JAPAN MUNG DU AMYU SHA NI (UN) DE TANG MADUN HPYI SHAWN

22.11.2011 (Bat lahkawng) ya, (3:00 pm – 4:00 pm) lapran, Tokyo mare Shibuya Mungkan Rapdaw (United Nation) rung shawng kaw, Mung Shawa Padang Hkrunlam Woi Awn Komiti myitsu ni hku nna woi awn ai hte, ni ai tsan ai shara shagu na myit rum Amyu sha ni yawng, Rudi Daidaw Buga Kanu Wunpawng Mungdan kata kaw, tengman jet ngang ai mung masha dat kasa ni woi awn masa (Democracy) mungdan hkrang lai hku n re sha, lam hpan amyu myu hku nna amyu shamyit masing kaba hte Shinggyim Ahkaw Ahkang ( Human Rights ) ladu lanang lai tawt lai let sat nat roi rip dip sha hkrum shajang nga ga ai majaw, Mungkan Rapdaw (UN) na seng ang ai Ninghpum myitsu Du Salang ni hpang de lapran tsap manghkang hparan hpaji jaw woi awn la shajang na matu,aja awa tang madun hpyi shawn n-gun madun lamang kaba hpe Karai Kasang a chyeju hte myit hkrum mang-rum lahkrip ra ra galaw awngdang la lu masai lam shiga na lu ai.

Ndai lamang garai n hpang yang, (11:00 am) kaw Wunpawng Amyu Sha Dawnghkawn hte hkyen lajang nga ai lamang ni yawng a matu, anhte a myit mada kamhpa shara, Padang lam a Madu Yehowa Karai Kasang kaw shawng ningnan kyuhpyi n-gun la hpawng shawng galaw lai mat wa masai.

Madung hku nna tang madun hpyi shawn ai lam ni gaw,
(1) Thein Sein Asuya kaw nna, Jinghpaw Wunpawng amyu sha ni hpe amyu shamyit
masing kaba hte sat nat roi rip dip sha nna, majan baw nga ai hpe ahkyak la ya na.
(2) Thein Sein Asuya kaw nna, Jinghpaw Wunpawng Amyu shayi sha ni hpe shinggyim
ahkaw ahkang tawt lai let, atik anang roi rip ai, zing-ri sat kau ai, shamat shamyit kau
ai manghkang ni hpe sawk sagawn shapraw ahkyak la ya na.
(3) Thein Sein Asuya kaw nna Mungkan Tara Upadi hte tsep kawp pat hkum da ai
Shingja laknak ( Dadu ) ( Chemical Weapons ) the Wunpawng Amyu sha ni hpe zing
ri jamjau jaw nga ai manghkang ni hpe ja ja ahkyak la pat hkum ya na.
(4) Munghpawm Mungdan kata na “ Masum brum mung masa lam yan “ ni hpe lawan
bawnban jahkrum nna byin tai awngdang wa lu hkra lapran tsap shang lawm ya na.
(5) Jinghpaw Wunpawng hpyen yen tsin-yam masha ni hpe garum madi shadaw la sha
jang na lam ni hpe aja awa tang madun hpyi shawn lai mat wa masai.

Ndai lamang hta Wunpawng Amyu sha Dawnghkawn hpe hkungga jaw ai lam, Mung Shawa Padang Hkrunlam Woi Awn Komiti ni kaw na seng ang ai myitsu ni hte Japan Mung du kaga amyu bawsang Dat Kasa ni, NLD- Japan de na Dat Kasa hte ( FWUBC) na Dat Kasa ni mung, pyaw rim rau, yak tim rau myit mang langai hte sha daini hkyak hkyak byin hkrum hkra nga ai anhte a mungdan kata na mabyin lam ni hpe myit hkrum mang-rum let mahkrun shaw jawm jawm kasat shamyit kau ra sai lam, ningmu amyu myu hku nna n-gun mi alu tsun sanglang tang madun hpyi shawn lai mat wa masai.

Sa du shang lawm n-gun madun ai pu gang sin machyi share shagan ni yawng marai ( 100 ) jan re lam chye lu ai. Ndai lamang gaw, maigan du amyu sha ni a matu sha n-ga, Mungkan Wunpawng sha ni yawng a matu n-gun la kasi kamang kaja langai mi rai sai lam, Wunpawng labau lungpa hta malap n lu mai labau hpundung kaba langai mi rai sai hpe mungkan Wunpawng amyu sha ni yawng hpe tang madun shana shabra ndau dat ga ai.

Matut nna Kanu mungdan kata kaw wa watik tik nna n mai galaw ai lamang ni hpe, maigan mungdan kaji kaba mungdan ( 22 ) kaw du shajang nga ai Jinghpaw Wunpawng amyu sha ni yawng, tinang du taw nga ai mungdan shara kaw nna dang di lu ai maga hku Myu sha lam yan hta Karai hpe ningpawt madung shatai let ( Myit hkrum yang panglai nawng pyi htawk dang lu ai ) nga ai ga malai hte maren, Mung Shawa Padang Hkrun lam de shakut shaja shamu shamawt hkawm sa wa shajang ga ngu, n-gun gang ga saw dat ga gai law.