Myitkyina kaw KIO/KIA masha ni a dum nta jahpan hta

Myen hpyen asuya gaw, lai wa sai July shata kawn Jinghpaw mungdaw mare daju Myitkyina e shanu nga ai Wunpawng Mungdan Shanglawt Hpung/Hpyendap (KIO/KIA) masha ni a dum nta jahpan mahka hpe ya kalang bai hta lahkawn nga sai lam, chye lu ai. Hpyen asuya a mare uphkang salang ni nan lit la let, KIO/A dum nta ni de sa du nna Dingdung Daw Daju (snr Jinghpaw Mungdaw Dap Up) dap up (Taimu) Du Daju Soe Win a matsun hte maren nga nna, dum nta hkringdat hte hkrak jahpan hta nga ai re lam, Myitkyina shiga lawk kawn chye lu ai. Myitkyina gat kaba Bai nna, KIO/A masha ni a sut hpaga bungli ni hte lamuga hkai sun ni hpe mung, jahpan hta la nga ai re lam, KIO/A dum nta ni hpe lakap let chye lu ai. Maning mung, mungdaw dap up dingsa Du Daju Ohn Myint gaw Myitkyina na KIO/A dum nta ni a shamu shamawt lam hpe aten shagu yu gawn na matu, pyada ni hpe lit jaw wa sai re. Ndai lam ntsa, KIO daju Laiza na ginjaw salang langai tsun ai gaw, "Myen gaw Myitkyina na KIO/A masha ni dum nta jahpan hpe chye chyalu re. Dai hpe ya bai jahpan hta wa ai gaw, anhte (KIO/A) hpe sharim mayu ai lam rai na re", nga ai. Ya ten, Myen gaw KIO hpe tinang KIA dap hpe "Jarit Sin Dap" galai na matu shagyip shagyeng nga ai ten, KIO mung Myen de htang hpyi tawn ai gaw, KIA dap hpe "Kachin Regional Guard Force" mahtang galai mayu ai lam hte htaning 2010 ralata poi galaw lu nna, Jinghpaw asuya n'nan pru wa yang, dai kaw KIO masha ni ading tawk shanglawm na matu re. Raitim, ya ten du hkra gaw, gara uhpung wa mung mahtai jaw ai lam n nga ai sha, "tinang tang madun ai lam" hta sha, ja ja tsap nga ai masa re nga nna, lai wa sai bat laman, KIO Ninggawn Amumadu Dr. Lahkyen La Ja, KNG de sanglang dan wa sai. Bai nna, ya ten Myitkyina e asuya mu gun masha, Hkristan nawku hpung sara ni hte Bukda hpungkyi ni a mying jahpan ni hpe mung, shanhte a shingdu labau kadun hte hkrak, jahpan hta nga ai lam, asuya mu gun masha ni kawn chye lu ai. Ndai zawn galaw ai gaw, lama Myen hte KIO lapran majan bai byin wa yang snr Myitkyina e asuya ninghkap shawa n-gun madun poi ni galaw wa yang, dai hpe lawan hparan shazim lu na matu, tau hkyen lajang ai masa re nga nna, buga masha ni myit sawn nga ai lam, chye lu ai. Myitkyina e mungmasa kasu kabrawng lam ni hpe madung woi galaw na gaw, nawku makam masham hpung ni, asuya mu gun masha ni hte KIO/A masha ni rai na hpe hpyen asuya myit sawn lu ai majaw galaw ai rai na hpe buga masha ni mu mada tawn ai lam, matut chye lu ai.