WUNPAWNG MUNGDAN SHANGLAWT HPUNG,GINJAW KOMITI A NDAU SHABRA LAIKA

NDAU SHABRA LAIKA

1. KIO a makam hte pandung gaw mungdan kata shanu nga ai mungshawa ni hta jadip jahpang nga ai hte mungdan ting ngwi pyaw simsa rawt galu kaba wa lu namatu yaw shatawng shada ai lam rai nga ai.

2. KIO gaw simsa ngwi pyaw wa lu na matu Mungdan Asuya ni hte law law lang bawngban jahkrup lai wa sai. 2009 ning April shata (28) ya shani kaw nna galaw hpang ai bawngban hpawng mung dai ni aten du hkra bawngban jahkrup nga ding yang rai nga ai.

3. KIO gaw 1994 ning, February (24) ya shani na NWT Asuya hte KIO a gap hkat jahkring ai ga sadi laika hta ningpawt tawn nna ngang grin ai simsa lam hpe matut gaw gap sa wa lu na matu myit mada ra sharawng ai.

4. Ngang grin ai simsa lam hpe lu la na matu myit mada ai majaw KIO gaw;-

(a) Munghpawm Mungdan kata kaw nna ga, garan pru mat wa na, ngu ai lam n re ai sha, 1947 ning hta Wunpawng Amyu sha Du, Salang, Hpu Shawng Hpu Ba ni hte kaga Amyu Bawsang Du Salang ni Panglung mare kaw myit hkrum ga sadi tawn da sai, Panglung jasat hpe ningpawt ninghpang shatai let Munghpawm Mungdan kaw rap ra ai tara shangwang kata rau sha jawm nga pra sa wa na.

(b) Mungdan Asuya ban shagu hte bawngban jahkrup wa sai hte maren matut nna mung bawngban jahkrup ai ladat hpe madung tawn nna ngang grin simsa wa lu hkra shakut sa wa na.

(c) KIA hte kaga magam dap ni hpe mung lahta na No. 4 (a) (b) ni hte bung pre ai hku nna galai shai sa wa na.

5. KIO gaw Asuya kaw nna woi galaw sa wa na rai nga ai, ra lata poi hpe tara rap ra ai hku galaw sa wa na matu ra sharawng ai.

6. KIO gaw, ngang grin simsa ai Munghpawm byin tai wa na matu ra sharawng myit mada ai ni yawng hte lata gindun sa wa na.

Ninghtoi;- 2010 Ning, August Shata (30) ya.

MATUT HTI NA »

MAIGAN DU MYU WUNPAWNG SHA NI A N-SEN

Ninghtoi: 2010 ning, August 27

“WUNPAWNG MUNGDAN SHANGLAWT HPUNG (KIO/KIA) A SHAWNGLAM HKRANG GALAI SHAI LAM N‐TSA MAIGAN DU JINGHPAW WUNPAWNG SHA NI A N‐SEN’’

1.Karai Kasang jaw da ai manu dan Wunpawng Mungdan hte Wunpawng Myusha ni hpe (40) ning jan asak ap nawng makawp maga ya nga ai a Wunpawng Mungdan Shanglawt Hpung (KIO/KIA) hta mu gun nga ai myu tsaw share shagan ni yawng hpe maigan mungdan shara shagu de du nga ai anhte Wunpawng Myusha ni yawng nachying wa kabu chyeju dum ga ai.

2.August shata 22 ya shani Myen tai hpyen ni kawn, Wunpawng Mungdan Shanglawt Hpung (KIO/KIA) hpe 2010 ning September (1) ya shani laknak ap na matu tsun shadut wa ai lam hpe anhte maigan du Wunpawng Myusha ni yawng kawn TSEP KAWP n hkap la lu ai hte ninghkap dat ga ai. Wunpawng Mungdan hte Wunpawng Myusha ni a dawhpum dawnu rai nga ai Wunpawng Mungdan Shanglawt Hpung (KIO/KIA) hpe Myen tai hpyen kawn laknak jahkrat na matu atik anang tsun jahkrit shama wa ai lam hpe TSEP KAWP n hkap la na matu anhte maigan du Wunpawng myusha ni kawn myit hkrum shadut dat ga ai.

