Slideshow Image 2

(64) NING HPRING JINGHPAW MUNGDAW NHTOI, MYITKYINA

(64) Ning Hpring Jinghpaw Mungdaw Nhtoi rai nga ai 2012 ning, January (10) ya jahpawt (8:00am) tup hta, Myitkyina mare, Jinghpaw Mungdaw Asuya Rung ndaw e, Jinghpaw Mungdaw Nhtoi masat masa zuphpawng galaw lai wa sai lam chye lu ai. Asuya magam dap shagu na magam gun ni hte saw shaga da ai mungchying sha bawsang shagu na dat kasa ni yawng hpawn 1000 mi daram du zup nhtawm, Jinghpaw Mungdaw Hkringmang Daju Salang Lajawn Ngan Seng hti dan ai mungga (minit 15) hta lai nna, kaga lamang hpa mung n lawm ai. Zuphpawng hpaw hpang ai shaloi mung, ngut kre ai shaloi mung, akyu hpyi ai lam n lawm ai. Karai Kasang hpe chyeju dum ai lam n lawm ai. Nawku Hpung ningbaw ningla ni, Wa jau ni a myi man n mu lu ai. Salang Lajawn Ngan Seng a mungga hta KIA ni a majaw, mungdan n simsa hkraw ai lam hta lai nna, mungshawa nga mu nga mai lam, mungshawa shinggyim ahkaw ahkang lam hpa mung n lawm nga ai. Jut shagu laknak lang ai hpyenla ni hkrai sin makawp tawn ai kata e, tin shapun gan gawat galaw la ai lam rai nga ai. Yawng hpawn minit 20 laman hta ngut kre nhtawm, du sa ai ni yawng hpe shat kajam makai hpra hte lwidwi si langai hpra plastik hta bang nna garan jaw dat ma ai. Jinghpaw Mungdaw Nhtoi she nga tim, Rung pat nhtoi n masat ya ai hta n ga, laika sharin jawng ni mung dingyang lung nga ai hpe mu lu ai. Shatapru Manau Wang de chyawm gaw katsi katsang rai nga ai.


1 comments:

Anonymous said...

jinghpaw nhtoi hpe ndai hku galaw ai gaw jaw dik rai sai. hpa majaw nga yang jinghpaw mung nhtoi gaw makam masham hpung ni hte n'seng ai. myu sha ni hte she seng ang ai. myu sha yawng hta karai kasang ngu nga ai.hpung hte hpung hkam la ai hkrang sha shai ai. na karai kasang, ni karai kasang jaw ai ngu tsun n'mai ai baw re. jinghpaw mung n'htoi gaw nawku hpawng n're. jinghpaw mung nga myu sha yawng wu wu di di shagrau shaa ai baw re. dai ni jinghpaw wunpawng myu sha ni gahkyin hkumdin yak ai gaw makam masham hte woi ginhka ai majaw re.j.w. myu sha ni dai ni makam masham hpung, htunghkying hpung hte myu sha hpung ni hpe n'chye ginhka ai majaw shawn lam de grau na yak wa na ra ai law. ka dai mi gara makam masham hpe hkam la ai raitim jahtum gaw nang jinghpaw jinghpaw wunpawn myu sha sha re. J.W. hpu nau ni e she myit yu ga law.

Post a Comment