MA KAJI NI MASU CHYE AI A N PAWT

Lai wa sai ten hta Australia hkrang mu sen na (TV) kaw Ma ni kaji ai ten kaw na chye masu ai lam sawk sagawn ai lamang langai galaw lai wa ai. Dai lamang hta gawk manga hta ma marai manga hpe gawk langai hpra hta bang tawn da nna shan hte n mu n chye hkra video camera ni hpe gawk shagu shakap da ai. Ma ni a shingdu hta shan hte grai ra ai baw sumla kasha ni taw da ya nna, shan hte hpe shingdu de n gayin yu na lam mung hkang da nga ai.

De hpang gawk shagu hta masha kaba langai hpra gaw dai ma ni a shingdau kaw tawn da ai sumla ni a n sen hpe hpaw dan ai. Ga shadaw gwi sumla nga yang gaw wuk wuk nga n sen shangoi ya nna, nyau sumla nga yang gaw nyawng nga n sen shapraw ya ai. Ma ni dai n sen hpe madat nna shan hte tak jaw jang sumla dai ma hpe jaw kau ai. Kalang mi gaw ma ni a shingdu kaw gorilla sumla tawn da ya nna shi a n sen hpe shangoi dan ai. Gorilla a n sen hpe gaw ma ni na ga ai lam n nga ai majaw mau mat ma ai hte mahtai n lu jaw ma ai. Ma ni dai hku mau nga yang shan hte hpe yu ai masha kaba ni gaw ma ni hpe aten minute 15 na yang bai wa san na hte shingdu de gadai mung n gayin yu na hte shan hte a myi ni hpe pat da na lam tsun let gawk kaw na le mat wa ai. Masha kaba ni pru mat wa ai gade nna yang ma ni gaw shingdu de lagu yu nna shan hte a shara hta hpa nre ai zawn myi pat na bai dung taw ma ai. Masha kaba ni bai shang wa nna mahtai lu nlu san yang ma yawng gaw Gorilla re lam mahtai jaw ma ai. Shaloi masha kaba ni shanhte hpe shingdu de lagu yu n lagu yu hkap san yang yawng gaw n lagu yu ai lam, myi hpe magap da ai majaw lata pyi grai tsu mat sai lam hpaw tsun wa ai. Marai manga kaw na ma langai mi sha lagu yu ai lam hpaw tsun hkap yin la ai hpe mu lu ai. N dai lamang hpe yu ai a marang e ma ni gaw kaji ai ten kaw na masu magaw lam hpe chye galaw wa sai lam hpe mu lu ai.

Ma ni n dai zawn chye masu wa ai lam gaw shan hte hte a ni sha nga ai kanu kawa ni kaw na shawng nnan sharin la ai re hpe kanu kawa ni gaw n dum shami nga chye nna, ma ni masu ai hpe mara sha shagun chye nga ai. Ma ni ga chye shaga wa ai ten kawn shan hte a bawnu hte matsing sumhting ai lam gaw grai nan rawt jat bawng ring wa nna, ma ni gaw shan hte hte ni htep dik htum ai, nga manga ma hkra hpe shawng nnan sharin la wa ai. Dai ten kawn shan hte hta nga ai a tsam ni hte chye myit chye maram wa sai rai nga ai. Ma ni masu magaw ai lam chye wa hkra sharin ya ai lam hte seng nna mabyin langai hpe tsun ga nga yang, lani mi hta sumtsan kaw na manam langai du wa ai, dai manam du wa yang ma gaw gara kaw na sa wa ai lam hpe hkap san ai, shaloi manam dai gaw sumsing lamu kaw na sa wa ai nga hkap tsun ai. Dai hku tsun dat ai a marang e ma gaw dai sumsing lamu nga hpe loi li hte sha hkap la na n rai nga ai. Ma bai hkap san ai gaw sumsing lamu gaw ganing re rai, gara kaw rai, gara hku sa ra ai rai nga bai hkap san wa yang dai manam wa gaw aloi ali hte n gup kaw pru wa ai hpe sha ma hpe, a hpa a tang hte tsun dan ai. Shaloi ma gaw dai manam wa tsun dan ai lam ni hpe shi a bawnu hta matsing sumhting mat sai rai nga ai. A ten ladaw ni na wa nna dai manam wa tsun dan mat wa ai lam ni gaw kaja n re hpe ma dai maram chye mat yang, ga hpe n jaw n teng, kam ai hku mai tsun shaga ai ngu ai myit jasat ni shi kaw shang mat wa ai. Dai zawn sha ma kaji ni hpe kanau kawa ni gaw lep ni, nat ni hte tsun shahkrit ai, n jaw n teng ai lam ni tsun nna asawng shayu ai, mani a hkaja ai lam hpe ahkyak n la nna hkrup mara hpe a hpa a tang tsun dan ai, n jaw n teng ai lam ni tsun ai gaw ma ni hpe masu magaw chye hkra sharin ya hpang dat ai zawn rai mat wa ai.

