Myen hpyen asuya a adip arip ai sakse langai hku nna, Jinghpaw ni hpe tinang a Jinghpaw mungdaw kata Htunghking Manau Shadung hte Gawknu gawgap na ahkang n jaw ai lam, htunghking salang ni kawn chye lu ai.
Manmaw mare, Deng Lahkawng, Awng Ta lawk na eka-13 kaba ai, Jinghpaw Laili Laika hte Htunghking Hpung (JLH) wang e wut bilat hte ngang ngang kang kang, dai ning n htum shi yang ngut hkra galaw hkyen nga ai "Jinghpaw Hkunghking Manau Shadung hte Gawknu" hpe hpyen asuya pathkum tawn ai lam, htunghking komiti kawn chye lu ai.
Ndai zawn Myen hpyenla ni sinat hpai sin tawn ai npu, nambat 1 lang na Hugawng Pa Manau Poi hpe Danai mare e Manau Wang, Manau Shadung hte Manau Gawknu hpaw poi hte rau, dai ning na February praw 2 hte 4 ya laman galaw wa sai.
Ndai Manmaw JLH wang hpe lai wa sai 1996 ning hta Manmaw ginwang Jinghpaw Wunpawng Hkalup Hpung kawn mari la lu ai rai nna, dai kaw htunghking Manau Shadung hte Gawknu gap na matu, dai ning laman 3 lang shakut yu sai raitim, Myitkyina e daju ai Dingdung Daw Daju Dap Up (Taimu) Du Daju Soe Win kawn pathkum ai re lam, htunghking komiti kawn matut chye lu ai.
Ya hpang jahtum, lai wa sai July shata hta, htunghking salang nkau gaw Taimu Soe Win hte Myitkyina e hkrum nna, Manmaw Jinghpaw htunghking nta hte Manau Shadung gawgap lu na matu, n-gup aga hte kahtap ahkang hpyi yu sai raitim, Taimu gaw “Jinghpaw Mungdaw a jet ai ngwipyaw simsa lam hpe hkra machyi shangun na re majaw, gawgap ahkang pathkum ai re” nga nna sanglang dan sai lam, JLH komiti malawm ni tsun ai.
De a shawng e mung, March 31 ya shani, hpyen asuya a Manmaw ginwang uphkang rung (Hka-Ya-Ka) hte May 19 ya shani kalang bai Jinghpaw mungdaw uphkang rung (Pa-Ya-Ka) de Manau Shadung hte Nta gawgap ahkang lu na matu laika hte tara shang hpyi lajin wa sai raitim, Jinghpaw mungdaw a chyawmtari Taimu Soe Win wa ahkang n jaw ai lam, chye lu ai.
Hpa majaw Taimu wa pathkum ai lam hpe htang shana laika hta sanglang dan ai gaw--- langai, Jinghpaw ni a htunghking Manau Wang, Manau Shadung hte Manau Gawknu kaba hpe Myitkyina kaw lu da chyalu re majaw kaga mi n ra sai. Lahkawng, amyu bawsang hkum hkra shanu nga ai Manmaw mare hta, Jinghpaw htunghking Manau Shadung hte Nta gap dat yang, dai gaw Jinghpaw langai hte sha seng ai majaw, amyu bawsang gahkyin gumdin lam hpe ahtu hkra wa na re nga, madi madun tawn ai lam, komiti malawm ni tsun ai.
Ndai lam hpe Manmaw JLH komiti malawm ni tsepkawp n hkapla lu ai sha n ga, Jinghpaw mare shagu hta tinang a htinghking Manau Shadung hte Nta hpe gawgap mai ra na re nga nna, ja ja hkam la tawn ai lam, komiti hpe lakap let chye lu ai.
Lai wa sai June shata 22 ya hta, Manmaw Hka-Ya-Ka ningbaw Col. Khin Maung Myint gaw, htunghking komiti malawm yawng 40 hta na marai 5 hpe sha alak mi Manmaw Hka-Ya-Ka rung de shaga la nhtawm, shanhte hpe "Manau Shadung hte Nta gawgap masing hpe jahkring kau sai" ngu ai madu nan yin la ai laika hpe, atik anang lata masat htu shangun wa sai lam, komiti kawn chye lu ai.
Mungkan Wunpawng Hpung (UN) a Shinggyim ahkaw ahkang ndau laika (The Universal Declaration of Human Rights) a Tara kanu Masat 22 hte 27 kaw tsun da ai gaw, masha shagu hta tinang a htunghking maka hte laili laika ni hpe shadan shadawng lu na, jai lang hkan nang hkan sa lu na, rawt jat gan ga hkra gyin shalat lu na hte rem zing makawp makawp maga lu na, ahkang nga ai lam, adan aleng ka da ai re.
Ya ten, J.W amyusha ni, Myen mung sha n ga, kaga htingbu Miwa, Kala hte Htai mungdan ni hta dai mungdan a mungchying masha hku nna shanu nga ai hta, tinang a htunghking maka, laili laika hte Manau Shadung, Manau Gawknu ni hpe n dut n dang shadan shadawng galaw lu nga ai lam chye lu ai.
0 comments:
Post a Comment