26:00.000+08:00

Wunpawngsha ni labau hta,
Kadai n up n magra;
Moi kawn anhte Shanglawt ai,
Mayam hpan anhte n tai;

Daini Myen hte mazum shut,
Shanglawt ai lam yawng ginlut;
Sharai la yak yak ai wa,
Akik akawk hkum sumhpa;

Daini Padang ginjang mu,
L’ngai hkrai lit nan re ai lu!
Langai hpra lit n la yang,
Mayam tai nan na grai tsang;

Wenyi n-gun hte gasat,
Shawng lam de sinat n tat;
Salang K’ba ni Mungmasa,
Hparan lu hkra shakut nga;

Mungshawa ni n mai mau,
Makam masham zet latsau,
N htap htuk hkum galaw hkrup,
Karai Mungga hkan shatup;

Tsadan a man hkum kataw,
Kaya kahpa hkum galaw;
Akyu hpyi let myit shaja,
Myu a matu sadi ga;

Tinang hkum jasan jaseng,
Myu a matu ngu shareng;
Karai hpe hkrit hkungga let,
Madat mara lam shakyet;

Nang myit sumnung shingdi ai,
P’dang lu hkra shakut ai tai;
L’ngai hkrai myit sut su ai gaw,
Awng P’dang lu lam rai sai law!

Shanglawt Tsing

MADU LAHKAWNG RAWNG AI LUNGPU

2012-01-28T00:32:00.004+08:00

Tsaw ra ai Jinghpaw Wunpawng sha ni e nmu yu ai anhte buga de mu yu nga saga ai. N na yu ai mung anhte buga de na yu nga sai le. Laika ka ai wa hku na November 2011 shata hta laika ngau langai mi ka lai wa sai. Hpa ta? Nga yang masu bai n hkrum na matu shadum lai wa sai re. Ya mung n dum shani bai masu wa nga ma ai lu. Myen mung a hkring mang daju Thein Sein order jahkrat dat ai da. Jinghpaw mung de gaiwang shang nna shanglawt ni hpe gasat nga ai shi a hpyen dap ni hpe gasat hkring na matu, ning hkap gasat ai hta lai na, hkan gasat ai lam n galaw na matu aming jahkrat dat ai da. Dai lam bat lahkawng daram na wa tim majan n zim ai majaw, shiga lawk ni Thein Sein hpe bai san ai shaloi, Jinghpaw mung nam de rawng nga ai shi a hpyen la ni laika rai n lu la ai majaw or phone rai n lu la ai majaw, rai n chye nna re ngu htai ai da.

Ndai lai gaw “lagu gaw chye lagan n chye ai“ lam rai nga ai. Myen hpyen la ni shanhte a chyawm tari wa tsun ai yawng aloi sha na na matu, hpyen la shagu hpe phone naw mari jaw ra na zawn rai nga ai i? Mai dang waw ai wa n gaya tim Ji nu gawn ai wa gaya ai ngu ai ga malai, na ai ni yawng gaw mau na malai akye kabye na lam sha rai nga ai. Kaja wa myit yu yang, Gumsan magam Thein Sein tsun ai ga hpe hpyen jau bu wa a kyak n la ya ai lam sha rai nga ai. Hpyen jau bu wa mung majoi galaw ai lam n rai, 2008 gaw da ai tara kaw nan Vice President wa myit n hkrum yang gum san wa myit hku sha hpa mung n mai galaw ai nga da nga ai. Dai majaw, gaw da ai tara hta Gum san magam wa hta pyi vice gum san wa she grau power nga ai hku n rai i? Vice gumsan wa gaw shi a n pu na hpyen jau bu wa (ka koi ye u si chyuk) hpe gasat ai n hkring shangun ai majaw, re hpe magap da nga ai. Mung kan mungdan ni yawng hta n byin yu ai lam rai nga ai. Ndai gaw anhte mungdan kaw madu lahkawng up nga ai lam hpe asan sha mu mada nga ai.

Dai rai yang ya anhte a kam hpa nga ai ningbaw ningla ni majan simsa na matu bawngban taw nga ai gaw gadai the ta? Mung shawa a hkringmang wa a hpung ni hte sha bawngban nna, hpyen jau bu hkring mang wa hte n bawngban ai rai yang, hpawt hpra ni grai hkrak sai ngu bawngban tawn ai lam gaw, gaman rai mat na hpe, ma langai a myi jut hku yu tim dan leng na lam nga nga ai. Madu lahkawng n rup n ra nga ai ngu ai gaw danleng dik nga ai le. Ndai gaw grai myit shalawm ra na re ngu tsaw ra ai ningbaw ningla ni yawng hpe hpaji jaw mayu n ngai. Mung masa de she Thein Sein wa power nga ai zawn raitim, hpyen masa de gaw hpyen jau bu wa chyu sha gumrawng gumtsa hpe jum tek nga ai ngu ai gaw grai adan aleng re nga ai. Aung San Kaw mung Media ni hpe tsun ai shaloi, “gumsan magam Thein Sein wa Power gade daram lu jai nga ai ngu ai hpe a tsawm rai n lu hting ram shi ai” nga tsun ai gaw, myen mungdan a gumrawng gumtsang power ma hkra hpe Thein Sein hkrai n madu ai nga ai hte bung nga ai. President (gumsan magam) gaw mungdan a tsaw dik htum ai power nga ra ai rai tim hpyen masa hta rai jang hpyen jau bu wa sha power nga ai hpe mu lu ai. Ndai gaw Democracy galaw nga ai nga mungkan de n sen pyaw shapraw nga ai myen mung dan a lai ladat rai nga ai.

Raitim bawngban ai lam saw lajin jang gaw, mai gan ni yu yang tsawm daw rai ra ai majaw, kabu gara hkap la nna bawngban hkat ra nga ai. Simsa bawngban ai lam gaw mungkan de myen asuya a myi man lu na matu san san sha re. Kaja wa anhte amyu sha ni hpe tsaw ra nna bawngban ai lam n re. Dai re majaw, bawngban ai lam hta anhte mung, mungkan yu yang htap htuk na hku sha galaw jang ram na sai. Bawn ban nna she annau ni mungdan lu na n re. Dip tawn, gamu tawn lu nna she ra ai hpe ahkye gare la lu na re hpe annau ni yawng kam ra ai. Masa hpe atsawm yu yang anhte myu sha ni hku nna, myit masa hku mung dang nga saga ai. Hpyen masa hte mung dang ai hku rai nga sai. Myen ni n dai hta grau nna n gun shadat na n gun n nga sai. Loi mi jat dat ai hte “la kau manu” nga shi shawng jaw wa na sha rai sai. Hpyen gasat ai shada rai tim, myen hte anhte share shagan ni gaw hkam la ai lam nan n bung ai. Myen hpyen la ni gaw, shat man man lu sha kun? Nga nna hpyen shang ai. Shat atsawm n hkru sha nga ai hta, n tsa na ni a hprep sha kau ai bai hkrum rai nna, hpyen gasat na myit n lawm dik ai. N tsa na ni hpe maroi nni ai lam hkrai rai tim, anhte a share shagan ni gaw, lu lawm lam a matu, ja gumhpraw marit nna n rai, myu tsaw myit , mungtsaw myit a majaw sha, gasat nga ai majan re majaw, anhte matu gaw shawng kaw Awng Padang la nga sai. Chyum laika hta “na lata amu nang sha lu na” ngu ai gaw annau ni hpe tsun ai re. Kachyi mi mung n shayawm ga. Gasat ga. Nanhte share shagan ni a hpang e Wunpawng myu sha ni yawng lahkrip ra ra rai madi shadaw nga ga ai. Mungkan ting nga ai Wunpawng myu sha ni yawng madi shadaw ga. Wunpawng mungdan a matu, dang lu ai maga hku na arang bang ga ngu, ngang kang ai lahpum hte madi shadaw nga na.

Hkung ga let
Gu Namti

JAWNG SARANUM HPE MYEN HPYEN LA NI GAP SAT

2012-01-27T19:28:00.004+08:00

January (27) bat Manga,Jinghpaw Mung N Jang Yang mayan Jaw Sa Mare na Jawng Sarama Ngwa Mya Sa hpe myen asuya hpyen dap hka-la-ya (319) na hpyen la ni January (11) ya shani mara kata gap sat kau lai wa sai lam shiga na chye lu ai. January (11) ya shani Jaw Sa mare lup wa kawng makau kaw Wunpawng Mungdan Shanglawt Asuya Dung (4) na KIA myu tsaw share shagan ni hte myen hpyen hka-la-ya (319) dap ni gasat poi byin wa ai majaw hkrit nna nta de hprawng wa ai Sarama Ngwa Mya Sa hpe shi nta makau kaw nan gap sat kau ai re lam na chye lu ai.

SIN DAI MYIPRWI

2012-01-27T11:20:00.000+08:00

Wunpawng salum Buga
Rudi Munghpawm Burma,
2011 June 9 ya
Rawt malan majan Bum Sen ga,
Share shagan ali ama
Baw gum shagrau hkungga.

Bumlang hkaraw lungbra
Nshung Lanam mya mya,
Sai hka Nammukdara
Du daw sai hkaw aka,
Kaw si hpang gara kan kya
Chyu pala sama Shingja.

Padang hkrunlam kaba
Shiga sumla medea,
Mu na kahpra hpyen wa
Kraw dung wan hkat pala,
Kaning sha gaw n di nga
Masin sha gaw n si hkra.

Munghpawm Federal Asuya
Panglung shadaw ga shaka,
Amyu sha Dawnghkawn latsa
Madu nau shawng Padang nau pa,
Sin dai myiprwi kyuhpyi ga
Madat hkap la Karai Wa…..

