SATAN A LIT HTE ANHTE A LIT

SATAN A LIT

Grup yin a mabyin masa hpe maram yu yang, satan wa a lit madung gaw anhte myusha ni a mahku mahkau lam hpe dumbru dumbra byin hkra shalau tawn nna, hka hkanu ai shaloi nga rim loi ai kasi hpe lang let Wunpawng Myusha ni hpe shamyit kau na ladat lang nga malu ai. Dai zawn rai galaw na matu gaw satan wa a lit nan rai nga ai hte maren shadik shatup galaw nga sai.

ANHTE A LIT

Lai wa sai ten ni hta anhte shada ninghkap hkat na matu gunglau wa lu sai. Raitimung, dai ni na ten hta anhte yawng dum hprang wa nna tinang kaw lit nga ai hte maren myusha ni a lawt lu lam hta kahkyin gumdin ai n-gun hte jawm shakut bang wa nga saga ai. Sinat gap na atsam rawng ai hpu nau ni gaw KIA hpyen hpung hte rau amyu hte mungdan a matu asak ap nawng let myusha lam yan hta shang tsap nhtawm gasat bang wa nga sai. Kade tsan ai mungdan hkan du hkawm nga ai hpu nau wa raitimung, du nga ai shara kaw nna byin mai ai mahkrun hku nna myusha lam yan hta shang lawm let garum nga masai.

WUNPAWNG MYUSHA YAWNG KYU HPYI

Dai zawn rai shakut sa wa nga ai kaw awngdang wa lu u ga matu mungkan ting kaw nga pra sa wa nga ai Wunpawng Myusha gumgai dingla mahkawn shabrang ramma ni yawng gaw shani shana hpan wa Madu Karai Kasang kaw akyu jawm hpyi nga ai nsen hpe na ya ai marang e, matsan dum la ai hpe adan apra jawm mu nga saga ai. Mungdan kata kaw mung masha ni hpe satan wa gara hku roi rip nga ai hpe chye lu na matu myutsaw hpu nau ni masa amyu myu hku shadan shadawmg sa wa nga ai ten hta KIO mung mungmasa hku nna shadan shadawng lu na matu kasa dat let mungkan zuphpawng hkan e shang lawm tang madun ai lam mung galaw nga sai.

ZUPHPAWNG KAW TANG MADUN

2011 October 29 ya kaw nna November 1 ya laman Phnom Penh kaw galaw ai Asia Pacific Region Round Table Meeting kaw mung KIO kasa sa shang lawm nhtawm myusha lam yan hte seng nna zuphpawng kaw tang madun wa sai. Tang madun ai hta:- President Thein Sein gaw 2011 March 30 ya shani Myen asuya hpe gaw-gap dat sai. Shi a mying kaja wa lu nna 2014 hta ASEAN a ningbaw tai wa lu na matu hkinjang tam nu ai. Mung masha ni, rawt malan hpung ni, maigan masha law malawng gaw ASSK hpe ra sharawng madi shadaw ai hkrai rai nga ai hpe hkinjang mu nu ai.

ASSK hpe jahkau la lu nna asuya hpe madi shadaw wa hkra galaw lu jang shi hpe ra sharawng nga ai ni yawng gaw Myen asuya hpe jawm madi shadaw wa na masai nga nna hkam la ai majaw ASSK hpe jahkau kahtep la nu ai. Htawng masha ni hpe shalawt ai. Media ni hpe ahkaw ahkang jaw ai. Myitsone dam hpe jahkring kau ai. Sinna mungdan ni hte jahkau la ai. Mung masha ni hpyi shawn ai ahkaw ahkang nkau jaw wa magang ai zawn re ai in a lam hpe ndau shabra nga ai majaw, maigan masha law malawng a ningmu hku rai yang, Thein Sein asuya gaw mungdan a matu mai kaja ai maga de woi shanang sa wa nga sai hku nna maram nga ma ai.

KIO kasa maigan zuphpawng kaw sa tang madun ai hta, Myenmung a manghkang hpe hpyen masa hku nna sang lang la lu na rai yang lai wa sai aten galu hta sang lang la mai na sai. Gasat hkat ai lahkawng maga de sum ai hta n-ga, grau sum ai gaw mungmasha ni rai nga ai. Dai majaw KIO gaw mung masa hku sang lang la lu na matu 1994 ning kaw gap hkat jahkring nhtawm asuya hte pawng nna constitution lu wa hkra jawm ka ai rai yang 2008 ning kaw ka ngut la lu sai. Wunpawng Myusha ni gaw ra lata poi kaw shang shingjawng na matu Kachin State Progressive Party (KSPP) ngu ai mungmasa party hpe hpaw shabawn la lu sai. Dai hpang Myen hpyen asuya gaw KIO hpe Border Guard Force (BGF) galaw shangun wa sai. Shanhte a uphkang ai npu kaw tsep kawp shang mat na matu rai nga ai. Wunpawng Myusha ni lu ging ai ahkaw ahkang sha nlu dingsa KIO hpe dawm kau mai na nre majaw BGF galaw shangun ai hpe n hkap la ga ai.

