MALI NMAI ZUP HKA MADIM A MAJAW JINGHPAW WUNPAWNG BUGA MASHA NI YAWNHKYEN HKRUM SHA NGA SAI HPE KYU HPYI GARUM NA LAM

Nhtoi: 10-1-2010. Kachin State day

Lai wa sai 21-12-2009 hta Mali Nmai zup(Myitsone) Hydropower hka madim hpaw poi lamang hpe Myen mung ginjaw Hydropower Wungyi Col Zaw Min, Taimu Gen Soe Win, hte China Power Investment cooperation (CPI) ningbaw Mr. Lu Qizhou ni sa du nna galaw lai wa sai . Dai zuphpawng hta mare masha (100) jan hpe laktik lakna aming hte sa lung shangun lai wa sai

Myitsone Hydropower gaw Pe (500) tsaw nna, wan n-gun (6,000)MW hpe Miwa mung de dut shalai nhtawm, Myen asuya gaw laning mi hta USD wan (500) jan lu la na rai nga ai.

Ya ten hta Mare buga masha ni hpe htawt sit na matu aming jahkrat taw nga aten re. Dai majaw mare kahtawng (60), masha jahpan maram (15,000) jan gaw tinang a yi sun hkau na, dum nta ni hpe kabai kau nna, ayai aya htawt sit ra ai madang de du taw nga sai. Hkrap ngu hkrap ngoi yawn madai nsen shapraw nga masai.

Jinghpaw Wunpawng sha ni a ginru ginsa labau shang ginra hte Myanmar mungdan hta mying gumhkawng ai Mali Nmai Zup(Myitsone) mung mat wa na rai sai. Mali Nmai zup gaw

(Sagaing fault line) ngu ai nlangnawn sai lam hte (100 klm) ntsan ai shara kaw nga ai re.

Nlangnawn nawn nna, Madim lama daw mat ai rai yang, madim a npu de Myitkyina hte hpawn, Mali hka hpe machyu let kan bau bungli galaw lu galaw sha ai Myen mung masha wan (3) jan gaw hka lim kaput ai maw ru kaba hkrum sha ai hte asak sum machyi ai lam byin chye nga ai

Dai majaw buga masha ni a lawt lu lam hte Mali Nmai zup, Mali hka nu tsawm htap ngang grin lu na matu mungkan shara shagu shanu nga ai Jinghpaw Wunpawng Myu sha ni yawng the makam masham hpung ni yawng kyuhpyi karum la na matu saw lajin dat ga ai law.

Kyu hpyi saw lajin ai,

Jinghpaw Wunpawng Bawngring Mahkri shawn Hpung (KDNG)

Kyithkai hkringdat: Email: kdngchn@gmail.com Tel No: +66 837555693

Kata lam shiga: kachinnews.com hte burmariversnetwork.org/ videos.html

Forward mail kaw na la bang da ai re.