MATUT HTI NA »
PHONE SHA GAW SHAGA YA GA
"Nu ngai kasha jai na gumhpraw n nga sai."
"gade ram ra ai law, Nu Sha?"
"Mun masum ram shagun ya rit Nu"
"Nu mun manga shagun dat ya na yaw, hkamja lam sadi let hpaji mung grai shakut u yaw"
"deng gaw Kasha jawng sa na sai yaw, gumhpraw shagun ya na hkum malap yaw Nu"
Hpang shani ngai kaw gumhpraw Sen mi du wa ai.
Nta kaw na pru jawng lung hkawm mat ai shawng shaning;
"Nu, Awng n ta wa mayu ai."
"galoi wa na law, Nu Sha?"
"gumhpraw bai ra sai i? Wa shagun dat ya na le?"
"n ra ai Wa, Awng n ta wa mayu ai."
"E le dai hku nga yang, jawng pat ai hte wa rit, Wan leng lekmat ni tau lajang da u yaw, hkamja lam mung sadi u."
"Mai sa, Nu yen Wa"
Ngai Phone shaga ngut ai hte Nu hkrap ai lam hpang e she chye ai. Ngai n du ga ai shara, n mawn ai mare kaba hta jawng lung na matu myit hkrum lai wa sai Wa hpe Nu mara shagun lai wa ai da.
Jawng salung ai 2 ning, 3 ning, 4 ning ni hta;
"Nu Sha, phone n shaga ai na sai le, bungli ni kyin nga ai kun?"
"bungli ni nau law na phone shaga na aten n nga ai Nu"
"Na Nu, Nang hpe dum taw ai Ma Awng, n ta kaw mung na Nu chyu re, rau ai ten hta na Nu hpe phone sha gaw shaga ya u"
"mai sa Wa, n dai laman laika ni loi law taw na re, a ten lu yang shaga dat na.”
"Awng, nta galoi wa na, hkying gade na wanleng hte wan a law?" wanleng daru kaw Wa wa tau la na le"
"hkum sa tau Wa, dai ning na jawng dat Awng n ta n wa ai, manang ni kaw hkan dam na jahkrup da sai.”
"Awng ra ai shat shamai ni lajang da di na Nu nang hpe la taw ai le"
"manaw manang ni hte hkawm chyai na a hkaw a hkang nau n lu ai, Wa"
"Awng, nta wa na a ten mung nau n lu ai le, laning mi hta she 2 lang ram Nu yen Wa hte lu hkrum ai gaw”
*************************************
Dai ni manang ni hte lam mat ai majaw n ta wa ten hpang hkrat mat ai. Ngai a matu hkyen lajang da ai malu masha ni mung katsi mat ma sai. Nu Sha n lawm yang shat sha mung n mu la ai lam Nu hpaw tsun wa ai.
*****************
Magam Bungli nnan shang ten ......
"Nu e, bungli ni grai ba la ai, Awng n ta wa mayu ai"
"wa rit Nu Sha, Awng hpe sha gaw Nu yen Wa lu galaw jaw ai"
"wa rit Wa Kasha, Wa bungli naw lu galaw ai, Wa a Kasha hpe lu tam jaw ai.
Nu yen Wa a ga ni gaw nta wa mayu ai ngai hpe n ta de du hkra lagaw n dung shayawng dat ai.
*******************
Magam bungli galaw nga ai ten…..
"bungli grai law taw ai i, Nu Sha, shat gaw atsawm lu sha ai i?"
"grai kyin ai Nu, lu sha gaw byin ai hku sha sha ra ai"
"lu sha hpe gaw a tsawm sha u Nu Sha e? bungli galaw ai re majaw hkam ja lam nga ra ai, shat seng hkan na htet sha u le.”
"mai sa Nu"
*****************
Bungli rau nna nta wa yang nta shawng hkan Shan jahkraw ni, nga jahkraw mana maga lam jahkraw da ai hpe wa mu ai.
"n dai ni gaw bungli n law ai sau jahkut la na gangau dat sha re" nga Nu tsun ai.
Ngai bungli de bai sa wa yang Nu gaw myit galu galang rai kyaw da ai shat mai ni hpe palin ni hta law hkra bang dat ya ai.
*******************
Ya ten hta .......
"Nu, ngai kasha Nu hpe shaga la na matu gumhpraw mahkawng taw ai.”
"dai mungdan kaw rai ni gaw manu hpu la ai hte, Nu Kasha sha myit pyaw hkra nga u, gumhpraw ni hpe mung sharam jai lang u.”
“ Awng kaw gumhpraw nga ai le, Nu du wa yang nga na shara ni mung nga ai.”
“Awng a Wa hpe mung Nu naw kawn ra ai”
Wa, Nu hpe n lu hka ai re hpe mung ngai chye ai. Nu gaw galoi mung Wa a matu sha myit tsang ya taw nga ai.
Nu yen Wa hpang de phon shaga yang ngai tsun byin ai gaw n dai ga hkum masum mali ram sha re. Phone shaga yang n dai ga si ni sha pru wa na re hpe mugn Nu yen Wa chye chyalu re.
Kalang marang shata 1,2 nta de phone n shaga ai nga hkrup yang, Nu gaw ngai hpe hkam kaja nga ai i, shat gaw a tsawm lu sha ai i, nga ni san chye ai. Bat shagu phone shaga ai majaw Nu mung shaga na law law n nga na re ngu ngai shadu lai wa ai. Kaja wa nga yang ngai hpe shaga na matu Nu hta gasi ni grai law nga ai.
Nu yen Wa hpang de phone shaga shagu, Ngai hpe hkam kaja nga ai i? shat a tsawm lu sha ai i? bungli grai ba ai i? nga galoi mung san chye ai.
Ngai mahtang Nu yen Wa hpe hpa mung n san lai wa ai, san na mung malap ai.
Naw kaji ai ten hta Shan yen gaw Ngai a Mungkan re. Shahte n dai nga yang Ngai mung n dai sha rai lai wa ai, hpa hpe mung n ninghkap lai wa ai.
Tim dai ni na n htoi hta gaw, Ngai hpa tsun tsun Nu yen wa madat mat sai. Ngai tsun ai ga hkaw shagu jaw ai chyu rai mat sai, Shan yen gaw lani hte lani asak gawng kung wa sai. Garum shingtau na tam hpang wa sai. Shan yan a prat ting hta lu madu da ai gaw an nau ni sha rai mat sai.
