KIO gaw Share Shagan Nhtoi galaw

Wunpawng Mungdan Shawnglawt Hpung (KIO) gaw tingkyeng Share Shagan Nhtoi masat lamang ni hpe Jinghpaw mungdaw hte lahta Sam mung na tinang shalawt gaiwang ni hte, dap dung, dap ba ni hta galaw wa sai lam, KIO shiga lawk kawn chye lu ai. Ndai August 10 ya hpe Share Shagan Nhtoi hku lai wa sai 2004 ning hta KIO ginjaw kaw tara shang myit hkrum masat wa nna, 2005 ning kawn masat nhtoi lamang ni hpe galaw hpang wa ai gaw, dai ning 5 lang, rai sai re. KIA hpe woi de let Awmdawm Shanglawt Jinghpaw Mungdan gaw de na woi shakut wa sai G.O.C Lahtaw Zau Seng (1961-1975). KIO daju Laiza, Sinpraw Majoi Manau wang e buga masha ni hpe saw shaga nna lamang hpe jahpawt hkying 10 a.m. kawn 11 a.m. lapran galaw ai hta, ningbaw kaba Lanyaw Zawng Hra a mungga hpe Ginjaw hpaji dap lithkam Sara Kaba Sumlut Gam kawn minute 10 daram hti dan wa ai lam, lamang sa du madat ai ni tsun wa ai. Lamang sa du madat ai ni tsun ai hta, shanhte hpe hti dan ai ningbaw kaba a mungga hta "Hkrat sum mat sai KIA ningbaw G.O.C Lahtaw Zau Seng, V.C.S Lahtaw Zau Tu (G.O.C a kanau), Ninggawn Amumadu Pungshwi Zau Seng hte hpyen Jaubu Lahtaw Zau Dan (G.O.C a kanau hpungdim) ni a lam hpe shakawn shagrau da ai hte, KIO/KIA a mungmasa bandung n du du hkra gasat sa wa na lam" hpe mung tsun tawn ai re, nga ai. KIO/A gaw August 10 ya hpe "Share Shagan Nhtoi" ngu masat ai lam gaw, Wunpawng Mungdan Shawnglawt Hpyendap (KIA) hpe ningpawt hpang ya ai G.O.C Lahtaw Zau Seng a hkrat sum mat sai nhtoi, 1975 ning August praw 10 ya hpe mahta ai re lam, KIO salang ni kawn chye lu ai. G.O.C Zau Seng sat hkrum ai lam gaw Myen hpyen wa n re sha, V.C.S Zau Tu a rung amumadu Maran Seng Tu (snr. Tu Bung) a mayun ladat shaw woi shachyai ai hte maren, Myen-Htai ga jarit, Htam Ngawp Bum, tinang KIA hpyendap e KIA hpyenla ni nan gap kau ai lam re. G.O.C hpe n gap sat shi ai 3 ya shawng, August praw 6 ya shani gaw, V.C.S Zau Tu, Ninggawn Amumadu Pungshwi Zau Seng hte Du Zau Hkawng ni hpe Htam Ngawp Bum kaw sha Maran Seng Tu a KIA hpyenla ni gap kau sai, rai nga ai. Share Shagan G.O.C Zau Seng gaw Lahpai Naw Seng kawn hpunau Karen National Union (KNU) kaw hpyen hpaji sharin la na matu dat dat hkrum masha rai nna, shi gaw 1961 ning February praw 5 ya hta KIA hpe woi de let laksan awmdawm shanglawt Jinghpaw Mungdan gaw de na matu Myen hpyen hpe woi gasat wa sai re. Raitim, G.O.C sat hkrum ai hpang shaning 1976 ning kawn Maran Brang Seng bai KIO/A a ningbaw kaba tai wa nna mungmasa policy hpe mung awmdawm shanglawt mungdan kawn madu uphkang mungdaw hpyi ai madang de shagrit let tsap mat wa dai gaw, ya ten du hkra re. Laiza na KIO salang ni hpe lakap let chye lu ai gaw, 1961-1994 ning ladaw, Myen hte KIO/A byin ai dinghku majan ni hta Myen hpyen hkying kaba hpe shagrawt kau lu sai re, nga ai. Raitim, tinang J.W mungmasha ni mun lam gaw Myen hpyen ni a lam amyu myu hku zingri zingrat sat hkrum sai jahpan gaw, KIO/A magam gun masha ni hkrat sum jahpan hta grau law ai re nga lam, KIO ginjaw salang langai tsun wa ai re. Ya ten mung, Myen gaw KIO hpe laknak jahkrat shangun ai hku nna Jarit Sin Dap, galai na shagyip shagyeng nga ai majaw, uhpung lahkawng lapran dinghku majan byin wa na masa nga ai, KIO shiga lawk kawn chye lu ai.