Bumwa Hkri Ma
Fuji Majoi, Japan

KDF SCHOLARSHIP N DAU

2012-01-27T11:17:00.000+08:00

NYAU HPRAW, NYAU CHYANG AHKYAK N-RE

2012-01-27T11:05:00.002+08:00

Tsaw ra ai,
Chyurum Wunpawng sha ni yawng (hkum ting dek) hpe tsun dan mayu ai.Du na ra ai April shata hta myen asuya hku nna wahkrang dantawk ra lata poi lamang (selection) gaw annau ni hte hpa n seng ai.NYAU CHYANG, NYAU HPRAW lata na matu Annau ni ahkyak n-re.
Hkyi kun? Panau kun? Nyau hpraw kun? Nyau chyang kun? ngu nna ra lata shang lawm na lam nnga ai. Annau ni hkum ting dek hta ahkyak dik ai gaw,

(1) Ti nang(ngai) gaw hpa baw re?
(2) Ti nang (ngai) gaw gara kaw du, gara kaw tsap taw nga ai?
(3) Ti nang(ngai) gaw gara de naw matut sa ra nga nngai?

N-dai hpan masum(3) hpe annau ni yawng ma hkra chye na hkamla ra na re. N-dai hpan masum(3) hpe Annau ni n-chye na, n-chye hkamla yang gaw Amyu matmat na. Mungdan mung matmat na.Htunghking Laili laika hte ginru ginsa labau ni yawng ma hkra mat mat na.
(1) Ti nang ( ngai ) gaw hpa baw re? ngu ai hpe chye na hkamla ra nga ga ai.Annau ni hpe Hpanwa Ningsang Chyewa Ningchyang gaw Shanglawt ai Amyu kaba langai byin wa na matu jinat matse labye e uphkang ai lata kaw na Madu Yesu hte hkye mawai shawla sai shanglawt ai Amyu re ngu ai hpe dumhprang chye ra nga ga ai.Shanglawt ai Amyu re.
(2) Ti nang (ngai) gaw gara kaw du, gara kaw tsap taw nga ai? hpe mung chye na hkamla ra nga ga ai.N-dai hpe n-chye na ai annau ni a kahpu kanau n kau mi gaw hkyi re,panau re hpe n chye ginghka ai matsat shabat myen gumshem gunma a lakung lakap tai lagaw lata tai nna hpyen wa maga tsap lawm taw nga ai majaw Annau ni a Myu hte Mungdan Shanglawt hkrunlam hta ram ram dingbai ding na jaw taw nga ai majaw grai yawn nngai. Raitim Annau ni shada mara raw ya chyalu re. Hpang n-hkrat ai ya jang bai gayin wa marit.
(3) Ti nang (ngai) gaw gara de naw matut sa ra nga nngai? Ngu ai ndai ga san? hpe chyena hkamla ai lam nnga yang gaw Annau ni Asak
hkrung nga ninglen si taw nga ai hte bung na re.Annau ni Shanglawt ai Amyu rai nga ga ninglen Shanglawt rai n-lu shi nga ga ai re hpe galoi mung dum ga.Annau ni teng tup lu du ra ai Pandung shadaw (Shanglawt) rai n-lu shi nga ga ai.Annau ni Shanglawt lu na matu gaw Annau ni hkum ting dek hta lit nga ai hte maren Annau ni sha shakut la ra na re. Kadai hpe mung nmai kam ai.
# Dai majaw Nyau Chyang Ting tsing Asuya tsun ai ga hpe hkum kam.
# Nyau Hpraw Awng San kaw tsun ai ga hpe mung kam tim hkum hkap la.
N-dai Nyau Hpraw yen Nyau Chyang gaw Annau ni hpe mahkyit amya shamawng kau hkyem ai re. Dai majaw Annau ni a matu gaw n-dai NYAU HPRAW NYAU CHYANG AHKYAK N-RE.
Tsun mayu ai lachyum gaw Anhte Jinghpaw Wunpawng Myu sha ni (Shanglawt Ai Myu, Karai Kasang hkye la ai Amyu) hta Democracy ahkaw ahkang, shinggyim ahkaw ahkang mung kalang ta lawm chyalu, lu tawn sai ni rai ga ai. Ya hkyak hkyak nan Democracy ra rawng ahkyak taw nga ai gaw shanhte Madu Yesu (Karai Kasang) hpe rai n-lu la shi ai Myen Asuya ni kaw she re. Shanhte uphkang nga ai Asuya ni nan Madu Yesu (Karai Kasang) hpe n-lu la shi ai a majaw jet ai Democracy mung lu na n-re. Masu ai democracy rai chyalu sha re. Daini Mungkan kaw Democacy hpyi (tsop) hpun sumli tawn ai Mungdan grai law ai.
Dai majaw myen Asuya (satan) uphkang ai kata kaw nga nga dingsa Annau ni lu tawn sai Democracy galoi mung jailang lu na n-re. Tsaw ra ai chyurum Wunpawng Sha ni yawng lahkrip ra ra hte Jinghpaw Wunpawng Mungdan (Kachin Land) hpe myen hpyen Asuya a uphkang ai kaw na tsepkawp lu la hkra gasat sa wa ga.

Sau Nan Du
Sweden

KNU HPUNG NI A N DAU LAIKA

2012-01-27T01:00:00.002+08:00

ေကအဲန္ယူ ကရင္အမ်ိဳးသားအစည္းအရံုး၏ ေၾကျငာစာတမ္း

MAWHAN MARE MAKAU KAW GASAT

2012-01-27T00:43:00.002+08:00

January (26) bat Mali
Wunpawng Mungdan Shanglawt Asuya Dap Ba (4) npu Dung (29) na KIA myu tsaw share shagan ni hte myen tai hpyen ni dai hpawt jau jau (12:00am) hpang de Mawhan Mare makau kaw Kutkai maga na lung wa ai myen hpyen asuya a hpyen hpung ni hte gasat poi byin lai wa sai lam shiga na chye lu ai. KIA Dung (29) na Du N Hkum La Ring woi awn ai myu tsaw hpung ni hkap gasat ai rai nna, myen hpyen la (10) jan si hkala lai wa sai lam matut na chye lu ai.

DUM GA

2012-01-26T16:43:00.000+08:00

Chye chyang ai myit, dum hprang ai myit, n'chye ai, ndum hprang ai myit hpe ten hpring sawn dinglik yu, maram yu, dinglun yu ai lam n'nga ai a majaw n'sum ging ai sum, n'machyi ging ai machyi, n'si ging ai si, n'byin ging ai byin re hpe shingra tara ngu na kun? Jan shang jan du jang shana, janpru manap hpe shani ngu yu shalai kau na kun? Ningsin ninghtoi hta byin chye ai hpe sadi ai gaw lai ai ngu n'nga mat na re dum ga.
Dai ni Ningbaw kaba ni, Slg kaba ni hpe shadum mayu nngai law. Madu jaw ai hku, madu tara kata, madu ahkaw ahkang kata, galaw dan nga dan ga ngu tsun mayu nngai. Madu gun ai madu lu, madu sha mayu ai madu gun sa na sha, masha ni jaw na sha sak hkrung ai nre hpe madun yu ga. Lai sai ten kaw na ndai hpe grai tsun mayu nga ai re. Dai ni tai hpyen wa gaw annau ni hpe tara nlang ai sat sharu nga ai myu shamyit nga ai, shingja laknak nmu ai mu ai laknak yawng hte gasat nga ai re du baw law law htu jaw nna, dang hkra gasat nga ai re majaw hpa lam hta mung sadi ai gaw nlai na re.
Myen hte mung masa bawngban sa ai ten ni hta tinang lu hka tinang gun sa nna shadan lu dan ra ai, myen hpe nmai kam ai lam shamu shamawt ningsam hkrang hte n gup ga ntsun ai galaw dan ra ai, myen jaw ai kum hpa ni hpe mai byin yang nhkap la yang kaja na re, lama hkap la yang pyi dasang palatsatik ta mawza sumbu hte la dan ra ai. Kade hkrit hpa yet manam ai myu re hpe htawng madun ra ai, dai hpe yu nna mungkan na mung sakse hku, mabyin hku, hpang na ma ni yu la mai ai hte labau re, mung masa amyet kaba tai na re. Myen hpe sadi dung u, teng ai galaw u tsun u ngu ai lachyum mung rai na re.
Hpa majaw, mu yu na yu ai shari mung grai law wa sai, myen a pale palau masu magaw sadi ndung ai gaw ya dai ni du annau ni hkam sha nga ai. Namdan myetle ga hta gahtawk tsi, jinat, numla shapoi sha ai, sara shaga nna nat galaw chye ai ni re hta n ga makam n bung ai nat sara grai shagrat nna wa bawng na re. Dai hta grau hkrit tsang ra ai gaw ga ngwi si chye ai, shingja tsi ni n bang ai ngu gadai tsun lu na ta? Annau ni makam sham lam grak na re raitim Karai nre hpe dum ga, dung lahkum kaw na hkawt pyi atsawm gatsut dan ra ai. Dai gaw n'gasat ra ai hpyen gumshem hpe dang la lu ai lam langai re. Shaning (60) du wa sai hpe mung dum ga, ngai hku na tsang ai lai mat sai kun?
Mungtsaw myutsaw myit a jaw re hpe sawn la ya marit.

Hkungga let,
Baren Numraw

RAWT SAGA

2012-01-26T13:37:00.001+08:00

DU KABA LAUWA ZAWNG HKAWNG HPE HKUNGGA JAW N NGAI

2012-01-25T12:14:00.002+08:00

Ngai gaw, Du Kaba Lauwa Zawng Hkawng Hpe Hkungga Jaw Nngai.