Manang langai mi ngai hpe tsun ga ai;
“laning mi hta anhte nta de (5) lang lu wa ai ngu ga, Kanu Kawa ni gaw asak (100) du hkra nga lu ai rai tim anhte gaw Shan hte a asak (40) ning hpe sha dep ai, Shan hte hpe (200) lang ram sha anhte lu hkrum sai.” Kanu Kawa hte hkrum zup na ten ni lani the lani yawm mat wa sai.
Laning mi hta 6,7 lang n ta wa lu ai rai tim, wa shagu gahprup katup wa ai a ten ni law ai, Shan hte hte ga a tsawm n lu shaga ai. Du ai gade n na yang bai hkawm ra mat mat re ai. Nta hpe manam jarawp shadu ai i nga Nu myit n pyaw let tsun chye nga ai. Nu n dai hku tsun dat shangu ngai a myit hta hkam sha ai lam ni byin pru wa ai. Shan hte hte rau Ngai hpe nta kaw na na wa nga shangun mayu ma ai. N dai zawn kaji gajaw hpyi shawn ai hpe anhte ni n lu hkan shatup ya nga ga ai.
Kanu Kawa sak hkrung let naw nga ai rai yang Shan hte hpang galoi ma phone shaga ya ga, Shan hte a matu a ten loi mi jaw na hpa n yak nga ai. Tinang a sumtsaw wa hpe a ten hkying hkum mi lu jaw ai rai yang Kanu Kawa a matu minute (5) ram sha gaw lu jaw hkra di u. Laga tsun na lam ni wa n nga ai rai tim, hkam kaja nga ai i, ngwi pyaw nga ai i, sha ngut sai i, hpa ni galaw nga ai law, ngu anhte shawoi shaga ai ga ni hpe sha shaga ya ga. Anhte gaw dai ga ni hpe sha lang shagu tsun ai majaw jin taw na re, rai tim Kanu Kawa ni a matu gaw galoi mung jin ngu n nga ai. Kasha ni a n sen hpe na lu yang myit dik myit pyaw la ma ai.
Anhte a prat shawng lam ngu ai ni gaw Kanu Kawa ni hpe malap mali rai da shangun chye nga ai. Kanu Kawa ngu ai ni gaw tingkyeng myit n nga ai. Kashu Kasha ni kaw na bai lu la na re nga myit mada lam ma n nga ai. Kasha ni galu kaba kunghpan wa hkra bau maka na ngu ai gaw loi ai bungli nrai nga ai. Shan hte galaw ai lam shagu gaw Kasha ni a matu sha rai nga ai. Dai majaw a ten lu shagu Kanu Kawa hpang de Phone shaga ga. Ni nawn ai hkan nga ai ni rai yang nta wa na Kanu Kawa ni hpe wa jahkrum hkrum di ga ngu yawng hpe lajin mayu ai.
****************
Ngai Kasha chye na sai Nu, ma prat ten Ngai Kasha mani makrai ai hpe mu yang Nu myit pyaw ai, jawng lung ten hta mung Ngai Kasha a jawng n hpye hpe hpye na galoi ma n ba ai Nu, jawng na wa yang shat gahtet n tsa jum sau bun, shan jahkraw hpe gang je let Ngai Kasha san shagu sha ngut sai nga na Ngai Kasha a shat ngam hpe sha, sha ai Nu, n shung lanam galai shai nna Ngai Kasha jawng ngut yang Nu kabu myit pyaw taw ai, Ngai Kasha hta pi grau ai. Ngai Kasha hpe mara raw dat ya rit Nu, Ngai Kasha hpaji ni hkum wa yang she Nu a makau kaw n lu nga ya ai, Ngai Kasha a shawng lam hpe sha myit nna Nu yen Wa hpe malap mali rai tawn kau da ai, Ngai Kasha tsum tsan kaw na wa ai ten, kabu pyaw taw ai hpe mu di Ngai Kasha a myi prwi ni hkrat ai, Nu hpe Ngai Kasha malap da ai lam ni hpe Nu she chye yang ngu ai myit a majaw gaya myit ni Ngai Kasha kaw byin pru wa ai. Ngai Kasha chye na sai Nu.
Mut Tsawm
26/3/2011
MATUT HTI NA »
ZAI BRU HTE N LUNG
Kalang mi hta grai tsawra hku hkau ai manang lahkawng gaw dam la ai zaibru jang kaw rau sha hkrun lam hkawm taw ai. Shara mi kaw du yang shan lahkawng shada ga loi shawng shai hkat wa ai. Dai zawn shawng shai hkat wa nna manang langai mi wa gaw myit nau pawt wa ai majaw shi manang hpe shabyi bye dat ya ai. Dai shaloi shabyi bye katut ai manang wa gaw hpa n tsun ai sha zaibru jang kaw laika yan mi hpe ka dat ai. Dai gaw…
“Dai ni, Ngai hku hkau dik ai nye manang wa ngai hpe shabyi bye ya ai.”
Dai zawn rai shan lahkawn matut nna hkrum lam hpe hkawm wa ai yang shara mi hta hka nawng langai kaw du wa ai. Shan lahkawng mung dai kaw hkring nna hka shin la na matu myit hkrum daw dan wa ai. Hkan shin na ngu hka nawng de yu wa yang shabyi bye katut ai manang wa gaw hpum pup nawng de let mat ai, lawt pru na matu shakut magang hpum pup nawng kaw lup magang rai wa na jam jau taw ai. Shaloi shi manang wa gaw shi hpe hpum pup nawng kaw na shi hpe hkye shaw la ai. Dai hku rai shan lahkawng nawng hking gau n tsa kaw dung hkring sa nga yang nawng kaw lut mat ai manang wa gaw lungpa langai hta la n na dai kaw laika yan langai bai tawk ka taw ai. Dai gaw..
“ Dai ni, Ngai tsawra dik ai nye manang wa ngai a asak hpe hkye la ai.”
