Shawng n'nan lang ngu na, Jinghpaw mungdaw mare daju Myitkyina na Jinghpaw tsang-10 jawngnum Mary Hkinjawng Htoi San hpe ndai August praw 6 ya, lai wa sai bat Mali Ya shana, buga ten hkying 5 p.m. e Miwa la marai 5 gaw jawm roi rip nhtawm daw daw di katawng sat kau sai lam, chye lu ai.
Shi sat hkrum ai hpang shani, mang hpe Myitkyina, Masat (5) asuya Lahta Tsang Jawng wang a shingdu, N-Jang Hka hkingau e, grupyin buga masha ni mang yat bat manam ai ngu wa tam yang, mu hkrup ai hta, mang hpe hpun sutdek langai kaw daw daw di katawng bang tawn ai hpe mu lu ai re nga nna, myi-chyaw-sakse ni tsun wa ai re.
Uhpung roi rip sat hkrum sai asak 17 ning Mary Htoi San a dum nta masha ni tsun ai hta, Mary Htoi San hpe Myitkyina Wanleng Dabang makau, "Golden City Guest House" ngu ai manam jarawp na gawk langai kaw Miwa la 5 jawm roi rip nhtawm sat kau ai re, nga ai.
Mary Htoi San gaw, Tatkone, Sinpraw Dingdung lawk, Nta Nambat 1/85 kaw nga ai rai nna, Slg. Hkinjawng Tang Hkun hte jan Kaja Ja Awn Lu yan a shayi sha re lam, chye lu ai.
Bai, shi gaw, masat (5) asuya Lahta Tsang Jawng kaw laika tsang 10 hpe lung nga let Yuzana lawk na "Shwe Taung Garden" ngu ai shat seng kaba kaw mung shana de 7 hte 8 lapran, mahkawn hkawn let shang gumhpraw tam nga ai mung re lam chye lu ai.
Golden City manam jarawp hte ni kahtep ai shiga lawk kawn chye lu ai gaw, Miwa la ni a Mary Htoi San hpe katawng sat nna sutdek kaw bang let shinggan de hpai pru mat ai mabyin hpe manam jarawp madu ni hkrak chye tim, pyada ni hpe aten dep hpa shiga n shana ai re, nga ai.
Ya ten, Myitkyina mare Masat 1 Pyada Dap gaw Mary Htoi San hpe roi rip sat ai Miwa la marai 3 hpe hprawng ai kaw hkan rim lu sai raitim, marai 2 gaw naw hprawng lawt nga ai lam, Pyada dap shiga lawk kawn chye lu ai.
Ndai ten, Mary Htoi San a dum nta masha ni manu mana yawn hkyen hkrum nga ai zawn, Myitkyina mare na Jinghpaw ramma ni lapran mung, "Miwa ni hpe bai matai htang na" nga nna, grai pawt jawng nga ai lam, buga ramma langai tsun wa ai.
Jinghpaw ramma ni pawt ai lam gaw, "Maigan Miwa ni hku nna Jinghpaw mungdaw kaw nga lawm nhtawm, ndai zawn mungdaw madu, lamuga madu, jauman Jinghpaw amyusha ni hpe hpa n sawn roi rip ai mabyin a majaw re lam", ramma ni kawn chye lu ai.
Bai lam mi gaw, Wunpawng Mungdan Shanglawt Hpung (KIO) gaw 1994 ning Myen hte simsa lam la kau sai hpang gaw, tinang dap shawa mungshawa hpe maigan amyu ni kade wa lam amyu myu hku n gawn n sawn roi sha nga tim, "sinat hpai tawn nhtawm" tsepkawp n lu makawp ai mat ai majaw re nga nna, buga salang ni tsun wa ai re.
Dai re majaw, Jinghpaw mungdaw de htawt shanu nga ai maigan Miwa, Gala hte Myen ni gaw jauman J.W amyusha hpe lam shagun hta hpa n sawn, ka-up roi sha wa ai re nga nna, buga salang ni matut tsun dan wa ai.
0 comments:
Post a Comment