BUNGLI KAW HKALA HKRUM AI JINGHPAW MA NI

Malaysia mung dan Setapark, Miwa lusha seng kawgalaw ai Jinghpaw La Kasha 2 Gas yam gapaw ai majaw hkala hkrum lai wa sai.

Setapark, Genting Kalang Lam n tsa kaw na Chong Fatt Miwa lusha seng gaw mu galaw nga ai Shd. Chyang Hpung 29 ning hte Shd. Gum San Awng 28 ning yen gaw n dai October 9 ya shani lusha seng na shatgawk kaw mu galaw nga yang Gas yam gapaw wa ai majaw hkala hkrum ai rai tim seng madu ni tsi lajang ya ai lam n nga ai hpe chye lu ai. Shan hte rau bungli galaw ai mungdan masha marai 3 mung lawm ai lam, mungdan masha ni hpe gaw hkala hkrum ai hte seng madu ni tsi rung de lawan ladan sa ya ai lam, shan hpe gaw hpa tsi lajang ya ai lam, a hkyak mung n la ai sha gabai da ai lam hpe na chye lu ai.

Manang ni kawn shan hpe tsi gawk de sa madun ai rai tim n hkap la ai sha tsirung kaba de sa na lam sha tsun wa ai, tsirung kaba de du yang mung balik dap na madi shadaw laika n lawm sa ai majaw n hkap la ai lam, manang ni kaw na balik dap de madi shadaw laika sa la yang mung hkying hkum 3 ram na yang she jaw dat ai lam na chye lu ai. Shana maga 3pm ram hta tsirung de du ai rai tim yup tung 12 ram hta she tsi tsi na a hkang lu ma ai. Jahpawt hkying 4 ram hta gaw balik ni shaga la nna bai san jep ai rai tim, seng madu ni hpe hpa ahkyak n la ya ai lam, seng madu ni kawn mung hkala ai bungli galaw masha yen hpe n chye ai nga n dang kau ai lam, balik dap de madi shadaw laika sa la ya ai manang wa Shd. La Raw hpe mung bungli kaw na shapraw kau ai lam hpe na chye lu ai.