Dai hpe mu nna shi manang wa gaw shi hpe san dat ai,
“Ngai nang hpe shabyi bye ya ai shaloi gaw nang ngai a mying hpe zaibru n tsa kaw sha ka nna, ya nang na asak hpe hkye yang gaw nang hpa na ngai a mying hpe lungpa ntsa kaw ka a ta, dai gaw hpa baw lachyum ma…”
Shaloi lungpa hta laika ka taw ai manang wa gaw,
“marai langai ngai tinang hpe machyi hkra galaw wa yang zaibru jang kaw sha ka ra ai, dai rai yang she mara dat ya ai ngu ai bung tsin ni bung a hpawt wa yang ka da ai laika hpe a loi sha hte dai laika hpe lu shaprai kau ya nga ai. Rai tim marai langai ngai tinang a ntsa kaja ai lam ni galaw wa yang , garum shingtau la wa yang n dai zawn lungpa n tsa kaw tawk ka da ra ai, n dai hku lungpa n tsa kaw tawk ka da ai rai yang she ganing re n bung laru ni bung wa ai rai tim dai hpe n lu shaprai kau ya nga ai, shaprai kau ya na mung n loi nga ai.”
Mau mwi gaw n dai hte mi re,
Anhte marai shagu myit yu na lam gaw, anhte ni manang wa a chyeju hpe chye myit chye mang nga ai kun, chyeju dum chye nga ai kun. Anhte marai hkum shagu gaw tinang hkrai sak hkrung hkawm sa ai ni n rai nga ga ai, Makau grup yin, jinghku jingyu, manaw manang ni, u hpung u hpawng hte shanu nga ai ni chyu rai ga ai. Dai hku sak hkrung nga sa wa ai ten hta, anhte hpe n ju n dawng ai ni, anhte hpe garum shingtau ai ni law law wa hkrum ga na re. Dai zawn hkrum ga wa ai ten ni hta manang wa a mara ni hpe matsing da chye nga ai kun, mara n lu raw ya ai lam ni nga ai kun? Bai nna, anhte hpe garum shingtau ya lai wa ai ni mung law law nga na ga ai. Dai zawn hkrum wa ai ten hta manang wa ai chyeju hpe chye dum nga ai kun? Dai zawn re manang lu ai majaw a rawng la chye nga ai kun?
Manang wa a mara hpe n matsing da ai sha, raw dat ya lu hkra shakut sa wa yang anhte a prat hta tut e myit ngwi simsa lam lu na na re yawng hpe n gun jaw dat n ngai.
Mut Tsawm
19/3/200
Motivationalblog kaw na "Sand and Stone" hpe lakap nna ka da ai re.
MATUT HTI NA »
MAGAM BUNGLI GALAW YANG
Lani mi hta la kasha langai mi gat seng kata de shang wa nna rai sa mari ai.
Mari ra ai ni hpe mari la nna Phone shaga mayu ai lam seng madu kaw a hkang hpyi ai.
Seng madu gaw phone shaga sha ai seng nre majaw kalang mi sha a hkang jaw na lam tsun ai. Seng madu gaw la kasha dai phone shaga taw ai hpe a zim sha madat taw nga ai.
La sha dai gaw hpaw mi langai hte phone kaw na hkrum shaga taw ai lam hpe shi maram chye wu ai.
“Ah Tung re kun.. Ah Tung a n ta wang kaw tsin rep na bungli ngai hpe galaw shangun rit le”
Aw ra maga na bai shaga tsun wa ai gaw.. “ ngai masha laga hpe shangun kau sai.”
“Ah Tung e, ngai Ah Tung a n ta wang hpe Ah Tung myit dik hkra shatsawm ya na, manu hpe mung Ah Tung shangun ai wa a ga ang hkup sha la na ngai hpe mahtang galaw shangun rit,”
Phone kaw na bai tsun wa ai gaw, ya shi nta wang hpe tsing rep ya ai wa gaw shi myit dik hkra grai tsawm htap hkra galaw da ya sai lam bai tsun wa ai.
N dai lang la kasha dai gaw grai si mani shagrit shanem ai n sen hte bai tsun ai gaw,
“Ah Tung e, ngai Ah Tung a n ta hpe tsing mun grep ya na, n ta wang ting mung jasan shaseng ya na, n ta shawng ni yawng hkan mung san seng ya na, dai hku rai yang Ah Tung a n ta n dai lawk hta sha tsawm dik, san seng dik n ta wang byin wa hkra ngai galaw ya na, ngai hpe she bungli jaw rit le.”
Phone kaw na mung bungli n lu jaw sai lam sha tsun wa ai.
La kasha dai gaw myit dik myit pyaw ai hte Phone hpe shahkrat dat ai.
Dai la kasha wa a Phone shaga ai lam hpe n nan kaw na ngut du hkra madat taw ai seng madu gaw dai la kasha wa hpang de sit sa wa nna, “Ngai Hkri, Ah Tsa na a myit jasat hpe ra ai, na a kaja dik htum galaw ya mayu ai myit masa hpe ma shakawn ai, dai re majaw nang hpe Ah Tsa bungli langai jaw na nang gara hku myit ai law.”
Dai shaloi La Kasha dai gaw,
“Chyeju kaba sai Ah Tsa, ngai na matu bungli n ra ai. Ngai galaw dat ya ai bungli hpe bungli madu ni myit dik ai lam nga ai kun chye mayu ai majaw dinglik yu ai she re. Ngai Phone kaw hkrum shaga ai wa gaw ya ngai hpe bungli shangun ai bungli madu re.” ngu bai tsun dat ai.
Tsawra ai ramma manaw manang ni e, anhte marai hkum shagu mung magam bungli lama ma gaw galaw yu ai ni rai na re hpe kam ai, dai hku tinang magam bungli galaw ai ten hta tinang galaw ai magam bungli hpe bai n htang maram yu ai lam nga ai kun myit yu ga. Anhte ni law malawng gaw magam bungli ngut yang rai sai nga tawn kau chye ai ni hkrai rai nga ga ai. Tinang galaw lai mat wa sai magam bungli ni hpe bai n htang dinglik yu ai lam nau n nga ga ai. Tinang galaw dat ai magam bungli gaw kaja wa tang du hkra ngut kre ai kun? Tinang kaja wa myit dik ai lam lu ai kun? Tinang galaw dat ai magam bungli hpe masha wa myit dik lam lu ai kun ngu ai hpe myit sumru yu nga ga. Lahta na mabyin kaw na La Kasha zawn tinang galaw mat wa ai magam bungli hpe bai n htang maram yu ai rai yang gaw anhte galaw sa wa ai magam bungli ni gaw grau grau awng dang lam lu na re ngu shadum dat let.
