KIO laknak n jahkrat na, ndau dat

Daini, September praw 1 ya kaw nna laknak ap hpang wa na, mung up Myen hpyen asuya a sadi jaw hkrum ai, Wunpawng Mungdan Shanglawt Hpung (KIO) gaw, laknak n ap na lam, mani ndau shabra laika langai shapraw dat sai.

August 30 ya nhtoi hte shale ai KIO ndau hta, “1947 Panglung Ga Sadi hte maren jet ai munghpawm gawde lu wa nhtawm, Myen-KIO lapran ngang grin ai simsa lam lu galaw da ai hpang e she, KIA hte kaga dap ni hpe htap htuk ai hku galai shai wa na re”, nga ai.

KIO laknak n ap lam hpe myit hkrum daw dan ai, langai lang na KIO Party Congress, Alen Bum, Laiza. Sumla: Kachin News Group

Panglung ga sadi ngu ai gaw 1947 ning February 12 ya, Sam Mung Panglung mare hta, Myen hte rau Inglik lata na shanglawt rau jawm la nna Jet ai Munghpawm hta, ahkaw ahkang maren mara hte nga pra sa wa na matu Jinghpaw, Sam, Hkang ningbaw ni gaw, Myen ningbaw Buchyuk Awng San hte, myit hkrum ta masat ga sadi tawn ai lam re.

Shawng e KIO gaw, du wa na November praw 7 ya hta galaw na hpyen asuya a ralata poi de, “n shang lawm na, n ninghkap na” ngu tsun tawn tim, ya na ndai ndau laika hta gaw, “tara rap ra ai ralata poi” rai na ra sharawng ai lam, tsun jashai tawn ai.

Bai, ndau laika hte maren, KIO a shawnglam mungmasa galai shai lam kaba langai gaw, “KIO gaw, ngang grin simsa ai Munghpawm byin tai wa na matu ra sharawng myit mada ai ni yawng hte lata gindun sa wa na” ngu ai lam, rai nga ai.

Nde a shawng, 1994 ning simsa lam la ai hpang, mungdan kata shinggan na Myen mung democracy uhpung uhpawng ni hte, simsa lam n la ai amyu bawsang rawtmalan hpung ni hte matut mahkai let amu bungli jawm galaw ai lam ni hpe, KIO tsepkaw jahkring kau sai re.

KIO gaw, “mungmasa hpe mungmasa ladat” hte hparan na yaw shada let, 2004 kawn 2007 du hkra, Myen a Mungbawng Zuphpawng (National Convention) hpe madi shadaw sai. Dai hpang, dai zuphpawng na pru wa ai Myen hpyen asuya, shi myit ra ka ai Gawda ai Tara hpe mung, 2008 ning hta madi shadaw ya sai.

Ya en, dai Gawda ai Tara hte ralata poi galaw sa wa ai hta, Myen gaw KIO hpe ralata poi n du shi yang, shawng e “KIA dap hpe Myen hpyendap npu taw ai Jarit Sin Dap (Border Guard Force)” de hkrang galai shangun nhtawm, ya hpang jahtum “Laknak ap” na bai matsun wa ai lam re.

Raitim, KIO gaw, uhpung lahkawng lapran, mungmasa shawng hparan jasan ai lam n nga ai sha, laknak ap shangun ai hpe n hkap la lu ai lam, ndau laika hta shaleng tawn sai.

Ndai laknak n ap na sha n ga, KIO a “shawnglam ninggawn mungmasa” hpe htawng madun ai ndau laika hpe August 27-29 ya laman, Laiza, Alen Bum hpyendap daju e galaw ai zuphpawng kaba, Party Congress kaw masat jahkrat dawdan ai lam re.

Matsun ai nhtoi lai tim, KIO laknak ap na ningdang nga ai rai yang, “n tara ai uhpung hku” masat ndau wa sana re lam hpe Myen Kaichyan Dap (Tsa-Ya-Hpa) lithkam, Lt-Gen Ye Myint (ya U Ye Myint) gaw August 22 ya shani, KIO de tara shang shana sai re.

KNG