3.Maigan du Jinghpaw Wunpawng Myusha ni kawn, Wunpawng Mungdan Shanglawt Hpung (KIO/KIA) laknak jahkrat kau na hpe ninghkap ai hte maren, rawt malan amu magam hta anhte dangdi dangdep ai maga hku nna shanglawm lu na lam ni hpe tang madun dat ga ai.

a)Akyu hpyi garum ai hku shang lawm na.

b)Tinang kung kyang ai atsam hta hkan nna tatut ap nawng shang lawm na.

c)Ra wa ai hta hkan nna, shawa n‐gun madun ra wa jang, tinang du nga ai maigan mungdan hta tatut galaw sa wa na.

d)Shiga (Media) hku nna garum na.

e)Ja gumhpraw hku nna dangdi dangdep ai made shang lawm na.

f)Rawt malan hkrun lam kaw ra wa ai hta hkan nna lit shatsam wa ai amu lit ni hpe myit hkrum myit ra hte n‐gun atsam dat shang lawm sa wa na.

4.Anhte galoi mung myit mada kam hpa nga ai Wunpawng Mungdan Shanglawt Hpung (KIO/KIA) kawn Wunpawng Myu hte Mungdan ngang grin lu na matu tutnawng lam n yit, myit n daw ai sha ngang ngang kang kang tsap let woi awn ya na hpe hpyi lajin dat ga ai.

Matsing;‐ Lahta na ndau lam yan (4) hpe lawu na mungdan malawm ni hta du nga ai Jinghpaw Wunpawng Myusha ni kawn myit hkrum daw dan da sai.

1.Malaysia

2.United State of America (USA)

3.Canada

4.England

5.Singapore

6.Denmark

7.Japan

8.Norway

9.Australia

10.Holland

11.New Zealand

12.Germany

13.Israel

14.India

15.Hong Kong

16.China

17.Czech Republic

18.Switzerland

19.Thailand

20.Romania

21.Sweden

22.Philippines

MATUT HTI NA »

KIO Pati Hkumra Zuphpawng kaba

2010 ning, August 27 ya shani kaw nna, KIO Ninggawn Daju, Dai Lawn Rung Dap Dabang (Alen Bum), Hpung Mai Gawk Nu kaba hta galaw nga sai re.

Ndai zuphpawng hta KIO Ginwang madang hta na Party Tingnyang Up hte Amu Madu ni hte Ginwang shagu na Mungshawa Dat Kasa Salang ni shanglawm ai lam nga ai.

Ndai zuphpawng kaba gaw 2010 Myen a ra lata poi hte tsep kawp (tsep kawp) hpa n seng ai lam chye lu ai. 2010 Myen a ra lata poi hte seng nna KIO gaw n shanglawm ai, n ninghkap ai ngu ai hpe jau tau tsun shana ngut chyalu mung rai nga ai.

Zuphpawng ndai hta Wunpawng Mungdan a shawnglam mungmasa hte seng nna daw dan hparan sa wa na re lam chye lu ai.

Myen Gen. Ye Myit hku nna, laiwa sai August 22 ya shani KIO hpe September (1) ya hpang n hkrat laknak jahkrat na matu tsun shadut matsun ai lam nga ai raitim, KIO hku nna gaw laknak jahkrat lam hte seng nna, Mungmasa hparan jasan ngut ai hpang she myit mang sa wa na re lam chye lu ai. Mungmasa hparan jasan la lu ai lam n nga dingsa, KIO hpai sung lang nga ai Wunpawng Mungshawa a laknak hpe Myen a lata de n ap (n ap) kau na re lam chye lu ai.

