KIO, KDA ningbaw yan, Mandalay e tsirung rawng nga

KIO ningbaw kaba Lanyaw Zawng Hra hte KDA ningbaw Mahtu Naw yan gaw, 'sakkung ana' hte ya ten, Mandalay mare kaba e tsirung rawng nga ai lam, uhpung lahkawng shiga lawk kawn chye lu ai. Raitim, Lahta Sam mung Kawnghka e daju ai KDA ningbaw Mahtu Naw, asak 60 ning jan gaw hkum chyen machyi ai ana hte baw nu sai lam di ai ana hpe hkam sha ai majaw, n dum n dam hte ga n lu shaga mat sai lam, KDA salang ni kawn chye lu ai. Ndai shata praw hta ningbaw Mahtu Naw hpe Kawnghka kawn Lashu tsirung de sa sa tawn ai hta dai kaw machyi sawng wa ai majaw, Mandalay tsirung de bai htawt sa ai lam, KDA kawn matut chye lu ai. KIO ningbaw kaba Lanyaw Zawng Hra (pai) and KDA ningbaw Mahtu Naw Kawnghka na KDA salang ni tsun ai hte maren, ningbaw Mahtu Naw, Lashu e tsirung rawng ten, shi hpe KDA hte shi a makin jinghku ni sa gawan lu sai raitim, ya, Mandalay de htawt ai hpang gaw, Myen hpyen asuya ahkang n jaw ai re, nga ai. Ndai lam a majaw, ndai zawn ningbaw Mahtu Naw machyi kaba hkrum nga ten, Myen hpyen ni KDA ginjaw Kawnghka de maja htu lung nna laknak jahkrat shangun let shanhte ra ai hku KDA hpe bai hpaw shabawn ya chye ai hpe, Kawnghkang na KDA salang ni grai myit tsang nga ai lam, KDA shiga lawk kawn chye lu ai. Shawng de, Lahta Sam mung na KIA Dapba 4 rai nga ai, KDA gaw Myen hpyen asuya matsun ai N-gawn Hpyen de hkrang galai hpaw na lam hpe lai wa sai June shata hta hkap la kau sai re. Maga mi de, KIO ningbaw kaba Lanyaw Zawng Hra, asak 70 ning jan mung shi a sakkung ana hpe jep tsi lajang na matu, Jinghpaw mungdaw, tinang ginjaw Laiza kawn Mandalay de, lai wa sai bat hta rawt sai re. KIO ningbaw kaba gaw, madung salum n-gun yawm ai lam hte jahkru ai lam ni hpe Laiza e bat lahkawng ram hkam sha wa sai hpang, ya na zawn, Mandalay de ana jep, tsi lajang na matu rawt ai re lam, KIO ginjaw langai KNG de tsun shana wa ai. Bai nna, KIO a Hpaji Dap lithkam Sara kaba Sumlut Gam mung, shi a ana jep na matu, ningbaw kaba hte rau, Mandalay kaw du nga ai lam, KIO salang ni kawn matut chye lu ai. Ya ten, KIO hte Myen hpyen asuya lapran, Myen hpyendap npu taw ai, "Jarit Sin Dap" gabaw hte seng nna mahtai n lu bawngban nga ai ladaw, KIO hte KDA ningbaw yan Mandalay de tsirung rawng ai lam re.