KIA Dapba 4 hpe shamyit na lam, Myen lahta tsang dukaba tsun

WRITTEN BY KNG Myen hpyen asuya a lahta tsang dukaba langai gaw, Lahta Sam mung na Wunpawng Mungdan Shanglawt Hpyendap (KIA) Dapba 4 hpe gasat shamyit na lam, dapshawa mungmasha zuphpawng langai kaw tsun wa sai re. Hpyen asuya a hpyendap ginwang 3 yu hpareng du (Bureau of Special Operations (BSO)-2), Lt-Gen Min Aung Hlaing tsun wa sai ga hta, "KIA Dapba 4 gaw hpyen asuya a matsun n hkap la yang, hpang jahtum gasat shamyit na re lam" hpe September 30 ya, lai wa sai bat hpang masum ya shani, Hpawng Seng e galaw ai zuphpawng hta tsun wa ai lam, buga masha ni tsun ai. Ya ten, Lt-Gen Min Aung Hlaing a yu hparen ai npu hta, Lashu-daju Sinpraw Dingdung Daw Daju (Ya-Ma-Hka), Tawnggyi-daju Sinpraw Daw Daju (Ya-Pa-Hka) hte Keng Tong-daju Triangle (Ta-ri-gan) Ginra Hpyendap Daju (Ta-Tha-Hka) ni re. Dukaba Min Aung Hlaing gaw Ya-Ma-Hka ningtau Dap-up Brig-Gen Aung Htun hte rau, Hpawng Seng de sa du ai hta, "KIA Dapba 4 hpe n-gawn hpyen (Pyi-tu-sit) gale na matu tsun yu nna n lu yang gaw, Dapba yawng hpe Jinghpaw mungdaw de atsai awai htawt sit kau na matu tsun yu na re" nga nna mung tsun shaga wa sai lam, chye lu ai. Shi matut nna, "KIA Dapba 4 hpe hpung masum garan nhtawm n-gawn hpyen hku gale sana re. Hpung mi hta masha n-gun 30 hpra hte shanhte hpe hpyen asuya hku nna shara jahkrat ya na re. Dai zawn galaw na matu KIO ningbaw ni law malawng mung myit hkrum wa sai", nga tsun wa ai lam, zuphpawng sa du madat ai ni kawn chye lu ai. Lama KIA Dapba 4 gaw gara hpe mung hkap la ai lam n nga yang gaw, gasat shamyit kau na re lam hpe Myen dukaba wa ja ja sadi jaw ga tsun wa sai lam, zuphpawng sa du madat ai buga masha ni kawn matut chye lu ai. Saphkung Hka a sinna maga Loikang e daju ai KIA Dapba 4 daju gaw hka a sinpraw hkran na Kokang ginra (MNDAA) hte ni ai. Raitim, Kokang daju Laogai hpe lai wa sai August 24 ya kawn ya ten du hkra Myen hpyendap ni gasat zing tawn sai re. Ndai Kokang mabyin kawn, KIA Dap Awn Daju, Du Daju Gunhtang Gam Shawng gaw, Jinghpaw mungdaw hte Lahta Sam mung hta nga ai KIA hpyendap ni yawng de tinang ginra de tawt lai kabe shang wa ai Myen hpyen ni yawng hpe gap na matu aming jahkrat dat sai re. Lai wa sai September 29 ya shani hta, Myen hte KIO du salang ni gaw 8 lang ngu na, KIA hpe Border Guard Force (Jarit Sin Dap) gale na lam ntsa, shada jahkrup jahkrum bawngban wa sai raitim, mahtai kaja n lu ai re. Hpa majaw nga yang, Myen gaw KIO ra sharawng ai tang madun ai lam ntsa, hpa n myit ya ai sha, shi byin shangun mayu ai KIA hpe "Jarit Sin Dap" gale na matu sha, tsun shadut nga dingyang re ai majaw re lam, KIO salang ni kawn chye lu ai. Hpawng Seng zuphpawng hta, "Kokang na manghkang gaw aten n lata manghkang naw byin wa mai ai re lam hte, shawng e Kokang majan hta mawdaw 100 jan hpe mung zing la lu sai", nga nna, Myen dukaba Min Aung Hlaing tsun wa sai lam, zuphpawng sa du madat ai ni tsun wa ai re. Hpawng Seng ginra gaw Myen hte Tangbau Lau Yawng woi awn ai, Hpawng Seng n'gawn hpyen ni jawm uphkang nga ai shara langai mung rai nga ai. Ndai bat kaw na sha, Myen hpyendap gaw, Muse-Mandalay hpaga lam lapran, mungmasha ni a mawdaw ni hpe hkap jahkring nhtawm, shanhte a sinat laknak, lusha jarik ni hpe KIA dapba 4 hte ni ai shara hte United Wa State Army (UWSA) a Hopang shara makau de wa htaw sa nga sai lam, myi-chyaw-mu buga masha ni kawn chye lu ai. Myen-Miwa ga jarit na hpyen masa yu maram ai ni tsun ai rai yang, Myen a majan gasat na masing gaw, KIA Dapba 4 hpe shawng gasat shamyit nhtawm, Wa (UWSA) hpe jahtum tawn gasat na masing re, nga ai. Hpa majaw nga yang, Wa gaw masha langai sha ngam tim gasat ai amyu re nga nna, Myen dukaba wa masat tsun wa sai lam, sagawn chye lu ai.