Mandalay tsirung rawng ai KDA ningbaw a hkamja lam, grau n hkrak wa

Mandalay tsirung rawng nga ai KDA ningbaw Mahtu Naw a hkamja lam, ndai laman grau n hkrak wa ai lam, tsirung shiga lawk kawn chye lu ai. Ningbaw Mahtu Naw, asak 60 jan gaw shi a baw nu sai gayun ai ana a majaw, lai wa sai Oct. shata kawn Mandalay Mungshawa tsirung kaba kaw du nna baw ga tsi lajang nga ai re. Ya ten, KDA ningbaw gaw tsirung e n dum n dam hte, ga pyi atsawm n lu shaga sai lam, Mandalay kaw du nga ai shi a jinghku ni kawn chye lu ai. Dai re majaw, shi bai "mi na zawn hkamja wa na" ngu ai myit mada lam gaw n mai byin ai de law mat sai lam, shi jinghku langai KNG de tsun dan wa ai. KDA ningbaw Mahtu Naw Lai wa sai September htum wa de, Ningbaw Mahtu Naw gaw Lashu tsirung kaw tsi tsi nga ai kaw, ana sawng wa ai majaw, October praw hta Mandalay Mungshawa tsirung de htawt la ai, rai nga ai. Shawng de, Mahtu Naw ningbaw ai, Lahta Sam mung Kawnghka daju KIA Dapba 4 gaw, dapba ting, 1990 ning hta kanu hpung na ga garan pru let 1991 ning January 13 hta Myen hte htani htana simsa lam lakmat htu nna, "Kachin Defense Army (KDA)" ngu mying hte, daini ten du hkra tsap nga ai re. Raitim, lai wa sai June shata hta ningbaw Mahtu Naw hku nna, KDA hpe Myen hpyendap npu taw ai, "N-gawn Hpyen (Pyi-tu-sit)" hku hkrang galai hpaw na, Myen hpe ga sadi jaw sai, rai nga ai. Ningbaw Mahtu Naw gaw, "Myen hte hku hkau yang ngut sai" ngu ai masa hte, tinang Hkristan makam masham hte amyusha ni hpe n gawn n sawn, "Myen a N-gawn Hpyen hkapla ai lam hte 2001 ning hta Kawnghka daju e bukda hpungkyi jawng hte gawng ngu shachyaw ya ai lam majaw," tinang J.W amyusha ni a manu mana dinglu hkrum nga ai re. Naypyidaw mungdan mare daju de, lai wa sai July shata kaw Mungkan Wunpawng Hpung ninggawn amu madu Ban Ki-moon sa du ai shaloi hte August shata kaw Amerikan Lahta Rapdaw Salang Jim Webb sa du ai ten, bawsang simsa lam hpung nkau a ningbaw ni hpe hpyen asuya shaga madun wa sai shaloi, ningbaw Mahtu Naw mung shanglawm sai re. KNG