Mut Tsawm
18/3/2011
MATUT HTI NA »
TSAWRA N JA
2009 ning November shata htum wa maga de Shi ngai hpang de Shi a rai ni majaw hpai rai na du wa ai ten ngai a myit hta n chye tsun hkra kabu lai wa ai. Shi a rai ni hpe hpai garum let ngai a n ta de woi wa ai. Shi a matu gawk lak san n nga ai majaw ngai yup ai gawk kaw sha Shi nga na matu shara jaw ai. Dai ten kaw na an lahkawng a prat rau sha myit rum mang rum rai gaw gap hpang wa ai
Rai shajan hpa mung n lawm sa wa ai majaw Shi ra ai rai ni hpe ngai sha, lajang jahkum ya ai. Ngai hkum nan Shi hpe nau hkrum mayu ai myit ni a majaw Shi a lam yup mang hta jahkring hkring mu taw ai ten, ya na zawn n myit mada ai sha Shi ngai kaw du wa ai majaw nye myit hta n chye tsun dan hkra kabu myit dik lam ni l u la ai. N shung ta hta du wa ai re majaw Shi alum ala rai hkra ngai shakut na galaw ya ai. Shi chyawm gaw ngai hpe hpa mung n tsun ai sha ngai galaw ya ai hpe sha myit dik let nga ai.
Kalang marang ngai bungli ni nau law na myit ru ai ten ni hta shi ngai a makau kaw nga let ngai hpe manang tai ya ai. Kalang lang masin pawt nna Shi hpe marawn jahtau hkrup ai. Shi mung kalang marang shut shai wa ai majaw ngai myit n galu nna marawn paw tai lam ni hkrum sha lai wa ai. Bungli nau ba ai nna ngai yup pyaw mat ai rai tim Shi gaw shana ting n yup ai sha ngai a makau kaw ngai hpe dung let sin taw nga ai. Kalang marang Shi hpe ngai a bungli de woi sa ai, tim law malawng Shi hkrai n ta kaw nga taw ai ten ni grau law ai.
Kalang marang shi ngai a makau kaw sha yup pyaw mat mat re ai. Law malawng gaw ngai yup pyaw mat mat re ai hpe sha yu let nye makau kaw dung taw chye ai. Ngai yup nga yang Shi a hkum sama ni hpe lu la ai.
Ngai rung pat, bungli hkring nna hkrun lam hkawm yang Shi mung ngai a hpang galoi ma hkan nang nang re ai. Laiwa sai December hta ngai Penang de woi sa ai shaloi kahtet ai dam hpe ndang hkan majaw Shi ram ram jam jau hkrum mat ai. Nta bai du wa ai shaloi Shi hkum n pyaw byin mat ai majaw ngai grai bai tsi la kau ra ai. Dai majaw hpang kalang hkrun lam woi hkawm yang grai sadi let Shi hpe woi hkawm ra sai lam ngai chye sai.
Ya dai ni ten du hkra nye makau hta aput n ngun n nga ai sha Shi hte seng ai magam bungli ni hpe galaw let galoi ma nga ai. Ngai ra mara hpe Shi dangdi dangdep ai daram hkan shatup ya let nye a makau kaw galoi ma nga ai. Shi gaw nye prat hkrun lam a matu kaja dik htum manang kaja langai hku galoi mung nye makau hta nga ya nga ai.
Ngai hte rau sha ngai a prat hkrun lam hta hkrat sum ai ten, awng dang ten ni hta ngai the rau galoi ma nga ya ai Shi gaw ngai tsawra manu shadan dik ai ngai a Bluesky Colour n sam nga ai Dell Notebook computer kasha rai nga ai. Shi gaw ngai a matu kaja dik htum manang langai hku nna ngai ra mara hpe n put n ngun n nga ai sha aa ten tup hkan galaw ya nga ai Computer langai rai nga ai.
Mut Tsawm
15/3/2011
MATUT HTI NA »
PRINTER KAJI HTE SUMLA KABA LAW DI PRINT LA GA
Dai ni gaw n hpa tsun dan na i nga yang… tsaw tsaw na Sumla hpe kaba law gaw prin mayu Printer gaw kaji sha law ai sha lu rain a yak taw nga ai ni a matu Printer kaji sha law ai hte Sumla Kaba law Print la ai ladat hpe tsun dan na yaw.
Tsawra n ja na sumla hpe kaba law di gaw print la mayu, seng de sa print yang mung gumhpraw gaw bai n kam jaw kau rai yak taw nga ma ai kun, hpa hkum tsang sa yaw… A4 size Print ai Printer hte Sumla kaba law di mai galaw la nga ai.
Printer kaji sha law ai hte sumla kaba law ai gara hku na print lu na law, n mai byin ai hkum tsun u gaw nga mayu na re… hpa hkum tsang yawng gai gai lawan she galaw yu ga..
PosteRazor software hpe lang nna print la yang aloi sha re. N dai software hte sumla gade mi kaba ba yak hkak ai lam n nga ai sha mai print shaw la ai. N tsa na sumla kaw madun da ai hte maren shawng nna na a sumla ni hpe kachyi chyi di shawng garan kau ya na ra ai. Ngut nang na a A4 size Printer hte langai hpang langai print galaw la u. Yawng print ngut sai nga yang shi shara hte shi matu la dat u. dai shaloi nang ra ai sumla kaba law ai hpe lu sai hku re.
Ndai Sofrware manu n jaw ra ai free software re. PosteRazor software hpe open source GNU License garan jaw da ai re.
N dai kaw http://sourceforge.net/projects/posterazor/ garawt la dat nga.
Grai ya gaw tsaw tsaw a Sumla Kaba law hkra print la nna myit dik hkra yu saga.
Yawng awng dang u ga.
Mut Tsawm
15/3/2011
MATUT HTI NA »
FACEBOOK SHORTCUTS
Dai ni gaw Facebook hpe sharawng shara lang nga ai manang ni a matu Facebook kaw lang ai Shortcut ni hpe tsun dan na n ngai. Chye ai ni mung gaw nga na sai, tim rai n chye ai manaw manang ni a matu rai u ga. Mouse nlang ai sha Keyboard shortcuts ni hpe chye lang mat yang Mouse lang nna lata tsu ai lam hpe lu koi kau na ra ai.