Mungmasha ni hpaw shabawn dat ai KSPP hpe ra lata poi kaw nshang shangun ai hta n-ga, KIO hpe laknak jahkrat na matu hpyen masa hku nna lang hte lang shadut wa masai. Lahta de tang madun wa sai hte maren Myen asuya gaw mungmasa hku nna myiman tam ai lam amyu myu galaw wa masai. Dai hta n-ga, hpyen masa hku 2011 June 9 ya shani kaw nna KIA hpyen hpung hpe 10 ya laman tsep kawp zing la na masing hte shang gasat wa ai hta lahkawng maga de sum machyi ai lam ram ram nga wa nna asuya hku nna simsa lam bawngban na matu lang hte lang mahtan wa masai. KIO kasa hku nna hkrum shaga wa sai raitimung, Myen asuya maga na kasa gaw lamu ga jarit mayan na uphkang du kaji ni sha rai nna shada manu tawn hkat na madang nre majaw hkrum bawng timung manu nnga ai hpe mu wa sai. Myen ni KIA hpe majan baw ai gaw shata 6 de shang wa sai. Lahkawng maga bai hkrum bawng na matu 2011 October 29 ya shani U Thein Zaw kaw nna KIO Ginjaw de laika hku nna matut wa ai.

Lai wa sai ten ni hta rawt malan hpung ni Myen hpyen asuya hte simsa lam hkrum bawngban wa ga ai rai yang myit hkrum lam galoi mung nlu wa yu ga ai. Madung gaw hkrum bawng ai kaw lahkawng maga a matu akyu tam ya ai lapran masha nlawm ai majaw ganing re ai ga sadi jaw hkat timung lapran kaw sakse sakgan nnga ai hta hkan nna myit hkrum lam hta ngang grin ai lam nnga yu ai. Dai ni myit hkrum hkat nna ga sadi jawm tawn ai hpe hpawt ni jang jahten wa masai. Dai majaw du na ra ai bawngban lam hta rawt malan hpung ni hpung langai hpra hte bawngban ai hpe koi yen kau nna yawng kahkyin gumdin ai n-gun hte hkam dahka lam nga na matu kam ging ai uhpung langai ngai, shing nrai mungdan langai ngai lapran kaw shang tsap ya ai ladat hte sari sadang mi a nga rai kaga mungdan hkan na ninghkap hkat ai uhpung ni bawngban wa ai ladat hte sha hkrum bawngban mai na re.

ASEAN hpung shang mungdan 10 hta na Myenmung gaw lam shagu hta hpang hkrat nga ai rai nna ASEAN rawt jat sa wa na hpe shingdu kaw nna lagaw gang shingdang nga ai majaw ASEAN a matu simsa lam nmai lu hkraw nga ai hta n-ga, mungmasa, sut masa, kahkyin gumdin lam zawn re ai kaw mung nmai rawt jat wa ai hpe mu nga ga ai.

Ndai zuphpawng kaw sa du dung nga ai ningbaw ningla ni, grau nna Cambodia mungdan na ningbaw ningla ni gaw na chying hparan la yak ai mungmasa hpyen masa manghkang hpe hparan la lu ai majaw dai ni na ten hta ngwi pyaw simsa rawt jat ai namchyim hpe hkam la lu nga masai. Dai majaw nanhte hpu ba hpu shawng ni a mahkrum madup gaw Myenmung a manghkang hpe hparan la lu na matu hpaji jaw nhtawm manu ai jut kaw nna lawu kaw tang madun tawn ai lamyi ni hpe maju jung let shang garum la na matu hpyi shawn mayu ga ai.

1. Mungdan ting hta hkam dahka lam nga ai gasat jahkring lam galaw ra na;

2. Mungmasa htawng masha yawng hpe shalawt dat ra na;

3. Shada a ntsa, mara raw ya hkat ai masat dingsat npu e, asuya, rawt malan

hpung yawng hte mungmasa hpung ni lawm ai bawngban lam hpe lapran

masha shalawm nna npawt nhpang hpe shangang shakang la ra na;

Nanhte hpu ba hpu shawng ni jawm garum lam madun la ai marang e, kade nna ai laman Myenmung simsa wa na hpe myit kam nga ga ai. Dai shaloi Myenmung masha ni mung ASEAN a rawt jat lam hta shang lawm lu nna, Myenmung masha ni gaw sari sadang nga let maigan mungdan masha ni hte maren madang hku hku hkau hkau ganawn mazum sa wa lu na ga ai,… ngu nna tang madun wa ai hpe hpu nau myit su ni mung jawm na lawm chye lawm na matu tang shana dat nngai law.

JJ Lum Dau

……………………………………………………………………………………………………………..

MATSING:- Shawa a man e tang madun ngut ai hpang shanhte gaw President Thein Sein galaw wa ai hpe jawm shakawn nga ga yang, ya she mungdan kata kaw hpa baw byin nga ai hpe na chye lu ai lam tsun wa ma ai. Matut nna azin ayang san wa ma ai hpe mungmasha ni kade roi rip hkrum nga ai lam sang lang dan ai shaloi myit tau ya let matsan dum ai lam tsun wa ma ai. Dai hpang Cambodia a armed forces Commander-in-Chief hpe laksan hkrum nna azin ayang tang madun ai lam galaw sai.