KIO hpyi ai lam hpe "Matsan dum ai": Myen chyumtari Than Shwe

Myen hpyen asuya a chyumtari Dukaba Than Shwe gaw, ya hpang jahtum Wunpawng Mungdan Shanglawt Hpung (KIO) kawn tang hpyi ai lam ntsa "Matsan dum ai" nga nna, n hkap la ai lam tsun wa sai hpe Naypyitaw mungdan mare daju shiga lawk kawn chye lu ai. Myen chyumtari Than Shwe hku nna KIO hpe "matsan dum ai" ngu tsun ai lam gaw, du na shaning ralata poi galaw wa yang, pru wa na Jinghpaw Mungdaw asuya n'nan hta KIO salang ni ading tawk shanglawm lu na lam hpyi ai hpe n mai byin ai lam, tsun wa ai rai nga ai. Dukaba Than Shwe tsun ai hta, "KIO gaw Mungdan Gawda ai Tara nhprang hpe madi shadaw sai hte maren, KIO hpyi ai mungmasa, hpyen masa ahkaw ahkang gaw ya ten n mai byin mat sai rai nna, lama KIO hpyi ai hpe jaw ga nga yang, Mungdan Gawda ai Tara hpe bai ka ra na re majaw, n mai byin sai re lam" tsun wa ai hpe Dukaba Than Shwe hte ni kahtep ai shiga lawk kawn chye lu ai. Dukaba Than Shwe n hkap la ai hta, KIO hpyi tawn ai tinang Wunpawng Mungdan Shanglawt Hpyendap (KIA) hpe Myen hte n garau ai Jinghpaw hkrai san re ai, Kachin Regional Guard Force (KRGF) gale na lam mung, rai nga ai. Hpyen asuya hku nna KIA hpe byin shangun mayu ai lam gaw, Jarit Sin Hpyendap (Border Guard Force, BGF) rai nga ai. Ya ten, Myen hte Shanglawt (KIO) lapran mungmasa, hpyen masa yat yat shaja hkat wa sai raitim, Myen wa hku nna KIO hpyi ai hpe hpa mahtai n jaw shi ai zawn, KIO mung Myen wa hpyi ai lam hpe hpa "Ahpraw-Achyang" mahtai n jaw shi ai re. Ndai ten, Myen a Dingdung Daw Daju (Ma Pa Hka) Taimu (Dap Up), Du Daju Soe Win gaw J.W Hkristan nawku hpung hkum hkra na hpung woi sara ni hte hkrum shaga mungga tsun ai lam hpe July 29, mani bat Masum Ya shani, Mungdaw mare daju Myitkyina e galaw wa sai re. Ndai laman sha, Taimu hte J.W hpung woi sara ni lapran ndai lang hte 2 lang ngu na hkrum lu ai lam rai nna, ndai lamang hpe J.W Hkalup Hpung Ginjaw (KBC) a amumadu dingsa hte simsa lam tam lapran salang mung rai nga ai, Rev. Dr. Lahtaw Saboi Jum kawn Myen hpyen asuya de hpaji jaw ai hte maren, Taimu wa galaw wa ai re lam, KBC shiga lawk kawn chye lu ai. Raitim, ya ten, J.W mungchying shawa ni hku nna KIO/A hpe byin shangun mayu ai gaw, "lum-nai, hpat wat" mungmasa hta n tsap ai sha, "Ahpraw snr Achyang mungmasa hta tsap na hpe grau ra sharawng ai lam, buga kata shiga lawk ni kawn chye lu ai.