Karai Kasang a shaman chyeju san san hte mungkan ga, a-grin nga dingsa, Jinghpaw Wunpawng Amyu, Mungdan, htung hking, laili laika nmat hkra, makawp maga lu na ahkaw ahkang hpe, July praw 4, 2010 shani hta labau shang hpaw hpang lu sai.
Moi shawng e kalang mung nlu galaw ai, amyu hte mungdan a matu akyu ara lu la na zuphpawng hpe Malaysia mungdan du wuhpung bawsang shagu na ningbaw ni hte, myu tsaw mung tsaw salang ni kawn, dai wunli lu ai shani kaw sha, Amyu Mungdan Ngang Kang Komiti ngu amying shing teng jaw let, ta tut mu gun sa wa na shabyin shatai Komiti myit su salang (4) hte Komiti salang (14), lawm let hpaw hpang wa sai. Dai shani na Amyu Mungdan Ngang Kang Komiti zuphpawng kawn, madung daw dan myit hkrum lu ai, amyu sha ni a matu, grai ahkyak dik ai lam yan kaba (3) hpe mung daw dan lu saga ai.
Dai shani shatsam da hkrum ai Shabyin Shatai Komiti kawn, ning shawng let July (14) shana hta makam masham hpung kanu kawa ni, amyu bawsang ningbaw ni hpe saw shaga let ndai magam bungli hkrang shapru galaw sa wa na lam hpe hpaji hpyi, akyu hpyi hkam la let, myit hkrum hkrumra lusha hpawng (dinner) hpe jawm sha nna, myithkrum shagrin da sai.
Singapore JLH (Jinghpaw Wunpawng Laili Laika hte Htunghkring Hpung) hte lata gindun let, ndai lam yan hpe, jawm myit hkrum galaw sa wa na matu, July (25) ya shana COBEM (Coalition of Burma Ethnic of Malaysia) Pudu Plaza kaw, Singapore JLH gawng malai, ningtau ningbaw hte amu madu ni sa du shanglawm let Singapore hte Malaysia du jinghpaw wunpawng sha ni a masat (1) lang na, amyu sha lam yan zuphpawng hpe myit su salang (80) jan shanglawm nna, labau shang galaw awng dang la lu sai. Ndai zuphpawng hta madung lam yan Kaba (3) hpe myit hkrum nna ta tut, galaw sa lu na lam hte, Amyu Mungdan Ngang Kang Komiti lit magam hpe, ta gindun hkrang shapraw galaw sa wa lu na matu, mu gun ni hpe shatsam la lu sai. Ndai Komiti ni kawn woi awn let, kanu mungdan kata kaw Jinghpaw Wunpawng amyu sha ni hpe, shaning (50) ning amyu mungdan lawt lu na matu woi awn nga ai, KIO/KIA hpe, September praw (1) hpang jahtum masat let lak nak jahkrat na matu matsun wa ai a ntsa e, mungkan mungdan (22) kaw nga ai JW sha ni hpe phone, email, gtalk, web conference hte masha hkum nan sa du bawngban ai lam ni galaw nna, mungdan (22) nga ai JW sha ni a “N-Sen” ngu ai ndau shabra laika (Statement) hpe, August (27) hta ndau shapraw lu sai. Dai ndau shabra laika hta, KIO/KIA hpe amyu mungdan shawng lam a matu lak nak n-jahkrat ai sha matut woi awn la na hte, (SPDC) Myen tai hpyen asuya a lak nak jahkrat ngu ai matsun hpe, ninghkap ai lam, shaning (50) ning rawt malan hkrun lam hpe woi awn la ai a ntsa chye ju dum ai lam hte matut nna, anhte maigan du amyu sha ni kawn galoi mung rawt malan hkrun lam a matu, masha n-gun, hpaji atsam, ja gumhpraw hte lam shagu hta dangdi lu ai daram, garum sa wa na matu mung sadi jaw dat sai re.
Ya ten hta ndai Amyu Mungdan Ngang Kang Komiti kawn woi awn let Mungdan Ngang Kang Jarik ngu ai Receipt hte Singapore, Malaysia mungdan kaw du nga ai, myu tsaw mung tsaw kanu kawa ni hpang de lawk shagu hta lit hkam ni shatsam let, kanu mungdan kata a masa hta hkan nna, mungdan hpe ya hkyak hkyak garum lu na matu, ja gumhpraw ni hpe hta shinggyin nga sai re. Ndai lam ni hta mung “Nang” “Ngai” anhte yawng a, dailup daihpang kanu mungdan nmat na matu hte amyu sha ni tut nawng ngang grin lu na matu myithkrum, mangrum jawm shakut sa wa ga ngu lajin dat ga ai. Ndai magam bungli a lachyum gaw gara mungdan mi du tim, anhte JW sha ni gaw SAI langai (One Kachin) sha re, ngu ai myit hte yawng jawm shakut sa ga.
Matut nna Mungdan Ngang Kang Komiti a shawng lam galaw sa wa na magam lit ni gaw, shata shagu “LIT” shi laika shabra ai lam, amyu shayi makawp maga ai lam, htung hkring hte laili laika sharawt ai lam, amyu sha shim lam, amyu mungdan hte seng ai lam yan ni hpe mungdan shara shagu kaw nga ai, Jinghpaw Wunpawng sha ni hte lata gindun galaw sa wa na re lam hpe mung ndau shana dat ai.
Mungdan Ngang Kang Komiti
