NDA-K hte Ta-Ka-Sa-Hpa a tingkyeng manghkang a jaw, mungmasha ni jam jau

Jinghpaw mungdaw a Sinpraw Dingdung daw de daju ai, J.W sinat lang hpung lahkawng rai nga ai, NDA-K hte Ta-Ka-Sa-Hpa lapran na tingkyeng manghkang a majaw, mungmasha ni jam jau hkrum nga sai re. Hsawlaw ninghtawn, N'Mai Hka a sinna maga, Lang Ze hte grupyin mare na Rawang hte Lisu bum nga masha ni gaw NDA-K (New Democratic Army-Kachin) a "hpyen zawn" ganau mazum hkrum nga ai majaw, sakhkrung nga pra lam yak hkak hkrum wa ai re lam, dai buga masha ni kawn chye lu ai. Lang Ze buga masha ni tsun ai hku rai yang, ndai ginra na bum nga masha ni yawng gaw tinang ginra hta du hkra ladaw katsi la ai majaw Hkainu hta lai nna kaga n mai hkai sha ai majaw, n-gu hte kaga tsi mawan hte ra ahkyak rai ni hpe Miwa ga jarit, Hpimaw hte Kangfang ni de sha moi kaw nna madung dat, lagaw lam hku (ya ten kalang lang gaw mawdaw hte) gin hkrang gun sha nga ai re, nga ai. Ndai zawn Miwa ga jarit de n-gu gun sha ra ai hta, NDA-K a Tabang Hka gate hpe lai di ra ai hta, dai gate hta Lang Ze hte grupyin buga masha ni hpe Ta-Ka-Sa-Hpa (Tawng-chyan-tu-san-chyin-ye-ahpoi) masha hku n tsen ai hte hkap jahkring, mayun rim jep ai lam ni galaw ai sha n ga, kalang lang Miwa ga jarit de n lai shangun ai lam, Miwa ga jarit kaw du nga ai Lang Ze buga masha ni tsun ai. Bai nna, Miwa ga jarit na htaw wa ai snr gun wa ai n-gu hte kaga gat rai kaji kajaw ni hpe mung, dai NDA-K Tabang Hka gate kaw hkap sin ai NDA-K hpyenla ni gaw, "Rai nau law ai, Ta-Ka-Sa-Hpa hpe madi shadaw na matu kun?" ngu nna, gun wa ai rai ni a shadawn shadang hpe shagyit shayawm kau ya ai lam ni mung, galaw nga ai lam, matut chye lu ai. Ndai September 11 ya shani hta mung, Miwa ga jarit de rai sa mari na sa wa ai, Lang Ze buga masha 2 hpe Tabang Hka NDA-K gate e hkap jahkring nhtawm, hkying hkum 3 ram na hkra Ta-Ka-Sa-Hpa masha hku n tsen ai hte jep san nna, Miwa ga jarit de sa na ahkang n jaw ai lam, buga masha ni KNG de tsun dan wa ai re. Ya ten, Tabang Hka gate hpe woi awn nga ai gaw Dukaba (Major) Muk Myaw Dau Hkawng rai nna shanhte gaw NDA-K Dap Dung 1 npu na rai nna, dai gate e NDA-K ni buga masha ni hpe tsun nga ai gaw "NDA-K uhpung de n shang yang, gate kaw na mung n shalai na" ngu shagyip shagyeng nga ai re lam, chye lu ai. Lai wa sai 2005 ning hta, NDA-K kaw hpyenla galaw nga ai Rawang amyusha marai 20 jan gaw hpaga la Ahdang (Tanggu Dang) woi awn ai hte dai hpung kaw na sinat laknak ni hte ga garan pru nhtawm, Hkawnglanghpu e Rawang amyusha laksan Ta-Ka-Sa-Hpa hpung hpe Myen hpyen asuya madi shadaw ya ai hte hpaw ninghtan wa sai re. Dai ten kawn, Lang Ze hte grupyin e nga ai dum nta 200 jan buga masha ni gaw NDA-K Dap Dung 1 a ndai zawn, "Ta-Ka-Sa-Hpa a masha ni hku snr Ta-Ka-Sa-Hpa hpe madi shadaw ai ni hku" aten shagu n tsen hkrum let hkap jahkring, san jep hkrum nga ai re lam, buga masha ni kawn chye lu ai. Lang Ze mare na buga salang langai tsun ai, "Anhte chye na ai gaw, uhpung uhpawng ngu ai gaw mungmasha ni a matu, mungmasha ni a bawngring gan ga lam a matu re. Raitim, ya ten anhte gaw NDA-K a lanlak kam dang sha ai npu, Miwa ga jarit de n-gu gun sha mung yak, hkawm sa hkawm wa lam mung pat hkum hkrum, aten shagu san jep hkrum ai majaw, kadai hpe tsun na mung n chye, grai myit daw nga ai re". Pangwa-daju NDA-K (New Democratic Army-Kachin) hte Hkawnglanghpu-daju Ta-Ka-Sa-Hpa yan gaw lamu ga ginra dingdung dingda nau wa n gang hkat ai kaw daju ai mung rai nna, uhpung lahkawng yan gaw Myen hpyen asuya matsun npu nga ai re. KNG