Du Kaba Lauwa Zawng Hkawng (Sutdu Kaba), nhtoi 21-1-2012 ya 6:40 a.m aten, Madu Yesu hta yup pyaw mat wa sai shiga gaw, mungkan ting chyam bra mat wa sai. Lamu ganghkau laika pa hta yu dat yang, yawnhkyen ai, hkungga ai, shakawn shagrau ai, dinglun ai, ahpyak ai, jahpoi asawng ai, kinsha lasha ga du hkra hpring nga ai hpe mu lu ai.
Kadai hkawhkam wa rai ti mung, gara share shagan wa rai ti mung, hpaji ninghkrin wa mung, tsi sarawun wa mung, suthti kummi wa mung, matsan jahkrai wa rai ti mung, lani mi si na sha re. Shinggyim masha gaw, hkum hkrang si mat tim, mying hkrung nga lu yang, dai gaw myit dik mai ai lam re. Masha law law wa hkum hkrang asak naw hkrung nga ninglen, mying si mat ai ni nga ai.
Ndai ten na Jinghpaw Wunpawng sha ni a mabyin sat lawat hta, kaning rai yang, hkum hkrang si tim mying hkrung lu na ta? Kaning rai yang, hkum hkrang naw hkrung nga ninglen mying si mat chye a ta? Ngu nna ga garan sanglang dan na gaw, n si ai tsi sara, n shut ai tara kasa n nga ai zawn, tinang nang sawn ginhka la yu saga.
Jinghpaw Wunpawng sha ni gaw law la ai amyu ni n rai nga ga ai majaw, shada da pu gang sin machye chye ai myit, shada da makawp maga hkat chye ai myit, shada da mara raw hkyamsa hkat chye ai myit, shada da myit tau hkat chye ai myit, shada da arawng la hkat chye ai myit rawng ai rai yang, grau kaja na re hpe mu mada ai. Kadai mung hkum tsup ai gaw n nga ai. Agung alau ngu ai gaw, Yesu kaw pyi du pru ai lam Chyum Laika hta mu lu ga ai re.
Hpa mi rai tim, Du Kaba Lauwa Zawng Hkawng a myu tsaw myit gaw, hkungga shagrau ging nga sai. KIA rai yang she shagrau na; NDA-K (ran pru) re majaw nyeng nau n garu ai zawn re ai hku tsun shaga dinglun ai gaw n manu mu ai. Hpa baw nawku hpung hku kamsham hkan sa ai raitim, sumsing mungdan hpe myit mada ai lam maren sha rai nga ai zawn, hpa baw shingteng amying hte rawt tsap ai raitim, myu tsaw ai lam maren sha rai na ga ai. Wuhpung wuhpawng n bung hkat wa ai lam; shada hpai shai nna ran pru ra ai lam ni gaw, byin chye ai hkrai rai nga ai.
Gawng shingyan a ntsa asawng asang nga tsun shaga ai mung n htap htuk na ga ai. Kan tit ai hpe nau lu su, nau lu sha nna tit ai ngu dinglun jahpyak tim, tsun dinglun ai wa mahtang she hpoi na rai nga ai hpe dum ra ai. Kade lu sha tim hpum n hkraw ai ni nga ai zawn, jahpawt shana japhtu hte hkrai sha tim, hpum she hpum wa ai ni mung nga ai. Hkum hkrang kadun la ai hpe n kaw n law ngu tsun tim, gawng shingyan galu ai ni n lu galaw ai magam law law shi galaw lai wa sai.
Jinghpaw Wunpawng sha ni a rawt malan hkrun lam gaw, kade wa naw galu na kadun na kadai n lu tsun ai. Kadai wa a asak hkrun lam kaning rai hpungdim na mung n chye lu ai. Hpawt ni na lam hpe daini anhte garai n mai gumrawng ga ai. Anhte a nsoi nsa anhte a hkum hkrang ni Lauwa Zawng Hkawng hpe hkum tsun, gwi wa mang daram pyi n rai mat na kun kadai n lu tsun nga ai.
Daini gaw, Jinghpaw Wunpawng sha ni yawng, Du Kaba Lauwa Zawng Hkawng hpe hpang jahtum hkungga jaw dat ging ai nhtoi aten rai nga mali ai. Du Kaba Lauwa Zawng Hkawng NDA-K kaw na ran pru nhtawm, shi si ai shani du hkra, myu hte mungdan a ntsa sadi dung magrau grang let, share shagan lai wa sai gaw, kasi la mai ai lam nan rai nga sai. Hpunau kau mi tinggyeng nga manu lam hta machyu ai ninghkan jasam wa a lagaw lata myi na tai nhtawm, hkrap let wa pu shup nga ai ni hpe yu yang, Lauwa Zawng Hkawng gaw, jaw ai maga lata la hkrup sai lam danleng nga ai.
Ya aten hta Du Kaba Lauwa Zawng Hkawng a hpyenla ni shawng lam majan pa hta tsap nga ma ai hpe na chye lu ai majaw mung arawng la shagrau hkungga ai. Tengman ai labau lit hta apnawng daw jau gun hpai ai lam majing rai nga ai. Dai hta grau ai kaga hpa n nga sai.
Anhte gaw, myu hte mungdan a n tsa sadi run let lam dam nga ai ni hpe mung n mai kabai kau nga ga ai. Sagu latsa hta jahku shi jahku hpe lawng e rawng da lu tim, mat mat ai langai hpe naw hkan tam ra ga ai. Anhte a sai daw sai chyen ni; kalang mi na anhte a myit rum share shagan manang ni hkrai rai nga ma ai. Shanhte a matu chyinghka hpaw da let, myit galu kaba madun ra ga ai.
Jinghpaw Wunpawng amyu sha ni agrin nga dingsa Du Kaba Lauwa Zawng Hkawng a mying mung agrin nga na sai. Du Kaba Lauwa Zawng Hkawng a asak wenyi gaw, Karai Kasang a htoi kabrim ai sumsing htingnu e, htani htana asak hkrung let, ningngai lu na hpe myit dik kamsham let, hpang jahtum shagrau hkungga dat nngai law.

Watsat Hku Chyingtek
25-1-2012

RAU SA NA KUN?

2012-01-25T12:11:00.002+08:00

Munghpawm langai hku n'kam sa sai majaw myen hte bawsang ni dai ni du hkra gasat hkrat ra nga re, madu mung daw madu ga hkrung shada up hkang shangun mayu yang hpa majaw dai ni du naw gasat ra nga na rai ta? Dai ni KIO/KIA a mung masa ningshawn gaw ngai hku na mu yang munghpawm hku sa n'htawm madu mungdaw madu up hkang lu ai de sa nna, madu up hkang ahkaw ahkang lu yang gaw mungdan lu ai hte maren rai nga ai dai kaw na awmdawm shanglawt lu na gaw naw n'yak na re, ngu ngai hku na mu ai, raitim myen gaw dai masa de du hkra n woi sa ai, manai makai rai ten garawt nga ai, kaja nga yang UNFC hku teng myit hkrum ai hte bawngban sa lu yang gaw mungkan na mung madi shadaw ai hte grau htap htuk ai, n'gun nga ai re, myen hkrit tsang dik ai mung dai masa re rai yang ya dai masa n'du shi yang UNFC gaw shingran zawn mung masa pandung n'du ai de du nga ai.

Hpyen masa ginsup ai gaw hkum hkrang dubaw asak htu jaw nna ginsup ai lamang rai nga ai zawn hpyen masa ginsup ai a marang awngdang ai hte hkrat sum ai lam byin shangun nga ai. Yawn hkyen jamjau arang law law bang ra ai hte kabu kara ai n'gun kaba mung byin shangun nga ai. Mung masa ginsup ai gaw masha law law hpe galai shai shangun lu ai zawn masha hpung kaba hpe si shangun nga ai. Raitim myu langai mi matu gaw mung masa hpyen masa n'nga yang n'mai ai ahkyak kaba re.
Ahkyak kaba ai,manu dan dik ai, sutlu manu dan dik ai lamu ga mungdan re majaw masha yawng a ra sharawng ai, manu shadan ai, myit shang sha ai hte hpyen law nga ai re. Dai ni annau ni hpe grau myit shang na matu, grau mung masa amyet lu na matu hpaga masa hpe mung masa hpyen masa hku jai lang ra nga ai re. Masha yawng myit shang sha nga ai hpakant hpe pat ra ai zawn Dap kaba 4 dung 8 hku len shalai na hkyen nga ai Gas salu hte yenan sau dumlawm lam hpe pat nan pat ra ai hte anhte ahkaw ahkang n'lu ai, ahkang n'hpyi ai nmai lai hkra galaw ra ai.anhte lamu ga hta galaw nga ai hpaga masa yawng hpe n'mai galaw hkra jahten ra ai, myen hte miwa a lapran hkra machyi ai lam nga yang chyu mung masa hpyen masha amyet pru na re majaw yawng myit shang sha ai hpaga masa hte mabyin shara ni hpe jai lang ra nga ai.
Mung masa hpyen masa hku madi madun na gaw hpyen yen tsin yam masha ni re, dai ni mabyin hte garum ningtum ai lam hpe law law htawng madun ra ai, myen gaw dai ni hpe shinggyin nauna myit hte garum na ladat n'nga ai hte sat sharu nga ai myu shamyit nga ai masa hpe ja ja tsun madi madun ra ai, Garum sa wa na ni hpe mung pat hkum ai masha shinggyin ahkaw ahkang tawt lai ai lam ni hpe law law lawan lawan ten shagu lang hte lang htawng madun ra ai,UN hte EU Asean US de ding yang tang ra nga ga ai.
Ya kalang bai n'gun kaba dat nna maigan du myu sha ni yawng mungdan shagu ninghkap n'gun kaba lawan madun ra ai, mung masa lam bawngban sa wa na hta n'gun kaba re.rawt malan masat shani yawng n'gun madun lu yang kaja dik rai na re.
Myen hta miwa hpe grau hkrit ra ai,myen mung kaw shaning galu sai chyup lu na matu myen hpa galaw shangun yang galaw ya ai, maidang masawp kashin shangun tim galaw na sha re,myen a kaichyan yawng gaw miwa chyu galaw ya na masa nga ai. Manu dan dik ai lamu ga re majaw miwa a hpaga masa gaw annau ni matu tsang dik ra ai hte hkrit tsang ra dik ai lam re.
Yup pyaw nga ai madu a ma ni a myi man hpe azi yu masawp yu nna n'gun la ga.
Shanglawt sai.
Baren Numraw

TAT-MA (99) NI (105) MAIL KAWN NAMHPAKKA MAGA YAWNG

2012-01-24T22:39:00.000+08:00

January (24) bat Lahkawng,
Wunpawng Mungdan Shanglawt Asuya Dap Ba (4) Ginra maga de shamu nga ai myen hpyen asuya ai hpyen dap tat-ma (99) ni mawdaw (30) ram hte dai na maga hkying (6:00pm) ram hta Muse (105) mile kawn, Namhpakka maga de lai yu wa sai lam buga masha ni kawn chye lu ai. N dai myen hpyen dap ni hpe Kutkai de ya du hkra n du shang wa shi ai lam hte gara maga de yawng mat wa ai hpe gaw n chye dat ai lam matut shana wa ai.