N dai kaw yu la ga.
• ALT + 0 – Help Center
• ALT + 1 – Your Homepage Facebook
• ALT + 2 – Your Profile
• ALT + 3 – Recent Friendship Requests
• ALT + 4 – Recent Messages
• ALT + 5 – Latest Notifications
• ALT + 6 – Your Account Settings
• ALT + 7 – Privacy
• ALT + 8 – Official Fan Page
• ALT + 9 – Facebook Terms/ Agreements
• ALT + m_ Compose a new Message
• ALT +? _ Search Box
Langai mi nga ai gaw tinang lang ai Browser kaw hkan nna Key ni loi mi shai mat ai hku re. Firefox nga yang gaw Shift+Alt+0 ngu Shift hpe mung dip shalawm ra nga ai. Google Chrome kaw rai yang Alt+0 dip dat sha re. Internet Explorer kaw gaw Alt+0 dip nna Enter hpe dip dat ra nga ai.
Grai grai manang ni yawng Mouse hpe hkan shachyut rim taw ra ai prat kaw na hkring la lam lu mu ga.
Mut Tsawm
14/3/2001
MATUT HTI NA »
Hand Phone A Akyu Rawng Ai Lam
Hand Phone langai a hpe masha law malawng gaw Camera , FM Radio, Alarm, MP3 music n dai ni ram sha a kyu chye jashawn ai hpe mu lu ai.
N dai lang gaw Hand Phone a akyu rawng ai lam n kau mi hpe tsun dan mayu n ngai.
1.Hand Phone langai a Keypad hpe Locked galaw da tim 112 hpe dip dat yang mai taw ai hpe mu na ra ai. N dai No gaw mungkan ting hte seng ai, mungdan shagu a ahkyak dik No rai nga ai. Nang sha Phone mai matut ai area kata kaw nga ai rai yang n dai No (112) hpe dip dat ai rai yang na Phone gaw ni dik ai Phone network hpe shi chyu tam mat na ra ai. Handphone a Key ni hpe Locked galaw da ai rai tim n dai No hpe gaw mai dip taw ai mu na ra ai. N dai No gaw ahkyak ai ten hta lang ai re.
2.Mawdaw Zaw malap da yang
Na a mawdaw hpe Contor kasha hte hpaw ai baw rai yang Na a Hand Phone gaw akyu rawng nga ai. Nang Mawdaw zaw hpe mawdaw kata kaw bang malap kau da, mawdaw zaw shajan mung n lawm sa nna jam jau taw ai rai yang, na a hand phone hte mai hpaw la nga ai. Nta kaw nga taw ai masha langai ngai hpe na a hand phone de shaga dat u. Nta na masha htan ai rai yang Na a Hand Phone hpe mawdaw hte lagaw lahkam mi ram gang ai kaw tawn u, ngut na n ta na masha hpe mawdaw zaw hpaw ai control kasha hpe shi a phone makau kaw shakap nna dip dat shangun u shaloi na a maw daw chyinghka zaw hpaw mat wa na ra ai. Dai hku rai yang nta na ni mung mawdaw zaw hpe nang nga ai shara kaw du hkra sa jaw n ra sai. Na a mawdaw zaw shajan langai mi Mile tsa lam tsan ai kaw mi nga ai rai tim n dai hku mai loi li hte mai hpaw la nga ai. Rai tim nta kaw mawdaw zaw shajan langai nga taw na gaw ahkyak ai lu yaw.
3. Battery N Gun Shajan
Na a Hand Phone battery n gun grai yawm wa sai nga yang *3370# n dai hpe dip kau dat u. Dai shaloi na a Phone kaw a hkyak yang lang na matu ngam da ai battery n gun hpe hpaw ya na ra ai. Na a Phone hta battery n gun ga ang hkup ram bai rawng taw ai hpe mu lu na ra ai. Hpang kalang lang nang Battery n gun bai bang ai shaloi shawoi na battery n gun hte a hkyak yang na matu lang ai n gun lahkawng yen hpe bai jat bang da ya na ra ai.
4.Na Phone hpe masha ni lagu la katut ai rai yang
Na Phone hpe masha ni lagu la kau ya ai rai yang, dai Phone hpe masha ni n mai lang mat hkra mai galaw nga ai. Na a Phone kaw *#06# hpe dip dat u, shaloi Na Phone a No (15) (eg. 011223344556677) dai hku pru wa na ra ai . Dai No matsing da nna zing tawn da u. N dai No gaw nang lang ai Phone a lak san No rai nga ai. Lama na Na a Phone lagu la gatut ai hte Phone Company de matut mahkai nna dai No 15 hpe jaw let dai Phone hpe pat kau shangun u. Lama na Na a Phone lagu mat wa ai gaw Sim Card hpe rai n lu shaw kau ai shaloi Phone Company de shana lu ai rai yang gaw Sim Card hpe mung Na Phone hpe mung Disable byin hkra galaw kau lu nna, Na a Phone kata kaw bang da ai a hkyak ai lam ni, ahkyak ai Phone No no hpe lu lagu la ai wa n lu chye hkra galaw kau lu nga ai.
Laman na lagut wa nang hta grau lawan ladan re wa rai yang gaw Na a Sim Card hpe sha Disable galaw kau lu nga ai. A hkyak ai langai mi gaw Na a ahkyak ai Phone No ni hpe galoi Phone kaw n bang da ai sha, na a Sim Card kaw bang da ai gaw kaja dik htum re. Phone lang ni yawng tinang a Phone ni hpe n dai hku lu makawp maka da ai rai yang, Phone lagu ai ni mung lagu la tim a kyu n rawng ai hpe chye na mat ai majaw Phone lagu ai lam ni grau grau yawm wan a re ngu myit mada ai.
Mut Tsawm
MATUT HTI NA »
iPhone Kaw Myen Font Bang La Ladat
iPhone hte ipod ni kaw zawgyi font bang ai ladat loi dik htum hpe bai tsun dan na yaw..
Shawng nnan iPhone hte iPot kaw na cydia nga ai program hpe mu na ra ai. Dai program kaw shang nna npu kaw na taskbar kaw na manage nga kaw shang dat u, ngut na sources nga kaw bai shang dat u. Ngut jang n tsa jut kaw na Edit nga kaw dip dat nna add hpe gahtap dip dat u.
