Slideshow Image 2

Hkristan jawngma ni bukda hpungkyi jawng, san seng lam galaw ra


Myen hpyendap gaw Jinghpaw mungdaw kata, Hkristan Jinghpaw jawngma ni hpe bukda hpungkyi jawng san seng lam ni atik anang galaw shangun nga ai lam, buga kata shiga lawk kawn chye lu ai.

Jinghpaw mungdaw mare daju Myitkyina a dingdung de deng 54, Tayang Zup kahtawng na gin-run asuya lapran tsang jawng a jawngma ni gaw, mare lawu deng mi jan tsan ai bukda hpungkyi jawng a san seng lam hpe lit la galaw ra nga ai lam, chyauman buga masha ni tsun wa ai.

Ndai jawng hta Jinghpaw hkristan jawngma ni law malawng hte yawng 100 ram nga ai rai nna, "shanhte hpe jawng lung ten, jawng she pat hkra rai", hpungkyi jawng hta nam dan, tsin hkyen hte kaga guji guyang san seng lam ni kahtap htap galaw shangun ai re lam, jawng shiga lawk kawn chye lu ai.

120709-studentDai jawng hta jawng lung nga ai jawngma ni hta madung Tayang Zup hte grup-yin na jawngma ni hte, KIO uphkang ginra Mali-N'Mai Walawng, bum ga na jawngma ni mung lawm ai lam, buga masha ni kawn chye lu ai.

Ya lai wa sai Lanam Ta, May kawn September du hkra, yawm dik 3 lang, ndai Tayang Zup gin-run lapran tsang jawng na jawngma yawng hpe hpungkyi jawng san seng lam galaw shangun wa sai lam, chyauman buga masha ni hpe lakap let chye lu ai.

Tayang Zup e shata masum snr mali hta kalang lang galai gachyai jung ai Myen hpyendap ni a matsun hte maren, jawngma ni hpe hpungkyi jawng jasan jaseng ai amu galaw shangun ai re lam, buga masha ni kawn matut chye lu ai.

Ndai sat lawat gaw, "Myen hpyen asuya hku nna Jinghpaw hkristan jawngma ni hpe gum wai hku bukda sasana galaw ai lachyum re hku" buga masha ni mu mada tawn ai lam, mare shiga lawk kawn chye lu ai.

Mali Hka a lapai hkran hkyin gau e nga ai Tayang Zup mare hpe Myen hpyendap gaw shi a shawnglam ginra langai hku masat tawn ai rai nna, dai shara gaw, Mali Hka a lahkra hkran de jung ai KIA dapdung 4 hte mung ni ai re.

Myen mung na asuya hpaji jawng yawng, jawng kaji kawn lahta tsang du hkra hta jawngma ni yawng gaw Myen bukda nawku makam masham hte seng ai laika hpe n sharin n mai, rai nga ai re.
KNG

0 comments:

Post a Comment