MUNG SHAWA MAKAWP NINGGANG

2012-01-24T21:02:00.001+08:00

Tsawra hkungga ai JWP myusha ni e,,

1. Anhte n dai ten hta e n ngut shi ai rawtmalan PADANG HKRUNLAM MAJAN MASING hta e Myusha hte Mungdan hpe magrau grang grang makawp maga mat nna Hkrat sum mat sai share shagan ni hte Hkala n ba hkrum taw ai share shagan ni hpe anhte mungkan shara shagu hta e du taw ai JWP myusha ni hku nna n dai rawt malan poi hpe mahta la n htawm alu gumhpraw hpe gahkyin la nna shanhte ngam da ai kanu kawa kahpu kanau ni hpe shalai ya, Hkala taw ai ni hpe mung n gun jaw ga sa shaga ya, kumhpa shagrau jaw ya let Anhte Myusha ni a Tsawra myit hpe jawm madun ga ngu saw shaga mayu ga ai. Anhte langai sha re nga ga ai, Pu gang jang sin machyi ai ngu ai hpe anhte n dai lamang hta shanglawm let madun sa wa ga law.

2. Maning na Rawt malan poi kawn hpang ai "Mung Shawa Makawp Ninggang" kumhpa hpe dai ning na rawt malan poi hta e bai shagrau lu na matu mung yawng jawm shanglawm sa wa ga,
n dai kumhpa gaw
Mung shawa kawn Myusha hte Mungdan a matu tinggyeng hku nna a tsam dat shakut nga ai ni hpe shagrau kumhpa jaw na hku re ai, n dai lamang hta gaw maning e NDF party kaw na Slg. jan Bawk Ja hpe maning na rawtmalan poi hta shagrau ya sai hku re ai.
Dai hta e shagrau ya gring ai ni a mying jahpan ni hpe mung sa ya marit, lata la nna yawng e hkawn ai hpe jawm shagrau sa wa ga.

N dai lam a matu mung anhte yawng Ja gumhpraw hku nna shanglawm sa wa na matu saw lajin dat n ngai. N dai lam hte seng nna shara shagu de du taw ai myutsaw mungtsaw myitrum ni yawng hpe bai shana hkat na matu lajin dat n ngai.

Myit hkawn, myit lawm ai ni bungli rau jawm galaw sa wa lu na matu jawm bawng ban ga.
Shagrau sha a gring ai ni hpe anhte jawm nna shagrau sha a let n dai Padang Hkrunlam majan masing hpe awng dang wa hkra jawm shakut sa wa ga law.

Ong Lahpai,
+4552811075
Willemoesvej, 13.st.th
6760, Ribe, Denmark

THANKS FROM DEREK MITCHELL

2012-01-24T20:54:00.001+08:00

GA MUNG SHAGA, HKALI MUNG ASHAP

2012-01-24T20:44:00.002+08:00

Hkung ga let,
Mungdan Shanglawt Asuya KIO/KIA ningbaw ningla hpushawng hpuba ni hte mungchyingsha ni yawng hpang de ngai langai mi a ningmu hpe tangmadun shana dat n ngai.
Jinghpaw Wunpawng Myusha ni hte gaga rudi Wunpawng Myusha ni yawng madu uphkang ai mung(Kachin land) hpe tsep kawp lula na matu shakut shaja ding yang rai nga ai ndai ten hta hka hpunla grai ja dik ai hka ga-ang kaw du taw nga saga ai re hpe anhte yawng dum ga. Dai re majaw GA MUNG SHAGA HKALI MUNG ASHAP let matut shakut sa wa ra sai ngu mu lu nngai.
Tsun mayu ai gaw tara nlang ai Myen gumshem Asuya hpe n-gup aga mungmasa bawngban ai lam ding yang raitim Sinat lashawng gang ai lam mung n mai jahkring ai.Ga sha shaga nna hkali n ashap yang gaw anhte jawn tsap taw nga ai hkali gaw ndai ja dik ai hka hpunla kaw yawng lawm mat wa ai hta n-ga, Nammuk dara kata de lup mat wa chye nga ai.
Rawtmalan hkrunlam dai ni 50 ning jan hkra na mahkrum madup hte maram dinglik yu ai shaloi ...
(1)Sinat mahku nsen ngoi taw nga ai ten hta tsun shaga ai ga myu mi.
(2)Sinat mahku nsen zim mat jang tsun shaga ai ga myu mi.
(3)Daini tsun ai ga daini tara shang nna,hpawtni gaw tara bai n.shang mat ai, tara nlang ai lup mat amyu (Myen) re.
N-dai ja dik ai hka hpunla hpe myithkrum mang rum ai hte laidi lu hkra jawm shakut sa wa ga.An nau ni ngwi pyaw ai madu uphkang Mungdan lu na sha rai sai

Sau Nan Du
Sweden

MANA MASU

2012-01-24T00:47:00.001+08:00

Mana masu nna nga kaba kapung sha mayu ai, myen gaw Democracy masing hkrang numshawn hpe kachyi mi mung grai nchye hkawm shi ai (2) ning ma kaji zawn, sinna dan ni hte tinang shingwang kata kaw mung chying masha ni hpe n'tsa lam hpyi masu hpun tawn nna adan alen masu taw nga ai.
Bawsang yawng hte ten langai hta shara mi kaw, lamang mahkyen jahkrat nna n'gam hte n'gam langai hpang langai masing shawng jahkrat dan nna, tsang hte tsang mai bawng ai. Bai sharen da ai bawng masha ni hpe mung ten langai hta, atsawm jahpan la nna kalang dat mai dat ai re, hpa majaw ten garawt nga ai kun? Hpa majaw madu mana masu ai hpe htawng madun nga ai kun? Shingna shingnyip mu yang hkrang hpe mu chye sai ten madu myit n san seng ai hpe madu gaya n chye ai hpe hpa rai madun nga ai gaw Gumshem myit, hpyen myit grai nmat shi ai, nsawn n'ang ai gumshem daru aya hte naw up hkang sha mayu ai ladat a jaw re hte, hpyen u shoi naw dun nga ai kumla sha re.
Tinang dep magra lu ai masha, tinang shingwang hta tinang a matu hkra machyi ai lam n'nga ai ni hpe dat masu ai shatsawm masu ai, mungkan na tara shang asuya langai masat lu hkra bai pat tawn ai, hpaga masa hte bawngring lam yawng hpe hpaw ya na matu, hkabun hku mu hkrup ai shuchyit zawn, ba hkang she tat daw mi dang chyang, gungbang tawn ai nga chyayet hpe la malau sha nga ai. Shani tup gatet tim udi gaw langai sha, rau yup nna du manat sat ai masa de naw shanang na kun? Madu hkrai sha na sha shadu tawn nna shat ban (1) hta, bawsang law law hte rau chyawm sha ga nga mai na kun? Madu lamu ga na lu malu yawng gun sa nna, madu matu n'lawm ai shat hpun de sa na kun? Kadai mi simsa masat htu htu, hpa mi byin byin, annau ni hte n bung ai nseng ai, annau ni shawng lam de kara hku chyawm galaw yang shanglawt lawan lu na de she myit sa wa ga.
1-Panglong ga sadi mung shanhte ahkyak n'tawn sai.
2-2008 a gaw da ai Tara hkrang mung mai galai na nre.
3-Anhte lamu ga hta jung tawn ai, htu tawn ai hpyen dap, hpyen n'gun mung dawm kau ya na n're.
4-Hpyen majan simsa lam sha madung tawn ai.
5-Mung masa hte bawngban mahtai tam mayu ai lam n'nga ai.
6-Munghpawm hkrang masa n'nga sai.
7-Tinang up hkang mungdaw n'kam jaw ai.
8-Anhte hpe hkrai n'gun kaba hte gasat na.
9-Tara hkrang kalai kau na lam n'nga ai.
Mung masa hte bawngban sa na mahkyen masing shawng n'hpaw dan yang kara hku bawngban na lamang shawng nmu yang bawngban n'sa ai nga dan yu ra ai. N'dai ten myen hpe n'mai shakya ya sai. Ja ja mazut zut dawdan ga. Myen hpe galoi n'mai kam ai. Mung masa hte bawngban jahkrup nna mahtai tam sa wa na lam n'mu yang, hpyen masa nmai jahkring sai hte, myi htan tu ladat, jau gawng ladat hte machyu pala (1) hta tai hpyen langai hku shara shabra, masha n'gun shabra nna, n'sim nsa, gap shatsang ra sai.
Hpakant hpe pat nan naw pat kau ra ai. Hpaga masa yawng pat ra ai. Mung masa mahtai lu jang kaja nan simsa chyalu re, mahtai pru hkra shanglawt sha nlu dingsa ja ja naw gasat yang she kaja na re. Mana masu nna nga kaba kapung sha mayu ai hpyen hpe Tinang mungdaw up hkang lu ai masa sha n'du dingsa gung bang tawn ai, mung masa nga chyayet hpe madaw naw dam jaw, tawn jaw ra ai. Bawsang yawng hte simsa lam kade mi la la, shanhte hte annau ni nbung ai, annau ni hpe hkrai dasang gasat ai gaw annau ni matu grau kaja ai hte grau ga tsun n'gun nga ai hte mungkan na asan grau mu chye wa na re. Sam chyang ni hte ningma hkang alun na lam de myen gaw hkyen tawn magang sai. Sumprat kaba dawk na, wa hkali dat bang na gaw myen a bungli re.
Dai ni mahtai lu ra sai ten kaja nga yang, hka hkanu nga yang lawan nga hkwi ga. N'dai ten myen a hpyen masa mung masa mungkan na ni chye hkra n'gun hte htim gasat yu ra ai, shaloi she myen gara hku ka manawt wa na grau chye na re.

Baren Numraw

PANGLONG GA SHAKA LAIKA

2012-01-24T00:10:00.000+08:00

HOPIN KAW MYEN HPYEN DU MARE MASHA GAP SAT

2012-01-22T03:15:00.004+08:00

January (22) Laban,
Jinghpaw Mung Htingnai Ginwang, Hopin mare Wanleng daru makau na lu sha seng kaw myen hpyen du langai kawn mare masha langai hpe January (20) shana hkying (10:30pm) ten sinat gadun hte gap sat kau lai wa sai lam na chye lu ai. Hopin Thida lawk na Zaw Zaw Aung hpe hka-la-ya (388) dap na hpyen du Soe Aung Htet kawn lahtan kaw nan sinat hte gap ya ai re lam shiga na chye lu ai.

