Myen-Shanglawt, Myitkyina e bai hkrum

Myen hpyen asuya hte Wunpawng Mungdan Shanglawt Hpung (KIO snr Shanglawt), uhpung lahkawng datkasa ni gaw, August 22, lai wa sai Bat Kru Ya shani hta kalang bai, Jinghpaw mungdaw mare daju Myitkyina e hkrum shaga wa sai re. Zuphpawng hta, uhpung lahkawng lapran, laklai ai lam lama ma bawngban jahkrup lu ai lam n nga ai sha, kadai mung kade a byin mayu ai lam hta ja ja tsap ai masa hku sha zuphpawng shangut bra wa sai re lam, KIO datkasa ni kawn chye lu ai. Ndai zuphpawng hta, Myen gaw shawoi na hte maren, KIO hpe tinang KIA dap hpe "Jarit Sin Dap (Border Guard Force)" de hkrang galai na matu hte KIO/KIA magam gun masha jahpan ni hpe masat tawn ai du na October shata n htum shi yang du hkra jaw na matu" sha, kahtap tsun shadum dat sai lam, KIO datkasa ni kawn chye lu ai. Myen gaw, lai wa sai July shata praw 8 hte 11 ya laman, KIO kawn tinang de hpyi tawn ai lam n'tsa gaw hpa mahtai n jaw ai lam, matut chye lu ai. KIO hpyi tawn ai lam gaw--- KIA dap hpe, Myen n pu n re ai, "Kachin Regional Guard Force (KRGF)" hku nga mayu ai lam hte, htaning 2010 ralata poi galaw lu nna, pru wa na Jinghpaw mungdaw asuya n'nan hta mung KIO masha ni ading tawk shanglawm na lam re. KIO datkasa hpung hku nna Myen de htang tsun dat sai gaw, "Lani mi, KIO/KIA hkrang galai ai lam gaw nga na re. Raitim, KIO gaw asuya uphkang hkrang hku nga ai re majaw, masat tawn ai October shata hta gara hku mung n mai byin na re. KIO/KIA hkrang galai na lam hpe htaning 2010 ralata poi galaw lu nna pru wa na asuya n'nan hte matut bawngban jahkrup mayu ai lam ni re", nga ai. Ndai lam ntsa Taimu Soe Win wa laklak lailai bai htang tsun sai hta, "Ndai lam ntsa Ngai hku na gaw mahtai n lu jaw sai majaw, lahta de tang madun ya na" ngu tsun wa sai lam, KIO salang ni hpe lakap let chye lu ai. Zuphpawng hta, Myen hpyen asuya masha ni hpe Myitkyina e daju ai Dingdung Daw Daju (Jinghpaw Mungdaw) Dap Up (Taimu) Du Daju Soe Win woi awn nhtawm, malawm (8) KIO datkasa hpung hpe gaw tingnyang-up malai 1 Dukaba Gauri Zau Seng woi awn ai lam, chye lu ai. Ndai August shata 12 ya shani hta, KIO gaw tinang a asuya uphkang hkrang magam dap (10) jan a jahpan hpe Myen hpyen asuya de tang madun wa sai hpang, ya na zawn uhpung lahkawng lapran krum shaga wa ai lam mung re. Bai, lai wa sai bat lahkawng ram hta sha, Hpakan Uru Sengmaw Ga e Myen hte KIA hpyenla ni lapran ganoi noi gap hkat wa sai mabyin hpe Myen Taimu Soe Win hte KIO ningbaw malai Dukaba N'ban La Awng yan, hkyak hkyak sa hparan kau wa sai lam, chye lu ai. KNG