KIA HPYEN DAP A MATU KUN? AMYU SHA NI A MATU KUN?

Myen-Shanglawt (KIO) lata gindun: N nga mat sai KIO ningbaw kaba Lamung Tu Jai (Palawng ahpraw hte) hte shawng de na Jinghpaw Mungdaw Dap-up (Taimu) Maj-Gen Ohn Myint

Daini anhte hkrum katut nga ai mungmasa manghkang hta, amyusha ni yawng gaw myit n gut ai hte, amyu sha hkrat sum na matu hkrit tsang nga ai ten mung rai nga ai. Grau nna gaw, Wunpawng Mungdan Shanglawt Hpyendap (KIA) hpe Ga Jarit Sin Dap (Border Guard Force, BGF) hku nna masat na matu, Myen hpyen asuya (Na-A-Hpa) ni tsun wa ai shaloi, KIO Hpaawn ni hku nna mungshawa a myit ra ai hku rai na re nga nna tsun wa ai majaw, mungshawa yawng mung tinang hkam sha ai lam ni hpe gara kaw she n sa htim ngu nna hkam sha nga ai re majaw, laknak lang nna gasat na matu chyu tsun gajai nga ai hpe mu lu nga ai.

Raitim, daini anhte ni a amyusha gam maka hte KIA hpyendap a gam maka gaw langai sha hku mai sawn la sai kun? ngu ai lam myit yu shara rai nga ai.

KIA hpyendap hku nna mi moi de, anhte amyusha ni a awmdawm shanglawt ahkaw ahkang hpyi na matu rawt malan hpang wa ai chyawm gaw yawng chye chyalu rai nga ai. Raitim, simsa lam la ngut ai hpang na KIA Hpyendap a jasat jasa ni hpe bai dinglun yu ra nga ai.

Ndai lang gasat na ngu ai gaw KIA Hpyendap ngang grin na matu kun? Amyusha a shanglawt ahkaw ahkang a matu kun? ngu ai hpe mung sung sung myit yu ra nga ai.

KIA ni lama wa mungshawa a matu bungli galaw ai rai yang gaw, (1) Lamu ga ni zing la ya ai hkan shanhte mungshawa a gawng malai kade wa shaga sai kun? (2) Daini Hpyen Asuya galaw nga ai Gawda Tara (Constitution) gaw anhte amyusha a matu hpa ahkaw ahkang mung n lawm ai yawng chye ai, mungshawa n ra ai yawng chye ai, hpa majaw KIA gaw mungshawa maga n tsap ai? (3) Mali Hka madim (Dam) galaw na hte seng nna, ramma ni, mare ni nawn ai mare masha ni yawng ninghkap nga ai hpe KIA gaw hpa majaw zim nga ai? (4) Shanglawt ginra (shalawt da ai ginra) hkan, mi moi de anhte amyusha ni hkrai nga ai shara ni hta hpa majaw kaga amyu ni hpe ahkaw ahkang hte shara jaw nga ai kun? Lama wa ndai lahta na ginlam ni a majaw Asuya hte gasat gala byin wa ai nga yang gaw mungshawa a majaw gasat ai ngu nna mai sawn la nga ai. Raitim, ya KIA Hpyendap hpe dawm kau ya na matu maw wa yang she mungshawa myit ra ai hku rai sai, nga yang gaw, gara hku di sana?

Lama wa myit machyu nna laknak hte gasat ga nga yang, hpa majaw gasat na? Bandung gaw hkrak tawn sai kun? KIA Hpyendap ngang grin na matu sha kun? Amyusha a ahkaw ahkang a matu kun? Myit yu shara rai nga ai.

Anhte a rawt malan hkrunlam gaw KIO/KIA kaw sha htum mat na chyawm gaw n rai nga ai. Adip arip re ai ni sha nga dingsa gaw matut nna rawt malan nga ra na ga ai. Tinang Mungdan tinang uphkang ai prat du wa rai ti pyi, dip sha ai gumshem asuya she pru wa yang gaw matut nna naw gasat ra na ga ai. Laknak lang nna sha gasat ai ngu ai n re, galaw ging galaw mai ai bungli, tsun ging tsun mai ai ga, ninghkap ging ninghkap ra ai lam ni hte gasat ai lam mung amyusha a matu mai gasat nga ai.

Tsun ra ai ga hpe tsun na ten hta n tsun nna shalai kau nhtawm, majoi laknak hte gasat gala ai lam gaw n-gun shama, asak jasum, jamjau hkam la ai sha mahtai pru na re. Tengman ai lam hpe galoi mung gwi gwi tsun shapraw ga law.