One of Burmese army Lieutenant Colonel shot and killed one civilian in Hopin village, Kachin State. The killing took placed at 10:30pm local time on 20 Jan 20 January 2012 in the food stall near Hopin, Kachin State train station brutally with no reason, and any investigation as though he Burmese soldier has license to kill any civilian in Kachin State. According to eye witness report villager Zaw Zaw Aung was shot brutally at this forehead by by Burmese army Lieutenant Colonel Soe Aung Htet without any reasons.

WA YAW KAHTAWNG KAW MYEN (10) HPE GAP KAU

2012-01-21T22:51:00.005+08:00

January (21) bat Kru,
Wunpawng Mungdan Shanglawt Asuya Dap Ba (3) Ginra rai nga ai Wa Yaw Kahtawng de January (20) shana maga de myen hpyen la (10) jan shang wa ai hpe KIA myu tsaw share shagan ni kawn myen hpyen la ni yawng hpe lu gap kau sai lam shiga na chye lu ai. Jinghpaw Mung maga de myen hpyen asuya a tat-ma ni bai htu lung wa na nga shiga na chye lu ai. N kau hpyen dap ni gaw Jinghpaw Mung maga de lung wa nga sai lam hpe mung na chye lu ai.

There was another fierce fighting due to Burmese army intrusion into KIA 3th Brigade intrusion in Wa village on 20 January 2012. Fortunately KIA forces have successfully defeated Burmese army intrusion and killed all 10 soldiers. According to frontline report, Burmese army continue to build up more soldiers and weapons into the KIA control areas and Kachin State to reinforce the civil war against Kachin people in spite regime government peace talk with KIA recently. Burmese army fierce attacked and intrusion against KIA cited that the peace talk or discussion called by Burmese regime government is not honest and truthful intention for ethnic reconciliation.

LAUWA ZAWNG HKAWNG MADU HTA YUP PYAW

2012-01-21T17:59:00.004+08:00

January (21) bat Kru

Shawng de Jihpwi Lawk Hkawng, Chawng Taw Yalawng Mare na (Slg. Lauwa Dau Zawng + Jan Bale Bawm Win) yan a kasha Slg. (Lauwa Zawng Dau) + Jan. Maraw Lu Mai, Slg. (Lauwa Zawng Hong) + Jan Yit nam Ying Nam, Jan. Lauwa Bu Naw + Lakyam Lum Hkawng ni a kahpu kagu, Dr. Lauwa Hkawng Naw, Shayi Lauwa Hkawng Nyoi, Shayi Lauwa Hkawng Tsai, Shadang Lauwa Hkawng Lum, Shadang Lauwa Hkawng Dau ni a Kawa, Jan. Hpakawn Htu Ting, Jan. Shezang Hkawng Nan yan a Tsaw ra ai ningrum ningtau, May & Mark Company Limited Madu, Sut Du, Du Kaba, Lauwa Zawng Hkawng gaw Ninghtoi: 21/01/2012 Jahpawt 06:40 Am ten Madu Yesu hta yup pyaw wa sai. Shi a Hkum tsawp Moi mang hpe Laiza Muklum Shawa Lupwa kaw Ninghtoi: 22/01/2012, laban ya shani makoi mayang na re lam chye lu ai. Kachinnet

MANAWN MASHAM

2012-01-20T20:04:00.000+08:00

Ngai hku nna hpyen wa a manawn masham myit hpe kaji mi jahta mayu ai. Anhte yawng chye ai hte maren Madu Yesu gaw asak 12 ning kawn Yerusalem nawku htingnu de sa nna laika ka sara ni, saduke ni, hparishe ni, hkyinjawng agyi ni hte dangrang hkat sai, sanhtai galaw hkat ai shaloi Madu Yesu hpe shanhte mau ma ai, shi tsun ai lam mahkra shanhte a matu mau hpa rai mat ai, shante mahtang Madu Yesu a man e hpa n chye ai ni tai mat sai. Laika ka sara ni, saduke ni, hpari she ni, hkyinjawng agyi ni gaw shanhte hkum shahte grai chyedum ai grai chyoi pra dum ai raitim shanhte hta grau ai Madu Yesu hte hkrum wa ai shaloi shanhte grai manawn mat sai, shanhte hta grau ai wa du nga sai majaw shawa a man e shanhte ni miman sum ra nga ma ai dai majaw Madu Yesu hpe manawn sai, mara tam na sha myit mat sai sat kau na sha gyam mat sai.

No.II mungkan majan ngut mat ai hte mungdan law law gaw shanglawt la na masing byin wa ai, shaloi n tai n mai san ai, Jinghpaw ni mung shanglawt la na matu shamu shamawt wa sai. Raitim myen ningbaw Aung San gaw Jinghpaw ni hkrai san san shanglawt hkum la mu, anhte hte rau jawm la ga ngu Myitkyina Manhkring Mare e Jinghpaw ningbaw ni hpe shaga kakhin n htawm alau la nu ai, Jinghpaw ni san san shanglawt la na hpe manawn ai majaw rai na sai.

1961 ning hta hpushawng hpuba ni Myen ni hte n dai hku sha matut nga yang gaw n jaw na sai ngu jawm dawdan n htawm rawtmalan hpang sai. 1947 ning Panglong mare e bawngban da ai mungmasa ginlam ni hpe mung hkrang n shapraw mat sai majaw, Jinghpaw salang ni gaw mi shawng e Myen hte pawng yu nna n byin jang gaw shanglawt mungdan gawgap na ngu tsun shaga da ai hte maren Kachin ni a Republic of Kachinland Mungdan (Mungdaw n re) gawgap na shamu shamawt wa sai. Raitim Myen ni gaw anhte Kachin ni hpe shanglawt lu ai amyu langai hku n mu mayu ai J.W ni ngangwi ngapyaw na hpe manawn ai. N dai manawn ai lam gaw le ra Jinghpaw ningbaw kaw sumprat bang yu, aw ra Jinghpaw salang kaw tsun a chyaw yu di nna, anhte j.w sha ni nan shanglawt la na myti masin n rawng mat hkra awu asin di kau hkrum nga sai.

Dai majaw 1975 ning kawn n dai maga de gaw Awmdawm Shanglawt ngu hpe kabai kau nna Myen hte Jawm nga na pandung de bai shayawn mat sai. N dai hku galaw dat ai ten kawn anhte j.w sha ni a kata hta mung myit n hkrum n ra ni byin nga sai, ya dai ni du hkra rai nga sai.

Pratdep wa sai ramma ni mung ya kaba wa ai ma ni mung n dai zawn re masa ni hpe myit kraw kata hta jung nga sai majaw moi na hpushawng hpuba ni hpang da ai magam yi ngam hpe n kam hkan mat sai shanhte a myit hta prat n dep dum mat sai, grai nan mungding masa (conservative) shanang ai ngu sawn la ma sai. Myen ga mung atsawm chye shaga nga sai majaw, myen hte kanawn nna galaw lu galaw sha yang nga pyaw na shadu mat sai.

Myen ni gaw J.W sha ni shanglawt ngu ai n gazik mat hkra sat nat htim sai, mare masha ni num kasha ni hpe roi rip sat sharu sai. N dai gaw manawn masham myit a majaw galaw wa ai lam ni rai nga ai.

N dai shara kaw ngai tsun ai gaw, anhte ra (tsawra ) ai hpe tsun ai n re, ra nan ra nga ai hpe tsun ai she re, kaning n chye di nna myen hte jawm nga kau tim kade nna yang kashu kasha ni a prat hta myen hte bai kasat hkat wa na sha re.

Uma ga hte n gringdan ai rai yang anhte a kaji kawa ni Uma ga de buhtawt kasat shang bang wa ai chyoiloi n hkoi ten hta, mi kawn nga taw sai Sam hpunau ni hte kasat hkat ai poi ni hta anhte a kaji kawa ni si htum mat sa na re. Karai Kasang gaw J.W Myusha ni hte gringdan sai majaw ya nga ai Uma ga hpe kaji kawa ni a lata de ap da ya sai.

Raitim ya dai ni na aten hta Jinghpaw Mung hpe j.w sha ni n madu sai gaw nang ngai dum nga myit ni, anhte a daru magam aya hpe Myen la wa she jum da sai. Myen i jaw ai federal ngu ai mungmasa n pu e nga nang tim daru magam gaw myen a ta kaw sha re majaw, shanhte pru mu ngu ai n htoi hta pru mat ra na, shanhte dung mu nga yang dung ra na re.

Dai majaw Jinghpaw Mungdan hpe shalawt na magam hta “ tengman ai maga de tsap na i?” shingnrai “manawn masham myit rawng ai maga tsap na i?”, nang gwi gwi daw dan sa nu.

Ka ai
Slg. Naw Kham

SHWELI N DAU SHABRA LAIKA

2012-01-19T17:51:00.000+08:00

KIO HTE MYEN HPYEN NI HKRUM ZUP HPAWNG

2012-01-19T01:46:00.004+08:00

January (19) bat Mali,

Wunpawng Mungdan Shanglawt Asuya hte myen hpye asuya ni miwa gumsan mungdan Shweli mare kaw mani January (18) ya hkrum zup bawngban ai hta dai ni gaw hpa mahtai rai nlu shai ai lam hte hpawt ni bai matut bawngban sa wa na re lam shiga na chye lu ai. Dai ni na bawngban hpawng hpe shani hkying (1:00pm) kawn shana de (5:00pm) du hkra hkrum zup bawngban ai re lam hpe na chye lu ai.
Ndai zuphpawng hta KIO de na Sara Kaba Sumlut Gam woi awn ai Salang (18) dat kasa ni gaw Pang Long ga sadi kaw lam ai myit hkrum lam ni hpe madung da tsun jahta wa ai re lam hpe mung na chye lu ai.

