HTAWNGSENG MANGAI

Htawngseng mangai ta bai du
Bungli katsi bung ahpawt shamu,
Mangai namta sama salu
Shing-ra maka kumla pru,
Grup-yin makau madoi yu
Numri Saiwan ka-up kahpru,
Hpundung shagu azi chyan yu
Panse Ban-gya abya pu,
Marun Hkrudu du garu
Nra shawshi mung she ngu,
Karai chyeju awlaw garu
Chyeju dum poi ladaw bai du.

Ninghkaw Gintawng Jan htoi tu
U goi yup rawt jau jau jasu,
U gawn ma ni manap hkawn pru
Lahpaw shinggyin shagreng gun lu,
Alam numsun numshe pru
Yi dung yinwa pa de du,
Yi ya hpundu jut shagu
U jahkrit myi tu dung gangu,
Wahpaw mahku pung pang gadu
Shingnawm du hkra gang shamu,
Ubyit Utsa kachyaw pyen gasu
Hkru kat kabu sumsai hkrai lu.

Machya ningtsa lung gram yu
Nsi nai mam myin gumhpu,
Shingnoi htingga nhkyau gu
Mam ka chyahtai shachyip lu,
San tsawm lamu ninghtoi du
Ga la ga sa n hprai mai lu,
Hkai kahkyin mam shu mamdum du
Yoi yi mam htu htinggaw gu,
Chyeju dum poi shara shagu
Shat kada Noihpye yawng gun lu,\
Mangai myiman shabyi chyu
Pu ba salu hkoi wai sai lu.

Tsit tsawm shagawng Wunpawng bu
Dinghku nawng rap myit pyaw lu,
Lamu hpungtang du ngoi kadu
Kabu gumlawt Pahtau garu,
Htam shi sutdek lahpa hpai lu
Myit masin hkungga she ahkyak ngu,
Madu mungga hta manoi chyu
Chyeju shakawn annau ni ( 6 ),
Sumsing Tingnyang hkuwawt hku
Shinggyim mungkan de chyan yu,
Karai kabu myiprwi pru
Bai kahtap jaw na htaning bai lu.

Bumwa Hkri Ma