NDA-K, Jarit Sin Dap masha jahpring na Kummyunit hpyenla dingsa lahkawn

Jinghpaw Mungdaw a sinpraw maga, Pangwah-daju New Democratic Army-Kachin (NDA-K) gaw Jarit Sin Dap masha jahpring na matu Kummyunit hpyenla ni hpe hkan mahkawng nga ai lam, chye lu ai. Madung NDA-K uphkang ginra, Pangwah, Kambaiti, Hpimaw hte Kangfang ginra ni hta shawng de Myen Mung Kummyunit Pati (CPB) hta hpyenla galaw yu sai ni hpe shaga gahkyin nga ai re lam, NDA-K shiga lawk kawn chye lu ai. CPB gaw lai wa sai 1989 ning hta ga ayai mat sai re. Ya na zawn, Kummyunit hpyenla dingsa ni shaga ra ai masa gaw, NDA-K dapdung 3 hpe Myen npu taw ai Jarit Sin Dap (Border Guard Force) gale ai hta NDA-K hpyen n-gun n hpring ai majaw re lam, uhpung shiga lawk kawn matut chye lu ai. NDA-K Ginjaw Pangwah Myen a BGF hkrang hte maren, dapdung mi hta hpyen n-gun 326 shanglawm na re hta, hpyen n-gun 27 gaw Myen hpyendap na ading tawk shanglawm na lam re. Dai re majaw, NDA-K hpe BGF dapdung 3 hku gale ai hta, hpyen n-gun yawng 978 shanglawm na rai nna, dai hta NDA-K n-gun marai 897 hte Myen hpyenla marai 81 shanglawm hpaw ninghtan na matu, rai nga ai. Raitim, ya ten kaja wa NDA-K hta nga ai hpyen n-gun gaw marai 400 ram sha re lam, uhpung hte ni kahtep ai shiga lawk kawn chye lu ai. Maga mi de, ya ten, NDA-K na laksan lata la ai hpyenla nkau gaw, Myitkyina makau, Pyindawng e daju ai, Myen hpyendap a Masat 7 Lahta Tsang Hpyen Wunkat Jawng e du nga sai re. Shawng de Communist Party of Burma (CPB) a dap nawng masat 101 rai nga ai NDA-K gaw, Myen hpyen asuya a BGF hpe lai wa sai June shata hta hkapla kau sai re. Ndai zawn NDA-K ningbaw kaba Zahkung Ting Ying hku nna BGF hpe hkapla kau ai lam ntsa NDA-K lawu tsang du salang nkau hte mungmasha ni n ra sharawng ai raitim, ningbaw kaba a aming hpe kadai n tawt lai lu ai lam, KNG sagawn chye lu ai. Ya ten, NDA-K ningbaw kaba Zahkung Ting Ying mung KIO tingyang-up malai 2 dingsa Dr. Manam Tu Ja woi awn ai Jinghpaw Mungdaw Rawt Jat Pati (KSPP) hku nna hpyen asuya a 2010 ralata poi shang na hkyen lajang nga ai lam, Pangwah shiga lawk kawn chye lu ai. Ya ten du hkra KSPP gaw tara shang pati gaw n byin shi ai re. Myen mungdan kata, NDA-K gaw J.W laknak hpai hpung ni hta, Wunpawng Mungdan Shanglawt Hpung (KIO) ngut ai hpang, kaba dik uhpung re. Raitim, J.W mungmasha ni lapran, NDA-K hpe "mungmasa hpung hta sut hpaga hpung langai hku mahtang" grau mu mada tawn ai re. KNG