ROMANIA DU JINGHPAW TSIN YAM NI YAK HKAK HKRUM

Uropa dan na mungdan kaji langai rai nga ai, Romania mungdan de shawng n’nan du shang wa ai, Jinghpaw tsinyam ni hta, mayak mahkak hkrum nga ai re.

Malaysia mungdan kaw du nga ai, Jinghpaw tsinyam masha 38 gaw, lai wa sai May 31 ya hte June 1 ya shani hta Romania de htawt sit wa ai rai nna, ya ten, garum ningtum ai lam ni atsawm n lu ai sha n ga, aga manghkang a majaw matut mahkai lam ni yak nga ai lam chye lu ai.

Romania mungdan kaw shang n'nan du shang wa ai, Jinghpaw tsinyam masha ni.

Ndai mungdan masha ni gaw, Inglik ga n shaga ai majaw mung, matut mahkai lam hte, tsun shaga ai lam ni hta yak nga ai hte, “laning mi tup dum nta manu hte nga jarik hpa manu jahpu n la ai sha madi shadaw na ngu, ga sadi lu da tim, ya gaw shata 2 sha garum na re lam” asuya tsun shana wa ai lam, tsinyam masha ni tsun ai.

“August shata kaw na gaw, masha langai hpra hta Amerikan dollar 200 garum jaw na re ai, raitim nta manu 30 bai jaw ra ai,” nga nna, tsinyam langai KNG de tsun wa ai.

Ndai garum gumhpraw hpe, shata 9 sha jaw na re hpe mung matut chye lu ai.

Jinghpaw tsinyam 38 hta makaji 8 lawm ai rai nna, num kasha 2 hta lai nna, yawng gaw dinghku hte re nna, Romania mungdan hku nna, Myen mung na tsinyam ni hpe shawng n-nan hkap la ai lamang mung re.

Malaysia na Wunpawng Tsinyam Komiti (KRC) malawm langai tsun ai gaw, ya ten, Malaysia kaw, Jinghpaw ni n law htum 5,000 jan du taw sai hte, 2009 ning na KRC jahpan hku rai yang, Mungkan Tsinyam Masha Gawn Hkang Hpung (UNHCR) kawn tsinyam masat hkrum sai, Jinghpaw ni 300 daram gaw, namabat 3 mungdan ngu ai--- Amerika, Canada, Nawwe, Denmak, Swiden, Australia hte New Zealand mungdan ni de htawt sit wa sai lam chye lu ai.

Malaysia na UNHCR rung a 2010 May shata na tara shang jahpan hku rai yang, UNHCR kawn jahpan la tawn ai, tsinyam 88,100 rai nna, Myen mung na tsinyam ni gaw, 81,600 re ai hte, Jinghpaw tsinyam gaw 3,600 nga ai lam mu lu ai.

Jinghpaw mung hta, Wunpawng Mungdan Shanglawt Hpung/Hpyendap (KIO/A) hte Myen hpyen asuya lapran shaning 30 jan dinghku majan byin wa sai hte, dai aten hta, Jinghpaw amyusha ni gaw, hprawng yen na shara n nga ai sha, madung nam maling hkan makoi hkawm wa sai re.

Raitim, lai wa sai 1994 ning Myen hte KIO/A lapran gap hkat jahkring tawn ai hpang she, Jinghpaw ni, Myen mungdan a htingbu— Gala, Htai hte Malesha mungdan ni de yan le wa nna, “Kachin refugee” nga nna paw pru wa ai re.

KNG