Myen gaw KIO hpyi ai hpe jaw mai ai: Myitkyina Hkristan Kongsi

Myen hpyen asuya de "Wunpawng Mungdan Shanglawt Hpung (KIO) hpyi tawn ai lan hpe myit yu ya nna jaw mai ai" nga nna, Myitkyina Hkristan Kongsi gaw daini Jinghpaw mungdaw mare daju Myitkyina e galaw ai Myen Taimu hte hkrum ai zuphpawng hta tang shawn dat sai lam, chye lu ai. Alak mi, Myen a Dingdung Daw Daju Taimu (dap up) Du Daju Soe Win hte J.W Hkristan nawku hpung hkum hkra na sara ni hkrum shaga ai lam hpe, Myitkyina, Aung Nan Yik Ta na St. Columban Hkahtaw Lik hpung wang e jahpawt hkying 9 kawn 12 lapran galaw ai hta ndai zawn Myitkyina Hkristan Kongsi (Myitkyina Christian Council, MCC) kawn hpyen asuya de hpyi shawn dat ai re lam, zuphpawng shanglawm ai Myitkyina na Rev. Gregory kawn chye lu ai. Ndai zawn hpyi shawn ai lam hpe Taimu a aten hkying hkum mi chyen na hkra mungga shaga ngut ai hpang, MCC ningbaw Rev. Mading Zung Kyang kawn Taimu hte du sa ai shawa yawng hpe hti dan wa ai lam, chye lu ai. Hti dan sai MCC a hpyi shawn laika hta, "MCC gaw Myen hte KIO/A lapran masa lam amyu myu a majaw majan bai byin na hpe tsepkawp n ra sharawng ai lam hte, mungdan asuya hku nna mung KIO a hpyi shawn ai lam hpe myit yu ya nna, jaw mai ai lam" ni re lam, MCC sara ni kawn chye lu ai. MCC hpe Myitkyina mare kaba nga ai J.W Hkristan nawku hpung 4 rai nga ai, Hkalup, Hkahtaw Lik, Shanglawt Hkristan hte Anglican nawku hpung ni hte hpaw ninghtan tawn ai re. Taimu Soe Win hku nna du sa ai nawku hpung sara ni hpe mungga tsun ai hta, KIO a ya hpang jahtum hpyen asuya de hpyi shawn ai "mungmasa hte hpyendap ahkaw ahkang" hte seng nna n mai byin ai lam hpe madung dat sanglang mat ai lam, chye lu ai. KIO hpyi shawn ai mungmasa ahkaw ahkang gaw, htaning na ralata poi galaw lu nna dai kawn pru wa na Jinghpaw mungdaw asuya n'nan a uphkang dap (administration), upadi ka jahkrat dap (legislation) hte tara jeyang dap (Judiciary) ni hta KIO salang ni ading tawk shanglawm na lam re. Ndai lam ntsa Taimu wa sanglang dan sai gaw, ya ten na hpyen asuya galaw nga ai mungmasa hte maren KIO hpyi ai hpe n jaw lu na rai nna, maga mi de KIO salang ni hku nna tinang a mungmasa pati ni hpaw nna htaning na ralata poi hta shang shingjawng lawm mai ai lam hte tingkyeng sut hpaga bungli ni galaw mai ai lam, tsun wa ai lam, chye lu ai. Lama ndai lam hpe KIO salang ni galaw ai rai yang, dai bungli ni awngdang hkra mung hpyen asuya hku nna alak garum jaw mai ai lam ni tsun wa sai hpe kahtap chye lu ai. Bai nna, KIO gaw tinang KIA dap hpe tinang san uphkang ai Jinghpaw Ginra Makawp Maga Dap (Kachin Regional Guard Force, KRGF) hku hkrang galai na hpyi shawn tawn ai lam ntsa mung, KRGF gaw hpyen asuya matsun ai "Jarit Sin Hpyendap (Border Guard Force, BGF) ram pyi ahkaw ahkang n lu na re hpe Taimu wa tsun wa ai lam, chye lu ai. Hpa majaw nga yang, BGF gaw mungdan madang hku nga mat masa re majaw KRGF hte shingdaw yang hpa ahkaw ahkang lam hta mung grau ai, raitim, KRGF gaw "Kachin" ngu ai gabaw dat tawn ai majaw, hpa ahkaw ahkang lu na n re nga nna, sanglang dan ai lam chye lu ai. Taimu gaw Mungdan a Gawda ai Tara Kanu n'nan a hpyendap hte seng ai tara kanu hte maigan mungdan na hpyendap uphkang hkrang ni hpe mung madi madun nna, KIA hpe mungdan hpyendap a matsun npu na BGF hku nga na hpe mai kaja ai hte tsawra shawang myit kaba hte tsun ai re nga nna, galu galang sanglang dan sai lam, zuphpawng lawm sara ni kawn chye lu ai. Daini na zuphpawng hta Myitkyina, Manmaw, KIO uphkang shara Laiza, Mugawng, Munyin, Hopin, Danai hte Hpakant ni hta nga ai buga hpung hkum hkra 22 na hpung woi ni marai 150 ram hte hpyen asuya a Jinghpaw Mungdaw hte Myitkyina ginwang uphkang rung na salang ni mung sa du lawm ai lam, chye lu ai. Dai hta, J.W Hkalup Hpung Ginjaw (KBC) amumadu dingsa hte simsa lam tam lapran salang rai nga ai, Rev. Dr. Lahtaw Saboi Jum mung sa du lawm sai lam, zuphpawng lawm hpung sara ni hpe lakap let chye lu ai. Lamang de du sa ai hpung sara ni hpe Taimu wa hku nna hpyi lajin dat ai hta--- "Mungdan shinggan na tsun ai ga hpe tsepkawp n mai hkap la ai lam hte dai lam hpe tinang a nawku hpung masha ni hpe mung chye na hkra wa tsun dan na matu" re lam, hpung sara ni kawn chye lu ai. Daini na zuphpawng hta Taimu wa hte hpung sara ni lapran san-htai lamang kadun mung galaw lu sai rai nna, lamang hpe shani ga-ang hkying 12 e malu masha ma mi jawm sha nna ginchyum dat la sai lam, chye lu ai. MCC sara ni kawn chye lu ai hta, ndai zuphpawng galaw na matu, Rev. Dr. Lahtaw Saboi Jum hku nna Myen Taimu Soe Win hpe hpaji jaw sai hte maren, ya na zawn Taimu a MCC de shiga shana garum hpyi ai lam hpe MCC woi galaw wa ai re, nga ai.