Myen Jinghpaw mungdaw up, Mungdaw Nhtoi lamang hta n sa lawm

Dai ni ang ai 62 lang na Jinghpaw Mungdaw Nhtoi hpe Myitkyina, Shatapru Manau Wang hta masat masa lamang galaw wa ai kaw, Myen mungdaw up Dingdung Daw Daju (Ma-Pa-Hka), dap-up (taimu) Du Daju Soe Win, n shanglawm ai lam, lamang lawm ai ni KNG de tsun ai. Jahpawt hkying 8 kawn 10 du hkra galaw sai Mungdaw Nhtoi masat lamang hta, taimu Soe Win a malai, taimu malai Du Up Daju Tsan Htun mahtang sa shanglawm ai hte, mungga kadun mung shaga wa sai lam, lamang lawm ai ni tsun ai. Mungdaw dap-up wa n shanglawm ai hte seng nna, lamang lawm ai Jinghpaw mungmasa la langai, shi ningmu tsun ai, “Ya na zawn, shi (Soe Win) Jinghpaw Mungdaw Nhtoi lamang hta n sa lawm ai gaw, ya gaw Jinghpaw ni poi hpe hpa ahkyak n la sai lachyum re,” nga nna KNG de tsun ai. Mungdaw Nhtoi Manau hpe Wunpawng Htunghking Hpung Ginjaw woi nau hkyen yang. Dukaba Soe Win gaw, Sagai Tai, Myen-India jarit makau na mare, Nam Yun hta Naga amyusha ni a poi de mahtang shanglawm mat ai majaw, Jinghpaw Mungdaw Nhtoi shani na lamang hta n du lawm ai re lam, Ma-Pa-Hka shiga lawk hku chye lu ai. Mungdaw nhtoi lamang hta, shawa masha tsa kaba shawnglawm ai hta, Myen hpyendap, J.W laknak hpai uhpung ni hpe, asuya magam dap shagu na lithkam ni yawng, marai 150 jan, shanglawm sai lam, matut chye lu ai. Lamang hta J.W Htunghking Hpung Ginjaw Komiti ningbaw Duwa Mading Zung Ting hte dukaba Tsan Htun yan, mungga kadun shaga ngut sai hte, Myitkyina dakasu jawngma 600 gaw, laklai ai hku “62 ning hpring Mungdaw Nhtoi” hpe hkrang shala wa sai re lam, lamang lawm ai ni tsun ai. Htunghking ningbaw wa hku nna gaw, Jinghpaw Mungdaw byin wa ai labau kadun hpe Myen ga hku tsan wa sai lam, chye lu ai. Myen Tsan Htun a mungga hta, "Ndai zawn Manau poi galaw lu ai gaw amyu bawsang ni myit hkrum mang rum lam hpe madun ai kumla re. Grai kaja ai lam re. Simsa lam asi a majaw Jinghpaw Mungdaw rawt jat galu kaba wa ai re" nga nna tsun wa ai lam, mungga madat ai ni tsun ai. Dai hpang, masha tsa kaba shanglawm ai, laksan shawa Manau ni hpe jahpawt daw, shana daw matut manoi galaw mat sai lam, matut chye lu ai. Ndai lang na Manau poi de Wunpawng Mungdan Shanglawt Hpung (KIO) kaw na gaw law madaw salang ni hte, yawng marai 200 jan sha sa du lawm ai lam, chye lu ai. Kaja wa gaw, ndai Manau poi de KIO ni n sa lawm na matu daw dan tawn ai raitim, Myitkyina Ma-Pa-Hka na G-1, Lt-Col Aung Kyaw Soe, dasang “chyasam manam ni hpe saw shaga ai zawn” shaga ai majaw sha, nkau mi sa du lawm ai re lam, KIO salang ni hpe lakap let chye lu ai. Maning na Manau Poi de gaw, KIO/KIA masha 2,000 daram hpyen hking hte hkrak, sadu kabu lawm wa sai re. Bai, maning hte shingdaw yang, dai ning na Manau Poi Shabyin Shatai Komiti gaw, mungdan Myen hpyen ausya a grau grau dip matsun hkrum nga ai lam, komiti hte ni kahtep ai ni tsun ai. Dai ni Mungdaw Nhtoi hta nan, htinggrum Jinghpaw Mung Jawngma Hpung (AKSU) gaw, “Mali Zup madim n ra ai” ngu ai, ninghkap laika pa ni tsa lam hpe, Myitkyina mare kata, madung gat hkan na masha ni hpe gam garan jaw wa sai lam, shamu shamawt ningbaw Naw Seng tsun ai. Dai zawn sha, Jinghpaw Wunpawng Bawngring Mahkri Shawn Hpung (KDNG) hku na mung, Mali-N’Mai Zup madim gawgap ai lam hkring mat na matu, dai ni Mungdaw Nhtoi hta akyu jawm hpyi na matu, mungkan shara shagu na J.W ni hpang de ndau shana dat sai re. Mali Zup hka madim a majaw, grup-yin mare 60 jan na, n law htum masha 15,000 gaw, laktik laknang htawt sit hkrum ra na rai nna, Mali Hka a hka nam, hka lam dingyang na masha wan masum jan mung, hka madim daw hten wa yang, hka lim tsin-yam hkrum na re lam, KDNG sadi jaw nga ai re. KNG