SHANGLAWT AI A MYU TAI GA

Jinghpaw Wunpawng Myusha yawng hpe lam woi awn nga ai KIO/KIA Asuya hpe na chying wa chyeju dum n-gun jaw n-ngai law, matut n-na myu sha ni yawng Awng dawm ahkaw ahkang lu hkra lam woi sha kut mat na hpe mung kam hpa ai.

Anhte Mung chying mung shawa ni mung tinang a Myusha Asyu hpe tsawra hkung ga let myit lawm hkum lawm madi shadaw nga na hpe mung kam ai.Karai Kasang anhte yawng hpe myit hkrum mang rum ai n gun atsam chyeju jaw u ga matu mung kyu hpyi dat ai.

Dai ni na Mung Hpawm Mungdan amyu baw sang mung chying masha ni hpe dai myen gum shem hpyem wa n-tara lam galaw taw nga ai hpe ninghkap kasat ai lam galaw nga ai a ntsa hpyen gum shem wa hku nna n’gun la ba hte gasat shamyit ai hpe galaw taw nga ai a ntsa Aung San Kaw hte shi a NLD hpung shang masha ni gaw hpa majaw zim rai nga ai. Ngai langai mi hku nna shadu ai lam gaw amyu baw sang ni hte seng ai ahkaw ahkang ni hpe ahkyak kaba nshatai ya ai majaw da sang nan aten garawt da ai re ngu mu mada ai.

Ya ten hta an hte Myusha ni hpe Myen hpyen shawng lam de na ni kam ai hku Roi Rip, sat nat, tinang Myu sha wuhpung kata hta n-ru n-ra byin hkat hkra sum prat dawk bang ya, shada gap sat hkat shangun na maw lanyat daw ya rai galaw taw nga ai lam ni JW kahpu kanau, mayu /dama shada sha myit htum mat shangun dai lam galaw nga ai sha rai nna mungdan hte mung chying masha ni hpe makawp maga ai lam galaw ai nre gaw dan leng nga ai.

Aung San Kaw gaw ya dai ni mung masha dap masha yawng chye hkra Myen hpyen hpung asuya hte myit hkrum ganawn mat sai re hpe mu mada nga na re, rai tim amyu baw sang ni hte seng ai mung masa ahkaw ahkang lam ni hpe ahkyak shatai jawm bawng ban ai lam nnga ai hpe yawng chye na ga ai. Ndai ram laja lana re gasat majan byin taw nga ai lam ni the seng nna Aung San Kaw wa laja lana tsun garum lawm ai baw rai nga ai le.. ya gaw shi shara lu madu magam lu wa na hpe sha she shagreng mat wa ai masa rai nga ai.

Aung San Kaw tsun ai ga hta si mani ai ladat hte ahkaw ahkang la na nga ai gaw anhte myusha ni matu grau hkrit htum ra ai mi she rai na kun...? Tinang hpe shading gap wa ai hpyen ni hpe mu chye lu nna koi yen ning hkap kau lu tim n-dai si mani mung masa gasup ai ladat gaw tsang ra hpa nmu mada lu ai hpyen langai mi bai rai wa nga sai.

Bai nna dai ni anhte myusha ni hta hpyen tsin yam ladaw wa na mat wa sai majaw hpyen ngu ai hpe pi n-kam na na re,n-kau gaw n-dai majan lawan hkoi sanu ga ngu myit makun nga ai ni ,n-kau gaw hpa majaw n-dai zawn re majang ni wa byin ai i? ngu ai ni, nkau gaw an hte myu sha ni mahtang sut ai nga ngu njaw ai hku myit la mat wa ai ni, n-kau gaw n-dai lang gaw Shang lawt lu nan lu ra ai ngu myit da ting n’gun shadat lawm nga ai ni, n-kau gaw gap jahkring kau ra sai ngu myit daw mat ai ni law law wa nga na re. Myit yu na lam gaw mung kan n-tsa hta hpa mi galaw tim arang bang ra nga ai. Anhte kam sham taw nga ai Karai kasang pi Mungkan shinggyin masha hpe hkye la na matu kasha shing tai Madu Yesu hpe asak ap nawng jaw kau ya lai wa sai du hkra arang bang kau ya nna she anhte hpe hkye hkrang la ai lam galaw lai wa sai hpe myit dum let n’gun la nga ga. Myu hte Mungdan a matu shang lawt ngu ai ahkaw ahkang, akyu amyat hpe hkam sha lu na matu gaw nang ngai myusha ni yawng arang jawm bang ai re ngu hkam la nga let matut shakut ga, Karai Kasang gaw an hte Myusha ni hpe majoi n-kabai da ai. Karai Kasang gaw aten a hkying hpe jum madu da ai wa re.

Kasang gaw shang lawt ai amyu hpe teng sha sha byin ya na re, hpa majaw ngu yang Karai Kasang gaw shang lawt ai amyu masha bin tai wa na hpe ra sharawng ai majaw re.

Myu Sha ni yawng a n-tsa Wa Karai Kasang kaw na grau htum ai Shang Lawt shaman Chyeju ni hpe hkam la shangun u ga!

Shadan Zau