Myen hpe ninghkap gasat na simsa lam hpung 4, myit hkrum sai

Myen hpyen asuya hte simsa lam la tawn ai, amyu bawsang simsa lam hpung 4 gaw, hpyen asuya hpe rau sha ninghkap gasat na matu, shada chye na myit hkrum tawn sai lam, chye lu ai. Ndai uhpung ni gaw, Jinghpaw mungdaw e daju ai Wunpawng Mungdan Shanglawt Hpung (KIO) hte Sam mungdaw e daju ai, United Wa State Army (UWSA), Kokang simsa lam hpung, Mongla daju National Democratic Alliance Army-Eastern Shan State (NDAA-ESS) ni re. Jinghpaw mungdaw, Manmaw ginwang kata shawnglam hkawm nga ai KIA hpyenla langai. KIO shiga lawk kawn chye lu ai hta, lama hpyen asuya hku nna ndai 'hpyen masa myit hkrum hpung' na uhpung langai ngai hpe gasat hpang dat sai hte, ngam ai uhpung masum mung tinang ginra ni kaw hpyen asuya hpe ninghkap gasat na matu re, nga ai. Lai wa sai April shata kawn, Myen gaw mungdan kata na amyu bawsang simsa lam hpung ni n'tsa, shanhte a laknak hpai dap ni hpe "border guard force (Jarit Sin Dap)" hku hkrang galai hpaw na matu, policy jahkrat shagyip shagyeng hpang wa sai re. Ndai lam ntsa lahta na simsa lam hpung mali gaw n hkap la ya ai majaw, de a majaw, shanhte hpe hpyen asuya htu gasat wa yang, bai htang ninghkap gasat na matu myit hkrum tawn ai re lam, sagawn chye lu re. Hpa majaw nga yang, shada da lapran na mungmasa manghkang hparan ai lam tsepkawp n nga ai sha, maja laknak hpai dap hpe shawng hkrang galai shangun ai majaw re lam, chye lu ai. Mani sha mung, Myen gaw shi hku nna No. 1 hpyen kaba hku mu tawn ai, mungdan democracy ningbaw slgj. Awng San Su Chyi hpe, Yangon, Insein htawng kaba e tara jeyang ai hta, 'dum nta rim sharen ari' hpe shata 18 (laning mi chyen) bai jat dat sai re. Ndai gaw, htaning 2010 ralata poi n galaw ngut shi yang, slgj. Su Chyi hte shi a NLD pati a mungmasa shamu shamawt lam n nga hkra, tau hkau pat kau ai lachyum re nga nna, mungmasa la ni myit sawn nga ai re. Ya na zawn, slgj. Su Chyi hpe zim di sharen da ngut sai hpang gaw, No. 2 hpyen kaba rai nga ai, Jarit Sin Dap n hkap la ai bawsang simsa lam hpung ni de bai, hpyen man gayin, laja lana shagyip shagyeng wa na masa nga ai nga nna, Myen-Miwa ga jarit na mungmasa la ni KNG de tsun wa ai.