FACEBOOK KAW MAHKAWN BANG AI LADAT

2012-01-18T11:55:00.007+08:00

Ndai lang gaw Facebook prat re majaw Facebook kaw mahkawn (mp3) bang ai ladat hpe tsun dan nna n ngai. Rai n chye shi ai manaw manang ni a matu rai u ga.
Madun da ai sumla ni kaw yu let hkan galaw mat wa ga, hpa yak hkak ai lam n nga ai.
Shawng nnan N DAI KAW shawng shang nna account hpe hpaw la ga.

NDAI KAW YAW

Account hpaw la ngut yang n dai zawn pru wa ai hpe mu na ra ai. Shawng nnan Audio nga kaw dip u, Ngut yang ntsa kaw na File nga kaw dip dat u.

File nga kaw dip dat yang, lawu na zawn pru wa na ra ai. Select a file on your computer nga kaw dip dat u, shaloi na a Computer kaw na nang ra ai mahkawn hpe mai lata la na ra ai. Nang ra ai mahkawn hpe mu jang Double Click di dat u. Shaloi shi chyu upload galaw mat wa na ra ai.
Upload galaw ngut yang lawu na sumla zawn sha pru wa na ra ai. Tinang a mahkawn upload ngut yang kalang lang List hkaw byin taw chye ai, shaloi Grid nga kaw dip dat u. Grid hpe dip dat yang mahkawn ni list hte n madun ai sha lamu na zawn kaba law rai madun wa na ra ai. Shaloi tinang bang da ai mahkawn hpe Click di dat u.

Upload galaw da ai mahkawn kaw dip dat yang lawu na sumla zawn madun wa na ra ai. Shaloi View nga kaw dip dat u.

View nga kaw dip dat ai shaloi tinang a mahakwn hpe mai madat sai hkru re.
Facebook de mahkawn hpe mara mayu yang, lawu na sumla kaw mu lu ai hte mare Link hpe Copy galaw la nna, tinang a Facebook (sh) manang wa Facebook (tinang mara mayu ai kaw) mai sa mara sai hku re. Facebook kaw mara nna na a (sh) manang wa a page hpe refresh (reload) galaw kau dat u, Shaloi nang mara da ai mahkawn hpe Player hte pru wa ai hpe mu lu na ra ai.

Mahkawng bang ai ladat gaw tsun dan ngut sai, Facebook kaw sumtsaw sumra mahkawn ni chyu hpring nre ai sha, Myu tsaw Mung tsaw mahkawn ni hpe mung mara ga. Myu Sha ni myit rawt ai baw yu ngwi mahkawn ni law law hpe tam mara sa wa ga. N chye na ai manaw manang ni nga yang C-Box kaw rai rai, comment kaw rai rai ka da ya marit. Chye na sanglang hkra bai tsun dan na n ngai.
NDAI KAW

Yawng awng dang ai lam lu la u ga,

Mut Tsawm
18/1/2012

GAN DAU YANG KAW MYEN (2) HKRAT

2012-01-17T23:43:00.001+08:00

January (17) bat Lahkawng,
Wunpawng Mungdan Shanglawt Asuya Dap Ba (5) n pu Dap Nawng Dap Up Du Brang Mai woi awn ai KIA myu tsaw share shagan ni hte myen hpyen asuya a hpyen dap hka-ma-ya (318) ni January (16) ya jahpawt daw hkying (7:00am) ram hta Gang Dau Yang makau kaw gap gasat lai wa sai lam shiga na chye lu ai. N dai zawn gap gasat ai hte myen hpyen la (2) hkrat sum nna, hkala ai lam ni mung nga lai wa sai lam shiga na chye lu ai.

There was another Burmese soldiers intrusion into KIA 5th Brigade control area and fierce fighting continue between them. KIA force command under Colonel Brang Mai was successfully defended Burmese Battalion hka-ma-ya 318 soldiers on 15 January 2012 at 7am local time. According frontline report cited 2 Burmese soldiers were killed and unknown number of soldiers were injured. The fierce fighting continue daily by Burmese army in spite the regime government order to cease the fighting against KIA and Kachin people.

KIO A MYEN HPYEN ASUYA HPANG DE N DAU LAIKA

2012-01-17T21:30:00.006+08:00

JINGHPAW WUNPAWNG U HPUNG U HPAWNG NI A N DAU LAIKA

2012-01-17T21:30:00.003+08:00

ေကအုိင္အုိ နွင့္ စစ္အစုိးရေတြ႕ဆံုမွဳအေပၚ ကခ်င္အဖြဲ႕အစည္းမ်ား၏ သေဘာထားထုတ္ျပန္ခ်က္

KACHIN ORGANIZATIONS STATEMENT ON DIALOGUE 17 JAN 2012

2012-01-17T21:27:00.001+08:00

KIO GINJAW SALANG NI MIWA GA DE RAWT

2012-01-17T20:44:00.004+08:00

January (17) bat Lahkawng,

Wunpawng Mungdan Shanglawt Asuya a KIO/KIA Gijaw na myitsu Salang ni gaw myen hpyen asuya hte mung masa bawng bang na matu dai ni miwa mung de hkawm sa mat wa sai lam shiga na chye lu ai. KIO maga de na myen tai hpyen ni hte mung masa lam bawngban na matu Komiti hpe Hpaji Dap Lit Hkam Sara Kaba Sumlut Gam kawn woi awn ai re lam hpe mung na chye lu ai. Sara Kaba Sumlut Gam woi awn ai KIO a mung masa bawng ban na Komiti hpung ni gaw hpawt ni na nhtoi hta miwa ga kaw myen hpyen asuya a dak kasa ni hte hkrum bawng ban sa wa na re lam hpe mung na chye lu ai. KIO Ginjaw Komiti gaw n dai bawngban hpawng hte seng nna January (17) ya nhtoi masat hte mung shawa masha ni hpe n dau shana wa sai re.

KIO A MUNG SHAWA HPANG DE N DAU LAIKA

2012-01-17T10:47:00.001+08:00

TAW MAW KAW MYEN HPYEN LA (10) BAWM HTE SI

2012-01-16T20:53:00.003+08:00

January (16) bat Langai,
Jinghpaw Mung Uru Seng Maw, Taw Maw kaw dai ni January (16) hkying (10:00am) ram hta KIA myu tsaw share shagan ni bawm hte hkap kapaw ai majaw myen hpyen la (10) jan si hkrum wa sai lam hte law law mung hkala lai wa sai lam shiga na chye lu ai. KIA myu tsaw share shagan ni kawn bawm hkam tawn nna myen hpyen la ni hpe wang bang la nna remote bawm hte hkam kapaw kau ai re lam buga masha ni kawn na chye lu ai.

The Burmese amy intrusion into KIA control area of Taw Maw on 16 January 2012 and KIA forces have trapped the Burmese soldiers with remote control bombs. The bombs killed more the 10 Burmese soldiers and many others were also wounded. According battle frontlines witness cited that KIA forces set up sing of remote control bombs and being detonated as a defensive attack against Burmese army.

MYEN HPYEN LA NI MARA KATA MARE MASHA NI HPE GAP SAT

2012-01-16T20:46:00.002+08:00

January (16) bat Langai,
Jinghpaw Mung Uru Seng Maw, Sang Hka maw kaw January (15) laban ya shani hpyen la ni gap ai majaw mung shawa masha (3) si nna, marai (5) ram hkala mat ai lam na chye lu ai. Asak kaba sai Dinggai langai gaw lagaw daw mat ai lam ya hte hkala hkrum ni hpe Lawng Hkang tsi rung kaw tsi tsi ya nga ai lam na chye lu ai. Mabyin gaw myen hpyen la ni kawn kani ya langai hpe hkap jahkring ai hta dai kani ya gaw hkrit nna hprawng ai kaw myen hpyen la ni gaw sinat hte moi joi hkan gap sharu bun ai majaw mara kata mare masha ni asak sum mat wa ai re lam na chye lu ai.

OPEN LETTER TO UN SECRETARY AND HELLERY CLINTION

2012-01-16T20:28:00.000+08:00

SIMSA LAM HTE MUNGDAN LU NA N RE

2012-01-16T15:06:00.001+08:00

Jinghpaw WP amyu sha ni myen ni hte n mai kanawn ai gaw Karai Kasang mung chye sai, mungkan ting mung chye sai. Jinghpaw WP myu sha ni Laksan mungdan lu hkra Karai karum taw nga sai. Dai hpe ningbaw ningla ni gaw kamsham ai myit hte lajin ai lam hkrak hkrak galaw ra ai. Ya Shanglawt dap hku nna Hpakant hpe magra dat ai gaw grai nan jaw mat sai. Ya she miwa ni hpe kachyi mi hkra ai. Dai hpe gaw n mai tat ai. Ya pyi gaw simsa lam jahta na matu nga nna sa jahkruk shangun ai ni pyi n sa wa shi yang Hpakan ga de hpyenla 3000 bai dat na lam shiga pru taw nga ai. Dai majaw sawa lai hpe jai lang ai ni hte gaw galoi mung jahkrup n mai na re. Ya gaw myen hpyen ni dumbru dumgra byin hkyen taw nga sai. Dai majaw, shanhte rim bang da ai ni hpe pyi gaw bai shalawt let, myen amyu ni lahkum n shamat na matu chyawm bawngban taw nga sai. Shanhte shada n hkrum hkat tim, myen amyu ni ayai maw wa sai re majaw grai tsang wa ma sai. Dai majaw Shanglawt dap hku nna-

(1) Hpakan hpe n mai tat ai. Ya, myen hpyen ni a shang gumhpraw daw mi yawm mat sai. Dai sha nka dai gaw Jinghpaw WP mungdan gawgap ai shani dai hte arang galaw ra ai.
(2) Kaga amyu ni hpe tsepkawp n shang shangun ai sha, nga taw sai ni hpe mung Hpakant ga kaw na wa mat hkra ladat shaw ra ai. Hpa majaw nga yang, mungdan nnan kaw e, bungli n lu ai Jinghpaw amyu ni a matu kanbau ginra shatai ra ai.
(3) Ya Shanglawt dap hte myit n hkrum ai zawn rai taw nga ai, NDAK ni, Lasang ni hpang tim, myusha lam yan masing hte seng nna myit galu kaba the zinglum ai shiga ayan shalai ya yang mai na re. Hpa majaw nga yang masa lam hpe kaning n mai galai shai hkraw ai majaw kade n kam tim kanawn nang taw nga ai ni grai rawng taw nga ai. Dai ni gaw nau nna yang Shanglawt dap the langai sha tai wa na rai sai. Jinghpaw WP myusha ni myithkrum wa jang myen hpyen ni hpe hkum tsun kaning zawn re hpyen hpe mung dang na sha re.
(4) Kaga amyu rawt malan hpung ni mung Shanglawt dap hpe grau kamhpa wa hkra, ayan matut mahkai let shanhte a ginra kaw e majan hpe mai byin ai daram hpaw na matu n gun jaw ra sai. Dai lamang mali hpe shata manga dang lu shadik shatup jang mauhpa lamik kum la paw pru wa na re.

