KIA Dapba 4, Myen a matsun hkapla na lam tsepkawp n nga

KNG

Wunpawng Mungdan Shanglawt Hpyendap (KIA) gaw Lahta Sam mung na tinang Dapba 4 ntsa Myen dukaba wa jahkrit sharim tsun shapraw dat ga hpe tsepkap n hkapla ai lam, chye lu ai. Myen hpyen asuya a Sam mungdaw a hpyen ginwang 3 uphkang du (BSO-2) Lt-Gen Min Aung Hlaing gaw lai wa sai Sept. 30 ya shani Hpawng Seng e galaw ai dapshawa mungshawa zuphpawng hta, "Lama KIA dapba 4 gaw matsun hpe n madap yang, shamyit kau na lam", tsun sai re. Myen dukaba sadi jaw tsun ai hta, KIA dapba 4 gaw, "N-gawn hpyen hpung 3 hku hkrang galai hpaw ra na lam snr dai hpe n hkap la yang dapba ting hpe Jinghpaw mungdaw de atsai awai htawt sin kau na lam", rai nga ai. Jinghpaw mungdaw, Myen-Miwa ga jarit na KIO/KIA daju Laiza na du salang ni tsun ai hta, KIO/A gaw ndai Myen dukaba wa a dapba 4 n'tsa jahkrit sharim tsun shaga wa sai ga hpe tsepkawp hkapla na masa n nga ai re, nga ai. Hpa majaw nga yang, 'KIO' ngu ai mungmasa hpung hte 'KIA' ngu ai sinat hpai hpung hpe shawng n'nan hpaw hpang wa ai gaw, Lahta Sam mung kaw na re, nga ai. KIO/KIA labau hte maren, KIO hpe Lashu e 1960 ning October 25 ya shani hpaw hpang wa nna, KIA hpe gaw Sinli makau Lahu mare langai kaw 1961 ning February praw 5 ya shani (Laban shani), hpaw wa ai re. KIA ginjaw salang langai KNG de tsun ai, "KIA hpyenla langai n ngam tim, Jinghpaw amyusha ni nga dingsa, Dapba 4 mung grin nga na re. Hpa majaw nga yang, Dapba 4 gaw mungmasha ni a re". Lai wa sai April kawn ya ten du hkra, Myen hte KIO salang ni lapran, 8 lang hkrum shaga wa sai raitim, ndai Dapba 4 hte seng ai gabaw gaw n lawm ai lam, Laiza na KIO salang ni hpe lakap let chye lu ai. Ya ten, Laiza daju na KIO ningbaw ni gaw, ndai shata laman Myen hte, mahtai n lu ai "Jarit Sin Dap (Border Guard Force)" hte seng nna hkrum shaga na matu, hkyen lajang nga ai lam, KIO Ninggawn Amumadu Dr. Lahkyen La Ja, mani KNG de tsun wa sai. Myen gaw, lai wa sai April shata Jarit Sin Dap policy jahkrat wa sai kawn, Myen gaw KIA hpe shi npu e nga ai, dapdung madang Jarit Sin Dap hku galai na matu sha, tsun shadut nga tik tik re lam, KIO salang ni kawn chye lu ai. Raitim, KIO htang hpyi ai gaw, tinang J.W amyusha ni hte hkrai san re ai, dapba madang nga na, Kachin Regional Guard Force (KRGF) she byin mayu ai lam, Myen hpe tsun tawn sai re. Myen npu nga na Jarit Sin Dap hpe gaw, KIO/KIA hku nna "tsa htam shadang latsa tup", hkapla na n re lam, KIA ginjaw salang langai, KNG de kahtap shateng tsun wa ai.