ZANG NAWNG YANG AUK BAM MANAU POI

Lawhkawng Ginwang Zang Nawng Yang Mare Auk Bam Bum kaw Wunpawng Htung Hking Manau Wang hte Manau Htingnu n’nan hpe galaw la ngut nna, Lawng Waw, La Chyik, Li Su, Jinghpaw Htung Hking Komiti kaw nna woi awn galaw ai manau poi lamang langai galaw la ngut sai lam chye lu ai.

Dai Manau poi lamang hpe 2007 ning, February, (7) ya shani hta Htunghking Ningbaw Ladum Hkawng Gyung kaw na sumpan rep-di hpaw poi galaw nhtawm manau nau shang wa ai lam hpe chye lu ai. Dai manau poi lamang hpe praw (8) ya shani du hkra galaw lai wa sai lam chye lu ai. Ndai manau poi hta K.I.O maga de na Slg. Kaba Lajawng Hkawng Lum, Du Up Daju Zawng Buk Htan, Lt.Col. Lum Dau, Stuff Col. Ryuk Hkyawng Hkawng Lum, N.D.A(K) maga de na Du Kaba Na-Buk Hawng Hkawng, Du Kaba Zahkung Kyang Ting, Lt. Col Hung Lung Htang Sau hte kaga Salang ni, Myen Asuya maga de na (M.Y.K) Ningbaw U Mya Aye hte Hka.L.Ya (236) Dap Up Lt. Col Nyi Nyi Zaw hte ginra nga masha yawng hkying lahkawng jan shang lawm ai lam chye lu ai.

Ndai manau wang hte htingnu hpe galaw sa wa ai a yaw shada lam gaw (1) Ji Woi Ji Wa ni hkai ai hta labau shang shara langai re majaw (2) My sha kahkyin gumdin lam hta rawt jat wan a matu (3) Htung Hking Wunli hpe makawp maga la lu na matu (4) Myu tsaw myit kalu kaba wa lu na matu, re lam Poi Komiti Salang the Lawng Waw Htung Hking Ningbaw Lashang Dau Hkawng kaw nna na chye lu ai. Ndai shara hpe 2006 ning, October (23) ya shani Htinghput shara jahkrat galaw hpang wa nna 2006 ning, March (17) shani hta ngut kre la ai re lam na chye lu ai. Ndai manau htingnu hte wang hpe Myen Gumhpraw 14,880,000/ks ma hkam nna galaw da ai re lam mung matut nna chye lu ai.
Ndai poi lamang hta Auk Bam manau shayi lata poi hte prat dep yu ngwi pinra galaw ai hta W.P yungwi ninghkring ni mung sa du lawm ai lam hpe mung chye lu ai. Ndai manau nau ai lam hpe ndai ginra hta shawng ningnan lang na galaw sa ai lam re majaw, Ginra nga masha ni hku nna myit dik myit pyaw ai lam hkam sha nga ma ai lam hpe mung ginra nga masha langai kaw nna chye lu ai.

Knet