Ndai zuphpawng hta KIA hpyen dap hpu-awn ni hku nna magam bungli ni a majaw n shang lawm ai lam chye lu ai.

___________________________

Lak lai ai lawnglam ni hpe matut htawn shana ya na nngai.

Tinang a ningmu ni hpe mung attachment hku nna shagun da ya na hpe kam nngai.

Hkungga let,

Du Nhkang Myu Jet Awng

HAD - III {Awn (Shiga) }

Hpyen Awn Makan Dap

Ninggawn Daju, Dai Lawn Rung

MATUT HTI NA »

2010 Ra Lata Poi Hte Seng Ai

Ndai gaw KIO/KIA ni galaw na Party Congress a malai mung shawa daw tsa kaw nna, KIO/KIA a ntsa, 2010 ra lata poi hte dai ra lata poi ngut ai hpang byin shangun mayu ai mung masa lam ni hpe ningmu la ai lam rai nga mali ai.

1). 2010 Election hta KIO/KIA uphkang ginra ni hta ra lata poi mee-pung (voting stations) galaw gring ai kun?

2). Jinghpaw Mungdaw mung chying mung shawa a lu gring ai ahkaw ahkang hpe mahkawp maga ya lu ai tara hte tinang madu uphkang mungdaw atsang nlu shi ai aten KIA gaw BGF gale gring sai kun?

3). 2010 ra lata poi ngut ai hpang KIA gaw Tatmadaw a uphkang ai npu hta (2008 gaw da ai tara u padi hte maren) hkap la gring ai kun?

4). KSPP ni gaw shanhte Party a registration lu na matu KIA hpe BFG gale na matu matut shadut nga ai gaw hkap la gring ai kun?

5). Marai 7 e n mana ai wa hpe mana ai ngu yang, dai n mana ai wa mana wa chye ai, nga ai zawn, Myen amyu ni woi nga ai hku kara hku mi raitim jawm nga sa wa ga ngu ai law wa yang, ya yang na Jinghpaw Wunpawng amyu sha ni a rawt malan hkrun lam ni yawng hpe rap di da gring sai kun?

6). Shing nrai, amyu sha mung masa lam gaw mi di chyi matut galaw ra ai nga yang, kara masa lam hte matu galaw ra na kun? Nang langai hpa lam hta ap awng sa wa na kun? Yawng a LIT ngu ai hku hkap la wa masai kun? Galaw nga ai ningbaw/ hpung shang masha ni hpe sha naw LIT jaw nna n shang lawm nga n’htawm yu nga gring ai kun? Dai hku rai yang rawt malan lam lawan ai hku lu mai ai kun?

7). Anhte amyu sha ni BGF mung n hkap la, 2010 ning ra lata poi mung anhte amyu ni a matu mung masa mahtai nrai yang hpa matut galaw na?

8). Miwa/USA/UK/ asuya hte UN kaw nna n bungli, laknak kaja hte shang htim gasat nna garum na nbyin mai prat hta anhte mung shawa yawng hpa galaw gring ai?

Tinang a ningmu ni hpe mying madung (mying makoi nre sha) hte wang lu wanglang shaleng sa wa ga ngu saw shaga dat ga ai.

Alternative Voice of KIO/KIA Party Congress

MATUT HTI NA »

Galun Sat Katut Ai

August 23 ( bat langai ya ) shana Myitkyina Dakkasu jawng shingdu na Jan Mani shalawng hta Asak (30) ram re Num ma langai hpe mara mat ni n hki hte 12 lang tup galun sat tawn ai lam chye lu ai.

Galun sat hkrum ai wa hpe mung, galun sat ai ni hpe mung gadai ni re ya du hkra rai n lu sagawn ma ai lam Myitkyina kaw na manang langai mi tsun shana wa ai.

Tsawk Hkam

MATUT HTI NA »