KIO gaw Myen chyawm tari Than Shwe de jahtum laika tang tawn

KNG Uhpung lahkawng lapran, Jarit Sin Dap (BGF) bawngban mahtai n pru sai hpang, Wunpawng Mungdan Shanglawt Hpung (KIO) gaw, Myen hpyen asuya chyawm tari Dukaba Than Shwe hpang de, laika hte tinang byin mayu ai lam jahtum tang madun dat sai re. Laika hta, lama Myen hpyen asuya gaw, "Panglong Ga Sadi hpe hkungga hkapla nhtawm dai myit jasat hku sa wa yang, KIO gaw BGF n galaw chyai ra ai, laknak yawng ap kau na re" ngu tang madun tawn ai lam, KIO ginjaw salang ni kawn chye lu ai. Ndai KIO a tang madun laika hpe hpyen asuya a Myitkyina-daju Dingdung Daw Daju (Ma Pa Hka) dap up Du Daju Soe Win hku nna Dukaba Than Shwe de, ndai shata praw hta tang madun dat sai re lam, KIO salang ni tsun wa ai. KIO gaw ndai laika hpe dapashawa mungshawa ni de ndau shabra ai lam n galaw ai raitim, kade n na yang ndau shabra na masa nga ai lam, KIO shiga lawk kawn chye lu ai. Labau shang, Mung Hpawm Myen Mungdan byin wa ai ningpawt Panglong Ga Sadi hpe Myen ningbaw Buchyuk Awng San hte bum nga Jinghpaw, Sam hte Hkang ningbaw ni, lai wa sai 1947 ning February shata 12 ya shani, lakmat htu sai re. Dai hpang, 948 ning January praw 4 ya hta, Mung Hpawm Myen Mungdan gaw Inglik mung maden wa uphkang npu kaw na shanglawt lu wa sai, rai nga ai. Panglong Ga Sadi hta, madung Myen hte bum nga masha ni lapran rap rap ra ra mungmasa ahkaw ahkang lu ra na lam, bum nga masha ni tinang a mungdaw hpe tinang uphkang lu na lam hte, bum nga masha ni a mungdaw ni Mung Hpawm kawn ga garan pru lu na ahkaw ahkang ni, myit hkrum tawn ai re. KIO salang ni tsun ai hte maren, Myen hpyendap npu nga na BGF gabaw hte matut nna, KIO a tinang byin mayu ai lam hpyi ai lam gara hpe mung hpyen asuya n hkapla ai majaw, ndai zawn mi na Panglong Ga Sadi ahkaw ahkang hpe jahtum hpyi ai kaw du wa ai re, nga ai. Shawng e KIO hpyi wa sai lam gaw, tinang Wunpawng Mungdan Shanglawt Dap (KIA) hpe Myen a BGF gale na malai Kachin Regional Guard Force (KRGF) hku nga mayu ai lam hte, 2010 ralata poi galaw lu nna pru wa na Jinghpaw Mungdaw asuya n'nan hta KIO masha ni ading tawk shanglawm na lam re. Bai nna, Myen hte KIO lapran, KIO npu na hpyendap n re ai, mungshawa hte seng ai Hpaji Dap, Hkamja Dap, Buga Gaw Sharawt Dap hte DGA (Department of General Administration) Mungchying Uphkang Dap ni hte magam bungli jawm galaw na matu tang madun sai raitim, hpyen asuya n hkapla ai lam, KIO salang ni kawn chye lu ai. Ndai ten, Lahta Sam mung Loikang-daju KIA dapba 4 gaw Myen a alak mi jahkrit sharim ai lam hkrum nga sai re. Dai gaw, dapba 4 hpe Myen npu nga ai N-gawn Hpyen kaji 3 hku gale hpaw na lam hte lama dai hpe n hkap la yang, dapba ting hpe Jinghpaw mungdaw de htawt sit kau na lam re. N rai yang, hpang jahtum dapba ting hpe gasat shamyit kau na lam, rai nga ai. Raitim, KIA dapba 4 ntsa Myen a jahkrit sharim ai lam mahkra hpe KIO ginjaw gaw tsepkawp n hkap ai lam, KNG kawn sagawn chye lu ai. Ya ten, KIO gaw, Myen hpyen asuya chyawm tari Than Shwe de jahtum tang madun tawn ai lam ntsa, shi a hkap la, n hkap la bai htang shiga hpe sha la nga sai lam, KIO salang ni kawn chye lu ai.