JINGHPAW MUNG RAPDAW SALANG NI HPANG DE

Jinghpaw Mungdaw Rapdaw Asuya Hpa Galaw Da Lu Sai Kun?

Jinghpaw mungdaw hkringmang daju tai nga ai Salang Ngai Seng hte laga rapdaw salang/jan ni gaw ra lata poi shang shingjawng awng dang la lu mat wa sai laning mi hpring sai hte, mungdaw asuya rapdaw galaw wa ai mung laning mi ngu na rai sai.

Ndai mungdaw asuya rapdaw galaw nga ai ni gaw anhte mare mungshawa ni laiwa sai ra lata poi hta Me bang jaw dat ya ai majaw awngdang la lu ma ai hpe n’malap ai sha a dum nga na ma nhten!

Shanhte rapdaw salang tai wa lu na matu gaw anhte buga/mare mung shawa ni mung madi shadaw Me jawm bang jaw lawm ai hku nna arang bang lawm dat saga ai. Dai majaw anhte mung shawa ni hku nna mung rapdaw salang ni hpe hka ji na lam, akyu amyat hpyi la ra nga saga ai.

1. Nang rapdaw salang wa/jan wa ya du hkra rai yang anhte Me jawm bang jaw dat ya ai mare masha ni matu/ mare a matu hpa baw akyu ara pru lam ni gade ram wa galaw da ya lu sai kun? 


2. Ya ten e nan hte rapdaw asuya a myen hpyen hpung ni gaw nanhte Me hkan lahkawn la mat wa sai anhte Me jawm bang jaw lai wa sai mare masha ni hpe kam mara roi rip zingri, mare wan nat, hpya lu hpya sha, mu ai arung arai ni yawng htawm la kau ma, mare wan nat, nawku jawng hkan dap jung rai awu asin galaw taw nga ma ai hpe hkum pat lawm ai lam nnga, je maga lawm ai lam nnga, tsin yam masha ni hpe garum jaw ya ai lam nnga rai nga ai gaw anhte Me jaw dat ai nig aw na chying wa mau ai hte yawn madai nga ga ai.


3. A-tit anang Me bang lahkawn dang la lu ai lam gaw, mung masha dat kasa salang wa/jan wa ni a arawng aya lu na matu, shanhte a kun dinghku nta masha ni matu akyu amyat lu lam a matu, lu la da sai daru magam aya hte Me jaw bang dat ya ai mung masha ni hpe bai jahkrit sharim, aming jahkrat hkan nang galaw ya shangun na matu sha rai mat sai kun?


4. Gumsan magam Thein Sein wa woi galaw ai kaja ai, democracy rapdaw kaja ai, simsa lam galaw ra ai ngu tsun ndau shakawn tsun ai lam sha, mung masha ni a matu akyu ara galaw ya nga ai rai sai kun?

Mung masha ni matu akyu hkam sha lu na lam hpa nlu galaw ya sha jahkrit shama, dip up sha na hku nna sha rai yang anhte mung shawa a gawng malai tai ya nga ai ngu ai hpe ja ja ninghkap ra na re. Sam rapdaw mungdaw asuya, Hkang mungdaw rap daw asuya ni gaw tinang Me bang dat ya ai mung masha ni hpan tsap nna ra ai lam ni hpe tsun tang madun ya,hkung ga nga ma ai hte mai kaja lam kaji kachyaw ni hpe galaw hpang wa ya nga masai re.

Me jawm bang jaw lai wa sai kanu/kawa ni, manaw manang ni e, anhte Me bang jaw dat ya nna awngdang la lu wa sai rapdaw salang/jan ni gaw anhte Me bang jaw dat ya ai mare masha ni matu, mare a matu ya laning mi du tim hpa akyu jawm hkan sha lu ai lam nnga ai majaw, hpang lang na ra lata poi hta gaw ndai ya na rap daw dat kasa ni, mung masa pati ni hte hpung shang salang ni hpe matu nna Me jaw bang madi shadaw na hpe nmai galaw sai ngu mung chye la ra sai law.

Kahtawng Me jaw masha

Jinghpaw Mung
11.11.2011