Ningbaw ni e Plan kaba she soi ga. Wuhpung nawng nawng kasa hkat n mai ai shara kaw e, marai masum hpra rai nna jaugawng hpung law law hpaw let, shara law law kaw na hpyen ni a chyinghka lam hkan, hka ja lam, hka shin lam, gat sa lam re ni hkan kahti galai hkan sin ai rai yang hpyen ni na na hkam na n re. Lu gap ai hta hkan let shagrau ai lam mung galaw ga.

Simsa lam bawngban let gaw nau nmai shana ai. Ya gaw miwa ni mung machyi lawm sai re majaw, majan ladaw na wa jang, miwa ni mung grau grau maw lanyet lawm wa na tsang ra ai. Hpa majaw nga yang, anhte amyu sha ni law law gaw miwa mung kaw na n gu ni, tsi mawan ni, kaga shahpa ni hpe madung jailang taw nga ai re majaw, dai zawn re kaw e, dingbai dingna byin shangun ai tsi amyu myu kayau bang na dut shalai ya na hpe mung tsang ra ai. -myen the miwa hpe gaw maren tsang ra ai re. Hpa mi nga tim, n dai majan gaw myen ni anhte amyu sha ni hpe yu kaji ai a majaw byin wa ai mabyin re majaw myen yawng mayawng, hpyen da, mung masha ni da, myit galai shai ai lam nnga ding sa gaw ya simsa lam la tim, hpang e naw byin wa na sha re. Dai majaw kaja dik htum gaw ya shade madang du hkra woi shakut sai the maren, lam daw mi kaw n jahkring ai sha, WP mungdan hpe ladat hkra hkra the woi gapdi la na sha ra ai. Ya na zawn , ding yang shakut mat wa ga, WP mungdan grai ni sai.

Shanglawt hpyen dap ting hpe Lamu kasa Gabriela woi awn u ga.

HELP KACHINLAND FREE

2012-01-16T15:02:00.001+08:00

Out of 15 associations in Kachin Baptist convention, 10 have been devastated by the regime government so far. All the Kachin villages have become desolate places. Villagers’ livelihood has been destroyed; their belongings have been taken away as booties by the regime soldiers in more than one hundred villages. More than seventy thousands are at refugee camps. The rest of the Kachin population in towns, cities still stays at home, but they are like under-house arrested. They cannot do their livelihood. Typically, Kachins earn their living working in the countryside. By grace, humanitarian organizations, International communities, and some institutions have been providing the refugees food and shelter. But now, towns, cities dwellers are beginning to face shortage of income and food, too. The life of Kachin people has been restricted inside or outside the cities. Many of them are beginning to mortgage their houses and homes. When regime soldiers meet travelers in the buffer zones, they ask the travelers if they are kachins or non kachins. These soldiers let go non-Kachins but stop kachin travelers and put into jails, torture, dress them uniform, use them as human shields or potters in the battle. The soldiers have even killed several motorbike riding travelers by mistake in different areas. In fact, this is lexical cleansing of the regime government on Kachin people. Since the land of this small Kachin population sandwiches between non Christian countries of China, India and Burmese, these giants neighboring countries are also deliberately conspiring against small Kachin society and applying ammunition to wipe out small Christian society. In doing this, Chinese will harvest the natural resources freely, if Kachin population is crashed. With all these reasons Kachin people no longer see China and India honest looking at their immigrants living in Kachinland. Without these business people, regimes will have gone long ago. As Wang Kya Pou, Chinese prime minister said, “Mainland China is responsible for the wellbeing of these outside Chinese immigrants.” To protect the right and privilege of the Chinese in Burma, China supports regime all that they can, so as India. For the freedom and independence of the Kachinland, it is too hard for Kachins alone to struggle against these giant nations, but Kachins will never give up. When Kachinland is free it will be easy to free all other minorities, including even Tibet plateaus. Being in the middle of the two most populated nations, Kachinland is the most strategic point of these areas.

This is critical situation for Burma. It is very important that western leaders do not take in what this whitewashed regime says. In the news, magazines, there is news about the changing of Burma, but that is in their Burmese ethnic regions, not in Kachinland. They close the door to Kachinland for foreigners and make all sort of presidential lies. The president is only the puppet to deal with the leaders, but militarists are doing different jobs, they even use chemical weapons in their heavy shellings that are quite different to what president says to the international community. Their intention upon ethnic minorities is unchangeable unchanged. So, Western countries, The United States should stand on the side of ethnic groups and help Kachinland free directly if the west wants to see the genuine democracy in this region. Concerned leaders should not take time too long to provide KIA with ammunition directly. Then, KIA will not need much intervention of International Community. They will get back their land on their own. What the KIA needs now is ammunition. It is no use of having modest consultations with Burmese regime because they are not different from Somalia pirates or bandits. For example, they themselves explode bombs in the city centers to impose martial laws and arrest the people they suspect. They seize and imprison the civilians for hostage to bargain with western leaders, in order to have sanctions free. As the whole world sees, they have unwillingly acted out to a couple of western leaders’ demands, but what they have done is just to get what they want in order that they may be able to bully the weak worse.

During the Second World War, by the time, America joined alliance and saved Europe, Nazis had already wiped out millions of Jews. Today, world leaders should not let the same story repeat into this small Kachin society before it is too late. This Kachin society, though small, should also enjoy peace and prosperity managed by the leaders of the global society, but definitely, not by the regimes.
In the opinion of ethnic minorities, western leaders have been heroes in saving the countries and balancing the world since World War II. They still have a great hope on western leaders. They look up to them to live up to their reputation especially while these ethnics are in trouble. Unless Democracy countries and The United Nations help this small nation out of conscious decision in this critical situation, their role and attempts in global society will simply be fruitless propagandas.

For Kachin society, this is Armageddon war. This is too small to compare to the wars in Iraq and Afganistan, but for Kachins this could be the last war. If regimes lose Kachin will survive. If regimes win, Kachin will be finished, later on other ethnic groups will suffer the same fate because in the regimes top secret, they are to wipe out Kachins. While they are eliminating Kachins, they are to offer artificial peace-process to other ethnic groups. When Kachins are gone, they are to take Karen ethnic groups for the second. This top secret came when old Burmese saw British began to use hill tribe people in some of their management. The old Burmese began to see hill tribes as their future rivals. Then, an old Burmese activists group of colonists called “Takhin youth” meaning ‘the lord youth’ organized this secret plan of Burmanizing the country into one single race and single religion. Since then, this secret plan has been handed down by “Takhin youth” from the last moment of British colonels down to the present regimes. The regimes have changed groups after groups, but the top secret remains alive. After all these things, it will not be possible for Kachins to be living in union again because the regimes have imprinted racism to thousands of their young elements of different sectors. It is important to help the Kachinland free and stop all sort of boosting the terrorist Burmese regimes.

MADI YANG MAKAU KAW GAP

2012-01-16T14:57:00.002+08:00

January (16) bat langai,
Wunpawng Mungdan Shanglawt Asuya Dap Ba (5) Ginra rai nga ai Madi Yang makau na Machyawk Sun hta KIA myu tsaw share shagan ni hte myen tai hpyen dap hka-la-ya (389), 390) ni January (15) ya shana maga hkying (3:00) aten daram hta laja lana gap gasat lai wa sai lam shiga na chye lu ai.

On 15 January 2012 evening, there was another fierce fighting between KIA forces and Burmese army. The fighting took place in KIA 5th Brigade control area Madi Yang near orange firm with Burmese battalion No.389 and 390 soldiers intrusion at 3pm local times. The fighting is become part of daily life affair for KIA and Kachin people as the Burmese military try to occupy the KIA control area and Kachin states just of China self interest in doing Burmese as well as economic benefit.

LOI JE KAWNG SAR KAW GASAT

2012-01-16T14:35:00.002+08:00

January (16) bat langai,
Wunpawng Mungdan Shanglawt Asuya Dap Ba (3) Ginra rai nga ai Loi Je ninghtawn Kawng Sar Mare kaw KIA myu tsaw share shagan ni hte myen tai hpyen ni January (15) ya shani hkying ga ang daw hta laja lana gap gasat lai wa sai lam shiga na chye lu ai.

On 15 January 2012 about noon time, there was another deadly attack by Burmese army against KIA 3th Brigade control area Kawng Sa village. No exact report about casualties from both side and KIA forces together with Kachin people will defend the Kachin Land from any Burmese army intrusion.

LAK NAK KABA HTE SHANGLAWT GINRA DE GAP SHARU BUN

2012-01-16T00:46:00.001+08:00

January (15) Labang,
Jinghpaw Mungdaw Myitkyina Manmaw lam, Wunpawng Mungdan Shanglawt Asuya Dap Ba (5) Ginra rai nga ai Dawhpum Yang kaw du nga ai myen asuya hpyen dap hka-la-ya (142) hpung hpung ni kawn January (14) ya shani Hla La Yang maga de (120mm) lak nak kaba ni hte matut manoi gap sharu bun nga ai lam shiga na chye lu ai.

There was another heavy 120mm artilleries shelling by Burmese Battalion hka-la-ya (142) against under KIA government 5th Brigade control area of Dawhpum Yang, Kachin state on 14 January 2012. Burmese Army is continue its intrusion into KIA control areas and attack against KIA as well as brutal killing of Kachin civilian. On the other hand regime government is releasing more prisoners’ to gain international

DARU MAGAM

2012-01-16T00:05:00.002+08:00

Mungkan hta grin nga lu ai myu sha langai tai lu na matu, Tengman ai Daru magam up hkang Tara masing hkrang gaw ahkyak dik htum re ai.

