J.W amyusha ni a ginru ginsa Uma Ga de, Yu Li Hku bai byin sai

WRITTEN BY KNG

Myen mung a dingdung daw, Jinghpaw Mungdaw, J.W amyusha ni a ginru ginsa Uma Ga rai nga ai, Mali-N'Mai hte Mali-Hkrang Walawng ni de, Yu Li Hku n byin ai 32 ning na sai hpang, ya kalang bai laja lana byin wa sai re.

Lahkawng lang byin wa ai, ndai Yu Li Hku tsin-yam gaw, Wunpawng Mungdan Shanglawt Hpung (KIO) a Dingdung Ginwang snr Wunpawng Mungdan Shanglawt Hpyen (KIA) Dapba 1 a uphkang ginra, rai nga ai.

KIO a jahpan hte maren nga yang, ya ten, Mali-Hkrang Walawng hte Mali-N'Mai Walawng na mare kahtawng 60 jan, dai kaw nga ai dum nta htinggaw 600 jan na buga masha marai 4,000 jan gaw, shat malu masha hku hku ai, Yu Li Hku a tsin-yam hkrum sha nga ai re, nga ai.

Yu hte kaga hkrung kanu ni sha jahten kau sai, Mali-N'mai Walawng na bum yi langai.

Shanhte gaw KIO masat tawn ai, Hkin Dawng ninghtawn, Dagu Lum ninghtawn hte N'Rawng Kawng ginwang daw kata hta nga ai Ninghtawn yawng na mare buga masha ni re lam, chye lu ai.

KIO shiga lawk hte maren nga yang, lai wa sai June shata ram kaw na buga masha ni a mam hte hkai nmai ni hpe jahten ai madung hpyen 6 re, ng ai. Dai gaw--- Nun Kanu hpyen, Tung dan Kanu hpyen, Yu hpyen, Maru hpyen, Ma Shoi Kanu hpyen hte Kadawn hpyen ni re.

Ya ten, dai ginra na mam yi hte kaga yi sun ni yawng lahta na hkrung kanu ni a jawm sha jahten hkrum sai hta, nkau gaw yi ting tsepkawp sha jahten hkrum nhtawm, nkau gaw daw chyen sha jahten hkrum sai lam, chye lu ai.

Maga mi de, lit nga KIO mung, ndai Yu Li Hku byin ai ginra ni hpe, "hkyak hkyak hkye mawai la ra ai ginra" hku masat tawn sai rai nna, ginjaw hkamja dap masha ni mung, ndai laman dai ginra de rawt sai lam, matut chye lu ai.

Lai wa sai 1977 ning laman, J.W labau hta shawng n'nan lang ngu na Yu Li Hku kaba gaw ndai ginra ni hta byin lai wa sai re. De a majaw, buga masha ni hkying lam gaw madung Myitkyina hte Putau ga ni de htawt hprawng mat sai, rai nga ai.

Ya ten, Myen hte KIO lapran, shada jahkrup jahkrum n mai ai, "Jarit Sin Dap" gabaw hte matut nna, "majan bai byin na zawn" hpyen masa shaja hkat nga ten, KIA Dapba 1 ginra de Yu Li Hku byin wa ai re.