Myen-Kokang manghkang kawn majan kaba de gale wa sai

Ndai bat Mali Ya, August 27 ya shani kawn, Lahta Sam mung e Myen hpyendap hte Kokang rawtmalan hpung lapran, gap hkat hpang wa sai gaw, ya ten, majan kaba de gale wa nga sai lam, chye lu ai. Kokang ningbaw kaba Peng Jiasheng (Pai) hte Myen hpyen asuya chyawmtari Dukaba Than Shwe Mani hpawt kaw na, madung Kokang daju masum rai nga ai, Laogai, Chinshwehaw hte Wanchansu ginra ni hta uhpung lahkawng lapran, sinat kaji hta amyawk kaba ni hte grau n sim n sa, galai gachyai gap hkat wa sai re lam, majan pa shiga lawk kawn chye lu ai. Grau nna Kokang ni gaw bum ntsa kaw na 75 mm hte 120 mm amyawk kaba ni hte Myen hpyen ni hpe gap bun nga ai lam, shawnglam shiga lawk kawn chye lu ai. Ndai bat laman sha, Kokang ni kawn Myen hpyendap ni shang madu la ai, tinang uphkang ginra dingda daw na Chinshwehaw hpe mung, Wa Myithkrum Hpung (UWSA) hpyen n-gun 2,000 jan hte, mani sa gap zing la lu sai rai nna, ya ten, dai shara na Wa hpyen ni galai dung nga sai lam, Kokang hte ni kahtep ai shiga lawk kawn chye lu ai. Kokang shiga lawk kawn chye lu ai hta, mani shara masum hta byin ai majan hta, Myen hpyen ni marai 240 jan si ai mang hpe mu nna, Myen hpyenla law law hpe mung chyahkrung lu rim tawn ai re, nga ai. Ndai si jahpan hta, Myen pyada ni mung marai 20 jan lawm ai lam, matut chye lu ai. Kokang maga na gaw, masha 10 jan si nna, 30 jan gaw hkala hkrum ai lam, Kokang shiga lawk kawn chye lu ai. Myen-Miwa ga jarit na ya majan byin ai shara makau na Muse hte Munggu mare ni de mung, Myen hpyen hprawng ni law law gale pru wa ai re, nga ai. Bai nna, Myen hpyenla ni law law mung, majan ginra kawn tinang a sinat laknak ni kabai kau nhtawm, man ang ai de hpraw ai ni mung law law re lam, kahtap chye lu ai. Majan a majaw, ga jarit hpe lai di nna Miwa mung hkran de hprawng pru wa ai, "Kokang tsinyam masha ni (refugees)" ni gaw, lai wa sai August praw 8 ya, Myen hte Kokang ni hpyen masa shaja hkat hpang wa ai ten kaw na rai yang, marai 30,000 hkawt du sai lam, ga jarit shiga lawk kawn chye lu ai. Ndai hpyen hprawng ni hpe Miwa asuya hku nna tsinyam dabang 7 hpaw nna lanu lahku lam ni galaw nga sai zawn, nkau tsinyam dabang de garai n du shi ai ni hpe gaw, hpyen nbungli ni hte lamu kawn malu masha ni jahkrat jaw nga ai lam, ga jarit shiga lawk kawn chye lu ai. Ya ten, Myen hpyendap gaw, Mandalay, Meiktila na hpyen n-gun 4,000 jan hpe mung, majan byin nga ai Kokang ginra de sa dat sai hta, mani gaw, dai hpyen hpung ni Sinli kaw du wa sai lam, myi-chyaw-sakse ni tsun dan wa ai re. Bai nna, Myen hpyen asuya gaw, Lahta Sam mung, mare kaba ni hta nga ai asuya pyada dap shagu de mung Kokang gasat ai hta hpyenla ni hte rau shanglawm na matu, ndai laman matsun tawn sai lam, Muse buga masha ni kawn chye lu ai. Bai, ndai bat laman sha, Kutkai mare hta Myen hpyenla ni gaw buga masha nkau a dum nta ni de kam mara shang nna asak ram ai ni hpe, maja porter lahkawn wa sai lam, Kutkai buga masha langai kawn chye lu ai. Maga mi de mung, Kokang hte hpyen masa ga sadi la da ai, Wunpawng Mungdan Shawnglawt Hpyendap (KIA) mung, tinang ginra ni de kabe shang wa ai Myen hpyen ni hpe gap na matu, Jinghpaw mungdaw hte Lahta Sam mung na KIA hpyendap yawng de matsun dat sai re. Ndai matsun hpe, KIA Dap Awn Daju, Du Daju Gunhtang Gam Shawng a aming hte, ndai bat Mali Ya, Myen hte Kokang lapran gap hkat hpang wa ai shani matsun wa ai, rai nga ai. KNG