Manang langai mi hta asak 7 ning ram re kasha la kasha langai mi nga ai. Ma dai gaw masu magaw grai chye galaw ai. Kalang mi hta shan hte a n ta de sadam chyai yang, ma gaw muk sha mayu nna kawa kaw hpyi yang kawa gaw mut n nga sai nga masu tsun dat ai, ma gaw lama ma hpe chye mayu nna san dat yang ahpa atang hte hkrup mara nga bai htai ya ai lam ni hpe mu mada ai. Ma ngu ai gaw shan hte ra ai, chye mayu ai hta, lahta na tsun lai mat wa sai hkrang mu sen na lamang na zawn chyam mayu ai myit hpe grau hkan sa galaw chye nga ai. Muk n nga ai nga tsun tim muk tawn da ai shara hta lang dat n sa tam na re, rai tim hpang de dai shara hta muk kaja wa nga ai re chye wa ai shani, shi kawa shi hpe masu ai re hpe chye mat chyalu rai nga ai. Dai shaloi masu magaw ai ngu gaw mara n re ngu hpe shi chyena hkap la mat wa na rai nga ai.

Bai manang langai mi mung nga ai, shi gaw shi a kasha hpe ma she naw rai tim hkungga la ra ai hte a tsawm a kawm tsun shaga ai hpe mu mada ai. Ma muk ra nna hpyi yang n dai ten gaw muk sha ten nre la, sha ten rai yang jaw sha na lam, kaja ai hte n kaja ai hpe a tsawm sha tsun dan ai. Dai shaloi ma gaw masu ai lam n nga ai sha n ga, teng ai masa lam ni hpe hkap la chye wa nna, teng man ai lam ni hpe sha matut sharin hkaja la mat wa nga ai. Dai zawn sha ma kaji ni lama ma hpe chye mayu nna san ai yang, ma myit pyaw yang ngut sai ngu ai myit hte a jaw n teng ai lam ni hpe a hpa a tang hte sha n mai tsun dan nga ai. Ma ni chye na hkra myit galu ai hte a tsawm sha, ma chye mayu ai lam hpe tsun sanglang dan ra nga ai. Shaloi ma gaw shi chye mayu ai lam hpe a san sha chye la mat nna hpang de shi chye da ai ni gaw teng man ai ni rai nga ai ngu hpe mu mada wa ai shaloi kanu kawa hpe mung hkungga manu shadan wa na rai nga ai.

Australia mungdan hta gaw ma ni hpe jawng n tawn n mai rai nna, hpaji masa mung tsaw ai majaw kanu kawa ni kawn ma kaji ni hpe sharin shaga ai lam hta ningra wa ai rai tim, jawng de du yang ma ni hpe, nga sat nga sa kawn hkawt si mani tsawm htap wa hkra sharin shaga shading sharai ya lu nga ai. Anhte a mungdan hta gaw hpaji masa lam hta hkrat sum ai sha n ga, ma kaji ni yawng jawng lu lung ai lam n nga ai majaw ma ni a kyang lailen tsawm htap kaja wa lu na matu gaw kanu kawa ni hta sha madung rai nga ai. Dai re majaw kanu kawa ni yawng gaw tinang a ma ni a ntsa naw kaji nga ai ten kaw na, tsun shaga kanawn mazum ai lam hta grai a hkyak la ra nga ga ai. Kanu kawa ni nan sari sadang hte nga sa dan ai, kyang lailen kaja ni hpe sha madun ai, ma ni hpe hkungga manu shadan ai lam ni hpe naw kaji nga ai ten kaw na hkan galaw sharin ya ai rai yang anhte a kashu kasha ni mung myitsu tsawm htap ai ni tai wa nna, lani mi na ten hta Kanu kawa hpe kabu shangun ai, myu hte mungdan hpe a rawng lu shangun ai, nawku hpung a matu a kyu rawng ai ni byin tai wa lu na re ngu myit mada let.

Mut Tsawm

18/4/2011