Manmaw de Myen hpyendu tsa kahtap, sanghpaw hte htaw bang nga

Jinghpaw mungdaw a nambat lahkawng kaba dik Manaw de Myen hpyen asuya a lawu mung na hpyendu n'nan ni tsa kahtap hpe Mali Hka hku sanghpaw ni hte ndai laman htaw bang nga ai lam, buga masha ni tsun wa ai.

Manmaw Mali Hka daru e shana de shang wa ai sanghpaw ni hta Myen hpyendu, n law htum shagan lahkawng kap a lahta na hpyendu ni hkrai hpe hpung hte hpung htaw bang nga ai re lam, myi-chyaw-sakse ni kawn chye lu ai.

Myi-chyaw-sakse langai tsun wa ai gaw, "Ngai pyi ya hte Manmaw yu wa yang, 3, 4 lang mu sai. Shana de shagu sanghpaw shang wa shagu, sanghpaw langai kaw 200, 100 (Myen hpyendu ni) ram ram sha, yan bang ma ai. Hpyenla pyi n lawm ai".

Ndai zawn Manmaw sanghpaw hka daru de shang wa ai Myen hpyendu n'nan ni hpe Manmaw ginwang e nga ai Myen hpyendap na hpyenla ni hkap tau la nga ma ai lam, buga masha ni kawn chye lu ai.

Manmaw buga masha ni kawn matut chye lu ai hta, ndai hpyendu n'nan ni hpe Jinghpaw mungdaw kaw nga ai Myen hpyendap ni de bai garan bang na matu rai nna, ya ten mung, Shwigu kaw mung Myen hpyenla ni shamu shamawt nga sai re, nga ai.

Bai nna, Myen hpyendap a Lagyim Gap Hpung (sniper) ni mung Shwigu e du nga sai rai nna, ndai Shwigu mare makau hta Wunpawng Mungdan Shanglawt Dap (KIA) a dapdung 12 mung jung tawn ai lam, chye lu ai.

Ndai ten, KIA dapdung 12 sha n ga, KIA hpyendap shagu mung, hpyen masa hkyen lajang nga sai lam KIA hte ni nawn ai shiga lawk kawn chye lu ai.

Ya ten, KIO mung, tinang KIA dap galai na lam hte seng nna, Myen a dingdung daw daju Dap-up Du Daju (MajGen) Soe Win hte bawngban nga ten, "madu uphkang mungdaw" ra sharawng ai lam hpe Naypyitaw mungdan mare daju na Myen hpyendu kaba ni asan sha chye na lu matu, simsa lam tam salang ni hpe dat dat hkyen nga sai re.