Myen dukaba Ye Myint hte KIO hkrum na lam, ndai bat n teng mat

Naypyitaw na Myen dukaba Ye Myint hte KIO ningbaw ni lapran, du na Laban (September praw 6) ya shani, KIO Laiza daju e hkrum hkat na hku nhtoi masat tawn ai raitim, n teng mat sai lam, chye lu ai. Laiza daju na KIO ginjaw salang langai ni tsun ai hku rai yang, uhpung lahkawng lapran 'ra ahkyak' hkrum hkat na lam hpe, Myen hpyen asuya a Kaichyan Dap (Tsa-Ya-Hpa) lithkam hte bawsang simsa lam hpung yawng a jahkrup jahkrum ningbaw mung rai nga ai, Lt-Gen Ye Myint hku shawng ga hpaw tsun wa ai raitim, ya zuphpawng htingnut ai lam hpe shi bai shana wa ai re, nga ai. Ndai bat Kru Ya, September praw 5 ya shani, KIO gaw tinang lata saw shaga tawn ai Jinghpaw buga salang ni hte shawng hkrum ngut ai hpang, lahkawng masum ya na jang, uhpung lahkawng hkrum hkat ai lam hpe galaw na matu, Dukaba Ye Myint tsun wa ai lam, Laiza na KIO salang ni kawn chye lu ai. Lai wa sai shata hta, Lahta Sam mung na Kokang simsa lam hpung a ginra hpe hpyen asuya kawn gasat zing la wa sai hpang, KIO hte Myen lapran, 15-ning na sai simsa lam hten wa na zawn, hpyen masa shaja hkat ai masa hpe Naypyitaw Myen dukaba hku nna KIO de bawngban wa na rai na hpe KIO salang ni myit sawn tawn ai lam, chye lu ai. Lama dukaba Ye Myint gaw KIO salang ni hte hkrum lu yang, shi gaw Kokang manghkang a majaw shada bai gap hkat na zawn shachyen hkat nga ai ten, KIO de du sa wa ai aya kaba dik Myen dukaba langai rai na re.. Ndai ten, Myen-Miwa ga jarit dingyang nga ai KIO daju ni rai nga ai Laiza, Mai Ja Yang hte N'bapa ni hta mungmasha ni tsa lam gaw, ndai bat pru kawn tinang a dum nta rai ni hpe shawng madung dat let htingbu Miwa mung hkran de shani shana lahka bang nga ai lam, myi-chyaw-sakse ni KNG de tsun dan wa ai re. Ya na zawn galaw wa ai gaw, Myen hte Shanglawt (KIO) majan bai byin wa yang na matu, tinang a dum nta rai ni hpe, shim ai Miwa hkran de tau htawk shapraw tawn ai lachyum re lam, KNG kawn sagawn chye lu ai. Maga mi de, ya ten, Lahta Sam Mung na Wa Mung Myithkrum Hpyendap (UWSA) a ginra, Kokang ginra hte ni ai, Hopang, Panglong ginra ni de Myen hpyen n-gun, laknak kaba ni hte sinat machyu pala ni jat bang nga ai sat lawat a majaw, Myen hte Wa lapran majan byin na gaw lata layung daw hti sha rai sai lam, UWSA hte ni kahtep ai shiga lawk kawn chye lu ai. Lama Wa hte Myen lapran majan n'nan bai byin wa sai hte gaw, KIO mung kalang ta, tinang uphkang ginra Lahta Sam mung hte Jinghpaw mungdaw ni hta Myen hpe majan baw sana re lam, KIO/KIA du salang ni hpe lakap let chye lu ai. KNG