Miwa gaw Myen tsin-yam masha n le tim, dabang 3 kahtap hpaw

Miwa gaw shi a Myen ga jarit mayan de Myen mung na tsin-yam masha ni (refugees) langai mi mung n le wa tim, September 24, mani Mali Ya shani kaw na gaw, tsin-yam dabang 3 hpe kahtap hpaw wa sai re. Miwa ginjaw asuya a matsun hte ja gumhpraw jahkrat ya ai hte maren, Lahta Sam mung, Saphkung Hka a sinna maga Munggu (Mongkoe) hte Hpawng Seng makau, Miwa hkran shara masum hta tsin-yam dabang ni hpe galaw nga sai ai re lam, Munggu shiga lawk kawn chye lu ai. Tsin-yam dabang ni hpe Manghai, Pengjiazhai hte Xiaozhai mare ni kaw galaw nga aai rai nna, dai hta, Manghai kaw tsin-yam masha marai 5,000, Pengjiazhai kaw 6,000 hte Xiaozhai kaw 3,000 hku nna, hkap la na masing re lam, Miwa ga jarit shiga lawk kawn chye lu ai. Bai nna, Miwa asuya gaw tsin-yam dabang ni hpe masha law wa ai hta hkan nna bai kahtap hpaw na masing mung nga ai lam, matut chye lu ai. Ndai tsin-yam dabang ni hpe, Myen hte lamu ga jarit mayan na amyu bawsang laknak hpai hpung ni lapran majan byin wa yang, Miwa hkran de hprawng pru wa na Myen mung masha ni a matu yaw shada let hpaw ai re lam, Miwa tsin-yam dap hpe lakap let chye lu ai. Ya ten, Saphkung Hka sinna maga de nga ai madung rawtmalan hpung ni hta, Loikang-daju Wunpawng Mungdan Shanglawt Hpyendap (KIA) a dap ba 4 hte Sam Hpyen (SSA-N) ni rai nna, Saphkung Hka a sinpraw de gaw Kokang (MNDAA), Wa (UWSA) hte Mongla-daju NDAA uhpung ni nga ai re. Myen hpyen asuya gaw, du na October shata htum hpe jahtum nhtoi masat nna, dai ten shi matsun tawn ai "Border Guard Force—Jarit Sin Dap" n hkap la ai rawtmalan hpung kadai hpe mung gasat shamyit na matu, hkyen lajang nga sai re. Raitim, dai lam hpe KIA, UWSA, SSA-N hte NDAA uhpung ni, n hkap la ai re. Myen hte dai rawtmalan ni majan byin yang, madung hprawng pru wa na buga masha ni gaw, madung Saphkung Hka a sinpraw hte sinna maga nga ai, Jinghpaw, Lisu, Palawng, Akha, Lahu, Kokang hte Sam amyusha ni re lam, chye lu ai. Mani sha mung, Munggu mare na man na, Manghai mare tsin-yam dabang de galaw da chyalu plastic ginsum 170 hpe Mangshi kaw na htaw lahka tawn sai hpe mu lu ai lam, myi-chyaw-mu buga masha langai tsun dan wa ai. Ndai tsin-yam dabang 3 hpe n galaw shi yang, lai wa sai bat laman, Miwa asuya gaw Myen jarit hte ni kahtep ai tinang amyusha mare buga shagu na upkang salang ni yawng hpe "Ga jarit majan hte Myen mung tsin-yam masha" hte seng nna Mangshi de alak mi zuphpawng shaga wa sai lam, chye lu ai. Bai nna, Miwa asuya gaw, ndai tsin-yam dabang 3 a grupyin mare kahtawng shagu de sa du nhtawm, dum nta langai hpe Miwa mungdan dawng hkawng kaji langai hte gumhpraw Yuan 1,000 mi hpra mung garan jaw ai lam hpe lai wa sai bat kawn galaw wa ai lam, ga jarit shiga lawk kawn chye lu ai. Ndai zawn galaw ai gaw, lamu ga jarit hta majan byin wa yang, tinang mungmasha hte lamu ga hpe chye gin hka lu na yaw shada ai masa re nga nna, ga jarit hpyen masa sawk sagawn ai ni KNG de tsun dan wa ai. Ya ten, ga jarit hta majan n byin ai, tsin-yam masha n le ai ten, ndai zawn Miwa a tsin-yam dabang 3 hpaw ai sat lawat gaw, "Miwa hte Myen gaw lamu ga jarit e majan galoi byin na hpe hkrak chye chyalu hte dai lam hpe kata lam e jawm myit hkrum galaw ai masing, sakse madun ai lam re" nga nna, Munggu na hpyen masa dinglik salang langai tsun wa ai re. Lamu ga jarit na hpyen masa sawk dik ai ni tsun ai hku rai yang, du na October praw 1 ya hta ang ai Miwa Amyusha Nhtoi, ladu hkrum lamang galaw ngut ai hte gaw, lamu ga jarit mayan hta Myen hte rawtmalan hpung ni lapran majan sana re, nga ai. Lai wa sai August shata laman, Myen gaw Kokang ginra hpe htim gasat ai shaloi, Kokang tsin-yam masha 40,000 jan gaw Miwa ga jarit Nansan de hpraw pru wa sai re. Ndai zawn byin ai hte Miwa ginjaw asuya kawn tsin-yam masha ni a matu kalang ta jahkrat jaw budget gaw Miwa Yuan sen 100 (US $1,428,541) re lam, Miwa Tsin-yam Dap kawn chye lu ai. Ya ten, Kokang (MNDAA), UWSA hte NDAA uhpung ni a uphkang ginra kawn Miwa jarit na mare ni de, madung Nasan grupyin hte Ta-law (snr Daluo) de hprawng pru wa ai, Myen mung na tsin-yam masha jahpan yawng gaw, marai 60,000 jan sai lam, tsin-yam dabang shiga lawk kawn chye lu ai. KNG