Myen hpyendap a mayun laika hta, KIO hpe tsun n lu yang gap na lam tsun

Myen-Miwa ga jarit, Ruili (snr. Myen hku Shweli) e lu la ai, Myen hpyendap a mayun laika hte maren nga yang, Wunpawng Mungdan Shanglawt Hpung (KIO) hpe "Border Guard Force--Jarit Sin Dap" gale na ga ngwi ga pyaw hte tsun n lu yang, gap na re lam, Ruili shiga lawk kawn chye lu ai. Ndai laika makoi hta, "Shanglawt (KIO) gaw, kani dut lu dut sha hpaga ni galaw let sinat laknak ni grai lu mahkawng da sai hte, Amerikan kaw na madi shadaw lam ni lu da ai majaw, ja dum taw ai re" nga nna, ka tawn ai lam chye lu ai. Bai, bawm kapaw arung arai ni hte Jinghpaw ramma langai hpe kade n na ai ten lu rim kau dat sai lam hte, kasu kabrawng hkyen ai bukda hpungkyi 27 hpe mung lu rim tawn ai lam ni hpe, dai laika hta mu hti lu ai re lam, dai laika mu hti ai wa tsun dan wa ai re. Dai re majaw, Myen asuya gaw, shi masha ni mayun bang tawn Jinghpaw mungdaw na buga mare ni hta, sadi maja let aten shagu jep sagawn nga na matu matsun tawn sai lam, KIO shiga lawk kawn chye lu ai. Ya ten, Myitkyina hte Manmaw mare kaba ni hta, shana 10 jan sai hte lam nmaw de kadai n le na aming (snr n-sin n mai le aming) jahkrat tawn sai nna, dai ten pyada ni gaw hkyuk mawdaw ni hte mawdaw lam ntsa hkap sin nga ai lam, buga masha ni tsun wa ai. Myen gaw, Jarit Sin Dap galai na masing hpe, 2010 ralata poi n du shi yang ngut hkra galaw na shakut nga ai hta, lama wa dai masing atsawm n awngdang ai rai yang, 2010 ralata poi hpe mahtang htawt sit na masa re lam, Ruili shiga lawk lawk kawn chye lu ai. KNG