1-Rau shawng de numshawn shaw sa na lam
2-Rau shimlum shanglawt rawtjat galu kaba sa na lam
3-Rau bawngring sutsu nga mai na lam.
4-Rau Htunghking laili laika Ga hpe matsing sumhting sa wa na lam yawng hta,
Myu sha ni myit mang langai sha shabawn nna, Tara ritkawp langai a kata hta rau myit hkrum mangrum ai hte Ra ai magam lit ni hpe rau chyawm gunhpai shakut na matu Daru magam up hkang Tara hkrang gaw ahkyak dik htum ai lam rai nga ai. Pandung langai de rau lata gindun nna rau chyawm shakut sa na matu n'jaw n kaja ai, Tara Ritkawp masing hpe lai kau ra ai zawn n'jaw ai, n'kaja ai myit jasat myit masing masa yawng mung kabai kau ra ai hpe kabai,
prat madang ndep mat sai, myit jasat masa hpe mung tawn kau,n'jaw n'sawn n'ang ai myit lai len ni hpe mung kabai kalai kau yang chyu lawan shanglawt lu ai de du shang wa na re.
Dai ni myen Gumshem gaw annau ni hpe teng myu shamyit shamat ai masa hte gasat nga ai, kaga bawsang ni hpe galoi n'jaw yu ga ai,ahkaw ahkang hpe jaw nna simsa lam gabaw masing hte Ta masat htu ai,grai tsang ra ai lam numbraw kaw shatsap tawn nna hpraw ai kun? Chyang na kun? Moi na zawn ju panyep nyep tawn ai, ningma hkang dingsa alun madun ai de kun? Shing nrai Democracy simsa u shoi dun ai de kun? Myen a ya ten shamu shamawt ai hpe ten la nna grai naw ding lit yu ra na re.
Hpa majaw nga yang bawsang rawt malawn hpung yawng hte Democracy hpung ni yawng hpe ten langai hta rau rapdaw hta man 3 hkrum rai mai bawngban ai. Lama munghpawm tai wa ai ten hta mung rau rapdaw langai hta chyu chyawm bawngban sa wa ra nga n'rai i? Ya gaw annau ni hpe hkrai
dasang gasat nga ai, htawng masha ni hpe lang hte lang dat ai, ndai gaw myen a n'tsa lam mung masa ginsup ai re hpe asan mu chye mai nga ai hte
myen a hkrat sum ai kumla nan rai nga ai. Kata lam manghkang kaba nga sai kumla re. Myen kade manai ai, kade naw tsang ra ai myit masa re, hpyen dap sha madung naw rai nga ai zawn re masa gaw myen hpe nmai kam ai kumla, garan ginhka nna simsa lam bawngban jahkrup sa ai lam gaw myen a nsan nseng ai myit masa kumla re. Hpa wa nga tim ndai ten annau ni hpyen masa, mung masa lam hku myen tai hpyen wa hpe awngdang nga sai ngu sawn mai ai zawn mung masa hpyen masa amyet lu nga ai ten re. Yawng chye ai hte maren shanglawt gaw loi loi nmai lu ai zawn mayak law law kaw na she shanglawt ai de sa wa ra nga ai re,ntin ga.shaning galu dudaw saihkaw sai, htawng rawng sharen hkrum ai, nam rawng rawng ai, makru hpa shat sha, jum nlawm ai simai, jamjau shadang htum hkam wa sai, kawsi htansi, hkabra- hkrapngu hkrapngwi yawn hkyen hkrum nna arang kaba bang wa saga ai, tsin yam hte rau sak hkrung wa saga ai, ya ten NUWA hpu shawng hpuba, ji n ban yawng ruyak jamjau kata kaw na, majan pala lapran kaw nna, hpyen yen tsin yam ten kaw na myu sha yawng a matu arang bang ya ai majaw arawngla ai hte shagrau sha a nngai law.
Kaga Bawsang hpung 1 hte simsa masat htu shagu annau ni a matu n'gam 1 shanglawt lu na de grau nyi wa ai, myen a matu gaw 1 hte masat htu magang dubaw de Daru tara sumri 1 shakyet la magang, 2 htu shanglaw na de grau nyi, myen 2 shakyet la, 3-4-5 dai hte maren sha re majaw annau ni hte simsa lam ntam ai gaw grau kaja ai de lawan du shangun na re. Mung masa, hpyen masa, Daru tara up hkang hkrang hte ten masa gaw annau ni hpe tengman ai awmdawm shanglawt lu na de woi lakawn nga sai, naw hkam sharang ga, naw dating ga, annau ni teng man ai padang hkrun lam majan hte
arang bang gasat nga ai zawn, Democracy hpung nkau hte, shinggyin ahkaw ahkang hpyi hpung ni Sinna democracy Slg kaba hpung ni yawng shi manyi ai hte kya dik ai masing masa kata lam hku myen Gumshem hpe nmai shamu shamawt hkra grup grup hku nna gasat hpyi shawn nga ai, lani hte lani ten hte ten,myen a Daru up hkang tara hkrang hpe lapu du manat hku shakyet nga sai re. Dai majaw annau ni a matu kaja dik ai masa gaw du nan du nyi wa sai zawn annau ni hte nbawngban yang n'ngut ai, bawng nan bawng ra chyalu re raitim annau ni ra ai masing masa Daru magam up hkang lu ai hkrang de lu sa hkra she naw shakut ga, ahkyak hta pausi di, Udi matu tam nmu n'byin u ga, myit malai kalang bai nlu nu ga, ten masa hpe ja ja naw la maram yu ga.
Myen a kalai kau yak ai daru up hkang hkrang masa ni.
1-Hpyendap chyu sha mungdan a kanu kawa, Teng mungdan langai a kanu kawa jet gaw mung chying shawa she re,Daru magam up hkang hkrang hpe mung shawa hpe n'ap gwi ai.
2-Mung chying shawa gaw up hkang hkrum hkam masha masa. mung chying shawa a nsen kaba hpe n'madat ai tinang hpyen dap ra ai gumshem tara hkrang hte up hkang ai.
3-Hpyen la ni a sinat mahka hta she Daru magam up hkang tara grin nga ai. mung chying shawa yawng hpe n'sawn n'ang jahkrit shama,n'htung waw ai n mu mayu, hka ja wa ai hpe she mu mayu ai zai dik ai ladat,Dusat masa up hkang ai.
4-Hpaji ninghkring hpaji chye ai ni hpe shara njaw ai. Hpaji chye ai ni hpe dip tawn ai, n'kam ntsen ai,sinna tara shang ai ni nga nna ginhka kanawn ai.
5-Myu bung ai, makam bung ai ni hpe sha arawng aya kaba jaw ai, lahta tsang mu gun masha kaba tai na matu, myu bung, ga bung ra ai, makam bung ra ai, jaw tim njaw tim tsun ai hku galaw chye ai wa hpe shatsam ai, [ga shadawn hpyen du jaw, lahta tsang masha kaba shatsam sharin jawng ni hta myu bung ra ai myen myu rai ra ai, Bukda makam bung ra ai ni, tinang tara kata up hkang masha hku hkam la ai ni hpe lata san ai]. Ndai ni sha n galai kau lu yang myen hpe nmai kam ai. Ndai Daru magam up hkang hkrang sha nlai kau dingsa anhte bawsang ni hte rau mung hpawm hku rapdaw langai hta chyawm tsap ga ngu ai gaw grai myit yu ra ai lam re, bai simsa lam tam nga ai. U Awng Min tsun ai shada da kam hpa ai lam naw ningra ai majaw anhte hte mung masa loi nmai bawngban ai nga tsun ai, kaga bawngsang ni hte gaw hpa majaw ta? Anhte hpe hpyen man 1 hte n'gun kaba hte lu gasat dang hkra masing jahkrat ai lam sha re. Dai gaw myen a kaya nchye dik ai hkrat sum lam re. Miwa hte hpaga masing hten wa sai. dai majaw miwa hte galaw ai hpaga masing yawng hpe ja ja jahten nan jahten ra ai. Gas salu hte nhprang yenan sau nmai len shalai hkra galaw nan galaw jahten kau ra ai. Shaning galu shingran ran ai myit mada ai shanglawt gaw lu nyi sai, hpa naw myit tsang ra na ta?
Naw dating gasat ga.

Baren Numraw

MIWA MUNGDAN MASHA HPE MYEN HPYEN LA NI GAP SAT

2012-01-14T22:47:00.005+08:00

Loije Ninghtawn, Mu Bum Hpyen Dap hka-ma-ya (321) dap na hpyen hpung gaw January (12) ya shani hkying (11:00pm) ten ram hta Miwa Mungdan kata de lai shang nna, jarit kaw nna mile mi daram tsan e shara sun galaw nga ai Miwa Mungdan Loi Lung mare na Slg. Lahpai Zau Lawn (53 ning) hpe sinat hte gap sat kau sai lam na chye lu ai. Shi a baw hpe mung adup abrep kau ya ai hte shi a hkum hta pala shara (6) gap bang da ai hpe chye lu ai. Shi a moi mang hpe January (14) ya shani mare masha ni sa tam mu ai lam, Sat ai shara kaw nna (300 yards) tsan ai shara e mang hpe Myen hpyen la ni makoi da ai lam hpe chye lu ai. Mang a makau e bawm (2) hkam tawn da ai ai lam hte, Slg. Lahpai Zau Lawn a mang hpe January (14) ya shani (4:00pm) ten nat makoi mayang kau sai lam chye lu ai.

China Citizen Mr. Lahpai Zau Lawn 53 year old was shot and killed by Burmese soldiers from Mu Bum Base hka-ma-ya(321) on 12 January 2012 at 11 am in China territory. He was from Loi Lung village China and Burmese soldier crossed into China territory to killed him it seem to me that China government has allowed Burmese soldier to murder the Chinese citizen inside the China. The killing took placed at his firm while he was nursing his firm located inside China about mile away from Burma border. The body was discovered 300 yard away from his firm on 14 January 2012 by the villager and believe to be hidden by the Burmese soldier murderer. The body was shot 6 times and his head was also smash till crash and there was two bombs setup beside his dead body. The bombs were not detonated and his body was cremated on 14 January 2012 at 4:00pm according to report.