Sutdek kaw sat makoi tawn ai num kasha a mang, Myitkyina e mu

August shata praw 7, lai wa sai bat manga ya shana, hkying 6 jan e Jinghpaw Mungdaw mare daju, Myitkyina mare, Masat 5 asuya Lahta Tsang Jawng a shingdu, Shatapru lam, N'Jang Hka mahkrai n du shi ai shara kaw, sutdek hta bang makoi na kabai tawn ai num kasha langai a mang hpe mu tam lu ai lam, buga masha ni kawn chye lu ai. Grupyin hta mang yat manam bat na wa majaw, sa tam yang, Nga bang ai hpun sutdek zawn re ai hta, asak 20 ning ram re ai, num kasha ma langai a mang hpe singgu krin bang tawn ai hpe mu lu ai re lam, myi-chyaw-mu buga masha ni tsun wa ai re. Ya ten du hkra, ndai num kasha kadai re hpe n chye lu lu shi ai rai nna, shi a mang hpe gaw Myitkyina Tsirung Kaba a Mang Tawn Gawk kaw sa tawn sai lam, buga masha ni kawn matut chye lu ai. Myitkyina buga masha ni tsun ai hta, "Ndai numsha a mang kaw hpa adan aleng re ai ningma kaba kap ai hpe n mu ai majaw, hkumshan roi rip na sat kabai kau ai rai nga re", nga nna, myit sawn nga ai lam, KNG kawn sagawn chye lu ai. Ya ten, Myitkyina mare kaba hta num ma ni hpe roi rip ai manghkang ni gaw shawoi na hta grau ding ding byin pru wa nga sai lam, jauman buga masha ni kawn chye lu ai.