Woi Chyai Bum e Chyoipra ai Udang Kyu Hpyi Shagrau Poi galaw lu

Jinghpaw Mungdaw, Wunpawng Mungdan Shanglawt Hpung (KIO) daju Laiza Muklum, Woi Chyai Bum ningtsa e Hkahtaw Lik nawku hpung a 8 lang ngu na Chyoipra ai Udang Bum Kyu Hpyi Shagrau Poi hpe ndai bat Langai Ya shani (September 14), wu wu di di galaw lu sai re. Ndai Kyu Hpyi Poi hta Laiza grup yin na Hkahtaw Lik nawku hpung masha ni sa du ai sha n ga, KIO magam dap, makan dap na masha ni hte kaga Hkristan hpung shagu na hpung masha ni mung shanglawm let angwi apyaw hte kalang bai galaw la lu sai, rai nga ai. Lai wa sai 2002 ning September 14 ya shani, Mungdan Shanglawt asuya a ahkaw ahkang jaw shagrin ya ai hpe dai Woi Chyai Bum ningtsa e Chyoipra ai Udang masat shadaw galaw jun let kyu hpyi shaman nna hpaw hpang ai rai nga ai. KIO daju Laiza Muklum, Woi Chyai Bum e jun tawn ai Udang. Dai ten kaw na ya daini du hkra, shaning shagu Udang Buma Kyu Hpyi ai lamang ni hpe galaw sa wa ai hta Hkahtaw Lik hpung masha ni sha n ga, kaga Hkristan nawku hpung shagu na hpung masha ni mung, laning hte laning grau grau lung kyu hpyi wa ai lam, chye lu ai. Shanglawt asuya gaw dai Chyoipra ai Udang Bum a nam kawn hpe mung eka-30 grup yin hpe masat ya ai hte dai lamu ga hpe Karai Kasang hta kyu hpyi ap nawng shaman la sai re. Ndai Udang Bum de lung wa ai hkrun lam hta Madu Yesu n’ni n’hkri hkrum sha ai lam a sa-ra (14) hpe mung galaw da ai rai nna, myit sim myit sa kyu hpyi lung wa mai nga ai. Ndai Kyu Hpyi Bum, Chyoipra ai Udang Shagrau Poi hpe du na shaning hta mung grau hkik hkam ai hku galaw na maw mawn nga ai hte dai ning Kyu Hpyi Nta lu galaw na myit mada shakut nga ai lam, chye lu ai. Dai re majaw, dai Kyu Hpyi Nta galaw ai hta nang, ngai yawng shanglawm alu jaw na hpe mung, nawku hpung hku nna saw shaga nga ai re. KNG