ASean rapdaw gaw 2014 ning Asean ningbaw galaw lu na matu myen asuya hpe mu gin ai lu gin ai galai shai lam n-nga yang Rapdaw ningbaw tang ya yang, Asean gaw mungkan a man hta sari nlu ai hta n-ga, kaya hkrum na, Asean uhpawng kata kam hpa lam ginlut shangun na lam byin pru shangun wa na re hpe tau sawn maram yu ra nga ai majaw,myi kaba hte ntsen ai shawang myit hte yu maram nga ai Shaning grai na hkra chye nga ninglen masu taw nga ai hpe myi nmu na ntu ai zawn shari mu jin sai hpe mayun la taw nga ai.
Hpyi galai tawn ai myen asuya mung, mungkan de shadawn shadang nga hkra tengman ai hte galai shai ai lam ta tut madun dan ra nga ai,shanhte shari madun ai nau hpyau lai sai re majaw shanhte a shingran mau mwi hpe na jin sai, nkam madat lawm sai,shanhte shingna shanhte nan bai htawng mu na matu shadum nga ai ten re. Democracy tara hte bung pre ai tara masa hku bungli galaw dan hkrang shapraw madun ra sai, mung shawa yawng a lu gin ai ahkaw ahkang bawsang ni a ahkaw ahkang simsa lam, mung masa hte rim rawng tawn ai ni hpe dat na lam,kata ntsa,hpyen masa mung masa simsa lam, mung shawa a matsan grit nyem dik ai sutgan kata madang, Sut hpaga masing,Mali zup madim mang hkang,ni hpe ya hkyak hkyak lani hte lani galai shai lam madun lu yang chyu tengman ai Democracy tara hte shadawn shadang ai masa de du lu na re.
Mung shawa hpe adip arip shagyip shagyep ahkaw hkang njaw ai hpe langai hte langai lam the lam hpyen raw magang du manat ai lata hpyen raw tat magang, shanhte a du de sumri shakret gyit la magang,rai wa ai masa, ning sin kaup ai kata htinggrum kata dip up hkang ai kaw na lani hte lani san seng jet ai ning htoi de hpaw mu magang ninghtoi a san seng tsawm pra ai gaw ning sin hta grau n-gun ja ai, grau shing kang rawng ai grau manu dan ai hpe mu magang tinang nan prat a shawng de hkawm nga ai zawn nawn tim prat a ningsin kaba de htingnut ai hpe myit malai masu tim gat hkai ai hta dan la ai grau sum machyi nga sai. Tinang shangai ai kashu kasha ni ban hte ban hka ji na re hpe dum let yup pyaw lu na nrai masai.tinang galaw taw ai mang hkang langai yen salang ran magang grau law ai mang hkang pru magang, grai chye tum grai lak dum,hpaji kaba hte galaw dat ai hkrang gaw shani chyingtung bau mawng kaba dum let ngai mana kaba re ngai mana kaba re. Kaja ai masing law law hkrang shapraw magang shinghte nkaja ai law law dan dawng magang rai wa nga ai majaw kaja dwi mu ai re gaw chye tim nwam sha, nsha yang gaw n-galaw yang gaw mungkan tara jeyang ai [ICC } rap daw gaw shanhte hpe myi makrim nga sai.mungkan mungdan law law gaw wa yu kaya nga sai.
Myen gum shem hpe kam shut nna kaya kaba hkrum ai mung alang lang hkam mana sha sai majaw mungdan law law gaw nkam gwi ai ntsen ai myi kaba myit hte tau yu nga ai, Democracy tara hte bung hpre ai mung shawa asuya rai sai majaw mung shawa a nsen kaba hpe madat ra sai.mung shawa a akyu ara, ahkaw ahkang,hte gindan ai lam jaw ra sai. Dai myen a mung masa lam hpe maram yu yang mungkan mungdan de hte mare kaba de na ni hpe chyu loi hpaw dan masu ai ladat hte mungkan de htawng dang masu ai,shatsawm hkra galaw ai, maga mi de UNFC kaw lawm ai ni hpe gaw gasat nga ai. Bai Miwa ni law law ntsa tsang de up hkang nga ai UWSA hte MAILA ni hpe simsa lam la ai, (dai ni UWSA-MAI LA hpung ni gaw miwa ni law law Du galaw nga ai ) miwa dip n-gun jaw ai, miwa a myiman hpe tau ra nga ai.shanhte gaw anhte bawsang ni the masa nbung ai.
Mungkan mungdan law law hpe htawng madun ai ladat gaw anhte matu madat chyai yu chyai na sha re, myit shang sha shara n-nga ai, anhte hpe teng simsa lam la mayu yang mai galaw ai lam shadang hpring ai shanhte njaw nkam la ai gaw anhte hpe jahpyat asawng ai hpe yu nna mu gin sai,mung shawa yawng madi shadaw nna dang da ai mungdaw myen a SLg ni, shan kata na byet re hpe dum nga ga, ndai ram dudaw sai hkaw rai matsan jam jau hkam nga ai tinang myu ni a mabyin hpe n-yu ai, jahpoi ga naw tsun gwi ai tinang myu kaji kawa ni a akyu ara hpe malap nga ai. Ya shanhte galaw nga ai gaw sai garan ai ladat shi manyi ai hte yup mang zawn ga garan hkra galaw ai lam re.
Dai majaw hkangkawp lahpaw tai taw nga sai hpyi galai asuya gaw mang hkang langai yen yang mang hkang law law bai pru, langai hpaw yang law law bai pat,dung yang mung ju rawt yang mung ju, nsha gaw nmai sha nan sha ra, sha yang gaw dang, nsha yang gaw kawsi kretsi na tai,Democracy rai sai majaw tsaw nan tsaw ra, tsaw yang gaw mung shawa manat sat na tai, ntsaw yang mung gapsat hkrum na tai, jaw yang mung madu hkum nan madu gyit la ra, hkrit gaw hkrit marit gaw marit nga ai madang de du nga sai, myen asuya a mayak manghkang law law shanut yak nga ai ten annau ni lam shagu grau gasat shamyit ra sai, shi shabra ai, Media law law jai lang ra sai.
Hkrit gaw hkrit marit gaw marit rai asawng hkrum nga sai tsawp kalai asuya hpe mung shawa yawng lapawk dum na ten du nyi sai,dating ga.,mung shawa a nsen kaba gaw annau ni a teng man ai awng dang na masing kaba rai nga ai. Mung shawa akyu ara, ahkaw ahkang,shimlum makawp maga, tara rap ra ai hte rawt jat galu kaba ai, awm dawm gum rawng gum tsa mungdan grin ai de rau sha lahkam sa wa ga.
Baren Numraw
0 comments:
Post a Comment