KIO/KIA Lasang Awng Wa Hpung, tara shang N-gawn Hpyen gale sai

Lasang Awng Wa woi awn ai, Lawa Yang daju KIO/KIA ga garan hpung gaw, October 16, lai wa sai bat hpang Manga ya shani hta, Myen hpyendap npu taw ai N-gawn Hpyen (Pyi-tu-sit) de tara shang gale sai re. Simsa Lam Hpung kawn N-gawn Hpyen de tara shang hkrang galai ai lamang hpe, Jinghpaw mungdaw mare daju Myitkyina a sinpraw dingdung de deng 20 tsan ai, uhpung daju Lawa Yang e jahpawt hkying 11 a.m. kaw galaw lu sai lam, uhpung shiga lawk kawn chye lu ai. Myen a N-gawn Hpyen n gale shi yang, kanu KIA uniform hte mu lu ai Lasang Awng Wa Simsa Lam Hpung na hpyenma ni. Lamang hta, Myen hpyen asuya a Myitkyina-daju Dingdung Daw Daju (Ma-Pa-Hka) Dap Up (Taimu) Du Daju Soe Win, shi nan sa du let Lasang Awng Wa Simsa Lam Hpung hpe "Lawa Yang N-gawn Hpyen" ngu tara shang masat ya sai lam, Lawa Yang shiga lawk kawn chye lu ai. Ndai N-gawn Hpyen hta masha n-gun yawng 164 tup shanglawm ai hta--- laknak hpai masha marai 60, shingnan hpyen n-gun 94 hte malawm 10 Ninghpum Salang Hpung (Na Ya-ka) ni re. Raitim, laknak hpai hpung hpe kalang bai hpyen n-gun 30 hpra hte uhpung 2 hku garan nhtawm, "Lawang N-gawn Hpyen" hte "Gwi Htu N-gawn Hpyen" ngu, shara san san, kalang ta masat ya sai lam, matut chye lu ai. Dai re majaw, ningbaw Lasang Awng Wa mung, ya gaw, ndai malawm 10 Ninghpum Salang Hpung (Na Ya-ka) a salang langai hku sha byin mat sai re. Bai, N-gawn Hpyen gale ai lamang galaw ai shani nan, Ma-Pa-Hka na la sa ai, nsam tsit ai N-gawn Hpyen Uniform n'nan hpe mung, kalang ta ap jaw sai lam, matut chye lu ai. Dai uniform hta, Lahpa lapai lahkra na dazik hpe, Ma-Pa-Hka npu na hpyenla ni shakap ai N-dan Pala kumla shakap nna, de a npu kaw "Pyi-tu-sit (N-gawn Hpyen)" ngu ai laika ka shakap tawn ai re. Bai nna, sinda shawng na dazik npu hta gaw "Lawa Yang Pyi-tu-sit" ngu laika ka shakap tawn ai lam, chye lu ai. Lamang ten, Taimu Soe Win wa mungga kadun shaga ai hta, "Ya gaw, nanhte gaw Myen mung ting hta tara shang laknak hpai na ahkaw ahkang lu sai. Ndai gaw Mungdan ningbaw kaba Dukaba Than Shwe a tsawra myit majing nan re", nga nna tsun wa sai lam, lamang sa du madat ai ni KNG de tsun wa ai. Shawng de KIO/KIA a Kaichyan hte Amyusha Shim Dap lithkam, Col. Lasang Awng Wa gaw, KIO/KIA kata shada arawng aya kashun ai manghkang a majaw, 2004 ning January shata praw 4 ya shani, KIO/KIA hpang hkan masha n-gun 300 jan hte "gan koi yen ai" ngu pru mat ai ta, hpang e tsepkawp ga garan mat ai re. Dukaba Lasang Awng Wa hte malawm ni gaw, 2004 ning tup, Zahkung Ting Ying a New Democratic Army-Kachin (NDA-K) a ginra hta shingbyi nga ai kawn 2005 ning htum wa de gaw, dai ten na Ma-Pa-Hka Dap Up Du Daju Ohn Myint, Gwi Htu Pa de shara jahkrat ya sai hte maren, dai de dap jung wa sai gaw ya ten du hkra re. Dukaba Lasang Awng Wa hte malawm ni ga garan pru mat ai majaw, dai ten KIA hpyendap ganoi hten mat daram byin wa sai re lam, KIA ginjaw salang ni hpe lakap let chye lu ai. KNG