Myen gaw KIO a hpyi ai hpe mahtai n jaw shi

Myen asuya gaw daini du hkra Wunpawng Shanglawt Hpung (KIO) hpyi ai mungmasa hte hpyendap ahkaw ahkang hpe hpa mahtai n jaw shi ai lam, KIO shiga lawk kawn chye lu ai. Jinghpaw mungdaw, KIO daju Laiza na du salang ni tsun ai hta, KIO tang madun ai lam ntsa hpyen asuya a bai htang shana wa na hte, shada matut bawngban jahkrup lu na KIO la nga ai re, nga ai. Lai wa sai shata hta KIO hku nna Myen de tang madun tawn ai lam gaw--- KIA dap hpe Kachin Regional Guard Force (KRGF) de gale mayu ai lam hte du na shaning 2010 ralata poi ngut ai hpang le wa na Jinghpaw mungdaw asuya n'nan hta ading tawk shanglawm na matu re. Lai wa sai April shata kawn KIA hpe Myen hpyendap uphkang npu nga ai, "Jirit Sin Hpyendap" de gale na matu shagyip shagyeng wa sai, rai nga ai. Myen gaw KIO hpe hpa shiga n shana wa tim, uhpung lahkawng lapran na simsa lam hpe gaw matut aten garawt na lam hpe gaw, lai wa sai July shata laman tsun shana wa sai lam, KIO salang ni kawn chye lu ai. Lai wa sai bat hta mung, KIO gaw tinang a magam dap 10 jan a jahpan hpe hpyen asuya de tang madun dat sai re. KIA hpe lai wa sai February 5, 1961 ning hta awmdawm shanglawt ai Jinghpaw mungdan gawde na matu hpaw dat ai re, raitim, 1976 ning kawn gaw Munghpawm kata na madu uphkang mungdaw madang de shagrit hpyi wa sai gaw ya ten du hkra, rai nga ai.