YUP HKRU NGA AI KUN

Anhte shinggyim masha ni hta marai langai hte langai yup ra ai a ten n bung hkat nga ai. Masha n kau mi gaw lana mi hkying hkum (6) yup yang yup hkru ai rai tim, n kau mi gaw hkying hkum (8) hte lahta yup yang she yup hkru chye nga ai. Tsi hpaji ninghkring ni gaw lana ni hkying hkum (7) kaw na hkying hkum (9) du hkra yup ra ai lam hpaji jaw da nga ma ai. Yup ra kaw na myit a san a wan rai di rawt wa nna shani ting myit hkum zet tsang taw ai rai yang gaw nang hta yup ai lam hta kaja ai a kyang lai len nga ai ngu mai tsun nga ai.

Yup n hkru ai lam ni hte seng nna,

1. Hka ja ai hte matsing sumhting ai lam

Yup ai lam gaw matsing sumhting ai lam ni hpe bawnu de sa ya ai hta garum shingtau nga ai. Shana a tsawm sha yup hkring sa la ai nna, san poi shang htai, magam bungli shang na interview ni sa shang htai ai rai yang yup n hkru ai wa hta grau nna myit san ai hpe matsing sumhting ai lam ni grau byin shangun nga ai. Sharin hkaja da ai, matsing sumhting da ai lam ni law law wagaw shana ting yup hkru hkru yup ai ni a matu bawnu hta grau nna matsing sumhting ai lam hpe jaw ya nga ai.

2. Hkum Hkrang nam nak shadawn madang

A ten na na wa n yup ai sha nga yang hkum hkrang hta Carbohydrate zing sumhting ai lam hte, myit simsa ai lam hpe jahten kau ya lu ai Hormone Cortisone ni hkum hkrang hta grau law jat wa shangun ai majaw masha hpe grau nna hpum wa shangun lu nga ai. Cortisone Hormone law ai gaw kan hta sau law ai lam hte mung matut manoi rai nga ai. Yup n hkru ai rai yang shat kan si ai lam hpe ninghkap ya ai Leptin Hormone hpe shayawm kau ya nna shat kan si ai lam hpe byin shangun ai Ghrelin Hormone grau law jat wa ai majaw malu masha hpe grau sha shangun nga ai.

3. Hkrat sum ai lam

A ten galu nna yup n hkru ai hte a ten gadun yup n hkru ai lam ni gaw myit n galu ai lam ni hpe byin shagun ai, pyaw mayu ai, myit gahta ai lam ni hpe byin pru shangun nga ai. Bai nna matsing sumhting ai lam hta mung ningra shangun ai. Yup n hkru ai lam gaw hkum hkra hpe ba shangun ai, bungli galaw lu ai a tsawm ni hpe mung shayawm kau ya nga ai.

4. Hkum hkrang n gun a tsam

Aten galu n yup ai sha nga ai lam gaw hkum hkrang hpe ninghkap ya lu ai n gun a tsam ni hpe mung galai shai kau ya lu nga ai. Hkum hkrang n gun a tsam yawng hkrat mat yang aloi loi sha hte waw waw ai lam, machyi makaw hkrum wa ai, baw makret machyi ai, nga n pyaw ai lam ni hpe byin shangun nga ai.

5. Salum hte Sinwawp hkam ja lam

Aten galu nna n yup ai lam gaw saum hte sinwawp a hkam ja lam hpe gade wa dingbai dingna jaw ai lam hpe gaw hkrat n chye lu ai rai tim, yup n hkru ai lam law wa ai rai yang sai rawt wa ai lam, salum gumhtawn ai lam ni hpe shai wa shangun lu nga ai. Bai nna myit hkamja lam hpe hkra machyi shangun ai Hormone ni law wa nhtawm n dum n dam re lam ni hpe byin wa shangun nga ai. N dai lam lahkawng gaw salum ana hpe byin shangun ya lu ai madung lam ni rai nga ai.

6. Asak shinglam

Yup hkru hkru yup ai lam gaw loi li sha hkala hkrum ai lam hpe makawp maka ya lu nga ai. Yup n hkru ai lang ni law wa yang myit ni ndum n dam rai nna malap mali re ai lam ni byin wa ai majaw gataw ai lam, di hkrat ai lam, hkala hkrum ai lam, n dum shami a dawt a dat re ai lam ni hpe byin shangun nga ai. Yup n hkru na yup nga ai majaw shani shangu America mung dan hta mawdaw a dat ai lam sen mi jan nga ai lam hkawm sa hkawm wa shinglam hpung kaw na tang madun da nga ai.