Myen asuya shi laika hta tinang uhpung na pru sai KIO ningbaw ni hpe shakawn

Ndai bat pru kaw na, Myen hpyen asuya a shi laika ni hta, lai wa sai bat mi jan e tinang Wunpawng Mungdan Shanglawt Hpung (KIO) na pru mat wa sai KIO lahta tsang salang 6 hpe shakawn shagrau wa sai re. Daini September 17 ya shani shapraw ai, Myen hpyen asuya a Myanmar Ahlin shiga laika. Madung, Myen laika hte dip shapraw ai Kyaymon (The Mirror) hte Myanmar Ahlin (The New Light of Myanmar) shi laika ni hta, "2010 ralata poi shang na shajin nga ai, KIO Tingnyang-up malai atsang 2 Dr. Tu Ja hte, kaga lahta tsang salang 5 hpe KIO na hkring sa na ahkang jaw dat ai lam gaw jaw ai dawdan lam re" nga nna, madi shadaw tawn ai. Bai nna, ndai September shata praw 5 ya shani, Jinghpaw Mungdaw, KIO ginjaw Laiza e KIO woi galaw ai Mungshawa zuphpawng a ndau shabra laika hpe mung "Ndai gaw J.W amyusha ni hku nna simsa lam hpe kaja wa ra shashawng ai hte gawda ai tara npu rawt jat galu kaba ai democracy mungdan, jawm gaw de ai kaw shanglawm ai lam re" nga nna mung, shiga laika hta ka da ai re. Ndai Laiza Mungshawa Zuphpawng a ndau shabra laika hta, dinghku majan hpe tsepkawp ninghkap ai lam, simsa lam hpe aten garawt nna shada kam hkat lam hpe gaw gap let manghkang hpe bawngban hparan mat na ra sharawng ai lam hte tinang uhpung hkrang galai ra na lam hpe mung 'masa hku' hkam la tawn ai lam ni, rai nga ai. Raitim, daini September praw 17 ya nhtoi hte shapraw ai Myanmar Ahlin shi laika hta gaw, lai wa sai 1993 ning, October praw 1 ya shani, KIO datkasa ni hte Myen hpyen asuya masha ni zuphpawng galaw ai shaloi, dai ten na KIO a Tingnyang-up Malai Dukaba Mali Zup Zau Mai a tsun bawngban wa sai lam hpe madi madun tawn ai lam, mu lu ai re. Dai gaw, "Tinang laknak hpai rawt malan magam hpe tawn kau na lam hte Mungbawng Zuphpawng (National Convention) na mungdan a gawda ai tara le wa nna kaja wa ai hte rau, laknak ap ra na lam hpe, myit tawn chyalu rai nna, mungmasa galaw mayu yang laknak hpai rawt malan amu gabai kau ra na mung chye na tawn ai re" nga ai. Arawng aya kawn shapraw hkrum sai KIO ningbaw kaba Mali Zup Zau Mai. Arawng aya kawn shapraw hkrum sai, KIO a ningbaw kaba dingsa mung rai nga ai, Dukaba Zau Mai bawngban tsun wa sai ga gaw, 1994 ning, February 24 ya, Myen hte KIO lapran simsa lam ga sadi lakmat htu ai lam, n galaw shi ai ten hta re. Ya ten, KIO gaw tinang KIA dap hpe du na October shata htum hta jahtum tawn nna, Border Guard Force (Jarit Sin Dap) hku hkrang galai na matu, Myen a ladat amyu myu hte sawng dik shagyip shagyeng hkrum nga ai aten mung rai nga ai. Ndai ten du hkra gaw, KIO hku nna dai Myen a Jarit Sin Dap hkrang galai na lam hpe n hkap la ai rai nna, KIA hpe Kachin Regional Guard Force hku mahtang nga mayu ai lam hpe tang madun tawn ai, rai nga ai. KIO ginjaw salang ni kawn chye lu ai hku rai yang, Myen hte KIO uhpung lahkawng na datkasa ni gaw du na October praw 2 ya shani hta Myitkyina e bai hkrum hkat let shada da tang madun tawn ai lam ntsa, "ahpraw snr achyang mahtai" jaw hkat na masa nga ai re, nga ai. KNG