Dai kaw Http:// nga pru wa na ra ai. Dai kaw http://www.cydia.macforus.com n dai hpe gayet bang nna add kaw dip dat u. Dai ngut ai hpang done kaw dip dat yang sources kaw na cydia.macforus nga ai program adder langai pru wa na ra ai, dai kaw shang dat yang zawgyi keyboard hte zawgyi font 2 shing nrai 4 pru wa na ra ai. Dai kaw na zawgyi keyboard hte zawgyi font hpe 2 hpe sha intsall galaw la u. Zawgyi font hpe shawng install galaw la u,ngut jang back kaw bai dip nna zawgyi keyboard hpe bai install galaw dat u. Ngut jang springboard galaw dat u. Grai ya gaw Zawgyi font bang ngut sai hku re. Dai ngut jang gaw lauguage kaw na ikeyboard kaw zawgyi hpe galaw la nna mai lang sai hku re.
Yawng myit pyaw awng dang lam lu la u ga.
Mut Tsawm
12/3/2011
MATUT HTI NA »
N SHUNG YUP MANG
Garu kachyi nga n sen a majaw ngai yup nga ai kaw na hprang wa ai. Makau grup yin de yu dat yang n bungli ntsa kaw du taw ai she rai nga a hka! Ngai na makau kaw gaw tsawm tsawm san ai miwa num langai, n dai n bungli gara de sa wa ai rai ngu ngai shi hpe miwa hku san dat yang shi gaw “America” de sa wa ai re nga Russia ga hku bai htan wa ai.
Dai ten “Shat Jam makai hte tsapi gawm mi” sa jahkrat ya ai hpe mu nna yu dat yang Angelina Jolie wa rai taw nga ai. Shi gaw ra ai lam nga yang tsun rit nga ngai hpe Jinghpaw ga hku naw tsun dat shi ai. Ngai mung sha na ngu sha naw galaw dat yang n bungli wa Sanghpaw Daru kaw wa hkring mat ai.
N bungli na yu ai hte America kaw na Sari lawai da ai Gala Num ni mana maka ngai hpe sa tau taw ma ai. Ngai mung mani sum sai rai yang hpe ta shakram di na shan hte hpe lai di mat wa ai. N bungli pa kaw na pru ai hte Bus Stop kaw Bus langai nga taw ai hpe mu dat ai. Ngai mung Bus ntsa lagat lung mat wa ai. Bus kaw masha nau law di lagaw jahkrat na shara pi n nga ai. Mawdaw lam mung mala la… Hpakant sa lam gaw sha naw re… Sapeya mung ram ram a lahta matse ai kaw lawm mi. Mawdaw n tsa kaw na yu dat yang Pizza seng langai hpe mu dat ai majaw kan si na Bus kaw na ganaw yu mat wa ai. Bus kaw na yu nna n dai ram chyat ai bus gaw ganing rai Bus wa rai kun ngu gayin yu dat yang Ma Hta Ta 39 wa rai taw a hka!!! Ngai ram ram wa myit htum mat ai. Myen mung kaw nga yang n dai hku n re hpe bai myit dum kau dat ai.
Lam hkawm let Pizza seng de shang wa yang seng kata kaw masha gadai mung n nga ai. Seng madu langai sha a put a ngun rai dung taw ai hpe mu dat ai. Gat dut n kaja ai lam, a hkun hkangse law ai lam, moi na America hte n bung mat sai lam, shi a kasha lahkawng hpe mung grai prat madang tsaw taw sai Myen mung de sa bungli galaw shangun na myit taw ai lam, ya hpang de gaw myen mung de sa na matu n loi mat sai lam, Agent ni mung n mai kam ai lam. America na ramma ni law law wa mung Myen mung de bungli sa galaw ma sai lam ni hpe a put a ngun nga tsun dan taw ai. Ngai mung Kawa hka na lau hku lu, shan jahkraw jap htu hpe mai rai seng madu tsun ai lam ni hpe madat ya taw ai.
Pizza seng kaw na bai pru wa yang mawdaw lam n tsa hta hpung ki (monks) ni mana maka hpe mu dat ai. Shanhte gaw ngai hpang maga lata sa wa nga ma ai, shan hte a hpang kaw NATO hpyen hpung ni mung maja wa lagat nang taw ai. Ngai mung hpa re n chye hkrit nna kyu hpyi nga yang hpyen la langai mi ngai na du krung kaw sa magra nna shaga mat wa ai. Hpang e gaw ngai hpe Obama hte jahkrum ya ai. Obama gaw Japan shiga la shara hpe lam n tsa kaw sinat hte gap sat ai nang re nga ngai hpe mara shagun ai. Ngai mung ngai n re lam tsun let balik dap na a kyang lailen kaja ai lam madi shadaw laika pa shaw madun dat yang she bai dat dat ya ai.
Ngai mung dai kaw na pru wa nna Hotel langai a shawng kaw du wa ai. Hkring sa la mayu ai majaw Hotel n tsa de lung wa ai hte wan si mat ai. Hotel na gala ni hpe san yu yang, America kaw wan hpe gahti galai (အလွည့္က်) jaw ai re lam, dai ni gaw wan laga lawk de jaw ai n htoi re lam tsun dan ai.
Ngai mung ram ram wa myit htum mat ai nna America kaw n kam nga sai majaw Myen mung de wa na matu Passport sa galaw ai. Ram ram wa ganaw kau ra ai. Jin hkra mung a la kau ra ai. Dai kaw nna myit n gun a woi ngu di na ngai mung +3 ni a show sa yu mat ai. Tingkaw Tawng gaw “ Kalang Sha” nga mahkawn hpe hkawn taw nga yang N Hpan Ja Ra gaw “ N Kam Sai” nga hpe lung mahkawn nna rawt a dup hkat bang wa ai majaw, hpang jahtum gaw Naw Hpwi Hkung Nawng si mat ai.
Ngai mung Passport rung de bai sa nna dai kaw na myit su ni hpe laika sumpu jaw dat yang ngai na Passport hpe kalang ta shaw jaw dat ma ai. Myen mung de wa sana re majaw Onsaw hpe sa shakram yang shi gaw ngai hpe a hpun chyit di da nna grai myit kaji la ai zawn hkrap taw nga ai. Ngai mung myit n kaji na lam ni tsun let Onsaw myit pyaw u ga ngu shi lata hpe jum let shi a shabyi hpe ngai a n ten hte shakap dat ai hte…………
Dung….!!!!!!!
