HKRIT HPA

Simsa lam ngu ai teng man ai tara masing tara kaw shinggyim, ahkaw ahkang masa hte ding hpring ai mung masa ahkaw ahkang teng lu ai rai yang she simsa lam gaw lachyum nga na re hte, njaw ai ntara ai simsa lam gaw hpyen majan hta grau hkrit ra nga ai zawn masha hpe hkrung nga ninglen, si ai hte bung ai, prat a myit makru yawng daw kau ya ai, rawt jat lam yawng pat kau ya ai gaw, AIDS, ana zinli hta grau hkrit hpa re.

Jum hte sha mi rai rai, bahkang langai sha lu bu tim lu sha, lu hpun jang rai sai ngu ai, da shatawt myit jasat gaw rawt galu kaba lam hta hkra machyi dik ai, shanglawt hpe pat tawn ai myit masa kaba re, nlung hta mi rai rai, zai bru jang e mi rai rai, gara hku di yang shat hpraw lu sha na ngu ai, ntsam ai myit marai, myit jasat hte shakut ai rai yang, lam yawng teng awng dang na re. Tinang hkrai atsawm nmyit yu, n'yu nna, ahtu kataw yang, langa masha hpe mara n'nga dasang zingri sat ai, htawng bang ai, mara gata numma hte hpa nchye shi ai ma ni hpe roirip sat ai, mare nat ai, shinggyim ahkaw ahkang htum zingri ai, n'gun kaba hte majan je ai, ndai zawn re hpe asuya ngu tsun lu na kun? Gasu kabrawng hpung, mya sha, lagu sha, kashun sha, myu shamyit ai, ladat kaba hte galaw taw nga ai myen hpe asuya ngu na kun? Madu up hkang kata madu kasha ni dai zawn rai hkrum ai hpe yawng a Kanu Kawa Gumsan magam ngu tsun mai na kun? Asuya majing Gumsan magam jet ai shani she simsa lam jahta yang kaja na re.
NLD Aung San Kaw ni mung jawng ma ni a 8-8-88, ninghkap n'gun madun ai, 2007, hpungkyi ni hte mung shawa n'gun, kaba madun ai ten ni hta, NLD hte Aung San Kaw ni, makau kaw nga nna poi yu masha langai hku nga ai, 2010 ra lata poi hpe 2008 a tara masing hpe nra ai majaw hte 1990 NLD ni ra lata poi na awng dang ai hpe shawng masat ya yang she ra lata poi shang na nga ya hpa majaw, tsun tawn ai, langai mi mung grai nlu shi yang hpa majaw ya gaw ra lata shang na hkyen sai, bai anhte baw sang hte seng nna, tsin yam masha hte seng nna galoi ahkyak la tsun yu nga ta? Dai ni hpe maram yu nna dai ni hpe mung tsan tsan kaw na yu tawn da sha mai ai.
Mung masa hte seng nna sharen da ai htawng masha ni hpe ninghpai masu na, mung masa laknak hku jai lang jahkrit ai, laknak kaba shatai ai. Simsa lam ga manaw shapraw nna, mung masa, hpyen masa laknak kaba shatai, bawsang nkau mi hpe, grin ai mung masa bawngban jahkrup ai lam n'nga, hpaga lam hte shalen nna, moi na zawn, magwi shabam majap ntsa kaw dwi hpa magap tawn ai masa hku mung masa laknak kaba shatai ai hpe annau ni grai tsang maram dik ra ai. Sadi ra ai.
Hpyen yen tsit ni nga gabaw dat nna mung masa laknak shatai mayu ai, [Ma-Sa-La-prat =Na-A-Hpa prat ] ten hta shanhte dap kaw na mung shawa de mu bungli galai shatsam hkrum ai hpyen du kaba ni gaw, madu hpyen dap hpe bai ninghkap ai masha grai law wa ai mung, myen hpyen dap a, ya ten hkrit tsang nga ai lam re, dai ni hpe mara tam nna, arawng aya n'nga hkra kawng ntu hkra ladat shaw shamyit ai, maza kanu law law sha hkrum tawn sai hpun kaba hte bung nga ai myen mung a mung masa, hpyen masa gaw, kade nna yang daw na sha rai sai majaw, annau ni a masa lam yan hpe mung, dating nna loi naw sharang tawn let matut gasat yang gaw, myen a masa masing yawng gaw nsin shang hkyen sai. Galoi mung asum jaw na nre, langai sha ngam tim gasat ra na re ngu mu ai. Ma kaji ni a myiman n'sam hpe yu nna naw gasat ga.
Baren Numraw