Uru Hka mawru hte ga gyi ai mabyin hta, masha ru si lam nga

Lai wa sai, July shata praw 4 hte 5 ya hta Hpakan Uru Sengmaw Ga e marang n sim n sa htu ai majaw, Uru Hka mawru byin ai hte ga gyi kaput nna masha law law si hkrung si htan hkrum wa sai re. Asuya shiga lawk hta tsun tawn ai gaw, masha 70 jan si ai nga tim, kaja wa gaw Hpakan mare e si ai sha pyi tsa hku re nga nna, buga masha ni tsun wa ai re. Hpakan, Maw Wan e ndai zawn ga gyi ai hta mawdaw kata na masha 5 mung si mat wa sai. Dai hta, Hpakan, Seng Tawng sha n-ga nna, Nam Maw hte Ta Mahkan maw de mung, masha law law si ru mat sai re lam, dai shara na du wa ai, Hpung sara ni tsun wa ai re. "Ta Mahkan kaw sha, masha si mang ni hpe htaw la ai hta, mang 200 shang ai maw daw hte htaw ginhkrang ai gaw 7 lang hkawt re lam" lahta na Hpung sara ni kawn matut chye lu ai. Bungli galaw taw nga yang, kalang ta, ga kaput nna si ru mat ma ai rai nna, dai hta malawng gaw hpunau Myen, Sam amyu ni re lam, kahtap chye lu ai. Ya na zawn, shara hte shara hta kade si ai hpe hkrak tup sagawn n lu ai lam gaw, matut mahkai lam ni hta hkumpup hte ga gyi tawn ai majaw, sa sa wa wa yak nna, mare langai hta kade si ai hpe hkrak n chye lu ai manghkang byin nga ai re lam, buga masha ni tsun wa ai. Uru Hka mawru byin ten, sumla gayet, shiga la mahkawng taw ai, masha marai (4) hpe mung, Myen hpyen asuya ni rim kau nna, zingri tawn ai lam, lahta na hpung sara ni tsun wa ai re. Ndai rim hkrum ai ni hpe shanhte a jinghku ni mung, hkan la taw nga ai lam, matut tsun wa ai. Sumla, sumla hkrung gayet ai masha kade hpe Myen hpyen asuya rim tawn ai lam jahpan hpe gaw, hkrak tup n chye lu shi ai re. Myenhpyen asuya gaw, ya na zawn, hka kaba nna, masha si hkrum ai ten hta, alak mi lanu lahkau hkye mawai bungli ni hpa n galaw ai sha, masha kade si ai lam hpe makoi magap tawn nna, matut mahkai n mai hkra mung, telephone line ni ma di tawn ai lam KNG kawn sagawn chye lu ai .