Ngai kajawng nna hprang wa ai, yu dat yang Nyau wa Bido n tsa kaw na gum htawn hkrat wa ai she rai taw nga ai. N Shung yup mang re majaw hpa ni sha gaw mang taw ai kun.?? Aw mu le mu… N ta na Nyau hpe gaw gayet sat kau na daram pawt mayu kau ai… ganing rai nna yup mang kaja de du wa yang she…..
Mut Tsawm
11/3/2011
MATUT HTI NA »
LANGU SI HTE HKAM JA LAM
Dai ni gaw hti ga ai laika buk ni hta lakap nna loi loi hte sha lu mai ai Langu Si a lam hpe tsun dan na nngai. Hkam ja lam a matu mung, tsawm htap lam a matu mung a kyu rawng dik ai re.
Shayi sha ni manu jahpu law law jaw nna mari lang nga ai shakya rai ni malawng gaw n dai langu si hte galaw htuk shapraw da ai ni chyu rai nga ai. Langu si gaw hkum sai shan a matu akyu rawng nga ai, shayi sha ni a matu binsi mai tsi hta law malawng lang ai hpe chye lu ai. Bai nna kara hpe n gun jaw ai majaw kara kya nna madi tsawm shangun ai hte kara n dung lahkawng brang rai ga ai hpe mung makawp maka ya nga ai majaw baw hta chya ai chya hpa hkum sum hpa ni hta mung langu si hpe lang nga ma ai. Dai re majaw langu shi gaw shayi sha ni a matu kaja dik manang re ngu tsun yang n shut nga ai. Laga langu si a akyu rawng ai lam ni hpe mung naw tsun dan na nngai.
Myit hpe zim shangun ai
Tryptophan hte Amino Acid ni lawm ai majaw myit n san ai hpe lu shamai ya nga ai. Potassium law law wa rawng ai majaw salum gumhtawn ai hpe sharai ya lu nna, hkum hkrang hta ra ai hka ni hpe hkang ya lu nga ai. Masha langai myit ru ai lam hkrum wa jang hkum hkrang hta na Potassium ni mana maka yawm mat wa lu nga ai. Langu si hta Potassium ni law law wa rawng ai majaw hkrum hkrang hta ra nga ai Potassium hpe bai lu jat bang ya nga ai. Dai hta sha n ga masha a bawnu atsam hpe mung grai jat bang ya nga ai. Dai re majaw san poi shang htai na jawng ma ni langu si hpe sha da yang hti da ai laika ni hpe malap mali rai mat ai lam kaw na makawp maka ya lu nga ai.
Myi n Gun
Lani mi hta nam si myu masum hpe sha ya ai wa gaw asak kaba wa yang myi n mu wa ai lam ni hpe nau n nga ai nga nna tsi hpaji ninghkring ni tsun da nga ai. Laga, masha kaba ana ni law law wa hpe mung mai tsai shangun ya lu nga ai.
Madawn yang
Shat sha ngut shagu (jahpawt, shani, shana) langu si ya yang madawn mayu wa wa re ana hpe ma kawp maka ya lu nga ai.
Malut Hka Yawm Lu Ai
Malut hka yawm lu ai lam hpe tawn kau mayu yang langu si law law sha ya u. Langu si gaw malut hka yawm lu ai lam jahkring kau ai hta law law wa akyu jaw ya lu nga ai. Hpa majaw nga yang Vitamin B6, B12 ni lawm nna, Potassium hte Magnesium n sa lu law law rawng ai majaw Nicotine a majaw yawm mat ai lam ni hpe bai jat bang ya lu nga ai.
Ji Grawng
Ji Grawng kawa nna machyit maru rai nna gaya ai shara ni hta langu si hpyi hpe a rut ya yang mai mat lu nga ai.
Hkum Katsing Si Ai
England tsi hpaji ninghkring ni sawk shagawn tam mu da ai hta Langu si hpe sha ya ai a marang e hkum katsing si ai ana hpe makawp maka ya lu ai lam tang madun da ma ai.
Shayi Sha ni a matu
Egypt hte Roma myu sha ni gaw moi kaw nna, shanhte a tsawm htap hkra galaw ai tsi mawan ni hta langu si hpe grai manu shadan lang ai hpe mu chye lu ai. Langu si hta lawm ai Amino Acid gaw hkum shan hte kara hpe mana maka akyu jaw nga ai. Kara hpe kya tsawm shangun ai hta sha n nga Vitamin A,B,C ni rawng ai majaw kara n dung ga ai lam hpe makawp maka ya nga ai.
Langu si hpe hpyi yen kau nna kara hta arut ya u, loi na ai hpang hka hte baw mahkrut ya u Conditioner lang pi n ra ai sha kara ni htoi tu madi tsawm wa ai hpe mu lu na ra ai.
Hkum Hkrang Sap Sanap a matu
Langu si hpyi hpe sha hkum hta arut chya ya ai gaw hkum hkrang sap sanap a matu grai kaja nga ai. Myi man ni hta bansi kap yang langu si hpyi hpe arut chya ya u. Gade nna yang bansi ni mat mat na ra ai. Langu si hpe a nya la nna myi man kaw chya tawn nna minit 15 ram na yang hka jasan hte man myit kau dat u. N dai zawn galoi ma lu galaw ya yang myi man n sam ni san tsawm wa shangun nga ai. Myi man na maza ni hpe mung la kau ya lu nga ai. Ningma hkang ni hpe mung mai shangun ya nga ai. Ti Jawn (ၾကြက္ႏုိ႔) sat ai lam hta mung langu si hpe mai lang nga ai. Htaw bat si (ေထာပတ္သီး) langai, langu si langai hpe gayau anya la nna nga chyu jet jet chyaw 2 hte Vitamin E lawm ai Sau chyaw 2 bang gayau la nna myi man hte hkum hkan chya ya u. Minit 10 ram tawn da nna hka hte bai kashin kau dat u. Shaloi hkum hkrang ni grai san tsawm wa ai hpe mu lu na ra ai.
