KIO gaw tinang lahta tsang salang 6 hpe uhpung kawn shapraw kau sai

Wunpawng Mungdan Shanglawt Hpung (KIO) gaw tinang lahta tsang salang 6 hpe uhpung kawn shapraw kau sai lam, chye lu ai.

Jinghpaw mungdaw, Jinghpaw-Miwa ga jarit, KIO daju Laiza kawn chye lu ai hta, Tingnyang-up Malai 2 Dr. Manam Tu Ja, Tau Ninggawn Amumadu Dukaba N'Ja Naw Rip, Dukaba Mung Hkawng, Dukaba Paushi Zau Hpan, Dukaba Nuk Le hte Salang kaba Sabaw Krang ni hpe, 'KIO aming order laika' hte September praw 2, ndai bat Masum Ya shani, shapraw kau sai re, nga ai.

KIO Tingyang Malai 2 dingsa Dr. Manam Tu Ja

Ndai zawn shapraw ai lam hte seng nna, KIO gaw, kade n na yang, shawa yawng chye hkra ndau shabra laika shapraw na re lam, Laiza na KIO ginjaw salang langai KNG de tsun dan wa ai re.

Lai wa sai bat lahkawng hta, lahta Sam mung na Kokang simsa lam hpung kata shada shai hkat wa ai ten, hpang jahtum Myen hpyen ni Kokang ginra yawng hpe hpyen n-gun hte ga-up la ai mabyin zawn, KIO kata e mung n byin na matu, ndai zawn jau nna KIO salang 6 hpe shapraw kau ai re lam, Laiza na KIO du salang ni hpe lakap let chye lu ai.

KIO shiga lawk kawn matut chye lu ai hta, ndai shapraw kau sai KIO salang 6 gaw, mi kaw na mung pru na hkyen nga ai ni re lam, hpa majaw nga yang, shanhte gaw Jinghpaw Mungdaw Pran Wan Komiti hta shanglawm let, "Jinghpaw Mungdaw Rawt Jat Pati (KSPP)" ngu ai hpe mung, maning hpaw dat sai re.

Ndai pati gaw, kade n na yang hpyen asuya hku nna mungmasa pati n'nan ni, mying jahpan bang na ahkang jaw dat sai hte tara shang pati byin hkra shawk la nhtawm, htaning hpyen asuya woi galaw na ralata poi hta shang shingjawng na yaw shada tawn ai re.

Ya ten, KSPP gaw tara shang pati n byin shi ai raitim, pati hpe madung woi awn ai gaw Dr. Tu Ja re lam, chye lu ai.

KIO Tingyang Malai 2 dingsa Dr. Tu Ja hpe shapraw kawn ai lam gaw lak lai ai lam gaw n re, hpa majaw nga yang, shi hku nna, maning, KNG de tsun wa sai hta, KSPP hpe tara shang pati hku shawk la lu sai hte KIO kaw na asan sha pru mat na re lam tsun wa sai re.

2004 ning kawn 2007 ning hta shangut lu sai, hpyen asuya a mungdan gawda ai tara kanu ka ai Mungbawng Zuphpawng (NC) hta, zuphpawng lung ai KIO datkasa ni hpe Dr. Tu Ja hku nna woi awn wa sai, rai nga ai.

Raitim, Dr. Tu Ja woi galaw wa ai mungmasa ladat gaw, "Myen hpe hkrai madi shadaw ai zawn" byin wa ai majaw, shi hpe 'Sama Duwa Sin Wa Nawng nambat 2' nga nna mung, KIO hte Jinghpaw uhpawng kata shadawn tsun garu wa sai re.

Sama Duw Sin Wa Nawng gaw nambat langai Jinghpaw Mungdaw a uphkang du rai nna, shi gaw moi Inglik prat, Japan prat hte Myen hkringmang daju U Nu asuya prat du hkra, Myen maga hkrai tsap lai wa sai hpe labau hta mu lu ai.

KNG