Ma ni a matu
Langu si gaw shayi sha ni a matu sha n rai Ma Kaji ni a matu mung grai akyu rawng ai nam si langai rai nga ai. Lusha ni hpe aloi sha rin mani ya lu nna, sau mung n rawng ai majaw Ma Kaji ni a matu htuk manu ai sha hpa langai rai nga ai. Langu si hte n htuk ai Ma n nga ai daram rai nga ai. Bai nna Ma ni a hkum hkrang bawng ring galu kaba ai lam hta Langu si gaw a hkyak ai shara mi kaw lawm nga ai.
Shat Kan,
Langu si gaw sha da ai malu masha ni hpe lawan ai hku rin mani ya alu ai a tsam rawng ai majaw shat kan a matu grai a kyu jaw ai sha n ga, shat kan a na a myu myu kaw na mung makawp maka ya lu nga ai. Jahpawt hpa rai n sha shi yang langu si langai sha nna hka gawm mi lu da ya yang shani ting malu masha gade sha tim hpa hkrit ra ai lam n nga ai. Tsawm mayu nna hpum na hkrit ai majaw shana shat n sha ai kanau kana ni, jahpawt hpa rai n sha shi yang langu si langai sha nna hka gawm mi lu da yang hpa hkrit tsang na lam n nga ai hte, shanat shat mung mai sha sai lam kabu mai hpa tsun dan dat lu n ngai.
Mut Tsawm
10/3/2011
MATUT HTI NA »
Tinang a Sumla hpe Mahkawn Madat let yu ga
Tsawra ai Ramma manaw manang ni e,,
N dai lang gaw tsawra ai manang ni a tsawm la ai sumla ni hpe slide show hte background yu ngwi mahkawn ni hte grai tsawm hkra galaw la ai ladat hpe tsun dan na yaw... grai yak hkak ai lam gaw n re...
Shawng nnan Ndai Kaw Na Software hpe shawng download galaw la dat u...
Download galaw la ngu yang manang wa na computer gaw Run kau dat u...
Run ngut ai hte gaw mai galaw sai hku re...
Computer kaw n dai software bang da yang gaw kam ai hku, madu ra ai hku mai galaw la sai.
Na computer na, Na a tsawm la ai sumla ni hpe mahkawn madat let Video hku mai yu sai. CD kaw burn la na TV kaw mung mai yu ai hku re...
Grai grai lawan she galaw chyam yu mu...
MATUT HTI NA »
Memory Stick gara hku gram la na
Gai gai n dai kalang gaw Memory Stick gram la ai lam hpe loi mi tsun dan na yaw..
Memory Stick hpe lang ai ni law ai zawn hten mat mat re ai mung grai law nga ai. Computer kaw n hti mat ai, hpaw dat yang Format galaw shangun wa wa re ai. Bai na File ni hpe n mai gahtap bang mat ai, Capacity hpring hkra nlu mat ai, n dai mang hkang ni law law wa byin chye nga ai. Format galaw shangun wa wa re ai, rai tim Format galaw n mai ai. Dai majaw Memory Stick gara hku gram na ngu ai hpe tsun dan dat nngai.
Tsun ga nga yang Format galaw shangun ai gaw File System n nga mat ai majaw re. Format galaw tim n mai ai gaw Partition Table kaw Corrupt byin mat ai majaw re. Dai majaw Partition Table hpe la kau nna nnan bai galaw la ra ai, ngaut nna File System bai masat la yang kaja wa nga ai. Ra ai Software ni gaw Test Disk hte Bootice n dai yen re.
Shawng nnan Test Disk hpe Run dat u, n pu kaw na zawn pru wan a ra ai.
No Log hpe Keyboard kaw na Arrow Key hte lata nna Enter dip dat u. Dai shaloi Hard Disk hte Memory Stick yan pru wan a ra ai. Memory Stick hpe lata u. Enter hpe dip u. Ngut na Partition Table type lata shangun na ra ai. Intel hpe lata nna Enter dip dat u. dai shaloi [Analyse] [Advanced] [Geometry] nga nna pru wan a ra ai. Dai kaw na [Delete] hpe lata nna Enter dip dat u. Yes/No san wa yang Yes clik nna Enter dip at u. Dai rai yang Memory Stick na Partition Table hpe yang la kau ngut sai.
N dai ram nga yang TestDisk a kata lam ngut mat sai. Ngut nna Bootice hpe Run la u. n pu kaw madun dan ai hku sha re.
Perform Format hpe dip u. gahtap nna bai pru wa yang USB-HDD mode (Single Partition) lata nna Next hpe dip u. Dialog box hkrat wa yang OK hpe dip u. Dai rai yang Format galaw mat wan a ra ai.
N dai ram nga yang manang wa a Stick hten ai bai mai lang mat sai hku re.
Awng dang lu u ga.
Download Bootice (100KB)
Download TestDisk (1.44MB)
MATUT HTI NA »
ANTIVIRUS GARAWT LA GA
Computer langai mari wa sai nga yang shawng nnan myit yu ai gaw Antivirus hpe gara baw lang ra na ngu ai re. Laptop (Notebook) mari ai ni a matu gaw seng kaw na bang dat ya ai McAfee rai rai Drweb rai rai langai ngai bang dat ya ma ai, rai tim dai ni mung shata 2, 3 rai yang htum mat chye nga ai. Dai seng kaw na bang dat ya ai Antivirus htum mat yang gara baw kaja ai, gara baw bang yang mai na nga san chye nga ga ai.
Ngai hku nna madun mayu ai gaw Microsoft security essentials re. Ram daw gaw kaja nga ai. Tim shi n dang ai Virus ni mung gaw nga ai. Ngai gaw n dai Microsoft Security Essentials hpe lang taw ai ram ram na sai, Ngai a Computer a matu tsawm ra mi Save byin ai hpe mu mada ai.
n dai kaw mai garawt la ai.
Tinang a computer 32bit hte 64bit hpe gaw ginghka na garawt la ga.
Hpang langai mi gaw AVG re. Shi ma tsawm ra mi gaw Save byin ai hpe mu mada ai. Rai tim Graphics Card n gun n law jang vz0 pi li taw chye ai. Graphics hpe chye lang nna garawt la mayu ai nga yang gaw.
n dai kaw garawt la dat u.
32bit the 64bit ginghka na garawt la u
Yawng awng dang ai lam lu la u ga,
Mut Tsawm
MATUT HTI NA »
Subscribe to:
Posts (Atom)
